ತನ್ನ ಜೊತೆ ಪ್ರಿಯಕರ ಓಡಿಹೋಗಲು ನಿರಾಕರಿಸಿದ್ದಕ್ಕೆ ಮತ್ತೊಬ್ಬನ ಜೊತೆ ಓಡಿಹೋದ ಅಪ್ರಾಪ್ತೆ!

ಡೆಹ್ರಾಡೂನ್: ಪ್ರಿಯಕರ ತನ್ನ ಜೊತೆ ಓಡಿಹೋಗಲು ನಿರಾಕರಿಸಿದ್ದಕ್ಕೆ ಅಪ್ರಾಪ್ತೆ ಬಾಲಾಕಿಯೊಬ್ಬಳು ಮತ್ತೊಬ್ಬ ಯುವಕನ ಜೊತೆಗೆ ಓಡಿ ಹೋದ ಘಟನೆ ಉತ್ತರಖಂಡದ ಡೆಹ್ರಾಡೂನ್‍ನಲ್ಲಿ ನಡೆದಿದ್ದು, ಪೊಲೀಸರು ವಿಚಾರಣೆ ನಡೆಸಿದ್ದಾಗ ಪ್ರಕರಣ ಬೆಳಕಿಗೆ ಬಂದಿದೆ.

ಬಾಲಕಿ ತನ್ನದೇ ಗ್ರಾಮದ ಯುವಕನೊಬ್ಬನನ್ನು ಪ್ರೀತಿಸುತ್ತಿದ್ದಳು. ನಂತರ ಈ ವಿಷಯ ಗ್ರಾಮದಲ್ಲಿ ಎಲ್ಲರಿಗೂ ತಿಳಿದು, ಚರ್ಚೆಯಾಗುತ್ತಿದ್ದಂತೆ ಬಾಲಕಿಯ ಪೋಷಕರು ಆಕೆಯನ್ನು ಮನೆಯ ಹೊರಗೆ ಕಳುಹಿಸದಂತೆ ರೂಮಿನಲ್ಲಿ ಕೂಡಿ ಹಾಕಿದ್ದರು.

ಪೋಷಕರ ಈ ವರ್ತನೆಯನ್ನು ನೋಡಿ ಬಾಲಕಿ ನಾವಿಬ್ಬರೂ ಓಡಿ ಹೋಗೋಣವೆಂದು ಪ್ರಿಯಕರನಿಗೆ ಕರೆ ಮಾಡಿ ಒತ್ತಡ ಹೇರಿದ್ದಾಳೆ. ಆದರೆ ಯುವಕ ಬಾಲಕಿ ಜೊತೆ ಓಡಿ ಹೋಗಲು ನಿರಾಕರಿಸಿದ್ದಾನೆ.

ಆದರೆ ಬಾಲಕಿ ತನ್ನ ಹಠವನ್ನು ಬಿಡದೇ ಸಮಯ ನೋಡಿ ಮನೆಯಿಂದ ಓಡಿ ಹೋಗಿ ರಾಯಸಿ ತಲುಪಿದ್ದಳು. ನಂತರ ಅಲ್ಲಿ ಬೇರೆ ಯುವಕನನ್ನು ಕರೆ ಮಾಡಿ ಆ ಯುವಕನನ್ನು ಕೂಡ ರಾಯಸಿಗೆ ಕರೆಸಿಕೊಂಡು ಆತನ ಜೊತೆ ಓಡಿಹೋಗಿದ್ದಾಳೆ ಎಂದು ವರದಿಯಾಗಿದೆ.

ಬಾಲಕಿ ಮನೆಯಿಂದ ನಾಪತ್ತೆ ಆದಾಗಿನಿಂದ ಆಕೆಯ ಪೋಷಕರು ಆಕೆಯನ್ನು ಹುಡುಕಾಡುತ್ತಿದ್ದರು. ಆದರೆ ಬಾಲಕಿಯ ಸುಳಿವು ಅವರಿಗೆ ಸಿಗಲಿಲ್ಲ. ನಂತರ ಬಾಲಕಿಯ ಪೋಷಕರು ಲಶ್ಕರ್ ಕೋತ್‍ವಾಲ್ ಪೊಲೀಸರಿಗೆ ದೂರು ನೀಡಿದ್ದಾರೆ. ನಂತರ ಪೊಲೀಸರು ಬಾಲಕಿಯ ಪ್ರಿಯಕರನನ್ನು ಕರೆಸಿ ವಿಚಾರಣೆ ನಡೆಸಿದ್ದಾಗ ಸಂಪೂರ್ಣ ವಿಷಯ ಬೆಳಕಿಗೆ ಬಂದಿದೆ.

ಬಾಲಕಿ ಬೇರೊಬ್ಬ ಯುವಕನ ಜೊತೆ ಓಡಿ ಹೋಗಿರುವ ಮಾಹಿತಿ ದೊರೆತ್ತಿದ್ದು, ಆ ಆಧಾರದ ಮೇಲೆ ತನಿಖೆ ನಡೆಸಲಾಗುತ್ತದೆ ಎಂದು ಕೋತ್‍ವಾಲ್ ತ್ರಿವೇಂದ್ರ್ ಸಿಂಗ್ ರಾಣಾ ತಿಳಿಸಿದ್ದಾರೆ.