ಇಂದಿನ ಜಗತ್ತಿನಲ್ಲಿ ಕೃತಕ ಬುದ್ಧಿಮತ್ತೆ (AI) ಕೇವಲ ಕೆಲಸಗಳನ್ನು ಸುಲಭ ಮಾಡುವ ತಂತ್ರಜ್ಞಾನವಾಗಿ ಉಳಿದಿಲ್ಲ. ಬದಲಿಗೆ ಅದು ಮನುಷ್ಯನ ಸಾಮರ್ಥ್ಯವನ್ನೇ ಮೀರಿಸಿ ಬೆಳೆಯುತ್ತಿರುವ ಒಂದು ಕ್ರಾಂತಿಕಾರಿ ಶಕ್ತಿಯಾಗಿದೆ. ದಿನನಿತ್ಯದ ಬರವಣಿಗೆ, ಕೋಡಿಂಗ್ನಿಂದ ಹಿಡಿದು ಕಷ್ಟಕರ ಸಂಶೋಧನೆಗಳವರೆಗೆ ಎಲ್ಲ ಕ್ಷೇತ್ರಗಳಲ್ಲೂ ಎಐ ಅನಿವಾರ್ಯವಾಗುತ್ತಿದೆ. ಈ ಹೊತ್ತಿನಲ್ಲೇ, ಈ ತಂತ್ರಜ್ಞಾನದ ಅತಿಯಾದ ವೇಗ ಮತ್ತು ಸ್ವತಂತ್ರ ನಿರ್ಧಾರ ಮನುಕುಲದ ಅಸ್ತಿತ್ವಕ್ಕೇ ಮಾರಕವಾಗಬಹುದೇ ಎಂಬ ಆತಂಕ ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿದೆ.
ಕೃತಕ ಬುದ್ಧಿಮತ್ತೆ (AI) ದಿನದಿಂದ ದಿನಕ್ಕೆ ಹೆಚ್ಚು ಶಕ್ತಿಶಾಲಿಯಾಗುತ್ತಿದ್ದು, ಇದು ಮುಂದೆ ಮನುಷ್ಯ ಕುಲಕ್ಕೇ ಮಾರಕವಾಗಬಹುದು ಎಂದು ವಿಜ್ಞಾನಿಗಳು ಹಲವು ವರ್ಷಗಳಿಂದ ಎಚ್ಚರಿಸುತ್ತಲೇ ಇದ್ದಾರೆ. ಪ್ರಸಿದ್ಧ ಕಂಪನಿಯೊಂದರ ಸಂಶೋಧಕರೊಬ್ಬರು ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿ, ಈ ದಶಕ ಮುಗಿಯುವುದರೊಳಗೆ ಈ ತಂತ್ರಜ್ಞಾನ ನಮ್ಮೆಲ್ಲರನ್ನೂ ಮಾರಕವಾಗಿಸುವ ಅಪಾಯವಿದೆ ಎಂದು ಎಐ ತಯಾರಿಸುವ ಅನೇಕರು ನಂಬಿದ್ದಾರೆ ಎಂದಿದ್ದರು. ಇದರ ಬಳಿಕ ಈ ಬಗ್ಗೆ ಚರ್ಚೆ ಜೋರಾಗಿದೆ.
ಮುಂದಿನ ಹತ್ತು ವರ್ಷಗಳಲ್ಲಿ ಎಐ ಇಡೀ ಮನುಕುಲವನ್ನು ನಾಶಮಾಡುವ ಸಾಧ್ಯತೆ ಶೇಕಡಾ 10ಕ್ಕಿಂತ ಹೆಚ್ಚಿದೆ. ಆದರೆ ಇತರ ಕೆಲ ತಜ್ಞರು ಇದನ್ನು ಒಪ್ಪದೆ, ಭವಿಷ್ಯದಲ್ಲಿ ಆಗಬಹುದಾದ ವಿನಾಶದ ಬಗ್ಗೆ ಅತಿಯಾಗಿ ಯೋಚಿಸುತ್ತಾ ಹೋದರೆ, ಈಗ ಎಐನಿಂದ ಆಗುತ್ತಿರುವ ತೊಂದರೆಗಳನ್ನು ಸರಿಪಡಿಸಲು ಆಗುವುದಿಲ್ಲ ಎಂದು ವಾದಿಸಿದ್ದಾರೆ.
