ಗೌತಮ್ ಐಯ್ಯರ್ ನಿರ್ದೇಶನದ ವೃತ್ರ ಚಿತ್ರ ಈಗೊಂದಷ್ಟು ದಿನಗಳಿಂದ ಸದಾ ಸುದ್ದಿ ಕೇಂದ್ರದಲ್ಲಿದೆ. ಆರಂಭದಲ್ಲಿ ರಶ್ಮಿಕಾ ಮಂದಣ್ಣ ಈ ಚಿತ್ರದ ಮುಖ್ಯ ಪಾತ್ರದಲ್ಲಿ ನಟಿಸುತ್ತಾರೆಂಬುದರಿಂದ ಹಿಡಿದು, ಅವರು ಇತ್ತೀಚೆಗೆ ಈ ಚಿತ್ರದಿಂದ ಎದ್ದು ಹೊರಡೋ ತನಕವೂ ಸುದ್ದಿಯದ್ದೇ ಕಾರುಬಾರು. ಇದೀಗ ಈ ಚಿತ್ರ ನಟಿಯೊಬ್ಬರ ಆಗಮನದಿಂದ ಮತ್ತೆ ಸದ್ದು ಮಾಡುತ್ತಿದೆ.
ಇತ್ತೀಚೆಗಷ್ಟೇ ಈ ಚಿತ್ರದಲ್ಲಿ ರಶ್ಮಿಕಾ ಬಿಟ್ಟು ಹೋಗಿದ್ದ ಜಾಗಕ್ಕೆ ನವ ನಟಿ ನಿತ್ಯಾಶ್ರೀ ಆಗಮನವಾಗಿತ್ತು. ಈ ಮೂಲಕ ಈ ಚಿತ್ರಕ್ಕೆ ವಿಧ್ಯುಕ್ತ ಚಾಲನೆ ಸಿಕ್ಕ ವಿಚಾರವೂ ಜಾಹೀರಾಗಿತ್ತು. ಇದಾದೇಟಿಗೆ ಚಿತ್ರತಂಡ ಉಳಿಕೆ ತಾರಾಗಣದ ಆಯ್ಕೆ ಕಾರ್ಯದಲ್ಲಿ ಬ್ಯುಸಿಯಾಗಿದೆ. ಮಹಿಳಾ ಕೇಂದ್ರಿತವಾದ ಕಥಾ ಹಂದರ ಹೊಂದಿರುವ ಈ ಚಿತ್ರದ ಪ್ರಧಾನವಾದ ಪಾತ್ರಕ್ಕೆ ಸುಧಾ ರಾಣಿ ಆಯ್ಕೆಯಾಗಿದ್ದಾರೆ.
ಇತ್ತೀಚೆಗಷ್ಟೇ ಲೈಫ್ ಜೊತೆ ಒಂದ್ ಸೆಲ್ಫಿ ಚಿತ್ರದಲ್ಲಿ ಅದ್ಭುತ ನಟನೆಯಿಂದ ಗಮನ ಸೆಳೆದಿದ್ದವರು ಸುಧಾರಾಣಿ. ಈ ಮೂಲಕವೇ ಅವರು ತಮ್ಮ ವೃತ್ತಿ ಬದುಕಿನ ಎರಡನೇ ಇನ್ನಿಂಗ್ಸ್ ಅನ್ನು ಭರ್ಜರಿಯಾಗಿ ಶುರು ಮಾಡಿದ್ದರು. ಇದೀಗ ವೃತ್ರ ಚಿತ್ರದಲ್ಲಿಯೂ ಬೆರಗಾಗಿಸುವ ಪಾತ್ರವೊಂದು ಅವರಿಗಾಗಿ ಒಲಿದು ಬಂದಿದೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv
