ಕಚ್ಚಾ ತೈಲ ಬೆಲೆಗಳು ಭಾರತಕ್ಕೆ ಪೆಟ್ಟು ಕೊಟ್ಟಿದ್ಹೇಗೆ? ದೇಶ ಎದುರಿಸುತ್ತಿರೋ ಬಿಕ್ಕಟ್ಟುಗಳೇನು?

ಅಮೆರಿಕ, ಇಸ್ರೇಲ್ ಮತ್ತು ಇರಾನ್ (US-Iran War) ನಡುವಿನ ಯುದ್ಧ ಕೇವಲ ಮಧ್ಯಪ್ರಾಚ್ಯದ ಮೇಲಷ್ಟೇ ಪರಿಣಾಮ ಬೀರಿಲ್ಲ. ಭಾರತ (India) ಸೇರಿದಂತೆ ಅನೇಕ ರಾಷ್ಟ್ರಗಳ ಮೇಲೆ ಯುದ್ಧದ ಬಿಸಿ ತಟ್ಟಿದೆ. ಯುದ್ಧ ಹೀಗೆಯೇ ಮುಂದುವರಿದರೆ ಭಾರತದ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸಲಿದೆ. ಸಂಘರ್ಷದಿಂದಾಗಿ ಕಚ್ಚಾ ತೈಲ (Crude Oil) ಬೆಲೆ ಏರಿಕೆಯಾಗಿದೆ. ಇದರಿಂದ ಭಾರತದಲ್ಲಿ ಪೆಟ್ರೋಲ್, ಡೀಸೆಲ್ (Petrol-Diesel) ಬೆಲೆ ಏರಿಕೆ ಕಂಡಿದೆ. ಇದು ಹಲವು ವಲಯಗಳ ಮೇಲೆ ಪರಿಣಾಮ ಬೀರಿದೆ. ಮುಂದೇನಾಗಬಹುದೆಂಬ ಆತಂಕ ಭಾರತೀಯರಲ್ಲಿ ಇಮ್ಮಡಿಗೊಂಡಿದೆ. ಯುಎಸ್-ಅಮೆರಿಕ ಯುದ್ಧದಿಂದ ಭಾರತೀಯರ ಮನೆಯ ಖರ್ಚು ವೆಚ್ಚಗಳ ಹೆಚ್ಚಳಕ್ಕೆ ನಾಂದಿ ಹಾಡಿದೆ. ಪೆಟ್ರೋಲ್ ಬಂಕ್‌ಗಳು ಬಂದ್ ಆಗುತ್ತಿವೆ. ದೈನಂದಿನ ಖರ್ಚು ವೆಚ್ಚಗಳು ದುಬಾರಿಯಾಗುತ್ತಿವೆ. ಹಾಗಾದ್ರೆ, ಯುದ್ಧ ಮತ್ತು ಹಾರ್ಮುಜ್ ಜಲಸಂಧಿ ಮಾರ್ಗ ಬಂದ್ ಭಾರತದ ಮೇಲೆ ಏನೇನು ಪರಿಣಾಮ ಬೀರಿದೆ ಎಂಬ ಬಗ್ಗೆ ಇಲ್ಲಿ ವಿವರಿಸಲಾಗಿದೆ.

