ಲಕ್ನೋ: ಕುಡಿಬೇಡ ಎಂದು ಹೇಳಿದ್ದಕ್ಕೆ ತಂದೆಯೊಬ್ಬ ತನ್ನ ಅಪ್ರಾಪ್ತ ಮಗಳನ್ನು ಶೂಟ್ ಮಾಡಿದ ಘಟನೆ ಉತ್ತರ ಪ್ರದೇಶದ ಸಂಬಾಲ್ ಜಿಲ್ಲೆಯಲ್ಲಿ ನಡೆದಿದೆ.
ನೀಮ್ ಸಿಂಗ್(52) ಕೊಲೆ ಮಾಡಿದ ತಂದೆ. 17 ವರ್ಷದ ಮಗಳು ಮದ್ಯ ಕುಡಿಯಬೇಡ ಎಂದು ತಂದೆಗೆ ಹೇಳಿದ್ದಾಳೆ. ಮಗಳ ಮಾತಿನಿಂದ ಕೋಪಗೊಂಡ ನೀಮ್ ಸಿಂಗ್ ಗನ್ನಿಂದ ಶೂಟ್ ಮಾಡುವ ಮೂಲಕ ಆಕೆಯನ್ನು ಕೊಲೆ ಮಾಡಿದ್ದಾನೆ.
ಗುಂಡಿನ ಸದ್ದು ಕೇಳಿದ ಅಕ್ಕಪಕ್ಕದ ಮನೆಯವರು ಸ್ಥಳಕ್ಕೆ ಓಡಿ ಹೋಗಿದ್ದಾರೆ. ಬಳಿಕ ಪೊಲೀಸರಿಗೆ ಕರೆ ಮಾಡಿ ವಿಷಯ ತಿಳಿಸಿದ್ದಾರೆ. ಈ ವೇಳೆ ಬಾಲಕಿಯನ್ನು ಕಂಡ ಸ್ಥಳೀಯರು ಆಕೆಯ ಕರೆದುಕೊಂಡು ಹೋಗಿದ್ದಾರೆ. ಆದರೆ ಅಷ್ಟರಲ್ಲಿ ಬಾಲಕಿ ಮೃತಪಟ್ಟಿದ್ದಾಳೆ.
ಪೊಲೀಸರು ಬಾಲಕಿಯ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ. ಸದ್ಯ ಪೊಲೀಸರು ಆರೋಪಿ ನೀಮ್ ಸಿಂಗ್ನನ್ನು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ. ವಿಚಾರಣೆ ವೇಳೆ ಆತ ತನ್ನ ಮಗಳನ್ನು ಕೊಲೆ ಮಾಡಿರುವುದಾಗಿ ಒಪ್ಪಿಕೊಂಡಿದ್ದಾನೆ.
15 ವರ್ಷಗಳ ಹಿಂದೆ ನೀಮ್ ಸಿಂಗ್ ಪತ್ನಿ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಪತ್ನಿಯ ಸಾವಿನಿಂದ ಮನನೊಂದಿದ್ದ ನೀಮ್ ಸಿಂಗ್ ಮದ್ಯ ಸೇವಿಸುವುದನ್ನು ಶುರು ಮಾಡಿದ್ದನು. ಅಲ್ಲದೆ ಮದ್ಯ ಖರೀದಿಸಲು ತನ್ನ ಬಳಿಯಿದ್ದ ಜಮೀನು ಕೂಡ ಮಾರಾಟ ಮಾಡಿದ್ದನು.
ನೀಮ್ ಸಿಂಗ್ನ ಹಿರಿಯ ಮಗ ಗೌರವ್ ಕೂಡ ಆತನಿಗೆ ಮದ್ಯ ಸೇವಿಸಬೇಡ ಎಂದು ಎಚ್ಚರಿಗೆ ನೀಡಿದ್ದನು. ಆದರೆ ನೀಮ್ ಮಾತಿಗೆ ಒಪ್ಪದ ಕಾರಣ ಗೌರವ್ ತನ್ನ ಪತ್ನಿಯೊಂದಿಗೆ ದೆಹಲಿಗೆ ಶಿಫ್ಟ್ ಆಗಿದ್ದನು. ಬಳಿಕ ನೀಮ್ ಸಿಂಗ್ನ ಎರಡನೇ ಮಗ ಹಾಗೂ ಬಾಲಕಿ ಆತನ ಜೊತೆಯಲ್ಲಿಯೇ ವಾಸಿಸುತ್ತಿದ್ದರು.