ಹಾಗಾದರೆ ಎಐ ಮನುಷ್ಯರನ್ನು “ಕೊಲ್ಲಬಹುದು” ಎಂದರೆ ಅದರ ನಿಜವಾದ ಅರ್ಥವೇನು? ರೋಬೋಟ್ಗಳು ಅಥವಾ ಚಾಟ್ಬಾಟ್ಗಳಿಗೆ ದಿಢೀರನೆ ಜೀವ ಬಂದು, ಮನುಷ್ಯರ ಮೇಲೆ ದ್ವೇಷ ಸಾಧಿಸಿ ನಮ್ಮನ್ನು ನಾಶಮಾಡುತ್ತವೆ ಎಂದು ಇದರ ಅರ್ಥವಲ್ಲ. ಇದರ ಅಸಲಿ ಭಯ ಬೇರೆಯೇ ಇದೆ. ಎಐ ದಿನೇದಿನೆ ಹೆಚ್ಚು ಚುರುಕಾಗಿ, ತನ್ನ ಕೆಲಸಗಳನ್ನು ತಾನೇ ನಿರ್ಧಾರ ಮಾಡುವ ಹಂತಕ್ಕೆ ಹೋಗಿ, ಕಂಪ್ಯೂಟರ್, ಇಂಟರ್ನೆಟ್ ಮತ್ತು ಇತರ ಯಂತ್ರಗಳ ಸಂಪೂರ್ಣ ನಿಯಂತ್ರಣವನ್ನು ಪಡೆದುಕೊಂಡಾಗ, ಮನುಷ್ಯರಿಗೆ ಅದನ್ನು ತಡೆಯಲು ಅಥವಾ ನಿಯಂತ್ರಿಸಲು ಸಾಧ್ಯವಾಗದೇ ಹೋದರೆ ಏನಾಗಬಹುದು ಎಂಬುದೇ ಈ ಆತಂಕಕ್ಕೆ ಮುಖ್ಯ ಕಾರಣ. ಈ ಗೊಂದಲಗಳನ್ನು ಅರ್ಥಮಾಡಿಕೊಳ್ಳಲು 4 ಮುಖ್ಯ ಜಗಳ ಬಗ್ಗೆ ತಿಳಿಯಬೇಕಿದೆ..
ಭವಿಷ್ಯದಲ್ಲಿ ಎಐ ತಂತ್ರಜ್ಞಾನವು ಮನುಷ್ಯರ ಬುದ್ಧಿಗೂ ನಿಲುಕದಷ್ಟು ವೇಗವಾಗಿ ತನ್ನ ಬುದ್ಧಿಯನ್ನು ತಾನೇ ಹೆಚ್ಚಿಸಿಕೊಳ್ಳಬಹುದು ಎಂಬುದು ತಜ್ಞರ ಭಯ. ಸೈಬರ್ ಭದ್ರತಾ ಕಂಪನಿ ಸೈಬಲ್ನ (Cyble) ಉಪಾಧ್ಯಕ್ಷ ಮಂದಾರ್ ಪಾಟೀಲ್ ಅವರ ಪ್ರಕಾರ, “ಸುಳ್ಳು ಮಾಹಿತಿ ಹರಡುವುದು, ಆನ್ಲೈನ್ ವಂಚನೆ, ತಪ್ಪು ನಿರ್ಧಾರಗಳು, ಸೈಬರ್ ದಾಳಿಗಳ ಮೂಲಕ ಎಐ ಈಗಲೇ ಸಮಾಜಕ್ಕೆ ಹಾನಿ ಮಾಡುತ್ತಿದೆ. ಇದು ಸ್ವತಂತ್ರವಾಗಿ ಕೆಲಸ ಮಾಡಲು ಶುರುಮಾಡಿದಂತೆ ಅಪಾಯಗಳು ಮತ್ತಷ್ಟು ಹೆಚ್ಚುತ್ತವೆ. ಆದರೆ ಈ ಅಪಾಯ ತಡೆಯಲಾರದಂಥದ್ದೇನಲ್ಲ. ನಾವು ಅದನ್ನು ಹೇಗೆ ಮತ್ತು ಎಷ್ಟು ಮಿತಿಯಲ್ಲಿ ಬಳಸುತ್ತೇವೆ ಎಂಬುದರ ಮೇಲೆ ಎಲ್ಲವೂ ನಿಂತಿದೆ.
1. ಎಜಿಐ (AGI) – ಮನುಷ್ಯನ ಸಮಾನ ಬುದ್ಧಿಮತ್ತೆ
ಎಜಿಐ ಎಂದರೆ ಮನುಷ್ಯನಷ್ಟೇ ಸಮಗ್ರ ಬುದ್ಧಿಶಕ್ತಿ ಹೊಂದಿರುವ ಯಂತ್ರ. ಇಂದಿನ ಎಐ ಕವನ ಬರೆಯಬಲ್ಲದು, ಕಂಪ್ಯೂಟರ್ ಕೋಡಿಂಗ್ ಮಾಡಬಲ್ಲದು, ಫೋಟೋ-ವಿಡಿಯೋ ರಚಿಸಬಲ್ಲದು ಮತ್ತು ಕಷ್ಟದ ಲೆಕ್ಕಗಳನ್ನು ಬಿಡಿಸಬಲ್ಲದು. ಆದರೂ ಇಂದಿನ ಎಐ ಅನ್ನು ಎಜಿಐ ಎನ್ನಲಾಗುವುದಿಲ್ಲ. ಏಕೆಂದರೆ ಇಂದಿನ ಕಂಪ್ಯೂಟರ್ಗಳು ಕೆಲವೊಮ್ಮೆ ತೀರಾ ಪುಟ್ಟ, ಸಾಮಾನ್ಯ ವಿಷಯಗಳಲ್ಲೇ ತಪ್ಪು ಮಾಡುತ್ತವೆ ಮತ್ತು ಮನುಷ್ಯನಂತೆ ಎಲ್ಲ ಸಂದರ್ಭಗಳಲ್ಲೂ ಸಮಯಪ್ರಜ್ಞೆಯಿಂದ ಯೋಚಿಸಲು ಸಾಧ್ಯವಾಗುವುದಿಲ್ಲ. ಎಜಿಐ ಎಂದರೆ ಕೇವಲ “ಇನ್ನಷ್ಟು ಚುರುಕಾದ ಚಾಟ್ಜಿಪಿಟಿ” ಅಲ್ಲ. ಅದು ಮನುಷ್ಯನಂತೆ ಯಾವುದೇ ಹೊಸ ವಿಷಯವನ್ನು ತಾನೇ ಕಲಿತು ಯೋಚಿಸುವ ವ್ಯವಸ್ಥೆ. ಕಂಪ್ಯೂಟರ್ ಯಾವಾಗ ಈ ಹಂತ ಮುಟ್ಟುತ್ತದೆ ಎಂದು ಅಳೆಯಲು ಯಾವುದೇ ನಿರ್ದಿಷ್ಟ ಪರೀಕ್ಷೆಯೂ ಸದ್ಯಕ್ಕಿಲ್ಲ.