ಕಚ್ಚಾ ತೈಲ ಬ್ಯಾರಲ್‌ಗೆ 111 ಡಾಲರ್‌ಗೆ ಏರಿಕೆ
ಫೆಬ್ರವರಿ 28 ರಂದು ಆರಂಭವಾದ ಯುದ್ಧ ಇನ್ನೂ ಮುಂದುವರಿದೆ. ಯುದ್ಧದ ಪರಿಣಾಮ ಹಾರ್ಮುಜ್ ಜಲಸಂಧಿ ಬಂದ್ ಆಗಿದ್ದು, ಕಚ್ಚಾ ತೈಲ ಪೂರೈಕೆಯಲ್ಲಿ ಸಮಸ್ಯೆಯಾಗಿದೆ. ಇಂಧನ ಪೂರೈಕೆಯಲ್ಲಿ ತೀವ್ರ ಕುಸಿತ ಕಂಡುಬಂದಿರುವುದರಿಂದ, ತೈಲ ಬೆಲೆಗಳು ಪ್ರತಿ ಬ್ಯಾರೆಲ್‌ಗೆ 100 ಡಾಲರ್ ಗಡಿಯನ್ನು ದಾಟಿವೆ. ಸಂಘರ್ಷ ಪ್ರಾರಂಭವಾಗುವ ಮೊದಲು ತೈಲ ಬೆಲೆ ಬ್ಯಾರಲ್‌ಗೆ ಸುಮಾರು 70 ಡಾಲರ್‌ನಷ್ಟಿತ್ತು. ಬ್ರೆಂಟ್ ಕಚ್ಚಾ ತೈಲವು ಪ್ರತಿ ಬ್ಯಾರೆಲ್‌ಗೆ 111 ಡಾಲರ್‌ಗಿಂತ ಹೆಚ್ಚಿದ್ದು, ಈಗ ಇಂಧನ ಬೆಲೆಗಳು, ಮಾರುಕಟ್ಟೆಗಳು, ಕರೆನ್ಸಿಗಳು ಮತ್ತು ವ್ಯಾಪಾರ ವಲಯದ ಮೇಲೆ ಪೆಟ್ಟು ಕೊಟ್ಟಿದೆ. ಇದನ್ನೂ ಓದಿ: Explainer| ಒಂದೇ ಒಂದು ಪೋಸ್ಟ್‌, ಸಾವಿರಾರು ಕೋಟಿ ಲಾಭ – ಬಿರುಗಾಳಿ ಎಬ್ಬಿಸಿದ ಟ್ರಂಪ್ ಟ್ರೇಡಿಂಗ್ ಆಟ

ಭಾರತದಲ್ಲಿ ಪೆಟ್ರೋಲ್, ಡೀಸೆಲ್ ಬೆಲೆ ಗಗನಕ್ಕೆ
ದೇಶದಲ್ಲಿ ಇಂಧನ ಬೆಲೆ ಏರಿಕೆಯಾಗುತ್ತಿದೆ. ಈಗಾಗಲೇ ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ದರ ಎರಡು ಬಾರಿ ಏರಿಕೆ ಕಂಡಿದೆ. ಒಮ್ಮೆ 3 ರೂಪಾಯಿ, ಎರಡನೇ ಬಾರಿಗೆ 90 ಪೈಸೆ, ಮೂರನೇ ಸಲಕ್ಕೆ 87 ಪೈಸೆ ಹೆಚ್ಚಳವಾಗಿದೆ. ಆರಂಭದಲ್ಲಿ ಜಾಗತಿಕ ತೈಲ ಬೆಲೆಯಲ್ಲಿ ಉಂಟಾದ ಆಘಾತದ ಹೊರತಾಗಿಯೂ, ಭಾರತವು ಇಲ್ಲಿಯವರೆಗೆ ಹಲವಾರು ವಾರಗಳವರೆಗೆ ಇಂಧನ ಬೆಲೆಗಳನ್ನು ಯಾವುದೇ ಬದಲಾವಣೆ ಮಾಡದೆ ಇಟ್ಟುಕೊಂಡಿತ್ತು. ಆದರೆ, ಈಗ ಪರಿಸ್ಥಿತಿ ಬಿಗಡಾಯಿಸುತ್ತಿದೆ. ಬೆಲೆ ಹೆಚ್ಚಳ ಅನಿವಾರ್ಯ ಎಂಬಂತಾಗಿದೆ. ಭಾರತದ ಸರ್ಕಾರಿ ಸ್ವಾಮ್ಯದ ಸಂಸ್ಕರಣಾಗಾರಗಳು 10 ದಿನಗಳ ಅವಧಿಯಲ್ಲಿ ಮೂರನೇ ಬಾರಿಗೆ ಇಂಧನ ಬೆಲೆಗಳನ್ನು ಹೆಚ್ಚಿಸಿವೆ. ಹೆಚ್ಚುತ್ತಿರುವ ಕಚ್ಚಾ ತೈಲ ಬೆಲೆಗಳಿಂದ ಉಂಟಾಗುವ ಒತ್ತಡವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಬೆಲೆ ಹೆಚ್ಚಿಸಲಾಗಿದೆ. ಕಚ್ಚಾ ತೈಲದ ಏರಿಕೆಗೆ ಹೋಲಿಸಿದರೆ ಇದು ಬಹಳ ಕಡಿಮೆಯೇ. ಈ ಕ್ರಮವು ಸರ್ಕಾರವು ಹಣದುಬ್ಬರ ಮತ್ತು ಹಣಕಾಸಿನ ಒತ್ತಡಗಳನ್ನು ಸಮತೋಲನಗೊಳಿಸಲು ಪ್ರಯತ್ನಿಸುತ್ತಿದೆ ಎಂಬುದನ್ನು ಪ್ರತಿಬಿಂಬಿಸುತ್ತದೆ.

