ಇಸ್ಲಾಮಾಬಾದ್: ಪಾಕಿಸ್ತಾನದಲ್ಲಿ ಇಬ್ಬರು ಹಿಂದೂ ಹುಡುಗಿಯರನ್ನ ಬಲವಂತವಾಗಿ ಇಸ್ಲಾಂಗೆ ಮತಾಂತರಗೊಳಿಸಿರುವ ಬಗ್ಗೆ ವರದಿಯಾಗಿದೆ. ಪಾಕಿಸ್ತಾನದ ಅಲ್ಪಸಂಖ್ಯಾತ ಮತ್ತು ಮಾನವ ಹಕ್ಕುಗಳ ಹೋರಾಟ ಸಮಿತಿಯ ಟೀಕೆಯ ನಡುವೆಯೇ ಅಪಹರಿಸಿದ ಎರಡೇ ದಿನದಲ್ಲಿಯೇ ಈ ಮತಾಂತರ ನಡೆದಿದೆ.
ಹಿಂದೂ ಯುವತಿಯನ್ನು ಏಕ್ತಾ ಕುಮಾರಿ ಎಂದು ಗುರುತಿಸಲಾಗಿದೆ. ಇಸ್ಲಾಂ ಧರ್ಮದ ಧರ್ಮಗುರು ಎಂದು ಗುರುತಿಸಿಕೊಂಡಿರುವ ಮಿಯಾನ್ ಅಬ್ದುಲ್ ಖಲೀಕ್ ಎಂಬಾತ ತನಗೆ ಪಾಕಿಸ್ತಾನದ ಸೇನೆಯೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದೇನೆ ಎಂದು ನಂಬಿಸಿ ಬಲವಂತವಾಗಿ ಇಸ್ಲಾಂಗೆ ಮಾತಾಂತರಿಸಿದ್ದಾನೆ.
ಬಲೂಚಿಸ್ತಾನದ ಸಿಬಿ ನಗರದ ನಿವಾಸಿಯಾಗಿರುವ ಏಕ್ತಾ ಕುಮಾರಿಯು ವೃತ್ತಿಯಲ್ಲಿ ಶಿಕ್ಷಕಿಯಾಗಿದ್ದರು. ಅನಿಲ್ ಕುಮಾರ್ ಎಂಬವರ ಪುತ್ರಿಯಾದ ಏಕ್ತಾಳನ್ನು ಸ್ಥಳೀಯ ಮುಸ್ಲಿಂ ಯಾರ್ ಮೊಹಮ್ಮದ್ ಭೂಟ್ಟೊ ಅಪಹರಿಸಿದ್ದ ಎಂದು ವರದಿಯಾಗಿತ್ತು.
ಏಕ್ತಾಳನ್ನು ಭೂಟ್ಟೊ ಬಲವಂತವಾಗಿ ಪಾಕಿಸ್ತಾನದ ಸಿಂಧ್ ಪ್ರಾಂತ್ಯದ ಘೋಟ್ಕಿ ಜಿಲ್ಲೆಯ ದಾರಕಿಯಲ್ಲಿರುವ ದರ್ಗಾ ಎ ಆಲಿಯಾ ಭಾರ್ಚುಂಡಿ ಷರೀಪ್‍ಗೆ ಕರೆದುಕೊಂಡು ಹೋಗಿ ಇಸ್ಲಾಂ ಧರ್ಮಕ್ಕೆ ಮತಾಂತರಗೊಳಿಸಿದ್ದಾನೆ. ನಂತರ ಹಿಂದೂ ಯುವತಿಯ ಹೆಸರನ್ನು ಆಯಿಷಾ ಎಂದು ಬದಲಾಯಿಸಿ ಮದುವೆ ಆಗಿದ್ದಾನೆ.
ಈ ಹಿಂದೆ ಧನಿ ಕೊಹ್ಲಹಿ ಎಂಬ ಹಿಂದೂ ಯುವತಿಯನ್ನು ಮುಸ್ಲಿಂ ಯುವಕನೊಬ್ಬ ಬಲವಂತವಾಗಿ ಜುಮಾ ಬಜಾರ್ ಎಂಬ ಪ್ರದೇಶದಿಂದ ಅಪಹರಿಸಿ ಇಸ್ಲಾಂ ಧರ್ಮಕ್ಕೆ ಮತಾಂತರಿಸಿದ್ದ. ಈ ಪ್ರಕರಣದ ನಂತರ ಧನಿ ಕೊಹ್ಲಹಿ ಪೋಷಕರು ಮಗಳನ್ನು ಹುಡುಕಿದ್ದರು ಆಕೆ ಎಲ್ಲಿದ್ದಾಳೆಂಬ ಸಣ್ಣ ಸುಳಿವು ಸಿಕ್ಕಿರಲಿಲ್ಲ ಮತ್ತು ಪೊಲೀಸ್ ಠಾಣೆಯಲ್ಲಿ ಆರೋಪಿಯ ವಿರುದ್ಧ ಯಾವುದೇ ಪ್ರಕರಣ ಕೂಡ ದಾಖಲಿಸಿಲ್ಲ.
