60 ವರ್ಷದ ಪತಿಗೆ 35ರ ಮಹಿಳೆ ಜೊತೆ ಮದ್ವೆ ಮಾಡಿಸಿದ ಪತ್ನಿ

ರಾಂಚಿ: ಗಂಡು ಮಗುವಿಗಾಗಿ ಪತ್ನಿಯೊಬ್ಬಳು 60 ವರ್ಷದ ಪತಿಗೆ 35ರ ಮಹಿಳೆ ಜೊತೆ ಮದುವೆ ಮಾಡಿಸಿದ ಘಟನೆ ಜಾರ್ಖಂಡ್‍ನ ರಾಜನಗರದಲ್ಲಿ ನಡೆದಿದೆ.

60 ವರ್ಷದ ಲಾಲ್‍ಮೋಹನ್‍ಗೆ ಗಂಡು ಮಗು ಬೇಕಾಗಿತ್ತು. ಹಾಗಾಗಿ ಅವರ ತಮ್ಮ ಪತ್ನಿಯ ಒಪ್ಪಿಗೆ ಪಡೆದು 35 ವರ್ಷದ ಚೈತಿ ಮಹತೋ ಜೊತೆ ಎರಡನೇ ಮದುವೆ ಆಗಿದ್ದಾರೆ. 30 ವರ್ಷಗಳ ಹಿಂದೆ ಲಾಲ್‍ಮೋಹನ್, ಸರಳಾ ಅವರನ್ನು ಮದುವೆಯಾಗಿದ್ದರು. ಈ ದಂಪತಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದು, ಅದರಲ್ಲಿ ಒಬ್ಬಳಿಗೆ ಮದುವೆಯಾಗಿದೆ.

ಮೊದಲ ಪತ್ನಿ ಸರಳಾಗೆ ಗಂಡು ಮಗು ಆಗಲಿಲ್ಲ. ಹಾಗಾಗಿ ಲಾಲ್‍ಮೋಹನ್ ಖೀರಿ ನಿವಾಸಿಯಾದ ಚೈತಿ ಮಹರೋಳನ್ನು ಭೀಮ್‍ಖಂಡ ದೇವಸ್ಥಾನದಲ್ಲಿ ಮದುವೆಯಾಗಿದ್ದರು. ಮದುವೆಯಲ್ಲಿ ಮೊದಲ ಪತ್ನಿ ಸರಳಾ ಸೇರಿದಂತೆ ಇಬ್ಬರ ಕುಟುಂಬಸ್ಥರು ಭಾಗಿಯಾಗಿದ್ದರು.

ಈ ಬಗ್ಗೆ ಸಮಾಜಸೇವಿ ರಾಮ್‍ರತನ್ ಪ್ರತಿಕ್ರಿಯಿಸಿ, ಇಬ್ಬರ ಕುಟುಂಬಸ್ಥರು ಖುಷಿಯಿಂದ ಈ ಸಂಬಂಧವನ್ನು ಬೆಳೆಸಿದ್ದಾರೆ. ಲಾಲ್‍ಮೋಹನ್ ಅವರಿಗೆ ಗಂಡು ಮಗುವಾಗಲಿಲ್ಲ. ಹಾಗಾಗಿ ಪತಿ-ಪತ್ನಿ ಇಬ್ಬರು ಸೇರಿ ಈ ನಿರ್ಧಾರ ಕೈಗೊಂಡಿದ್ದಾರೆ. ಚೈತಿ ಅವರಿಗೂ ಮದುವೆ ಆಗುತ್ತಿರಲಿಲ್ಲ. ಅವರ ವಯಸ್ಸು ಕೂಡ ಹೆಚ್ಚಾಗುತ್ತಿತ್ತು. ಹಾಗಾಗಿ ಇಬ್ಬರ ಕುಟುಂಬಸ್ಥರು ಸೇರಿ ಒಳ್ಳೆಯ ನಿರ್ಧಾರ ತೆಗೆದುಕೊಂಡಿದ್ದಾರೆ ಎಂದರು.