ಬೆಂಗಳೂರು: ಬಿಜೆಪಿ ಕಚೇರಿ ಬಳಿ ಪ್ರತಿಭಟನೆ ನಡೆಸುತ್ತಿದ್ದರೂ ನಮ್ಮನ್ನು ಭೇಟಿ ಮಾಡಲೇ ಇಲ್ಲ ಎಂದು ರಾಜ್ಯಾಧ್ಯಕ್ಷ ಬಿಎಸ್ ಯಡಿಯೂರಪ್ಪ ವಿರುದ್ಧ ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದರು. ಈ ಹಿನ್ನೆಲೆಯಲ್ಲಿ ಮಂಗಳವಾರ ಬಿಎಸ್ ಯಡಿಯೂರಪ್ಪ, ಮಾಜಿ ಜಲ ಸಂಪನ್ಮೂಲ ಸಚಿವ ಬಸವರಾಜ ಬೊಮ್ಮಾಯಿ, ರಾಮಚಂದ್ರ ಗೌಡರ ಜೊತೆ ಧರಣಿ ಸ್ಥಳಕ್ಕೆ ಆಗಮಿಸಿದರು.
ಈ ವೇಳೆ, ಯಡಿಯೂರಪ್ಪರನ್ನು ರೈತ ಮುಖಂಡರು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು. ನೀವು ಕೊಟ್ಟ ಮಾತನ್ನು ಮೊದಲು ಉಳಿಸಿಕೊಳ್ಳಿ ಎಂದು ಆಗ್ರಹಿಸಿದರು. ಈ ವೇಳೆ ಯಡಿಯೂರಪ್ಪ ಹೋಗಿ ಸಿಎಂ ಮನೆ ಮುಂದೆ ಪ್ರತಿಭಟನೆ ಮಾಡಿ ಅಂತಾ ಹೇಳುತ್ತಲೇ ಹೋರಾಟಗಾರರು ಗರಂ ಆದರು.
ಮುಂದೆ ಬಿಎಸ್ವೈಗೆ ಮಾತನಾಡಲು ಅವಕಾಶ ನೀಡದೇ ಧಿಕ್ಕಾರ ಕೂಗಿದರು. ಬಸವರಾಜ್ ಬೊಮ್ಮಾಯಿ ಕೈಮುಗಿದು ಬೇಡಿದರೂ ಹೋರಾಟಗಾರರು ಕೇಳಲಿಲ್ಲ. ಹಸಿರು ಶಾಲೂ ಬೀಸಿದರು. ಈ ವೇಳೆ ಕೂಗಾಟ, ತಳ್ಳಾಟ ನಡೆಯಿತು. ಬಿಎಸ್ವೈಗೆ ಘೇರಾವ್ ಹಾಕುವ ಯತ್ನವೂ ನಡೆಯಿತು. ಕೊನೆಗೆ ಅಲ್ಲಿಂದ ಯಡಿಯೂರಪ್ಪ ನಿರ್ಗಮಿಸಿದರು. ಈ ವೇಳೆ ಫಕೀರವ್ವ ಎಂಬ ಮಹಿಳೆ ಅಸ್ವಸ್ಥರಾದರು.
ಈ ನಡುವೆ ಬುಧವಾರ ಮಹದಾಯಿ ಹೋರಾಟಗಾರರು ರಾಜಭವನ, ಸಿಎಂ ಸಿದ್ದರಾಮಯ್ಯ ನಿವಾಸ, ಎಚ್ ದೇವೇಗೌಡ ನಿವಾಸಕ್ಕೆ ಪಾದಯಾತ್ರೆ ಕೈಗೊಳ್ಳಲು ನಿರ್ಧರಿಸಿದ್ದಾರೆ. ಇದನ್ನೂ ಓದಿ: Exclusive ಮಹದಾಯಿ ಪ್ರತಿಭಟನೆ, ಅನಂತ್ ಕುಮಾರ್ ಭಾಷಣ: ಬಿಜೆಪಿ ಸಭೆಯ ಇನ್ಸೈಡ್ ಸ್ಟೋರಿ ಇಲ್ಲಿದೆ
ರೈತರು ಮತ್ತು ಬಿಎಸ್ವೈ ನಡುವೆ ಮಾತುಕತೆ ಹೀಗೆ ನಡೆಯಿತು:
ಬಿಎಸ್ವೈ – ಸಿಎಂ ಮನೆ ಮುಂದೆಯೇ ಹೋಗಿ ಧರಣಿ ನಡೆಸಿ.. ಇಲ್ಲಿ ಯಾಕೆ ಬಂದು ಧರಣಿ ಮಾಡುತ್ತೀರಾ..?