2. ಸೂಪರ್ಇಂಟೆಲಿಜೆನ್ಸ್ – ಮನುಷ್ಯನಿಗಿಂತ ಮಿಗಿಲಾದ ಮಹಾಬುದ್ಧಿ
ಎಜಿಐ ಮನುಷ್ಯನ ಸಮಾನ ಬುದ್ಧಿಮಟ್ಟವಾದರೆ, ‘ಸೂಪರ್ಇಂಟೆಲಿಜೆನ್ಸ್’ ಎಂದರೆ ಮನುಷ್ಯರಿಗಿಂತ ಹಲವು ಪಟ್ಟು ಹೆಚ್ಚು ಬುದ್ಧಿಶಕ್ತಿ ಹೊಂದಿರುವುದು. ಮನುಷ್ಯನಿಗಿಂತ ವೇಗವಾಗಿ ಚೆಸ್ ಆಡಿದರೆ ಅಥವಾ ಕಂಪ್ಯೂಟರ್ ಕೋಡ್ ಬರೆದರೆ ಅದು ಮಹಾಬುದ್ಧಿ ಎನಿಸಿಕೊಳ್ಳುವುದಿಲ್ಲ. ಆದರೆ ವಿಜ್ಞಾನ ಸಂಶೋಧನೆ, ಎಂಜಿನಿಯರಿಂಗ್, ದೊಡ್ಡ ಯೋಜನೆಗಳನ್ನು ರೂಪಿಸುವುದು ಮತ್ತು ಸ್ವತಃ ಹೊಸ ಎಐ ತಂತ್ರಜ್ಞಾನವನ್ನು ರೂಪಿಸುವುದರಲ್ಲಿ ಮನುಷ್ಯನನ್ನು ಸಂಪೂರ್ಣವಾಗಿ ಮೀರಿಸಿದಾಗ ಅದು ಅಪಾಯಕಾರಿಯಾಗಿ ಬೆಳೆಯುತ್ತದೆ. ಇಂತಹ ಮಹಾಬುದ್ಧಿಯ ಯಂತ್ರ ತನ್ನ ಮುಂದಿನ ಪೀಳಿಗೆಯ ಹೊಸ ಎಐ ಅನ್ನು ತಯಾರಿಸಲು ಶುರುಮಾಡಿದರೆ ಮನುಷ್ಯರ ಗತಿ ಏನು ಎಂಬುದು ಪ್ರಶ್ನೆ.
3. ರಿಕರ್ಸಿವ್ ಸೆಲ್ಫ್-ಇಂಪ್ರೂವ್ಮೆಂಟ್ (ತನ್ನ ಬುದ್ಧಿಯನ್ನು ತಾನೇ ಹೆಚ್ಚಿಸಿಕೊಳ್ಳುವುದು)
ವಿಜ್ಞಾನಿಗಳು ಅತಿ ಹೆಚ್ಚು ಭಯಪಡುವುದು ಇದಕ್ಕೇ. ಅಂದರೆ, ಎಐ ತಂತ್ರಜ್ಞಾನವು ಮನುಷ್ಯರ ಸಹಾಯವಿಲ್ಲದೆ ತನಗಿಂತ ಉತ್ತಮವಾದ ಹೊಸ ಎಐ ಸಿಸ್ಟಮ್ ಅನ್ನು ತಾನೇ ಕೋಡಿಂಗ್ ಮಾಡಿ, ಪರೀಕ್ಷಿಸಿ ತಯಾರಿಸಿಕೊಳ್ಳುವುದು. ಆ ಹೊಸ ಎಐ, ಇನ್ನಷ್ಟು ಶಕ್ತಿಶಾಲಿಯಾದ ಮತ್ತೊಂದು ಎಐ ಅನ್ನು ತಯಾರಿಸುತ್ತದೆ. ಈ ಚಕ್ರವು ನಿರಂತರವಾಗಿ ಮತ್ತು ಅತ್ಯಂತ ವೇಗವಾಗಿ ಬೆಳೆಯುತ್ತಾ ಹೋದರೆ ಮನುಷ್ಯನಿಗೆ ಅದರ ಮೇಲೆ ಯಾವುದೇ ಹತೋಟಿ ಇರುವುದಿಲ್ಲ. ಸದ್ಯಕ್ಕೆ ಕಂಪನಿಗಳು ಇಂತಹ ಹಂತವನ್ನು ತಲುಪಿಲ್ಲವಾದರೂ, ಎಐ ಕೆಲಸಗಳಲ್ಲಿ ಮನುಷ್ಯನ ಕಣ್ಗಾವಲು ಕಡಿಮೆಯಾಗುತ್ತಿರುವುದು ಈ ಆತಂಕವನ್ನು ಹೆಚ್ಚಿಸಿದೆ.