ಚಿನ್ನ, ಬೆಳ್ಳಿ ಸುಂಕಗಳು
ಪ್ರಧಾನಿ ನರೇಂದ್ರ ಮೋದಿಯವರು ಒಂದು ವರ್ಷ ಚಿನ್ನ ಖರೀದಿಯಿಂದ ದೂರ ಇರುವಂತೆ ಕರೆ ನೀಡಿದ್ದಾರೆ. ಸರ್ಕಾರವು ತನ್ನ ಕರೆನ್ಸಿಯನ್ನು ರಕ್ಷಿಸಿಕೊಳ್ಳಲು ಚಿನ್ನ ಮತ್ತು ಬೆಳ್ಳಿಯ ಮೇಲಿನ ಆಮದು ಸುಂಕವನ್ನು ಶೇಕಡಾ 6 ರಿಂದ ಸುಮಾರು 15 ಕ್ಕೆ ದ್ವಿಗುಣಗೊಳಿಸಿದೆ. ರೂಪಾಯಿ ಮೌಲ್ಯ ಸಾರ್ವಕಾಲಿಕ ಕನಿಷ್ಠ ಮಟ್ಟಕ್ಕೆ ಕುಸಿದ ನಂತರ ವಿಶ್ವದ ಎರಡನೇ ಅತಿದೊಡ್ಡ ಬುಲಿಯನ್ ಮಾರುಕಟ್ಟೆಯು ಬೆಳ್ಳಿ ಆಮದು ನಿಯಮಗಳನ್ನು ಬಿಗಿಗೊಳಿಸಿದೆ. ಬೆಳ್ಳಿ ಬಾರ್‌ಗಳ ಆಮದನ್ನು ಈಗ ನಿರ್ಬಂಧಿಸಲಾಗಿದೆ. ವಿದೇಶಿ ವ್ಯಾಪಾರ ನಿರ್ದೇಶನಾಲಯದಿಂದ ಪರವಾನಗಿ ಪಡೆದ ಸಾಗಣೆಗಳನ್ನು ಮಾತ್ರ ದೇಶಕ್ಕೆ ತರಬಹುದು.

ರೂಪಾಯಿ ಮೌಲ್ಯ ಕುಸಿತ
ಆಮದು ವೆಚ್ಚಗಳು ಹೆಚ್ಚುತ್ತಿವೆ. ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿಯುತ್ತಿದೆ. ಕಚ್ಚಾ ತೈಲದ ಬೆಲೆ ಏರಿಕೆಯಿಂದಾಗಿ ಭಾರತದ ತೈಲ ಆಮದು ವೆಚ್ಚ ವೇಗವಾಗಿ ಏರಿಕೆಯಾಗುತ್ತಿದೆ. ಈ ಆಮದುಗಳನ್ನು ಅಮೆರಿಕನ್ ಡಾಲರ್‌ಗಳಲ್ಲಿ ಪಾವತಿಸಲಾಗುವುದರಿಂದ, ಬೇಡಿಕೆಯಲ್ಲಿನ ಏರಿಕೆಯು ಭಾರತೀಯ ರೂಪಾಯಿಯನ್ನು ದುರ್ಬಲಗೊಳಿಸುತ್ತದೆ. ಯುಎಸ್‌ ಡಾಲರ್‌ ವಿರುದ್ಧ ರೂಪಾಯಿ ಮೌಲ್ಯ 95.70ಕ್ಕೆ ಕುಸಿದಿದೆ. ಈ ವರ್ಷ ಕರೆನ್ಸಿ ಸುಮಾರು 5.5% ರಷ್ಟು ಕುಸಿದಿದೆ. ಕರೆನ್ಸಿ-ಮಾರುಕಟ್ಟೆ ಒತ್ತಡಗಳು ಹೆಚ್ಚಾಗಲು ಮತ್ತು ಸ್ಥಳೀಯ ಷೇರುಗಳಿಂದ ದಾಖಲೆಯ ವಿದೇಶಿ ಹೊರಹರಿವು ಉಂಟಾಗಲು ಕಾರಣವಾಗುತ್ತದೆ. ಭಾರತ ತನ್ನ ಇಂಧನ ಅಗತ್ಯಗಳನ್ನು ಪೂರೈಸಲು ತೈಲ ಆಮದಿನ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಆದರೆ, ಹೆಚ್ಚಿನ ತೈಲ ಬೆಲೆಯು ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿತಕ್ಕೆ ಕಾರಣವಾಗಿದೆ. ಇದನ್ನೂ ಓದಿ: ಬೇರೆ ರಾಷ್ಟ್ರಗಳಿಗೆ ಹೋಲಿಸಿದ್ರೆ ಭಾರತದಲ್ಲೇ ಅತ್ಯಂತ ಕಡಿಮೆ ದರ ಏರಿಕೆ – ಪೆಟ್ರೋಲ್‌, ಡೀಸೆಲ್‌ ಬೆಲೆ ಹೆಚ್ಚಳಕ್ಕೆ ಕೇಂದ್ರ ಸಮರ್ಥನೆ

ಹಣದುಬ್ಬರ ಹೆಚ್ಚಳ
ಕಚ್ಚಾ ತೈಲದ ಬೆಲೆ ಏರಿಕೆ ಮತ್ತು ಇತ್ತೀಚೆಗೆ ದೇಶೀಯ ಚಿಲ್ಲರೆ ಇಂಧನ ಬೆಲೆ ಏರಿಕೆಯಾಗಿರುವುದರಿಂದ ಭಾರತದ ಸಗಟು ಬೆಲೆ ಸೂಚ್ಯಂಕ (WPI) ಹಣದುಬ್ಬರವು 42 ತಿಂಗಳ ಗರಿಷ್ಠ ಮಟ್ಟವಾದ 8.30% ಕ್ಕೆ ತಲುಪಿದೆ. ಪಶ್ಚಿಮ ಏಷ್ಯಾ ಸಂಘರ್ಷವು ಜಾಗತಿಕ ತೈಲ ಬೆಲೆಗಳನ್ನು ಮತ್ತಷ್ಟು ಹೆಚ್ಚಿಸುವ ಬೆದರಿಕೆಯನ್ನು ಒಡ್ಡುತ್ತಿದೆ. ಇದು ಭಾರತದ ಆರ್ಥಿಕತೆಯ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಹೆಚ್ಚಿನ ಸಾರಿಗೆ ಮತ್ತು ಉತ್ಪಾದನಾ ವೆಚ್ಚಗಳು ದೇಶದ ಆರ್ಥಿಕತೆಗೆ ಪೆಟ್ಟು ಕೊಟ್ಟಿದೆ. ಅಗತ್ಯ ಸರಕುಗಳು ಮತ್ತು ಸೇವೆಗಳ ಬೆಲೆಗಳನ್ನು ಹೆಚ್ಚಿಸುತ್ತಿವೆ. ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಅಂದಾಜಿನ ಪ್ರಕಾರ, ಪ್ರತಿ ಬ್ಯಾರೆಲ್‌ಗೆ ತೈಲದ ಹೆಚ್ಚಳವು ಹಣದುಬ್ಬರವನ್ನು 40 ಬೇಸಿಸ್ ಪಾಯಿಂಟ್‌ಗಳವರೆಗೆ ಹೆಚ್ಚಿಸಬಹುದು. ಡೀಸೆಲ್ ಭಾರತದ ಲಾಜಿಸ್ಟಿಕ್ಸ್, ಕೃಷಿ ಮತ್ತು ಉತ್ಪಾದನೆಗೆ ಶಕ್ತಿ ತುಂಬುವ ಇಂಧನವಾಗಿದೆ. ಈಗ ಇಂಧನ ವೆಚ್ಚದಲ್ಲಿ ಏರಿಕೆಯಾಗಿರುವುದು ಗ್ರಾಹಕ ಸರಕುಗಳ ಬೆಲೆಗಳ ಮೇಲೆ ತಕ್ಷಣದ ಪರಿಣಾಮ ಉಂಟು ಮಾಡುತ್ತದೆ. ಜಾಗತಿಕ ತೈಲ ಬೆಲೆಗಳಲ್ಲಿ ಪ್ರತಿ 10% ಹೆಚ್ಚಳವಾದರೆ, ಅದು ಭಾರತದ ಗ್ರಾಹಕ ಬೆಲೆ ಸೂಚ್ಯಂಕ (CPI) ಹಣದುಬ್ಬರಕ್ಕೆ ನೇರವಾಗಿ ಸರಿಸುಮಾರು 0.3% ಸೇರಿಸಬಹುದು ಎಂದು ಆರ್ಥಿಕ ತಜ್ಞರು ಅಂದಾಜಿಸಿದ್ದಾರೆ.

