ಪುಣೆ: ವಿದ್ಯಾರ್ಥಿಯೋರ್ವ ಬಿಜೆಪಿ ಶಾಸಕರೊಬ್ಬರ ಮಗಳ ಬೆರಳನ್ನೇ ಕತ್ತರಿಸಿರುವ ಘಟನೆ ಪುಣೆಯಲ್ಲಿ ನಡೆದಿದೆ.
ಬಿಜೆಪಿ ಶಾಸಕ ಸಂಜೀವ್‍ರೆಡ್ಡಿ ಬೋದ್ಕುವಾರ್ ಅವರ ಮಗಳಾದ 22 ವರ್ಷದ ಅಶ್ವಿನಿ ಮೇಲೆ ಆಕೆಯ ಸಹಪಾಠಿಯಾದ ರಾಜೇಶ್ ಬಕ್ಷಿ(23) ದಾಳಿ ನಡೆಸಿ ಕಿರುಬೆರಳನ್ನೇ ಕತ್ತರಿಸಿದ್ದಾನೆ. ಅಲ್ಲದೆ ಅಶ್ವಿನಿಯ ಇತರೆ ಮೂರು ಕೈಬೆರಳುಗಳು, ಆಕೆಯ ಅಂಗೈ ಹಾಗೂ ತುಟಿಯ ಮೇಲೂ ಗಾಯಗಳಾಗಿವೆ.
ಸದ್ಯ ಆರೋಪಿ ರಾಜೇಶ್ ಬಕ್ಷಿಯನ್ನು ಪೊಲೀಸರು ಬಂಧಿಸಿದ್ದು, ಐಪಿಸಿ ಸೆಕ್ಷನ್ 307(ಕೊಲೆ ಯತ್ನ) ಹಾಗೂ 354ಡಿ(ಹಿಂಬಾಲಿಸುವುದು) ಅಡಿ ಪ್ರಕರಣ ದಾಖಲಿಸಿದ್ದಾರೆ. ರಾಜೇಶ್ ಮೂಲತಃ ಹರ್ಯಾಣದವನಾಗಿದ್ದು ವಕಡ್‍ನಲ್ಲಿ ನೆಲೆಸಿದ್ದ ಎಂದು ತಿಳಿದುಬಂದಿದೆ.
ಅಶ್ವಿನಿ ವಕಡ್ ಬಳಿಯ ತಾತೇವಾಡದಲ್ಲಿರುವ ಶ್ರೀ ಬಾಲಾಜಿ ಸೊಸೈಟಿಯ ಸಂಸ್ಥೆಯೊಂದರಲ್ಲಿ ಮೊದಲನೇ ವರ್ಷದ ಎಂಬಿಎ ವ್ಯಾಸಂಗ ಮಾಡ್ತಿದ್ದರು. ಅಶ್ವಿನಿಗೆ 6 ತಿಂಗಳಿಂದ ರಾಜೇಶ್‍ನ ಪರಿಚಯವಿತ್ತು. ರಾಜೇಶ್ ಅಶ್ವಿನಿಗೆ ಕೆಲ ದಿನಗಳಿಂದ ಕಿರುಕುಳ ನೀಡುತ್ತಿದ್ದರಿಂದ ಆಕೆ ಆತನೊಂದಿಗೆ ಮಾತನಾಡುವುದನ್ನ ಬಿಟ್ಟಿದ್ದರು ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.