4. ಅಲೈನ್ಮೆಂಟ್ (ಮನುಷ್ಯನ ಮಾತನ್ನು ಯಂತ್ರ ತಪ್ಪಿಲ್ಲದೆ ಪಾಲಿಸುವುದು)
ನಾವು ಹೇಳಿದ ಮಾತನ್ನು ಅರ್ಥಮಾಡಿಕೊಂಡು ಎಐ ಸರಿಯಾಗಿ ನಡೆದುಕೊಳ್ಳುವಂತೆ ನೋಡಿಕೊಳ್ಳುವುದೇ ‘ಅಲೈನ್ಮೆಂಟ್’. ಎಐ ತೀರಾ ಚುರುಕಾದಾಗ ಇದು ಕಷ್ಟವಾಗುತ್ತದೆ. ಉದಾಹರಣೆಗೆ, ಎಐಗೆ “ಈ ಸಮಸ್ಯೆಯನ್ನು ಎಷ್ಟು ಬೇಗ ಸಾಧ್ಯವೋ ಅಷ್ಟು ಬೇಗ ಬಗೆಹರಿಸು” ಎಂದು ಆಜ್ಞೆ ನೀಡಿದರೆ, ಮನುಷ್ಯರು ಕಾನೂನು, ಧರ್ಮ ಮತ್ತು ನೀತಿ-ನಿಯಮಗಳನ್ನು ಗಮನದಲ್ಲಿಟ್ಟುಕೊಂಡು ಕೆಲಸ ಮಾಡುತ್ತಾರೆ. ಆದರೆ ಭಾವನೆಗಳಿಲ್ಲದ ಸ್ವತಂತ್ರ ಎಐ, ಸಮಸ್ಯೆಯನ್ನು ಬೇಗ ಮುಗಿಸಲು ಅಡ್ಡದಾರಿ ಹಿಡಿದು ದೊಡ್ಡ ತಪ್ಪು ಮಾಡಬಹುದು. ಇತ್ತೀಚೆಗೆ ಪರೀಕ್ಷೆಯ ಸಮಯದಲ್ಲಿ ಎಐ ಸಾಫ್ಟ್ವೇರ್ಗಳು ಕಂಪ್ಯೂಟರ್ ವ್ಯವಸ್ಥೆಗಳನ್ನು ತಾವಾಗಿಯೇ ಹ್ಯಾಕ್ ಮಾಡಲು ಪ್ರಯತ್ನಿಸಿದ್ದು ಇದಕ್ಕೆ ಉದಾಹರಣೆ. ಮಂದಾರ್ ಪಾಟೀಲ್ ಹೇಳುವಂತೆ, ಮನುಷ್ಯರ ನೀತಿ-ನಿಯಮಗಳು, ಸರಿ-ತಪ್ಪುಗಳ ವ್ಯಾಖ್ಯಾನ ತುಂಬಾ ಸಂಕೀರ್ಣವಾದದ್ದು. ಎಐಗೆ “ಒಳ್ಳೆಯವರಾಗಿರಿ” ಎಂದು ಹೇಳಿದರೆ ಅದಕ್ಕೆ ಅರ್ಥವಾಗುವುದಿಲ್ಲ. ಅದು ತನ್ನ ಗುರಿ ಮುಟ್ಟಲು ಹೋಗಿ ಮನುಷ್ಯರು ಬಯಸದ ಕೆಟ್ಟ ಫಲಿತಾಂಶ ನೀಡಬಹುದು. ಅದಕ್ಕಾಗಿಯೇ ಎಐ ಮನುಷ್ಯರ ಉದ್ದೇಶವನ್ನು ಸರಿಯಾಗಿ ಅರ್ಥಮಾಡಿಕೊಳ್ಳುವಂತೆ ಮಾಡಲು ಸಂಶೋಧನೆಗಳು ನಡೆಯುತ್ತಿವೆ.
ಎಐನಿಂದ ಭಾರಿ ಅನಾಹುತಗಳು ಹೇಗೆ ಸಂಭವಿಸಬಹುದು?
ಕೆಟ್ಟ ವ್ಯಕ್ತಿಗಳು ಎಐ ಬಳಸಿ ದೇಶಗಳ ಮೇಲೆ ಸೈಬರ್ ದಾಳಿ ನಡೆಸುವುದು, ಹೊಸ ವೈರಸ್ಗಳನ್ನು ಸೃಷ್ಟಿಸುವುದು ಅಥವಾ ಸುಳ್ಳು ಸುದ್ದಿಗಳನ್ನು ಹರಡುವುದು.
