ನವದೆಹಲಿ: ಕೊರೊನಾ ವೈರಸ್ ಹರಡುವುದನ್ನು ತೆಗಟ್ಟುವ ಸಲುವಾಗಿ ಇಡೀ ದೇಶವನ್ನೇ ಲಾಕ್ ಡೌನ್ ಮಾಡಲಾಗಿದ್ದು, ಹಲವಾರು ಕಾರ್ಯಕ್ರಮಗಳು, ಮದುವೆಗಳು ರದ್ದಾಗಿವೆ. ಆದರೆ ಹಿಂದಿ ಬಾಗ್ ಬಾಸ್ ಸೀಸನ್ 2ರ ವಿನ್ನರ್ ಅಶುತೋಷ್ ಕೌಶಿಕ್ ಲಾಕ್ ಡೌನ್ ನಡುವೆಯೇ ಮದುವೆಯಾಗಿ ಇದೀಗ ಭಾರೀ ಸುದ್ದಿಯಾಗಿದ್ದಾರೆ.
ಹೌದು. ಅಶುತೋಷ್ ಅವರು ತಮ್ಮ ಮದುವೆಯನ್ನು ಕ್ಯಾನ್ಸಲ್ ಮಾಡಿಕೊಳ್ಳದೆ, ಹಿರಿಯರ ಸಮ್ಮುಖದಲ್ಲಿ ಗೆಳತಿ ಅರ್ಪಿತಾ ತಿವಾರಿಯನ್ನು ನೊಯ್ಡಾದಲ್ಲಿರುವ ಮನೆಯ ಟೆರೇಸ್ ಮೇಲೆಯೇ ವರಿಸಿದ್ದಾರೆ. ಸದ್ಯ ಇವರ ಮದುವೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಮದುವೆ ಕಾರ್ಯಕ್ರಮದಲ್ಲಿ ಅಶುತೋಷ್ ಕುಟುಂಬದ ಆಪ್ತರಷ್ಟೇ ಭಾಗಿಯಾಗಿದ್ದು, ಉಳಿದವರು ವಿಡಿಯೋ ಕಾನ್ಫರೆನ್ಸ್ ಮೂಲಕ ನೂತನ ವಧು-ವರರಿಗೆ ಶುಭ ಕೋರಿದ್ದಾರೆ. ಅಶುತೋಷ್ ಬಳಿ ಬಣ್ಣದ ಶರ್ಟ್ ಹಾಗೂ ಕಡು ನೀಲಿ ಬಣ್ಣದ ಪ್ಯಾಂಟ್ ಧರಿಸಿದ್ದರೆ, ವಧು ಕೆಂಪು ಬಣ್ಣದ ಡ್ರೆಸ್ ಧರಿಸಿ ಬಹಳ ಸರಳವಾಗಿ ಹಸೆಮಣೆ ಏರಿದ್ದನ್ನು ನಾವು ವಿಡಿಯೋದಲ್ಲಿ ಕಾಣಬಹುದಾಗಿದೆ.
ಇತ್ತೀಚೆಗೆ ಮಾಧ್ಯಮಕ್ಕೆ ನೀಡಿದ್ದ ಸಂದರ್ಶನದಲ್ಲಿ ಮಾತನಾಡಿದ್ದ ಅಶುತೋಷ್, ಲಾಕ್ ಡೌನ್ ಘೋಷಣೆಯಾಗುವ ಮೊದಲೇ ಅಂದರೆ ಫೆಬ್ರವರಿಯಲ್ಲಿ ನನ್ನ ಮದುವೆ ದಿನಾಂಕ ನಿಗದಿಯಾಗಿತ್ತು. ಈ ಬಾರಿ ಅಕ್ಷಯ ತೃತೀಯದಂದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟರೆ ಒಳ್ಳೆಯದು ಎಂಬುದಾಗಿ ಅಂದೇ ಮದುವೆ ದಿನಾಂಕವನ್ನು ಫಿಕ್ಸ್ ಮಾಡಿದ್ದೆವು. ದಿನ ನಿಗದಿ ಆದ ಬಳಿಕ ಲಾಕ್ ಡೌನ್ ಘೋಷಣೆಯಾಯಿತು. ಆದರೆ ಮದುವೆಯ ದಿನವನ್ನು ಮುಂದೂಡಲು ಇಬ್ಬರಿಗೂ ಇಷ್ಟವಿರಲಿಲ್ಲ. ಹೀಗಾಗಿ ಅಂದೇ ಇಬ್ಬರೂ ವೂವಾಹಿಕ ಜೀವನಕ್ಕೆ ಕಾಲಿಡಲು ನಿರ್ಧರಿಸಿದೆವು.
ನಾನು ಸೇರಿದಂತೆ ಕೇವಲ 4 ಮಂದಿ ಕಾರಿನಲ್ಲಿ ಅರ್ಪಿತಾಳ ಮನೆಗೆ ತೆರಳಿದೆವು. ಪಂಡಿತರಲ್ಲಿ ಗ್ಲೌಸ್ ಹಾಗೂ ಮಾಸ್ಕ್ ಧರಿಸಲು ಮನವಿ ಮಾಡಿದೆವು. ಈ ಮೂಲಕ ಸರಳವಾಗಿ ಅರ್ಪಿತಾ ಮನೆಯಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವುದಾಗಿ ಅಶುತೋಷ್ ತಿಳಿಸಿದರು.
ನಮ್ಮ ಮದುವೆಗೆ ಖರ್ಚು ಮಾಡುವ ಹಣವನ್ನು ದಾನ ಮಾಡಲು ನಿರ್ಧರಿಸಿದ್ದೇನೆ. ಈ ಬಗ್ಗೆ ಅರ್ಪಿತಾ ಮನೆಯವರಿಗೂ ತಿಳಿಸಿದ್ದು, ಅವರು ಕೂಡ ನಮ್ಮ ನಿರ್ಧಾರಕ್ಕೆ ಸಮ್ಮತಿ ಸೂಚಿಸಿದ್ದಾರೆ ಎಂದರು.