ಆರ್ಥಿಕ ಕುಸಿತ
ಆಮದು ವೆಚ್ಚಗಳಲ್ಲಿನ ಏರಿಕೆ ಮತ್ತು ಹೆಚ್ಚುತ್ತಿರುವ ಹಣದುಬ್ಬರವು ಚಾಲ್ತಿ ಖಾತೆ ಕೊರತೆಯನ್ನು (CAD) ಹೆಚ್ಚಿಸಬಹುದು. ಆಮದು ಹಣದುಬ್ಬರದ ಪರಿಣಾಮವನ್ನು ಎದುರಿಸಲು, ಕೇಂದ್ರ ಬ್ಯಾಂಕ್ ಬಿಗಿಯಾದ ಬಡ್ಡಿದರ ಕ್ರಮಗಳನ್ನು ಜಾರಿಗೊಳಿಸುವ ಸಾಧ್ಯತೆ ಇರುತ್ತದೆ. ಕಚ್ಚಾ ತೈಲದ ಬೆಲೆ ಏರಿಕೆಯು ಐತಿಹಾಸಿಕವಾಗಿ ಭಾರತದ ಜಿಡಿಪಿ ಬೆಳವಣಿಗೆಗೆ ಹಾನಿಕಾರಕವಾಗಿದೆ. ಇದಕ್ಕೆ ವಿರುದ್ಧವಾಗಿ, ಕಡಿಮೆ ಬೆಲೆಗಳು ವೇಗವಾಗಿ ಆರ್ಥಿಕ ವಿಸ್ತರಣೆಗೆ ಬೆಂಬಲ ನೀಡಿವೆ.

ಖಾದ್ಯ ತೈಲ ಬೆಲೆ ಏರಿಕೆ
ಕಚ್ಚಾ ತೈಲ ಮಾರುಕಟ್ಟೆಗಳಲ್ಲಿ ಭೌಗೋಳಿಕ ರಾಜಕೀಯ ಆಘಾತವಾಗಿ ಪ್ರಾರಂಭವಾದದ್ದು, ನಿಧಾನವಾಗಿ ಭಾರತೀಯ ಅಡುಗೆಮನೆಗಳಿಗೂ ಹರಡುತ್ತಿದೆ. ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಮನೆಯ ಬಜೆಟ್‌ಗಳನ್ನು ಒತ್ತಡಕ್ಕೆ ಒಳಪಡಿಸುತ್ತಿವೆ. ಖಾದ್ಯ ತೈಲವು ಅನೇಕ ಕುಟುಂಬಗಳು ನಿರೀಕ್ಷಿಸಿದ್ದಕ್ಕಿಂತ ವೇಗವಾಗಿ ಮಾಸಿಕ ಆದಾಯವನ್ನು ಕಬಳಿಸುತ್ತಿದೆ. ಇತ್ತೀಚಿನ ಹಣದುಬ್ಬರದ ದತ್ತಾಂಶವು ಕಳೆದ ನಾಲ್ಕು ತಿಂಗಳಲ್ಲಿ ಸಂಸ್ಕರಿಸಿದ ಖಾದ್ಯ ತೈಲ ಹಣದುಬ್ಬರವು ದ್ವಿಗುಣಗೊಂಡಿದೆ ಎಂದು ತೋರಿಸುತ್ತದೆ. ಖಾದ್ಯ ಎಣ್ಣೆಯನ್ನು ಅನೇಕ ಪ್ಯಾಕ್ ಮಾಡಿದ ತಿಂಡಿಗಳು, ಬೇಕರಿ ವಸ್ತುಗಳು, ತಿನ್ನಲು ಸಿದ್ಧ ಆಹಾರಗಳು ಮತ್ತು ದಿನನಿತ್ಯ ಬಳಸುವ ಉತ್ಪನ್ನಗಳಲ್ಲಿ ಬಳಸಲಾಗುತ್ತದೆ. ಆದ್ದರಿಂದ ಬೆಲೆ ಏರಿಕೆಯ ಎಫೆಕ್ಟ್ ಇವುಗಳ ಮೇಲೂ ಬೀಳುತ್ತಿದೆ.