ರೈತರು – ಅದು ನಮ್ಮ ಕೈಯಾಗ ಸಾಧ್ಯ ಇಲ್ರಿ.. ನೀವು ಕೊಟ್ಟ ಭರವಸೆಯನ್ನ ಮೊದಲು ಈಡೇರಿಸ್ರಿ ಸಾಯೇಬ್ರಾ.
ಬಿಎಸ್ವೈ – ಗೋವಾ ಸಿಎಂ ಬರೆದಿರುವ ಪತ್ರವನ್ನ ನಿಮಗೆ ಕೊಡುತ್ತೇನೆ. ನನ್ನ ಕೈಯಲ್ಲಿ ಆಗುವುದು ಇಷ್ಟೇನೆ.. ನೀವು ಅದನ್ನ ತೆಗೆದುಕೊಂಡು ಹೋಗಿ ನ್ಯಾಯಾಧೀಕರಣಕ್ಕೆ ಕೊಡಿ
ರೈತರು – ಅದೆಲ್ಲಾ ಆಗಲ್ರೀ. ಶೆಟ್ರು ಮನೆ ಮುಂದ ಹೋದಾಗ ನಿವ್ಯಾಕ ಬಂದಿದ್ದು. ಅವತ್ತು ಸಮಾವೇಶದಾಗ ಓದಿದ ಪತ್ರ ನಮಗೆ ಕೊಡಿ. ಗೋವಾ ಸಿಎಂ ರೈಟಿಂಗ್ನಲ್ಲಿ ಕೊಟ್ಟ ಕಾಪಿಯನ್ನ ನಮಗೆ ಕೊಡಿ
ಬಸವರಾಜ ಬೊಮ್ಮಯಿ – ನಿಮ್ಮ ಕೈ ಮುಗೀತಿನ್ರಪ್ಪ, ಸುಮ್ನೆ ರಾಜಕೀಯ ಮಾಡ್ತಾಯಿರೋದು ಕಾಂಗ್ರೆಸ್ ಮಂದಿ. ನಮ್ಮ ಮಾತು ಕೇಳಿ ಪ್ರತಿಭಟನೆ ವಾಪಸ್ಸು ತಕ್ಕೊಳಿ. ಈ ಹಿಂದಾ ಕೂಡ ಕೃಷ್ಣಾ ಗಲಾಟೆಯಾದಾಗ ರೈತರೇ ನ್ಯಾಯಾಧೀಕರಣದ ಮುಂದೆ ಹೋಗಿದ್ರು. ಆಗ ನ್ಯಾಯ ನಮಗೆ ಸಿಕ್ಕಿತ್ತು. ಈಗ್ಲೂ ಹಂಗೆ ಮಾಡುದ್ರಾತು. ಇದನ್ನೂ ಓದಿ: ಮಹದಾಯಿಗಾಗಿ ಉತ್ತರ ಕರ್ನಾಟಕ ಬಂದ್: ಎಲ್ಲಿ ಬಂದ್? ಏನ್ ಇರುತ್ತೆ? ಏನ್ ಇರಲ್ಲ?
ರೈತರು – ರೀ ಸಾಯೇಬ್ರಾ. ನಿಮ್ಮ ಸಾಧನೆ ನಾವು ನೋಡಿದ್ದೀವಿ ನೀವು ತೆಪ್ಪಗಿರಿ. ನಾವು ಬಂದಿರೋದಾ ಯಡಿಯ್ಯೂರಪ್ಪ ಜೊತೆ ಮಾತನಾಡ್ಲಿಕ್ಕಾ. ನಿಮ್ಮ ಜೊತೆ ಅಲ್ಲ, ಸುಮ್ಮನ ಹೊರಡಿ ಇಲ್ಲಿಂದ
ಬಿಎಸ್ವೈ – ಆಯ್ತು ಬಿಡ್ರಪ್ಪ ನನ್ನ ಕೈಯಿಂದ ಆಗೋದಿಲ್ಲ ನಿಮಗೆ ಹೇಳೋದಕ್ಕೆ. ಬರ್ತೀನಿ ಬಿಡ್ರಪ್ಪ. ಇದನ್ನೂ ಓದಿ: ಮಹದಾಯಿ ಬಂದ್- ಬುಧವಾರದ ವಿಟಿಯು ಪರೀಕ್ಷೆಗಳು ಮುಂದೂಡಿಕೆ