ಕಳೆದ ಭಾನುವಾರ ಅಶ್ವಿನಿ ಕಾಲೇಜು ಅಧಿಕಾರಿಗಳಿಗೆ ರಾಜೇಶ್ ವಿರುದ್ಧ ದೂರು ನೀಡಿದ್ದರು. ನಂತರ ಶ್ರೀ ಬಾಲಾಜಿ ಸೊಸೈಟಿಯ ಅಧ್ಯಕ್ಷರಾದ ಬಾಲಸುಬ್ರಮಣಿಯನ್ ರಾಜೇಶ್‍ಗೆ ಎಚ್ಚರಿಕೆ ನೀಡಿದ್ರು. ಇನ್ಮುಂದೆ ಅಶ್ವಿನಿಯೊಂದಿಗೆ ಮಾತನಾಡುವುದಿಲ್ಲ ಎಂದು ರಾಜೇಶ್‍ನಿಂದ ಮುಚ್ಚಳಿಕೆ ಬರೆಸಿಕೊಂಡಿದ್ದರು. ಹೀಗೆ ಬರೆದುಕೊಟ್ಟ ಕೆಲವೇ ಗಂಟೆಗಳಲ್ಲಿ ರಾಜೇಶ್ ಅಶ್ವಿನಿ ಮೇಲೆ ದಾಳಿ ನಡೆಸಿದ್ದಾನೆ ಎಂದು ವಕಡ್ ಪೊಲೀಸರೊಬ್ಬರು ಹೇಳಿಕೆ ನೀಡಿದ್ದಾರೆ.
ಅಶ್ವಿನಿ ಎಂಜಿನಿಯರಿಂಗ್ ಮುಗಿಸಿ ಎಂಬಿಎ ವ್ಯಾಸಂಗ ಮಾಡುತ್ತಿದ್ದರು. ಕಾಲೇಜಿನಿಂದ ಸ್ವಲ್ಪ ದೂರದಲ್ಲೇ ಇದ್ದ ಖಾಸಗಿ ಹಾಸ್ಟೆಲ್‍ವೊಂದರಲ್ಲಿ ತಂಗಿದ್ದರು. ಸೋಮವಾರದಂದು ಅಶ್ವಿನಿ ತನ್ನ ಸ್ನೇಹಿತರೊಂದಿಗೆ ಎಟಿಎಂಗೆ ಹೋಗುತ್ತಿದ್ದ ವೇಳೆ ರಾಜೇಶ್ ಅಲ್ಲಿಗೆ ಬಂದು ಆಕೆಯೊಡೆನೆ ಮಾತನಾಡಲು ಪ್ರಯತ್ನಿಸಿದ್ದಾನೆ. ಆದ್ರೆ ಆಕೆ ನಿರಾಕರಿಸಿದಾಗ ಆತ ಕೋಪಗೊಂಡು ಆಕೆಯ ಮೇಲೆ ಚೂಪಾದ ವಸ್ತುವಿನಿಂದ ಹಲ್ಲೆ ಮಾಡಿದ್ದಾನೆ. ಈ ವೇಳೆ ಅಶ್ವಿನಿಯ ಕಿರುಬೆರಳು ಕಟ್ ಆಗಿದೆ. ಅಲ್ಲದೆ ಆಕೆಯ ಮೂರು ಹಲ್ಲುಗಳೂ ಕೂಡ ಮುರಿದಿವೆ.
ಈ ವೇಳೆ ಅಶ್ವಿನಿಯ ರಕ್ಷಣೆಗೆ ಬಂದ ವಿದ್ಯಾರ್ಥಿಯ ಮೇಲೂ ರಾಜೇಶ್ ಹಲ್ಲೆ ಮಾಡಿದ್ದಾನೆ. ಹಲ್ಲೆಗೊಳಗಾದರೂ ಆ ವಿದ್ಯಾರ್ಥಿ ರಾಜೇಶ್ ಕೈಯ್ಯಲ್ಲಿದ್ದ ಆಯುಧವನ್ನು ಕಿತ್ತು ಎಸೆದಿದ್ದಾನೆ. ಬಳಿಕ ಮತ್ತೊಬ್ಬ ವಿದ್ಯಾರ್ಥಿ ಬಂದಿದ್ದು ಇಬ್ಬರೂ ಸೇರಿ ರಾಜೇಶ್‍ನನ್ನು ಹಿಡಿದಿದ್ದಾರೆ. ಹಲ್ಲೆಗೊಳಗಾದ ಅಶ್ವಿನಿಯನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
ಕಟ್ ಆಗಿದ್ದ ಅಶ್ವಿನಿಯ ಕಿರುಬೆರಳು ಅರ್ಧ ಗಂಟೆಯ ಹುಡುಕಾಟದ ನಂತರ ಸ್ಥಳದಲ್ಲೇ ಸಿಕ್ಕಿದೆ ಎಂದು ವರದಿಯಾಗಿದೆ.