ದಲಾಲ್ ಸ್ಟ್ರೀಟ್‌ನಲ್ಲಿ ರಕ್ತಪಾತ
ಕಳೆದ ಕೆಲವು ತಿಂಗಳುಗಳಿಂದ ಹೂಡಿಕೆದಾರರ ಸಂಪತ್ತು ತೀವ್ರವಾಗಿ ಕುಸಿದಿದ್ದು, ಫೆಬ್ರವರಿ 28 ರಿಂದ ಒಟ್ಟು 5,85,751.13 ಕೋಟಿ ರೂ.ಗೂ ಹೆಚ್ಚು ನಷ್ಟವಾಗಿದೆ. ಮಾರ್ಚ್‌ನಲ್ಲಿ ಹೂಡಿಕೆದಾರರು ಸುಮಾರು 51.7 ಲಕ್ಷ ಕೋಟಿ ರೂ. ನಷ್ಟ ಅನುಭವಿಸಿದ್ದರು. ಬಿಎಸ್‌ಇ-ಪಟ್ಟಿ ಮಾಡಿದ ಕಂಪನಿಗಳ ಮಾರುಕಟ್ಟೆ ಬಂಡವಾಳೀಕರಣವು 46,325,200.41 ಕೋಟಿಯಿಂದ (ಫೆಬ್ರವರಿ 27 ರ ಅಂತ್ಯ) 41,241,172.45 ಕೋಟಿ ವರೆಗೆ (ಮಾರ್ಚ್ 30 ರ ಅಂತ್ಯ) ಕುಸಿದಿದೆ. ಇದು ಒಟ್ಟಾರೆ ಮಾರುಕಟ್ಟೆ ಮೌಲ್ಯದಲ್ಲಿ ತೀವ್ರ ಕುಸಿತಕ್ಕೆ ಕಾರಣವಾಗುತ್ತದೆ. ಪ್ರಸ್ತುತ ಮಾರುಕಟ್ಟೆ ಬಂಡವಾಳೀಕರಣವು ಈಗ ಸರಿಸುಮಾರು 4.3 ಟ್ರಿಲಿಯನ್ ಡಾಲರ್‌ ಆಗಿದೆ. ಮಧ್ಯಪ್ರಾಚ್ಯ ಸಂಘರ್ಷ ಪ್ರಾರಂಭವಾದ ನಂತರ ಮಾರುಕಟ್ಟೆಗಳು ಒತ್ತಡದಲ್ಲಿವೆ. ಕಚ್ಚಾ ತೈಲ ಬೆಲೆಗಳ ಏರಿಕೆ ಮತ್ತು ದುರ್ಬಲ ಜಾಗತಿಕ ಸೂಚನೆಗಳಿಂದಾಗಿ ತೀವ್ರ ಕುಸಿತ ಕಂಡುಬಂದಿದೆ. ಇವೆರಡೂ ಹೂಡಿಕೆದಾರರ ಭಾವನೆಯ ಮೇಲೆ ಭಾರಿ ಪರಿಣಾಮ ಬೀರಿವೆ. ಇದನ್ನೂ ಓದಿ: ವಾಹನ ಸವಾರರಿಗೆ ಮತ್ತೆ ಶಾಕ್; ಪೆಟ್ರೋಲ್ 87, ಡೀಸೆಲ್ 91 ಪೈಸೆ ಏರಿಕೆ

ಮಾರಾಟ ಮುಂದುವರಿಸಿದ ಎಫ್‌ಐಐಗಳು
ವಿದೇಶಿ ಹೂಡಿಕೆದಾರರು ಭಾರತೀಯ ಷೇರುಗಳಿಂದ ಹಣವನ್ನು ಹಿಂತೆಗೆದುಕೊಳ್ಳುತ್ತಿದ್ದಾರೆ. ಈ ತಿಂಗಳು ಇಲ್ಲಿಯವರೆಗೆ 30,000 ಕೋಟಿಗೂ ಹೆಚ್ಚು ಮೌಲ್ಯದ ಭಾರತೀಯ ಷೇರುಗಳನ್ನು ಮಾರಾಟ ಮಾಡಿದ್ದರಿಂದ ಹೊರಹರಿವು 2.22 ಲಕ್ಷ ಕೋಟಿಗೆ ತಲುಪಿದೆ. ಬದಲಾಗುತ್ತಿರುವ ಸ್ಥೂಲ ಆರ್ಥಿಕ ಪರಿಸ್ಥಿತಿಗಳು ಮತ್ತು ಭೌಗೋಳಿಕ ರಾಜಕೀಯ ಅನಿಶ್ಚಿತತೆಯಿಂದಾಗಿ ಜಾಗತಿಕ ಮನಸ್ಥಿತಿಯನ್ನು ಮಾರಾಟದ ಭರಾಟೆ ಪ್ರತಿಬಿಂಬಿಸುತ್ತದೆ. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (FIIs) 2026 ರಲ್ಲಿ 2.22 ಲಕ್ಷ ಕೋಟಿ ಮೌಲ್ಯದ ದೇಶೀಯ ಷೇರುಗಳನ್ನು ಆಫ್‌ಲೋಡ್ ಮಾಡಿದ್ದಾರೆ. ಇದುವರೆಗಿನ ಮೂರನೇ ಸತತ ತಿಂಗಳಿನಲ್ಲಿ ನಿವ್ವಳ ಮಾರಾಟಗಾರರಾಗಿ ಉಳಿದಿದ್ದಾರೆ. ಈ ತಿಂಗಳಿನಲ್ಲಿ ಇಲ್ಲಿಯವರೆಗೆ ಅವರು 30,374 ಕೋಟಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ಶುಕ್ರವಾರ, ಎಫ್‌ಐಐಗಳು ದೇಶೀಯ ಷೇರುಗಳನ್ನು 4,440.47 ಕೋಟಿ ರೂ.ಗೆ ಮಾರಾಟ ಮಾಡಿದರೆ, ದೇಶೀಯ ಸಾಂಸ್ಥಿಕ ಹೂಡಿಕೆದಾರರು (ಡಿಐಐಗಳು) 6,003.53 ಕೋಟಿ ರೂ.ಗೆ ನಿವ್ವಳ ಖರೀದಿದಾರರಾಗಿದ್ದರು. 2025 ರಲ್ಲಿ 1.66 ಲಕ್ಷ ಕೋಟಿಯನ್ನು ಹಿಂತೆಗೆದುಕೊಳ್ಳಲಾಗಿತ್ತು. ಫೆಬ್ರವರಿಯಲ್ಲಿ ಎಫ್‌ಪಿಐಗಳು ನಿವ್ವಳ ಖರೀದಿದಾರರಾಗಿ ಒಮ್ಮೆ ಮಾತ್ರ ಬದಲಾಗಿದ್ದಾರೆ. ಜನವರಿಯಲ್ಲಿ ಅವರು 35,962 ಕೋಟಿ ರೂ.ಗಳನ್ನು ಮಾರಾಟ ಮಾಡಿದರು. ಫೆಬ್ರವರಿಯಲ್ಲಿ 22,615 ಕೋಟಿ ರೂ. ಒಳಹರಿವು ಕಂಡುಬಂದಿದ್ದು, 17 ತಿಂಗಳಲ್ಲಿ ಅತಿ ಹೆಚ್ಚು ಮಾಸಿಕ ಹೂಡಿಕೆಯಾಗಿದೆ. ಆದರೆ, ಆ ಆಶಾವಾದ ಹೆಚ್ಚು ಕಾಲ ಉಳಿಯಲಿಲ್ಲ. ಮಾರ್ಚ್‌ನಲ್ಲಿ 1.17 ಲಕ್ಷ ಕೋಟಿ ರೂ.ಗಳ ದಾಖಲೆಯ ಹೊರಹರಿವು ಮತ್ತು ಏಪ್ರಿಲ್‌ನಲ್ಲಿ 60,847 ಕೋಟಿ ರೂ.ಗಳ ಹರಿವು ಕಂಡುಬಂದಿದೆ. ಮೇ ತಿಂಗಳು ಕೂಡ ಅದೇ ಹಾದಿಯಲ್ಲಿದೆ.

