ಉಡುಪಿ: ಕೃಷಿ ಮಣ್ಣಿನ ಪರಿಮಳವೇ ಅಂತಹದ್ದು. ಎಷ್ಟೇ ಎತ್ತರಕ್ಕೆ ಬೆಳೆದರೂ, ಎಷ್ಟೇ ದೂರ ಹೋದರೂ ತನ್ನೂರಿನ ಮಣ್ಣಿನ ನಂಟನ್ನು ಮರೆಯಲು ಸಾಧ್ಯವಿಲ್ಲ. ಉದ್ಯಮ, ವ್ಯಾಪಾರದ ಒತ್ತಡದ ನಡುವೆಯೂ ಕೃಷಿಯ ಮೇಲಿನ ಪ್ರೀತಿ ಮಾತ್ರ ಕಡಿಮೆಯಾಗಿಲ್ಲ. ವಿದೇಶದಲ್ಲಿ ಉದ್ಯೋಗ ಮಾಡುವ ಅವಕಾಶವಿದ್ದರೂ ತಾಯ್ನಾಡಿನಲ್ಲೇ ಸಾಧನೆ ಮಾಡಬೇಕೆಂಬ ಹಂಬಲದಿಂದ ಕೃಷಿಯತ್ತ ಮುಖ ಮಾಡಿದ ಉಡುಪಿಯ ದಂಪತಿ ಇಂದು ಮಾದರಿ ಕೃಷಿಕರಾಗಿ ಗುರುತಿಸಿಕೊಂಡಿದ್ದಾರೆ. ಮಲ್ಲಿಗೆ ಕೃಷಿಯಿಂದ ಆರಂಭವಾದ ಇವರ ಪಯಣ ಇದೀಗ ಮಿಶ್ರ ಕೃಷಿಯ ಮೂಲಕ ಹಲವು ಆದಾಯದ ಮೂಲಗಳನ್ನು ಕಂಡುಕೊಂಡಿದೆ.
ವೃತ್ತಿಯಲ್ಲಿ ಉದ್ಯಮಿ, ಪ್ರವೃತ್ತಿಯಲ್ಲಿ ಕೃಷಿಕ. ಇದು ಉಡುಪಿಯ ಇಗ್ನೇಷಿಯಸ್ ಡಿ’ಸೋಜ ದಂಪತಿಯ ಕೃಷಿ ಬದುಕಿನ ಪರಿಚಯ. ವಿದೇಶದಲ್ಲಿ ಉದ್ಯೋಗ ಮಾಡುವ ಅವಕಾಶವಿದ್ದರೂ, ಪರದೇಶಕ್ಕೆ ಹೋಗಿ ದುಡಿಯುವುದಕ್ಕಿಂತ ತಮ್ಮೂರಿನಲ್ಲೇ ಏನಾದರೂ ಸಾಧಿಸಬೇಕೆಂಬ ಕನಸು ಕಂಡವರು ಇಗ್ನೇಷಿಯಸ್ ಡಿ’ಸೋಜ. ಇದೇ ಹಂಬಲದಿಂದ ಮಲ್ಲಿಗೆ ಕೃಷಿಗೆ ಕೈಹಾಕಿ, ಬಳಿಕ ಹಿರಿಯ ಮಲ್ಲಿಗೆ ವ್ಯಾಪಾರಿಯಾಗಿ ಗುರುತಿಸಿಕೊಂಡರು. ಇದರ ಜೊತೆಗೆ ಕ್ಯಾಟರಿಂಗ್ ಉದ್ಯಮದಲ್ಲಿಯೂ ತೊಡಗಿಸಿಕೊಂಡು ಯಶಸ್ಸು ಕಂಡರು.
