ದಕ್ಷಿಣ ಭಾರತದಲ್ಲಿ ದೀಪಾವಳಿಯ (Deepavali) ಸಂಭ್ರಮ ನಡೆಯುವುದು ಮೂರು ದಿನಗಳ ಕಾಲ. ನರಕ ಚತುರ್ದಶಿ, ಲಕ್ಷ್ಮೀಪೂಜೆ ಮತ್ತು ಬಲಿಪಾಡ್ಯಮಿ ಆಚರಿಸಿದರೆ ದೀಪಾವಳಿಯ ಸಂಭ್ರಮ ಮುಗಿಯಿತು. ಆದರೆ ಉತ್ತರ ಭಾರತ ಮತ್ತು ನೇಪಾಳಗಳಲ್ಲಿ ದೀಪಾವಳಿ ಎಂದರೆ ಐದು ದಿನಗಳ ಹಬ್ಬ ಇಲ್ಲಿ ಅಮಾವಾಸ್ಯೆಗೆ ಎರಡು ದಿನಗಳ ಮೊದಲೇ ದಿವಾಲಿಯ ಸಂಭ್ರಮ ಆರಂಭವಾಗುತ್ತದೆ. ಅಮಾವಾಸ್ಯೆಯ ಲಕ್ಷ್ಮೀಪೂಜೆ ನಡೆದು ಎರಡು ದಿನಗಳ ಬಳಿಕ ಭಾಯಿದೂಜ್ ಎಂಬ ಆಚರಣೆಯೊಡನೆ ಮುಕ್ತಾಯವಾಗುತ್ತದೆ.
ಜೋಡಿ ಹಳ್ಳಿಯಲ್ಲಿ ತಿಂಗಳ ನಂತ್ರ ದೀಪಾವಳಿ:
ಮತ್ತೊಂದು ವಿಶೇಷವೆಂದರೆ ದೇಶವಿಡೀ ದೀಪಾವಳಿಯ ಸಂಭ್ರಮ ಆಚರಿಸುತ್ತಿರುವಾಗ ಉತ್ತರಾಖಂಡದ (Uttarakhand) ಚೌನ್‌ಸರ್- ಬಾವರ್ ಎಂಬ ಗುಡ್ಡಗಾಡಿನ ಜೋಡಿ ಹಳ್ಳಿಗಳ ಜನರು ತಮ್ಮ ಹೊಲಗಳಲ್ಲಿ ದುಡಿಯುತ್ತಾರೆ. ಈ ಜೋಡಿ ಹಳ್ಳಿಯ ಸಂಸ್ಕೃತಿಯೇ ಬೇರೆ.
ಚೌನ್‌ಸರ್ ನಿವಾಸಿಗಳು ತಮ್ಮನ್ನು ಪಾಂಡವರ ವಂಶಜರು ಎಂದು ಕರೆದುಕೊಂಡರೆ, ಬವಾರಿಗಳು ತಮ್ಮನ್ನು ದುರ್ಯೋಧನ ಅಥವಾ ಕೌರವರ ವಂಶಜರು ಎಂದು ಕರೆದುಕೊಳ್ಳುತ್ತಾರೆ. ಈ ಹಳ್ಳಿಗಳ ಪ್ರಧಾನ ದೇವತೆ ಮಹಾಸು ದೇವಿ. ಇವರಲ್ಲಿ ಬಹುಪತಿತ್ವ, ಬಹುಪತ್ನಿತ್ವ ಎರಡೂ ಪದ್ಧತಿಯೂ ಇದೆ. ದೀಪಾವಳಿ ಇವರಲ್ಲೂ ಇದೆ. ಈ ಸಂಭ್ರಮ ಒಂದೆರಡು ದಿನ ಇರೋದಿಲ್ಲ, ಒಂದು ವಾರ ಪೂರ್ತಿ ನಡೆಯುತ್ತದೆ. ಆದ್ರೆ ಈ ದೀಪಾವಳಿ ಹಬ್ಬ ಬರುವುದು ಒಂದು ತಿಂಗಳ ಬಳಿಕ. ಇದನ್ನೂ ಓದಿ: ದೀಪಾವಳಿಯಲ್ಲಿ ಪಟಾಕಿ ಸಿಡಿಸುವುದರ ಮಹತ್ವವೇನು?
