ಕೋಲ್ಕತ್ತಾ: ಯುವಕನೊಬ್ಬನಿಗೆ ಐಎಎಸ್ ಅಧಿಕಾರಿಯೊಬ್ಬರು ಇತರ ಪೊಲೀಸರ ಎದುರೇ ಮನಬಂದಂತೆ ಥಳಿಸಿದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಈ ಸಂಬಂಧ ಇದೀಗ ಅಧಿಕಾರಿಯನ್ನು ರಜೆಯ ಮೇಲೆ ಕಳುಹಿಸಲಾಗಿದೆ.
ನಿಖಿಲ್ ನಿರ್ಮಲ್, ಪಶ್ಚಿಮ ಬಂಗಾಳದ ಐಎಎಸ್ ಅಧಿಕಾರಿಯಾಗಿದ್ದಾರೆ. ಸದ್ಯ ಇವರನ್ನು ಜನವರಿ 16ರ ವರೆಗೆ ಸರ್ಕಾರಿ ರಜೆಯ ಮೇಲೆ ಕಳುಹಿಸಲಾಗಿದೆ. ಹೀಗಾಗಿ ನಿಖಿಲ್ ಜಾಗಕ್ಕೆ ಚಿರಂಜಿಬ್ ಘೋಷ್ ಎಂಬವರನ್ನು ನೇಮಿಸಲಾಗಿದೆ. ಥಳಿತಕ್ಕೊಳಗಾದ ಯುವಕನನ್ನು ವಿನೋದ್ ಸರ್ಕಾರ್ ಎಂದು ಗುರುತಿಸಲಾಗಿದೆ.
ವೈರಲ್ ಆದ ವಿಡಿಯೋದಲ್ಲೇನಿದೆ..?
ನಿರ್ಮಲ್ ಹಾಗೂ ಅವರ ಪತ್ನಿ ಸ್ಥಳೀಯ ಯುವಕನೊಬ್ಬನಿಗೆ ಫಲಕಟ ಪೊಲೀಸ್ ಠಾಣೆಯ ಒಳಗಡೆ ಚೆನ್ನಾಗಿ ಥಳಿಸಿದ್ದಾರೆ. ಇದೇ ವೇಳೆ ಇನ್ಸ್ ಪೆಕ್ಟರ್ ಸೌಮ್ಯಜಿತ್ ರೇ ಕೂಡ ಅಲ್ಲೇ ಇದ್ದರು.
ಥಳಿಸಿದ್ದು ಯಾಕೆ..?
ಯುವಕನೊಬ್ಬ ನಿರ್ಮಲ್ ಪತ್ನಿಯ ಫೇಸ್ ಬುಕ್ ಪ್ರೊಫೈಲ್ ಫೋಟೋಗೆ ಅಶ್ಲೀಲ ಕಮೆಂಟ್ ಮಾಡಿದ್ದಾನೆ. ಕೂಡಲೇ ಆ ಯುವಕನ್ನು ಗುರುತಿಸಿ ಠಾಣೆಗೆ ಬರುವಂತೆ ಸೂಚಿಸಲಾಯಿತು. ಹೀಗೆ ಬಂದ ಯುವಕನಿಗೆ, ಹಿರಿಯ ಇನ್ಸ್ ಪೆಕ್ಟರ್ ಎದುರೇ ಐಎಎಸ್ ಅಧಿಕಾರಿ ಹಾಗೂ ಪತ್ನಿ ಹಿಗ್ಗಾಮುಗ್ಗಾ ಥಳಿಸಿದ್ದಾರೆ.
ಅಚ್ಚರಿಯ ವಿಚಾರವೆಂದರೆ, ನನ್ನ ಜಿಲ್ಲೆಯಲ್ಲಿ ನನ್ನ ವಿರುದ್ಧ ಯಾವುದೇ ಕೆಲಸವನ್ನು ಮಾಡಲು ನಾನು ಬಿಡಲ್ಲ. ನಿನ್ನ ಮನೆಗೆ ಬಂದು ನಿನ್ನನ್ನು ಕೊಲ್ಲುತ್ತೇನೆ ಎಂದು ಯುವಕನಿಗೆ ಬೆದರಿಕೆ ಹಾಕುತ್ತಲೇ ಪತಿ, ಪತ್ನಿ ಇಬ್ಬರೂ ಮನಬಂದಂತೆ ಥಳಿಸಿದ್ದಾರೆ. ಇದೇ ವೇಳೆ ಪತ್ನಿ ಕೂಡ, ನಿನ್ನ ಇಂತಹ ನೀಚ ಕಮೆಂಟ್ ಮಾಡುವ ಹಿಂದೆ ಯಾರಿದ್ದಾರೆ ಹೇಳು ಎಂದು ಪ್ರಶ್ನಿಸಿ ಗದರಿಸಿದ್ದಾರೆ.
ಪತಿ ಹಾಗೂ ಪತ್ನಿಯ ಥಳಿತದಿಂದ ಬೇಸತ್ತ ಯುವಕ ಹೊಡೆಯದಂತೆ ಪರಿಪರಿಯಾಗಿ ಬೇಡಿಕೊಂಡಿದ್ದಾನೆ. ಮಾತ್ರವಲ್ಲದೇ ಅಧಿಕಾರಿಯ ಕಾಲಿಗೆ ಬಿದ್ದು, ತಪ್ಪಾಯ್ತು ಅಂತ ಕ್ಷಮೆ ಕೇಳಿದ್ದಾನೆ. ಆದ್ರೂ ಬಿಡದೇ ಅಧಿಕಾರಿ ಥಳಿಸಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ.
ಪ್ರಕರಣ ಸಂಬಂಧ ಅಧಿಕಾರಿಯಾಗಲಿ ಆಥವಾ ಅವರ ಪತ್ನಿಯಾಗಲಿ ಯಾವುದೇ ದೂರುಗಳನ್ನು ದಾಖಲಿಸಿಲ್ಲ. ದೂರು ದಾಖಲಿಸದೆಯೇ ಯುವಕನನ್ನು ಠಾಣೆಗೆ ಕರೆಸಿ ಥಳಿಸಲಾಗಿದೆ ಎಂದು ವರದಿಯಾಗಿದೆ.
West Bengal: District Magistrate of Alipurduar, Nikhil Nirmal caught on camera thrashing a youth in a police station for allegedly sending lewd messages to his wife on Facebook. The youth was later arrested. (6.1.19) pic.twitter.com/Hu6UlPO4OQ
— ANI (@ANI) January 7, 2019
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್ಲೋಡ್ ಮಾಡಿ: play.google.com/publictv
