ಲಂಡನ್: ಕಾರಿನಲ್ಲಿ ಬಿಟ್ಟು ಹೋಗಿದ್ದ ಶ್ವಾನಕ್ಕಾಗಿ ವ್ಯಕ್ತಿಯೋರ್ವ ಶಾಪಿಂಗ್ ಮಾಲ್ ಮುಂದೆ ಪಾರ್ಕ್ ಮಾಡಿದ್ದ ಬೇರೆಯವರ ಕಾರಿನ ಗ್ಲಾಸ್ ಒಡೆದು ಹಾಕಿರುವ ಘಟನೆ ಲಂಡನ್ನಲ್ಲಿ ನಡೆದಿದೆ.
ಶಾಪಿಂಗ್ಗೆಂದು ಕಾರಿನಲ್ಲಿ ಬಂದ ಮಾಲೀಕ ನಾಯಿಯ ಮರಿಯನ್ನು ಕಾರಿನಲ್ಲೇ ಬಿಟ್ಟು ಮಗಳ ಜೊತೆ ಶಾಪಿಂಗ್ ಮಾಡಲು ಹೋಗಿದ್ದಾನೆ. ಈ ವೇಳೆ ಕಾರಿನಲ್ಲಿದ್ದ ಶ್ವಾನ ಹೊರಗೆ ಬರಲಾಗದೆ ಉಸಿರಾಡಲೂ ಆಗದೇ ಕಷ್ಟಪಟ್ಟಿದೆ. ಕಾರು ಕೂಡ ಬಿಸಿಲಿನಲ್ಲಿ ನಿಂತಿದ್ದು, ಬಿಸಿಲ ಝಳಕ್ಕೆ ನಾಯಿ ಬೊಗಳಲು ಆರಂಭಿಸಿದೆ.
ಸುಮಾರು 45 ನಿಮಿಷ ನಾಯಿ ಕಾರಿನಲ್ಲಿ ಕಷ್ಟಪಟ್ಟಿದೆ. ಆ ನಂತರ ಸ್ಥಳದಲ್ಲಿ ಇದ್ದ ಜನರು ನಾಯಿಯನ್ನು ಹೊರತೆಗೆಯಲು ಮಾಲೀಕನನ್ನು ಹುಡುಕಿದ್ದಾರೆ. ಆದರೆ ಮಾಲೀಕ ಸಿಕ್ಕಿಲ್ಲ. ಆ ನಂತರ ಸ್ಥಳಕ್ಕೆ ಬಂದ ವ್ಯಕ್ತಿಯೋರ್ವ ತನ್ನ ಬಳಿಯಿದ್ದ ಕೊಡಲಿಯಿಂದ ಕಾರಿನ ಗ್ಲಾಸ್ ಅನ್ನು ಒಡೆದು ಹಾಕಿ ನಾಯಿಯನ್ನು ಹೊರ ತೆಗೆದಿ ದ್ದಾನೆ. ಬರೋಬ್ಬರಿ 8 ಬಾರಿ ಕೊಡಲಿಯಿಂದ ಗ್ಲಾಸ್ಗೆ ಒಡೆದು ಅದನ್ನು ಬ್ರೇಕ್ ಮಾಡಲಾಗಿದೆ. ನಂತರ ನಾಯಿಯನ್ನು ಪೆಟ್ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿದೆ.
ಈಗ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದ್ದು, ಗ್ಲಾಸ್ ಒಡೆದು ಹಾಕಿದ ವ್ಯಕ್ತಿಗೆ ನೆಟ್ಟಿಗರು ಮೆಚ್ಚುಗೆ ಸೂಚಿಸಿದ್ದಾರೆ. ಜೊತೆಗೆ ನಾಯಿಯನ್ನು ಕಾರಿನಲ್ಲಿ ಬಿಟ್ಟು ಹೋದ ಮಾಲೀಕನ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅವರು ನಾಯಿ ಸಾಕಲೂ ಕೂಡ ಅರ್ಹವಾಗಿಲ್ಲ. ಅವರನ್ನು ಜೈಲಿಗೆ ಹಾಕಿ ಎಂದು ಕಾಮೆಂಟ್ ಮಾಡಿದ್ದಾರೆ. ಸದ್ಯ ನಾಯಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ.