ನವದೆಹಲಿ: 32 ವರ್ಷದ ಮಹಿಳೆಯನ್ನು 12 ಬಾರಿ ಚೂರಿಯಿಂದ ಇರಿದ ಘಟನೆ ದಕ್ಷಿಣ ದೆಹಲಿಯಲ್ಲಿ ಬುಧವಾರ ಸಂಜೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.
ಚೂರಿ ಇರಿತಕ್ಕೊಳಗಾದ ಮಹಿಳೆಯನ್ನು ನೀತು ಶರ್ಮಾ ಎಂದು ಗುರುತಿಸಲಾಗಿದೆ. ಸದ್ಯ ಈಕೆ ಜಸೋಲಾದ ಅಪೋಲೋ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಸ್ಥಿತಿ ಗಂಭಿರವಾಗಿದೆ.
ಏನಿದು ಘಟನೆ?: ನೀತು ಶರ್ಮಾ ಅವರು ತನ್ನ ಗೆಳೆಯ ಅನ್ವರ್ ಎಂಬಾತನಿಗೆ 5 ಲಕ್ಷ ರೂ. ಕೊಟ್ಟಿದ್ದರು. ಹೀಗಾಗಿ ತಾನು ಕೊಟ್ಟ ಹಣವನ್ನು ವಾಪಸ್ ಕೇಳಲೆಂದು ಅನ್ವರ್ ನನ್ನು ಭೇಟಿಯಾಗಿದ್ದಾರೆ. ಈ ವೇಳೆ ಇಬ್ಬರ ಮಧ್ಯೆ ಮಾತಿನ ಚಕಮಕಿ ನಡೆದಿದ್ದು, ಮಹಿಳೆಗೆ ಅನ್ವರ್ 12 ಬಾರಿ ಇರಿದಿದ್ದಾನೆ ಎಂಬುದಾಗಿ ವರದಿಯಾಗಿದೆ.
ಗಸ್ತು ತಿರುಗುತ್ತಿದ್ದ ಸಂದರ್ಭದಲ್ಲಿ ಮಹಿಳೆಯೊಬ್ಬರು ತಮ್ಮ ಗೆಳೆಯನೊಂದಿಗೆ ಬೈಕ್ ನಲ್ಲಿ ಕುಳಿತಿರುವುದನ್ನು ನೋಡಿದ್ದೆವು. ಅಂತೆಯೇ ನಾವು ಮತ್ತೆ ಅದೇ ಜಾಗಕ್ಕೆ ಬಂದಾಗ ಸಾರ್ವಜನಿಕರು ಸೇರಿದ್ದರು. ಹೀಗಾಗಿ ಏನಾಯಿತೆಂದು ನೋಡಲು ತೆರಳಿದಾಗ ಅದೇ ಮಹಿಳೆ ಚೂರಿ ಇರಿತಕ್ಕೊಳಗಾಗಿ ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡುತ್ತಿದ್ದರು. ಕೂಡಲೇ ಅವರನ್ನು ಖಾಸಗಿ ವಾಹನವೊಂದರಲ್ಲಿ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿರುವುದಾಗಿ ಪೊಲೀಸ್ ಅಧಿಕಾರಿ ಲಖನ್ ಸಿಂಗ್ ಹಾಗೂ ರಾಹುಲ್ ಹೇಳಿದ್ದಾರೆ.
ಈ ವೇಳೆ ಮಹಿಳೆ, ತನ್ನ ಹೆಸರು ನೀತು ಶರ್ಮಾ, ಗ್ರೇಟರ್ ನೊಯ್ಡಾದ ನಿವಾಸಿಯಾಗಿದ್ದೇನೆ. ನನ್ನ ಮೇಲೆ ಗೆಳೆಯ ಅನ್ವರ್ ಎಂಬಾತ ದಾಳಿ ಮಾಡಿದ್ದಾನೆ ಅಂತ ಹೇಳಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ನೀತು ಅವರು ತಮ್ಮ ಗೆಳಯನಿಗೆ ಸುಮಾರು 5 ಲಕ್ಷ ರೂ. ನೀಡಿದ್ದರು. ಹೀಗಾಗಿ ತಮ್ಮ ಹಣವನ್ನು ಆತನ ಬಳಿ ಕೇಳಲು ಹೋದಾಗ ಈ ಕೃತ್ಯ ಎಸಗಿದ್ದಾನೆ ಎಂದು ನೀತು ಕುಟುಂಬದವರು ಹೇಳಿದ್ದಾರೆ.
ಸದ್ಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಅನ್ವರ್ ನನ್ನು ಬಂಧಿಸಿದ್ದು, ತನಿಖೆ ನಡೆಸುತ್ತಿದ್ದಾರೆ.