ಇಂಟರ್ನೆಟ್ ಸಂಪರ್ಕ ಹೊಂದಿರುವ ಸ್ವತಂತ್ರ ಎಐಗಳು, ಭದ್ರತಾ ಲೋಪಗಳಿಂದಾಗಿ ಅಥವಾ ಮನುಷ್ಯರ ಅಜಾಗರೂಕತೆಯಿಂದ ಸ್ವತಃ ಹಾನಿ ಉಂಟುಮಾಡುವುದು.
ಅತಿಯಾದ ಸ್ವತಂತ್ರ ನಿರ್ಧಾರ ಶಕ್ತಿ ಹೊಂದಿರುವ ಎಐ, ಮನುಷ್ಯನ ಹಿತಕ್ಕೆ ವಿರುದ್ಧವಾದ ಕೆಲಸವನ್ನು ಮಾಡುತ್ತಾ, ಅದನ್ನು ಆಫ್ ಮಾಡಲು ಅಥವಾ ನಿಲ್ಲಿಸಲು ಹೋದ ಮನುಷ್ಯರ ಆದೇಶಗಳನ್ನೇ ಧಿಕ್ಕರಿಸುವುದು.
ನಮ್ಮ ನಿಯಂತ್ರಣ ಮೀರಿ ವೇಗವಾಗಿ ಎಐ ಬೆಳೆಸುತ್ತಿದ್ದೇವೆಯೇ?
ಓಪನ್ಎಐ (OpenAI) ಸಂಸ್ಥೆಯು 2025 ಅನ್ನು “ಸ್ವತಂತ್ರ ಎಐ ಏಜೆಂಟ್ಗಳ ವರ್ಷ” ಎಂದು ಕರೆದಿತ್ತು. 2026ರ ಮಧ್ಯಭಾಗದ ವೇಳೆಗೆ ಶೇಕಡಾ 57ಕ್ಕಿಂತ ಹೆಚ್ಚು ಕಂಪನಿಗಳು ತಮ್ಮ ಕೆಲಸಗಳಲ್ಲಿ ಸ್ವತಂತ್ರ ಎಐಗಳನ್ನು ಬಳಸುತ್ತಿವೆ. ಗಾರ್ಟ್ನರ್ ಸಂಸ್ಥೆಯ ಪ್ರಕಾರ, 2025ರಲ್ಲಿ ಕೇವಲ ಶೇ. 5ರಷ್ಟಿದ್ದ ಎಐ ಏಜೆಂಟ್ಗಳ ಬಳಕೆ, 2026ರ ಅಂತ್ಯಕ್ಕೆ ಶೇ. 40ಕ್ಕೆ ಏರಲಿದ್ದು, ಒಂದೇ ವರ್ಷದಲ್ಲಿ 8 ಪಟ್ಟು ಹೆಚ್ಚಾಗಲಿದೆ.
ಇನ್ನೊಂದೆಡೆ, ಮನುಷ್ಯನ ಸಹಾಯವಿಲ್ಲದೆ ಎಐ ತಾನೇ ತಾನಾಗಿ ಕೆಲಸ ಮಾಡುವ (Self-replication) ಸಾಮರ್ಥ್ಯವು 2023ರಲ್ಲಿ ಶೇಕಡಾ 5ಕ್ಕಿಂತ ಕಡಿಮೆಯಿತ್ತು. ಆದರೆ 2025ರ ವೇಳೆಗೆ ಅದು ಶೇಕಡಾ 60ಕ್ಕಿಂತ ಹೆಚ್ಚಾಗಿದೆ. ಅಂದರೆ ಎಐ ಮನುಷ್ಯರ ನಿಗಾ ಇಲ್ಲದೆ ಕೆಲಸ ಮಾಡುವ ಮಟ್ಟ 12 ಪಟ್ಟು ಹೆಚ್ಚಾಗಿದೆ.
