ಬೆಂಗಳೂರು: ಬಾಲಿವುಡ್ ನಟಿ ಹಾಗೂ ಬಿಗ್ ಬಾಸ್ ಸೀಝನ್ 11ರ ಕಂಟೆಸ್ಟೆಂಟ್ ಒಬ್ಬಳು ಬೆಂಗಳೂರು ಯುವಕನಿಗೆ ವಂಚಿಸಿದ ಘಟನೆಯೊಂದು ಬೆಳಕಿಗೆ ಬಂದಿದೆ.
ಬಾಲಿವುಡ್ ನಟಿ ಭಂದಗೀ ಕಲ್ರಾರ ಮೇಲೆ ಈ ವಂಚನೆ ಆರೋಪ ಕೇಳಿಬಂದಿದೆ. ಭಂದಗೀ ಇನ್‍ಸ್ಟಾಗ್ರಾಂನಲ್ಲಿ ಐ ಫೋನ್ ಎಕ್ಸ್ 1 ಲಕ್ಷದ ಮೊಬೈಲ್ ನ್ನು 68,000 ರೂ. ಮಾರಾಟ ಮಾಡುವುದಾಗಿ ಜಾಹಿರಾತು ನೀಡಿದ್ದಳು.
ಈ ಇನ್‍ಸ್ಟಾಗ್ರಾಂ ಪೋಸ್ಟ್ ನೋಡಿ ಬೆಂಗಳೂರಿನ ಯುವಕ ಯುವರಾಜ್ ನಟಿ ಭಂದಗೀ ಜೊತೆ ಚಾಟ್ ಮಾಡಿದ್ದನು. ನಂತರ ಯುವರಾಜ್ ಐ ಪೋನ್ ಎಕ್ಸ್ ಮೊಬೈಲ್ ಅನ್ನು ನಟಿ ಭಂದಗೀ ಬಳಿ ಕೊಂಡುಕೊಂಡಿದ್ದ. ಅಲ್ಲದೇ ಅಡ್ವಾನ್ಸ್ ಆಗಿ 13 ಸಾವಿರ ರೂ. ಹಣವನ್ನು ಕೂಡ ನೀಡಿದ್ದನು. ಇದಾದ ಬಳಿಕ ಬ್ಲೂ ಡಾರ್ಟ್ ಕೋರಿಯರ್ ಮೂಲಕ ನಟಿ ಪಾರ್ಸಲ್ ಕಳುಹಿಸಿದ್ದಳು.
ಯುವರಾಜ್ ಉಳಿದ ಹಣ 48 ಸಾವಿರ ರೂ. ನೀಡಿ ಕೊರಿಯರ್ ಪಡೆದುಕೊಂಡಿದ್ದನು. ಬಳಿಕ ಯುವರಾಜ್ ಕೋರಿಯರ್ ಶಾಪ್ ಮುಂದೆಯೆ ಬಾಕ್ಸ್ ಒಪನ್ ಮಾಡಿದ್ದನು. ಆದ್ರೆ ಈ ವೇಳೆ ಬಾಕ್ಸ್ ನಲ್ಲಿ ನಕಲಿ ಮೊಬೈಲ್ ಇರುವುದು ಪತ್ತೆಯಾಗಿದೆ.
ಸದ್ಯ ನಟಿ ಭಂದಗೀ ಕಲ್ರಾ ಮತ್ತು ಬ್ಲೂ ಡಾರ್ಟ್ ವಿರುದ್ಧ ಮಾರತ್‍ಹಳ್ಳಿ ಪೊಲೀಸ್ ಠಾಣೆಯಲ್ಲಿ ಯುವಕ ದೂರು ದಾಖಲಿಸಿದ್ದಾನೆ.
