ಸಚಿವ ವಿನಯ್ ಕುಲಕರ್ಣಿ ಹತ್ಯೆಗೆ ಸುಪಾರಿ!

-ಧಾರವಾಡಕ್ಕೆ ಬಂದಿದ್ದಾರಂತೆ ಶಾರ್ಪ್ ಶೂಟರ್ಸ್!

ಧಾರವಾಡ: ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಸಚಿವ ವಿನಯ್ ಕುಲಕುರ್ಣಿ ಕೊಲೆಗೆ ವಿದೇಶದಲ್ಲಿ ತಲೆಮರೆಸಿಕೊಂಡಿರುವ ರಾಜ್ಯದ ಭೂಗತ ರೌಡಿಯೊಬ್ಬನಿಗೆ ಸುಪಾರಿ ಕೊಡಲಾಗಿದೆ ಎನ್ನುವ ಮಾಹಿತಿ ಬಂದಿದೆ. ಈ ಹಿನ್ನೆಲೆಯಲ್ಲಿ ಎಚ್ಚರಿಕೆಯಿಂದ ಇರುವಂತೆ ಪೊಲೀಸ್ ಇಲಾಖೆಯಿಂದ ಸಚಿವರಿಗೆ ಸೂಚನೆ ನೀಡಲಾಗಿದೆ.

ಖಚಿತ ಮೂಲಗಳ ಮಾಹಿತಿ ಆಧರಿಸಿ ಹಿರಿಯ ಪೊಲೀಸ್ ಅಧಿಕಾರಿಗಳು ಸೋಮವಾರ ಬೆಳಗ್ಗೆ ಈ ವಿಷಯವನ್ನು ಸಿಎಂ ಗಮನಕ್ಕೂ ತಂದಿದ್ದಾರೆ. ಈ ಬಗ್ಗೆ ಸೂಕ್ತ ಕ್ರಮಕ್ಕೆ ತೆಗೆದುಕೊಳ್ಳುವಂತೆ ಸಿಎಂ ಸೂಚಿಸಿದ್ದಾರೆ. ಇದರ ಬೆನ್ನಲ್ಲೇ ವಿದೇಶದಲ್ಲಿದ್ದುಕೊಂಡು ರಾಜ್ಯದಲ್ಲಿ ಚಟುವಟಿಕೆ ನಡೆಸುತ್ತಿರುವ ಇಬ್ಬರು ರೌಡಿಗಳ ಅಪರಾಧ ಚರಿತ್ರೆಯನ್ನ ಇಂಟರ್ ಪೋಲ್‍ಗೆ ರವಾನಿಸಿ ಅವರ ಬಂಧನಕ್ಕೆ ಪೂರಕವಾಗಿ ತಾಂತ್ರಿಕ ಕಾರ್ಯಾಚರಣೆ ನಡೆಸಲು ಡಿವೈಎಸ್‍ಪಿ ಮಟ್ಟದ ಅಧಿಕಾರಿಗೆ ಜವಾಬ್ದಾರಿ ನೀಡಲಾಗಿದೆ.

1 ಕೋಟಿ ರೂ.ಗೆ ಡೀಲ್: ಒಂದು ಕೋಟಿ ರೂ. ಸುಪಾರಿ ಹಣ 2 ಕಂತುಗಳಲ್ಲಿ ಹವಾಲಾ ಮಾರ್ಗವಾಗಿ ಥೈಲ್ಯಾಂಡ್‍ನಲ್ಲಿರುವ ಭೂಗತ ರೌಡಿಯ ಕೈ ಸೇರಿದೆ ಎನ್ನುವ ಬಗ್ಗೆ ಪೊಲೀಸರಿಗೆ ಮಾಹಿತಿ ಸಿಕ್ಕಿದೆ. ಶಿವಮೊಗ್ಗದಿಂದ ಬಂದು ಬೆಂಗಳೂರಿನಲ್ಲಿ ಹೆಸರು ಮಾಡಿ ಸದ್ಯ ಥೈಲ್ಯಾಂಡ್‍ನಲ್ಲಿ ತಲೆ ಮರೆಸಿಕೊಂಡಿದ್ದಾನೆ ಆ ಭೂಗತ ಪಾತಕಿಗೆ 30 ಲಕ್ಷ, 70 ಲಕ್ಷ 2 ಹಂತಗಳಲ್ಲಿ ಸುಪಾರಿ ನೀಡಲಾಗಿದೆ ಎನ್ನಲಾಗಿದೆ.

ಮುಂಬೈ ಮತ್ತು ಪುಣೆ ಮೂಲದ ಶಾರ್ಪ್ ಶೂಟರ್ಸ್ ಗೆ ಈ ಸುಪಾರಿ ನೀಡಲಾಗಿದೆ ಅಂತ ಹೇಳಲಾಗಿದ್ದು, ಅವರಲ್ಲಿ ಒಂದಿಬ್ಬರು ಧಾರವಾಡಕ್ಕೂ ಬಂದಿರುವ ಬಗ್ಗೆ ಚರ್ಚೆ ನಡೆಸಲಾಗುತ್ತಿದೆ. ಇದೀಗ ಬೆಂಗಳೂರು, ಧಾರವಾಡದಲ್ಲಿ ಪೊಲೀಸರು ಹೈ ಅಲರ್ಟ್ ಆಗಿದ್ದಾರೆ.