– ಸೇವಾ ಸಂಕಲ್ಪ ಅಭಿಯಾನ; ವಾರಣಾಸಿಯಿಂದ ವಡನಗರಕ್ಕೆ ತೆರಳುತ್ತಿರುವ ಯುವಕರ ಜೊತೆ ಪ್ರಧಾನಿ ಸಂವಾದ
ನವದೆಹಲಿ: ಸೇವಾ ಸಂಕಲ್ಪ ಅಭಿಯಾನದಡಿ (Seva Sankalp Abhiyan) ವಾರಣಾಸಿಯಿಂದ ಗುಜರಾತ್ನ ವಡನಗರಕ್ಕೆ ತೆರಳುತ್ತಿರುವ ಯುವಕರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ (Narendra Modi) ಸಂವಾದ ನಡೆಸಿದರು. ಪ್ರವಾಸದ ವೇಳೆ ವಿವಿಧ ಪ್ರದೇಶಗಳ ಜನರನ್ನು ಭೇಟಿಯಾಗಿ, ಅವರ ಸಮಸ್ಯೆಗಳು ಹಾಗೂ ಅನುಭವಗಳನ್ನು ಆಲಿಸಿರುವ ಯುವಕರು ತಮ್ಮ ಅನುಭವಗಳನ್ನು ಪ್ರಧಾನಿಯೊಂದಿಗೆ ಹಂಚಿಕೊಂಡರು. ಜನರೊಂದಿಗೆ ನೇರವಾಗಿ ಸಂಪರ್ಕ ಸಾಧಿಸುವುದು ವಿಶೇಷ ಅನುಭವವಾಗಿದೆ ಎಂಬ ಅಭಿಪ್ರಾಯ ಸಂವಾದದಲ್ಲಿ ವ್ಯಕ್ತವಾಯಿತು.
ಪ್ರಯಾಣದ ವೇಳೆ ಉತ್ತರ ಪ್ರದೇಶದ ಉನ್ನಾವೊ ಜಿಲ್ಲೆಯ ವೃದ್ಧೆಯೊಬ್ಬರನ್ನು ಯುವಕರು ಭೇಟಿಯಾಗಿದ್ದರು. ತಾವು ವಡನಗರಕ್ಕೆ ತೆರಳಿ ಫಲಾನುಭವಿಗಳನ್ನು ಭೇಟಿ ಮಾಡಿ ಅವರ ಆಶೀರ್ವಾದ ಪಡೆಯುತ್ತಿರುವುದಾಗಿ ಯುವಕರು ತಿಳಿಸಿದಾಗ, ಆಕೆ ಪ್ರಧಾನಿ ಮೋದಿಗೆ ಧನ್ಯವಾದ ತಿಳಿಸುವಂತೆ ಮನವಿ ಮಾಡಿದರು. ಇದನ್ನೂ ಓದಿ: NEET-PG 2026 ಫಲಿತಾಂಶ ಪ್ರಕಟ – 641 ಅಂಕ ಗಳಿಸಿದ ಅಭ್ಯರ್ಥಿ ದೇಶಕ್ಕೆ ಪ್ರಥಮ
ಪ್ರಧಾನಮಂತ್ರಿ ಆವಾಸ್ ಯೋಜನೆಯಡಿ ತನಗೆ ಪಕ್ಕಾ ಮನೆ ದೊರೆತಿರುವುದಾಗಿ ಮಹಿಳೆ ತಿಳಿಸಿದರು. ಹಳೆಯ ಕಚ್ಚಾ ಮನೆ ಶಿಥಿಲಗೊಂಡಿದ್ದ ಸಂದರ್ಭದಲ್ಲಿ ತಾನು ಅದರ ಹೊರಗೆ ಕುಳಿತಿದ್ದಾಗ ಮನೆ ಕುಸಿದು, ಇಟ್ಟಿಗೆ ಬಿದ್ದು ಗಾಯವಾಗಿತ್ತು ಎಂದು ಅವರು ವಿವರಿಸಿದರು. ಪಕ್ಕಾ ಮನೆ ನಿರ್ಮಾಣವಾಗದಿದ್ದರೆ ತಮ್ಮ ಕುಟುಂಬಕ್ಕೆ ಅಪಾಯ ಎದುರಾಗುತ್ತಿತ್ತು ಎಂದು ಮಹಿಳೆ ಹೇಳಿರುವುದಾಗಿ ಯುವಕರು ಪ್ರಧಾನಿಗೆ ತಿಳಿಸಿದರು.
ಸೇವಾ ಸಂಕಲ್ಪ ಅಭಿಯಾನದಡಿ ಯುವಕರಿಗೆ ಜನರೊಂದಿಗೆ ನೇರವಾಗಿ ಸಂಪರ್ಕ ಸಾಧಿಸುವ ಅವಕಾಶ ಕಲ್ಪಿಸಲಾಗಿದೆ. ವಾರಣಾಸಿ–ವಡನಗರ ಪ್ರಯಾಣವು ಕೇವಲ ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ತೆರಳುವ ಪ್ರಯಾಣವಾಗಿರದೆ, ಗ್ರಾಮಗಳು ಹಾಗೂ ವಿವಿಧ ಸಮುದಾಯಗಳ ಜನರನ್ನು ಭೇಟಿ ಮಾಡಿ ಅವರೊಂದಿಗೆ ಸಂವಾದ ನಡೆಸುವುದು ಮತ್ತು ಸೇವಾ ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳುವುದನ್ನೂ ಒಳಗೊಂಡಿದೆ.
ಪ್ರಯಾಣದ ವೇಳೆ ಸ್ವಚ್ಛತಾ ಅಭಿಯಾನ, ಶಾಲೆಗಳು, ಆಸ್ಪತ್ರೆಗಳು, ನರ್ಸಿಂಗ್ ಹೋಮ್ಗಳು ಸೇರಿದಂತೆ ವಿವಿಧ ಸಮುದಾಯ ಸ್ಥಳಗಳಲ್ಲಿ ಸೇವಾ ಚಟುವಟಿಕೆಗಳನ್ನು ಕೈಗೊಳ್ಳಲಾಗುತ್ತಿದೆ. ಜನರ ಜೀವನ ಮತ್ತು ಅವರ ಅಗತ್ಯಗಳನ್ನು ನೇರವಾಗಿ ಅರಿಯಲು ಇಂತಹ ಭೇಟಿಗಳು ಸಹಕಾರಿಯಾಗುತ್ತಿವೆ. ಇದನ್ನೂ ಓದಿ: ವಿಮಾ ಏಜೆಂಟ್ಗಳಿಗೆ ಕೇಂದ್ರದ ಶಾಕ್- ಕಮಿಷನ್ ಹಣಕ್ಕೆ ಕತ್ತರಿ
ಸೇವಾ ಸಂಕಲ್ಪ ಅಭಿಯಾನ ಸೆ.17ರಿಂದ ಅ.17ರವರೆಗೆ ನಡೆಯುತ್ತಿದೆ. ಪ್ರಧಾನಿ ಮೋದಿಯವರ ಸಾರ್ವಜನಿಕ ಜೀವನದ 25 ವರ್ಷ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ದೇಶದ ವಿವಿಧ ಭಾಗಗಳಲ್ಲಿ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ. ಅಭಿಯಾನದಲ್ಲಿ ಯುವಕರ ಪಾಲ್ಗೊಳ್ಳುವಿಕೆ, ಸೇವಾ ಚಟುವಟಿಕೆಗಳು ಹಾಗೂ ಜನರೊಂದಿಗೆ ನೇರ ಸಂಪರ್ಕಕ್ಕೆ ಒತ್ತು ನೀಡಲಾಗಿದೆ.