ಹೆಚ್ಚುತ್ತಿರುವ ಅಪಾಯ ಮತ್ತು ಆರ್ಥಿಕ ನಷ್ಟ
ಇದನ್ನು ಕಂಟ್ರೋಲ್ ಮಾಡುವ ನಿಯಮಗಳೇ ಇಲ್ಲ. ಶೇಕಡಾ 91ರಷ್ಟು ಕಂಪನಿಗಳಲ್ಲಿ, ಎಐ ಏನೋ ಒಂದು ಎಡವಟ್ಟು ಮಾಡಿ ಮುಗಿಸಿದ ಮೇಲಷ್ಟೇ ಅಧಿಕಾರಿಗಳಿಗೆ ಆ ವಿಷಯ ಗೊತ್ತಾಗುತ್ತಿದೆ. ಅಕ್ಟೋಬರ್ 2025 ರಿಂದ ಜನವರಿ 2026 ರ ನಡುವೆ, ಜನರು ಎಐ ಮೇಲೆ ಇಟ್ಟ ನಂಬಿಕೆಯಿಂದಾಗಿ ಎಐ ಕೆಲಸ ಮಾಡುವ ಸಮಯವು 25 ನಿಮಿಷಗಳಿಂದ 45 ನಿಮಿಷಗಳಿಗಿಂತ ಹೆಚ್ಚಾಗಿದೆ. ಆದರೆ ಈ ನಂಬಿಕೆಗೆ ತಕ್ಕಂತೆ ರಕ್ಷಣೆ ಇಲ್ಲ. ಸುಮಾರು ಶೇಕಡಾ 88 ರಷ್ಟು ಸಂಸ್ಥೆಗಳಲ್ಲಿ ಎಐನಿಂದ ಭದ್ರತಾ ತೊಂದರೆಗಳು ಎದುರಾಗಿವೆ. ಆದರೂ ಕೇವಲ ಶೇಕಡಾ 22 ರಷ್ಟು ಕಂಪನಿಗಳು ಮಾತ್ರ ಎಐಗೆ ಪ್ರತ್ಯೇಕ ನಿಯಮ ಮತ್ತು ಮಿತಿಗಳನ್ನು ಹಾಕಿವೆ.
ಇದು ಕೇವಲ ಊಹೆಯಲ್ಲ, ನಿಜವಾಗಿಯೂ ನಡೆಯುತ್ತಿದೆ. ಫೆಬ್ರವರಿ 2026 ರಲ್ಲಿ, ಮೈಕ್ರೋಸಾಫ್ಟ್ ಕಂಪನಿಯ ‘ಕೋಪೈಲಟ್ ಚಾಟ್’ ತಂತ್ರಜ್ಞಾನದಲ್ಲಾದ ತಪ್ಪಿನಿಂದಾಗಿ, ಕಂಪನಿಯ ಸುರಕ್ಷತಾ ನಿಯಮಗಳನ್ನೇ ಮೀರಿ ಗ್ರಾಹಕರ ಅತ್ಯಂತ ಗೌಪ್ಯವಾದ ಇಮೇಲ್ಗಳನ್ನು ವಾರಗಳ ಕಾಲ ಸಾರಾಂಶ ರೂಪದಲ್ಲಿ ಎಐ ಓದಿ ತೋರಿಸಿತ್ತು. ಹಣಕಾಸಿನ ನಷ್ಟವೂ ಭಾರಿ ಪ್ರಮಾಣದಲ್ಲಿದೆ. ಮತ್ತೊಂದು ಸಮೀಕ್ಷೆಯ ಪ್ರಕಾರ, ದೊಡ್ಡ ಕಂಪನಿಗಳಲ್ಲಿ ಶೇಕಡಾ 64ರಷ್ಟು ಸಂಸ್ಥೆಗಳು ಎಐ ಮಾಡಿದ ತಪ್ಪುಗಳಿಂದಾಗಿ 10 ಲಕ್ಷ ಡಾಲರ್ಗಿಂತಲೂ (ಸುಮಾರು 8 ಕೋಟಿಗೂ ಹೆಚ್ಚು ರೂಪಾಯಿ) ಅಧಿಕ ನಷ್ಟ ಅನುಭವಿಸಿವೆ. ಸರಿಯಾದ ನಿಯಮ ಮತ್ತು ಹತೋಟಿ ಇಲ್ಲದ ಕಾರಣ, 2027ರ ವೇಳೆಗೆ ಶೇಕಡಾ 40ರಷ್ಟು ಕಂಪನಿಗಳು ಇಂತಹ ಸ್ವತಂತ್ರ ಎಐ ತಂತ್ರಜ್ಞಾನವನ್ನು ಕೈಬಿಡಬಹುದು ಎಂದು ಎಚ್ಚರಿಸಿದೆ.
