ಮುಂಬೈ: ಬಣ್ಣದ ಲೋಕದಲ್ಲಿ ಕಾಸ್ಟಿಂಗ್ ಕೌಚ್ ಬಹುತೇಕರನ್ನು ಕಾಡಿದೆ. ಕೆಲವರು ಬಹಿರಂಗವಾಗಿ ಹೇಳಿಕೊಂಡ್ರೆ ಹಲವರು ವಿವಾದಕ್ಕೆ ಗುರಿಯಾಗೋದ ಬೇಡ ಅಂತ ಸುಮ್ಮನಾಗುತ್ತಾರೆ. ಇದೀಗ ಬಾಲಿವುಡ್ ನಟ ಆಯುಷ್ಮಾನ್ ಖುರಾನ ಆರಂಭದಲ್ಲಿ ತಮಗಾದ ಕಾಸ್ಟಿಂಗ್ ಕೌಚ್ ಅನುಭವವನ್ನು ಸಂದರ್ಶನದಲ್ಲಿ ಹೇಳಿಕೊಂಡಿದ್ದರು. ಇದೀಗ ಸಂದರ್ಶನದ ಕೆಲ ಲೇಖನಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ.
ನಿರೂಪಕನಾಗಿ ವೃತ್ತಿ ಜೀವನ ಆರಂಭಿಸಿದ ಆಯುಷ್ಮಾನ್, ರೇಡಿಯೋ ಜಾಕಿಯಾಗಿಯೂ ಕೆಲಸ ಮಾಡಿದ್ದಾರೆ. ತದನಂತರ ಐಪಿಎಲ್ ಕಾರ್ಯಕ್ರಮದ ನಿರೂಪಕರಾಗಿ ಚಿರಪರಿಚಿತರಾದ ಆಯುಷ್ಮಾನ್ ಅವರನ್ನು ಬಣ್ಣದ ಲೋಕ ಸೆಳೆದಿತ್ತು. ಕಿರುತೆರೆಯಲ್ಲಿ ಹೆಸರು ಮಾಡಿದ್ದ ಆಯುಷ್ಮಾನ್ ಕೆಲಸದ ನಡುವೆಯೂ ಸಿನಿಮಾ ಆಡಿಷನ್ ಗಳಿಗೆ ಹಾಜರಾಗುತ್ತಿದ್ದರು. ಒಂದು ಬಾರಿ ಆಡಿಷನ್ ಗೆ ತೆರಳಿದ್ದಾಗ ನಿರ್ಮಾಪಕರೊಬ್ಬರು ಸಿನಿಮಾದಲ್ಲಿ ಅವಕಾಶ ನೀಡುವ ಕುರಿತು ಭರವಸೆ ನೀಡಿದ್ದರು.
ನನಗೆ ನಿನ್ನ ಗುಪ್ತಾಂಗ ತೋರಿಸಿದ್ರೆ ಸಿನಿಮಾದಲ್ಲಿ ಪ್ರಮುಖ ಪಾತ್ರ ನಿನ್ನದಾಗಲಿದೆ ಅಂತ ಹೇಳಿದ್ರು. ಕೂಡಲೇ ನಾನು, ಏನು ಮಾತನಾಡುತ್ತಿದ್ದೀರಿ ಎಂದು ನಿಮಗೆ ಗೊತ್ತಿದೆಯಾ? ನಾನು ಸಲಿಂಗಿ ಅಲ್ಲ ಎಂದು ಹೇಳಿ ಹೊರಬಂದೆ ಅಂತ ಆಯುಷ್ಮಾನ್ ಸಂದರ್ಶನದಲ್ಲಿ ಹೇಳಿದ್ದರು. ಆದ್ರೆ ಸಂದರ್ಶನದಲ್ಲಿ ನಿರ್ಮಾಪಕನ ಹೆಸರನ್ನು ಆಯುಷ್ಮಾನ್ ಬಹಿರಂಗಗೊಳಿಸಲು ಇಷ್ಟಪಡಲಿಲ್ಲ.
ಆಡಿಷನ್ಗೆ ಹೋದಾಗ ಸೋಲೋ ಟೆಸ್ಟ್ ಮಾಡಬೇಕೆಂದು ಹೇಳುವವರು. ದಿಢೀರ್ ಅಂತ ನನ್ನ ನಂಬರ್ 50ಕ್ಕೆ ಬರುತ್ತಿತ್ತು. ಯಾಕೆ ಹೀಗೆ ಅಂತ ಪ್ರಶ್ನಿಸಿದ್ರೆ ನನ್ನನ್ನು ಹೊರಗೆ ಕಳುಹಿಸಲಾಗುತ್ತಿತ್ತು. ಇಂತಹ ತಿರಸ್ಕಾರಗಳನ್ನು ನನ್ನ ತಾಳ್ಮೆಯನ್ನ ಹೆಚ್ಚಿಸಿತು ಎಂದು ಹೇಳಿದ್ದಾರೆ.