ಇವರು ದಸರಾ, ಮಾಘ ಮೇಲಾ, ಬಿಸು ಹಬ್ಬಗಳನ್ನು ಎಲ್ಲರಂತೆ ಆಚರಿಸಿದರೂ ದೀಪಾವಳಿಯನ್ನು ಮಾತ್ರ ಒಂದು ತಿಂಗಳ ಬಳಿಕ ಆಚರಿಸುತ್ತಾರೆ. ಇವರ ದೀಪಾವಳಿಗೆ ಬೂಡೀ ದಿವಾಲಿ (ಹಳೆಯ ದೀಪಾವಳಿ) ಎಂದು ಹೆಸರು. ಇದರ ಸಂಪ್ರದಾಯಗಳೇ ಬೇರೆ. ಉತ್ತರಭಾರತದಲ್ಲಿ ದೀಪಾವಳಿಯನ್ನು ಶ್ರೀರಾಮ ಅಯೋಧ್ಯೆಗೆ ಮರಳಿದ ದಿನವಾಗಿ ಆಚರಿಸುತ್ತಾರೆ. ಈ ಜಾಗ ಪ್ರಾಚೀನ ಅಯೋಧ್ಯಾ ರಾಜ್ಯಕ್ಕೆ ಸೇರಿತ್ತು. ಆದ್ರೂ ಇಲ್ಲಿ ದೀಪಾವಳಿ ತಡ ಯಾಕೆ? ಇದನ್ನೂ ಓದಿ: ದೀಪಾವಳಿ| ಕರಾವಳಿಯಲ್ಲಿ ಗೋಪೂಜೆ ಮಹತ್ವ ಏನು?
ಶ್ರೀರಾಮ ಪತ್ನಿ ಸಮೇತನಾಗಿ ರಾಜಧಾನಿಗೆ ಮರಳಿ ಬಂದ ವಾರ್ತೆ ದೇಶದ ಸುತ್ತ ಕಾಡಿಚ್ಚಿನಂತೆ ಹರಡಿದ್ದರೂ ಈ ಗುಡ್ಡಗಾಡಿನ ಜನರಿಗೆ ಒಂದು ತಿಂಗಳ ಬಳಿಕವೇ ಅದರ ಸುದ್ದಿ ತಲುಪಿತಂತೆ. ಹೀಗಾಗಿ ಇವರು ಶ್ರೀರಾಮನ ಪುನರಾಗಮನದ ಸಂಭ್ರಮ ಒಂದು ತಿಂಗಳು ತಡವಾಗಿ ಆಚರಿಸಿದರಂತೆ. ಇಂದಿಗೂ ದೀಪಾವಳಿಯನ್ನು ಒಂದು ತಿಂಗಳು ತಡವಾಗಿ ಆಚರಿಸುವ ಸಂಪ್ರದಾಯ ಮುಂದುವರಿಸಿದ್ದಾರೆ ಇಲ್ಲಿನ ಜನರು. ಇವರು ತಮ್ಮ ದೀಪಾವಳಿಯನ್ನು ಮನೆಮನೆಗಳ ಅಲಂಕಾರದಲ್ಲಿ ಕಳೆಯುವುದಿಲ್ಲ. ಹೊಲಗಳಲ್ಲಿ ಕಟ್ಟಿಗೆ ರಾಶಿಯನ್ನು ಉರಿಸಿ ಅದರ ಸುತ್ತ ನರ್ತಿಸುತ್ತಾರೆ. ಎರಡೂ ಹಳ್ಳಿಗಳ ಜನ ಒಂದಾಗಿ ಸೇರಿ ಈ ದೀಪಾವಳಿಯ ಸಂಭ್ರಮ ಆಚರಿಸುತ್ತಾರೆ.
ಬಡೀ ದಿವಾಲಿಯ ದಿನ ಚೌನ್‌ಸರ್-ಬಾವರ್ ನಿವಾಸಿಗಳು ಮರದ ಆನೆಯನ್ನು ಊರಿನ ಸುತ್ತ ಮೆರವಣಿಗೆಯಲ್ಲಿ ಒಯ್ಯುತ್ತಾರೆ. ಒಂದು ವಾರದ ತನಕ ಬಣ್ಣ ಬಣ್ಣದ ಬಟ್ಟೆ ಧರಿಸಿ, ಹಾಡು ಕುಣಿತಗಳ ಸಂಭ್ರಮದಲ್ಲಿ ಮುಳುಗಿರುತ್ತಾರೆ. ಇದನ್ನೂ ಓದಿ: ಮನೆಗಳಲ್ಲಿ ಬೆಳಗಲಿ ದೀಪ.. ಕಲರ್‌ಫುಲ್ ದೀಪಾವಳಿಗೆ 10 ದೀಪಾಲಂಕಾರಗಳ ಟಿಪ್ಸ್