ಈ ಎಲ್ಲಾ ಪ್ರಕರಣಗಳಿಂದಾಗಿ ಕಂಗಾಲಾಗಿರುವ ಪಾಕಿಸ್ತಾನದಲ್ಲಿರುವ ಹಿಂದೂಗಳು ಮತ್ತೆ ಎರಡು ದಿನಗಳಲ್ಲಿ ಒಟ್ಟೊಟ್ಟಿಗೆ ನಡೆದ ಘಟನೆಯಿಂದ ಗಾಬರಿಗೊಂಡಿದ್ದಾರೆ. ಇದರೊಂದಿಗೆ ಪಾಕಿಸ್ತಾನದ ಇರ್ಮಾನ್ ಖಾನ್ ಸರ್ಕಾರ ಮತ್ತು ಬಹು ಸಂಖ್ಯಾತ ಮುಸ್ಲಿಂರಿಂದ ಕೂಡಿರುವ ಪಾಕಿಸ್ತಾನ್ ದೇಶ, ಅಲ್ಪಸಂಖ್ಯಾತರಿಗೆ ಮತ್ತು ಮಾನವ ಹಕ್ಕುಗಳ ಹೋರಾಟ ಸಮಿತಿಗೆ ಮತ್ತೆ ದ್ರೋಹ ಬಗೆದಂತಾಗಿದೆ ಎಂದು ಪಾಕಿಸ್ತಾನ ಹಿಂದೂಗಳು ಆಕ್ರೋಶ ಹೊರ ಹಾಕಿದ್ದಾರೆ.
ಈ ಎರಡೂ ಪ್ರಕರಣಗಳನ್ನು ನೋಡಿದ ನಂತರ ಸ್ಥಳೀಯ ಆಡಳಿತವಾಗಲಿ ಅಥವಾ ಪೊಲೀಸ್ ಇಲಾಖೆಯಾಗಲಿ ಯಾವುದೇ ರೀತಿಯ ಕ್ರಮ ಕೈಗೊಳ್ಳದೆ ಮೌನಹರಿಸಿ ಆರೋಪಿಯ ವಿರುದ್ಧ ಕೇಸು ದಾಖಲಿಸಿಕೊಳ್ಳಲು ವಿಫಲವಾಗಿದೆ. ಹಲವು ಪ್ರಕರಣಗಳನ್ನು ಗಮನಿಸಿದಾಗ ಹಿಂದೂ ಯುವತಿಯರನ್ನು ಮದುವೆಯಾದ ನಂತರ ಅವರಿಗೆ ಮಾನಸಿಕ ಮತ್ತು ದೈಹಿಕ ಕಿರುಕುಳ ನೀಡಿ ಕೊಳ್ಳಲಾಗುತ್ತದೆ ಅಥವಾ ವೇಶ್ಯಾವಾಟಿಕೆಗೆ ಮಾರಲಾಗುತ್ತದೆ ಎಂದು ವರದಿಯಾಗಿದೆ.
ಮುಸ್ಲಿಂ ಪಾದ್ರಿಯಾಗಿ ಗುರುತಿಸಿಕೊಂಡಿದ್ದ ಭೂಟ್ಟೊ ಪಾಕಿಸ್ತಾನದ ಸಿಂಧ್ ಪ್ರಾಂತ್ಯದ ಘೋಟ್ಕಿ ಜಿಲ್ಲೆಯ ದಾರಕಿಯಲ್ಲಿರುವ ದರ್ಗಾ ಎ ಆಲಿಯಾ ಭಾರ್ಚುಂಡಿ ಷರೀಪ್ ಮಸೀದಿಯಲ್ಲಿರುತ್ತಿದ್ದ. ಐಶಾರಾಮಿ ಜೀವನ ನಡೆಸುತ್ತಿದ್ದ ಭೂಟ್ಟೊ ಪ್ರತಿದಿನ ಬೆಂಗಾವಲುಗಾರರನ್ನು ತನ್ನ ಜೊತೆಯಾಗಿಸಿಕೊಂಡು ಪ್ರಯಾಣಿಸುತ್ತಿದ್ದ. 2008ರಿಂದ 2013ರ ವರೆಗೆ ಪಾಕಿಸ್ತಾನದ ರಾಷ್ಟ್ರೀಯಾ ಅಸೆಂಬ್ಲಿಯಲ್ಲಿ ಸದಸ್ಯನಾಗಿದ್ದ.
ನಂತರ ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ಅವರ ಪಿಟಿಐ ಜೊತೆ ಕೈಜೋಡಿಸಿ 200 ಹಿಂದೂ ಯುವತಿಯರನ್ನು ಮತಾಂತರಗೊಳಿಸಿರುವುದಾಗಿ ಹೇಳಿಕೆ ಕೊಟ್ಟಿದ್ದ. 2012 ರಲ್ಲಿ ಸ್ಥಳೀಯ ಶಿಕ್ಷಕನ ಮಗಳಾದ ಹಿಂದೂ ಯುವತಿ ರಿಂಕಲ್ ಕುಮಾರಿ ಎಂಬ ಯುವತಿಯನ್ನು ಮತಾಂತರಗೊಳಿಸಿ ಮೊದಲ ಪ್ರಕರಣದಲ್ಲಿ ಸಿಕ್ಕಿಹಾಕಿಕೊಂಡಿದ್ದ.