ಭಾರತಕ್ಕೆ ಒಂದು ಗುಡ್‌ ನ್ಯೂಸ್‌
ಕಚ್ಚಾ ತೈಲ ಬೆಲೆ ಏರಿಕೆ, ದಲಾಲ್‌ ಸ್ಟ್ರೀಟ್‌ ರಕ್ತಪಾತ, ರೂಪಾಯಿ ಮೌಲ್ಯ ಕುಸಿತ, ಹಣದುಬ್ಬರ ಮೊದಲಾದ ಹೊಡೆತಗಳಿಂದ ತತ್ತರಿಸಿರುವ ಭಾರತಕ್ಕೆ ಸಿಹಿ ಸುದ್ದಿ ಒಂದಿದೆ. ವೆಚ್ಚದ ಒತ್ತಡಗಳ ಹೊರತಾಗಿಯೂ, 2026 ರ ಖಾರಿಫ್ ಋತುವಿಗೆ ರಸಗೊಬ್ಬರ ಲಭ್ಯತೆಯು ಆರಾಮದಾಯಕವಾಗಿಯೇ ಉಳಿದಿದೆ. ಒಟ್ಟು ಅವಶ್ಯಕತೆಯಾದ 390 ಲಕ್ಷ ಟನ್‌ಗಳಲ್ಲಿ 51% ಕ್ಕಿಂತ ಹೆಚ್ಚಿನ ದಾಸ್ತಾನು ಇದೆ. ವೈವಿಧ್ಯಮಯ ಆಮದು ಮೂಲಗಳ ಮೂಲಕ ಅಂತರವನ್ನು ಸರಿದೂಗಿಸಲಾಗುತ್ತಿದೆ. ರಸಗೊಬ್ಬರ ದಾಸ್ತಾನು ಪ್ರಸ್ತುತ 200.9 ಲಕ್ಷ ಟನ್‌ಗಳಷ್ಟಿದೆ. ದೇಶೀಯ ಉತ್ಪಾದನೆಯು ದಿನಕ್ಕೆ ಸುಮಾರು 80,000 ಟನ್‌ಗಳಷ್ಟಿದೆ. ಮಧ್ಯಪ್ರಾಚ್ಯ ಬಿಕ್ಕಟ್ಟಿನ ಆರಂಭದಿಂದಲೂ, ಉತ್ಪಾದನೆಯು 86.2 ಲಕ್ಷ ಟನ್‌ಗಳನ್ನು ತಲುಪಿದೆ. ಇದು ಕಳೆದ ವರ್ಷ ಇದೇ ಅವಧಿಯಲ್ಲಿ ದಾಖಲಾದ 93 ಲಕ್ಷ ಟನ್‌ಗಳಿಗಿಂತ ಸ್ವಲ್ಪ ಕಡಿಮೆಯಾಗಿದೆ. ಆದರೆ ಪೂರೈಕೆ ಮಾರ್ಗಗಳನ್ನು ಕ್ರಿಯಾತ್ಮಕವಾಗಿಡಲು ಇನ್ನೂ ಸಾಕಷ್ಟು ಸ್ಥಿರವಾಗಿದೆ.