ವ್ಯಾಪಾರ, ಉದ್ಯಮ ಎಂದು ಬಿಡುವಿಲ್ಲದ ಬದುಕು ಸಾಗುತ್ತಿದ್ದರೂ ಕೃಷಿಯ ಮೇಲಿನ ಒಲವು ಮಾತ್ರ ಎಂದಿಗೂ ಕಡಿಮೆಯಾಗಲಿಲ್ಲ. ಹಿರಿಯರಿಂದ ಬಂದ ಜಮೀನಿನಲ್ಲಿ ಕೃಷಿ ಚಟುವಟಿಕೆ ಮುಂದುವರಿಸಿದ ದಂಪತಿ, ಸಾಂಪ್ರದಾಯಿಕ ಕೃಷಿಯ ಜೊತೆಗೆ ಹೊಸ ಪ್ರಯೋಗಗಳಿಗೂ ಮುಂದಾದರು. ಒಂದೇ ಬೆಳೆಗೆ ಸೀಮಿತವಾಗದೆ ಮಿಶ್ರ ಕೃಷಿ ಪದ್ಧತಿಯನ್ನು ಅಳವಡಿಸಿಕೊಂಡು ಹಲವು ಬೆಳೆಗಳನ್ನು ಬೆಳೆಯಲಾರಂಭಿಸಿದರು.
ಇಲ್ಲಿನ ಕೃಷಿ ಭೂಮಿಯಲ್ಲಿ ವಿಶೇಷವಾಗಿ ಗಮನ ಸೆಳೆಯುತ್ತಿರುವುದು ಡ್ರ್ಯಾಗನ್ ಫ್ರೂಟ್ ಕೃಷಿ. ಶಂಕರಪುರದ ಮಣ್ಣಿನಲ್ಲಿಯೇ ಡ್ರ್ಯಾಗನ್ ಫ್ರೂಟ್ ಬೆಳೆದು ಯಶಸ್ಸು ಕಂಡಿರುವ ಇವರು, ಕೃಷಿಯಲ್ಲಿ ಹೊಸ ಸಾಧ್ಯತೆಗಳನ್ನು ತೆರೆದಿಟ್ಟಿದ್ದಾರೆ. ಇದರ ಜೊತೆಗೆ ಆಡು ಸಾಕಾಣಿಕೆ, ಮೀನು ಸಾಕಣೆ, ಕೋಳಿ ಸಾಕಣೆ ಹಾಗೂ ಭತ್ತದ ಕೃಷಿಯನ್ನೂ ಕೈಗೊಂಡಿದ್ದಾರೆ. ಹೀಗೆ ಒಂದೇ ಜಮೀನಿನಲ್ಲಿ ವಿವಿಧ ಕೃಷಿ ಚಟುವಟಿಕೆಗಳನ್ನು ನಡೆಸುವ ಮೂಲಕ ಆದಾಯದ ಹಲವು ಮೂಲಗಳನ್ನು ಸೃಷ್ಟಿಸಿಕೊಂಡಿದ್ದಾರೆ. ಕೃಷಿ ಎಂದರೆ ಕೇವಲ ಬದುಕು ಸಾಗಿಸುವ ಕಾಯಕವಲ್ಲ, ಅದು ಮಣ್ಣಿನೊಂದಿಗಿನ ಭಾವನಾತ್ಮಕ ಸಂಬಂಧ ಎಂಬುದನ್ನು ಇಗ್ನೇಷಿಯಸ್ ಡಿ’ಸೋಜ ದಂಪತಿ ತೋರಿಸಿಕೊಟ್ಟಿದ್ದಾರೆ. ಉದ್ಯಮದ ಯಶಸ್ಸಿನ ನಡುವೆಯೂ ಕೃಷಿಯನ್ನು ಕೈಬಿಡದೆ, ಹೊಸ ಪ್ರಯೋಗಗಳ ಮೂಲಕ ಕೃಷಿ ಬದುಕಿಗೆ ಹೊಸ ಅರ್ಥ ನೀಡುತ್ತಿದ್ದಾರೆ. ಕೃಷಿಯತ್ತ ಯುವಜನರು ವಿಮುಖರಾಗುತ್ತಿರುವ ಈ ಕಾಲದಲ್ಲಿ ಇವರ ಸಾಧನೆ ನಿಜಕ್ಕೂ ಮಾದರಿ.

