ಕಿಸ್ ಮಾಡೋ ಭರದಲ್ಲಿ ಸೇತುವೆಯಿಂದ ಕೆಳಗೆ ಬಿದ್ದ ದಂಪತಿ

ಲಿಮಾ: ಪ್ರೀತಿಯಲ್ಲಿ ಮುಳುಗಿದ್ದ ದಂಪತಿ ಕಿಸ್ ಮಾಡುವ ತನ್ಮಯತೆಯಲ್ಲಿ 50 ಅಡಿ ಎತ್ತರದ ಸೇತುವೆಯಿಂದ ಕೆಳಗೆ ಬಿದ್ದು ಸಾವನ್ನಪ್ಪಿರುವ ಘಟನೆ ಪೆರು ನಗರದಲ್ಲಿ ನಡೆದಿದೆ.

ಎಸ್ಪಿನೋಜ್ (34), ಹೆಕ್ಟರ್ ವಿಡಾಲ್ (36) ಸಾವನ್ನಪ್ಪಿದ ದಂಪತಿಯಾಗಿದ್ದು, ಶನಿವಾರ ತಡರಾತ್ರಿ ದುರ್ಘಟನೆ ನಡೆದಿದೆ. ಟೂರಿಸ್ಟ್ ಗೈಡ್‍ಗಳಾಗಿ ಕೆಲಸ ಮಾಡುವ ದಂಪತಿ ಕಾರ್ಯ ನಿಮಿತ್ತ ಪಟ್ಟಣಕ್ಕೆ ಆಗಮಿಸಿದ್ದರು. ಶನಿವಾರ ಕೆಲಸ ಪೂರ್ಣಗೊಳಿಸಿದ್ದ ದಂಪತಿ ನಗರದ ಬೆಥ್ಲೆಹೆಮ್ ಸೇತುವೆ ಮೇಲೆ ಏಕಾಂತದಲ್ಲಿ ಕಾಲ ಕಳೆಯಲು ನಿರ್ಧರಿಸಿ ನಿಂತಿದ್ದರು.

kisss a

ಸೇತುವೆ ಮೇಲೆ ತನ್ಮಯದಿಂದ ಕಿಸ್ ಮಾಡುತ್ತಿದ್ದ ಸಂದರ್ಭದಲ್ಲಿ ಪತ್ನಿ ಎಸ್ಪಿನೋಜ್ ತನ್ನ ಪತಿಯನ್ನು ಹತ್ತಿರಕ್ಕೆ ಎಳೆದುಕೊಂಡಿದ್ದು, ಈ ವೇಳೆ ಬ್ಯಾಲೆನ್ಸ್ ತಪ್ಪಿದ ಕಾರಣ ಇಬ್ಬರು ಸೇತುವೆ ಮೇಲಿಂದ ಕೆಳಗೆ ಉರುಳಿ ಬಿದ್ದಿದ್ದಾರೆ. ಪರಿಣಾಮ ತೀವ್ರಗಾಯಗೊಂಡ ಇಬ್ಬರನ್ನು ಆಸ್ಪತ್ರೆಗೆ ದಾಖಲಿಸುವ ಪ್ರಯತ್ನ ನಡೆಸಿದರೂ ಎಸ್ಪಿನೋಜ್ ಆಸ್ಪತ್ರೆಗೆ ತೆರಳುವ ಮಾರ್ಗ ಮಧ್ಯದಲ್ಲಿ ಸಾವನ್ನಪ್ಪಿದ್ದಾರೆ. ಪತಿ ವಿಡಾಲ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುವ ಸಂದರ್ಭದಲ್ಲಿ ಸಾವನ್ನಪ್ಪಿದ್ದಾರೆ. ಇಬ್ಬರು ಸೇತುವೆ ಮೇಲಿಂದ ಕೆಳಗೆ ಬಿದ್ದ ದೃಶ್ಯಗಳು ಸ್ಥಳದಲ್ಲಿ ಅಳವಡಿಸಿದ್ದ ಸಿಸಿಟಿವಿ ದೃಶ್ಯಾವಳಿಯಲ್ಲಿ ಸೆರೆಯಾಗಿದೆ.