ಓವಲ್: ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಫೈನಲ್‍ನಲ್ಲಿ ಭಾರತವನ್ನು 180 ರನ್‍ಗಳಿಂದ ಮಣಿಸುವ ಮೂಲಕ ಪಾಕಿಸ್ತಾನ ಮೊದಲ ಬಾರಿಗೆ ಪ್ರಶಸ್ತಿ ಜಯಿಸಿದೆ.
ಗೆಲ್ಲಲು 339 ರನ್‍ಗಳ ಕಠಿಣ ಗುರಿಯನ್ನು ಪಡೆದ ಭಾರತ 30.3 ಓವರ್ ಗಳಲ್ಲಿ 158 ರನ್‍ಗಳಿಗೆ ಆಲೌಟ್ ಆಯ್ತು.
ಆರಂಭದಲ್ಲಿ ಬೌಲರ್‍ಗಳು ಕೈ ಕೊಟ್ಟರೆ ಬ್ಯಾಟಿಂಗ್ ನಲ್ಲಿ ಬ್ಯಾಟ್ಸ್ ಮನ್‍ಗಳು ಕೈ ಕೊಟ್ಟ ಕಾರಣ ಭಾರತಕ್ಕೆ ಹೀನಾಯ ಸೋಲಾಗಿದೆ.
ಭಾರತದ ಪರ ಹಾರ್ದಿಕ್ ಪಾಂಡ್ಯ ಬಿರುಸಿನ 76 ರನ್(43 ಎಸೆತ, 4 ಬೌಂಡರಿ, 6 ಸಿಕ್ಸರ್) ಸಿಡಿಸಿ ತಾನೊಬ್ಬ ಉತ್ತಮ ಆಲ್‍ರೌಂಡರ್ ಎಂದು ತೋರಿಸಿಕೊಟ್ಟರೆ, ಶಿಖರ್ ಧವನ್ 21 ರನ್, ಯುವರಾಜ್ ಸಿಂಗ್ 22 ರನ್, ರವೀಂದ್ರ ಜಡೇಜಾ 15 ರನ್ ಗಳಿಸಿದರು.
ರೋಹಿತ್ ಶರ್ಮಾ 0, ಕೊಹ್ಲಿ 5, ಧೋನಿ 4, ಜಾಧವ್ 9, ಆರ್ ಅಶ್ವಿನ್ 1, ಭುವನೇಶ್ವರ್ ಕುಮಾರ್ ಔಟಾಗದೇ 1, ಬುಮ್ರಾ 1 ರನ್ ಗಳಿಸಿದರು.
ಪಾಕ್ ಪರ ಮೊಹಮ್ಮದ್ ಅಮೀರ್ ಮತ್ತು ಹಸನ್ ಅಲಿ ತಲಾ 3 ವಿಕೆಟ್ ಪಡೆದರೆ, ಶಾಡಾಬ್ ಖಾನ್ 2, ಜುನೈದ್ ಖಾನ್ 1 ವಿಕೆಟ್ ಪಡೆದರು.
ಭರ್ಜರಿ ಮೊತ್ತ: ಟಾಸ್ ಸೋತು ಬ್ಯಾಟಿಂಗ್ ಆರಂಭಿಸಿದ ಪಾಕಿಸ್ತಾನ ಫಖರ್ ಜಮಾನ್ ಶತಕ ಮತ್ತು ಅಜರ್ ಅಲಿ ಅವರ ಅರ್ಧಶತಕದಿಂದಾಗಿ ನಿಗದಿತ 50 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 338 ರನ್ ಗಳಿಸಿತ್ತು.
ಶತಕದ ಜೊತೆಯಾಟ: ಆರಂಭಿಕ ಆಟಗಾರರಾದ ಫಕರ್ ಜಮಾನ್ ಮತ್ತು ಖಕರ್ ಅಲಿ 138 ಎಸೆತಗಳಲ್ಲಿ 128 ರನ್ ಜೊತೆಯಾಟವಾಡುವ ಮೂಲಕ ಪಾಕ್ ಇನ್ನಿಂಗ್ಸ್ ಗೆ ಭದ್ರ ಅಡಿಪಾಯ ಹಾಕಿದರು. 61 ಎಸೆತಗಳಲ್ಲಿ ಅರ್ಧಶತಕಗಳಿಸಿದ್ದ ಫಖರ್ ಅಲಿ 59 ರನ್(71 ಎಸೆತ, 6 ಬೌಂಡರಿ, 1 ಸಿಕ್ಸರ್) ಗಳಿಸಿದ್ದಾಗ ರನ್‍ಔಟ್ ಆದರು.
ಫಖರ್ ಜಮಾನ್ ಶತಕ: 4ನೇ ಪಂದ್ಯವನ್ನು ಆಡುತ್ತಿರುವ ಫಖರ್ ಜಮಾನ್ 92 ಎಸೆತದಲ್ಲಿ ಮೊದಲ ಶತಕ ಹೊಡೆದರು. ಅಂತಿಮವಾಗಿ 114 ರನ್(106 ಎಸೆತ, 12 ಬೌಂಡರಿ, 3 ಸಿಕ್ಸರ್) ಗಳಿಸಿದ್ದಾಗ ಪಾಂಡ್ಯ ಎಸೆತದಲ್ಲಿ ಜಡೇಜಾಗೆ ಕ್ಯಾಚ್ ನೀಡಿ ಔಟಾದರು.
ನಂತರ ಬಂದ ಬಾಬರ್ ಅಜಂ 46 ರನ್‍ಗಳಿಸಿದರೆ ಶೋಯಬ್ ಮಲಿಕ್ 12 ರನ್‍ಗಳಿಸಿ ಔಟಾದರು. ಕೊನೆಯಲ್ಲಿ ಮುರಿಯದ 5ನೇ ವಿಕೆಟಿಗೆ 45 ಎಸೆತಗಳಲ್ಲಿ ಮೊಹಮ್ಮದ್ ಹಫೀಸ್ ಮತ್ತು ಇಮಾದ್ ವಾಸಿಂ 71 ರನ್ ಗಳನ್ನು ಕಲೆ ಹಾಕಿ ತಂಡದ ಮೊತ್ತವನ್ನು 300 ರನ್‍ಗಳ ಗಡಿ ದಾಟಿಸಿದರು.
ಮೊಹಮ್ಮದ್ ಹಫೀಸ್ ಔಟಾಗದೇ 57 ರನ್(37 ಎಸೆತ, 4 ಬೌಂಡರಿ, 3 ಸಿಕ್ಸರ್) ಸಿಡಿಸಿದರೆ, ಇಮಾದ್ ವಾಸೀಂ ಔಟಾಗದೇ 25 ರನ್(21 ಎಸೆತ, 1 ಬೌಂಡರಿ, 1 ಸಿಕ್ಸರ್) ಹೊಡೆದರು.
ಭಾರತದ ಪರವಾಗಿ ಭುವನೇಶ್ವರ್ ಕುಮಾರ್, ಹಾರ್ದಿಕ್ ಪಾಂಡ್ಯ, ಕೇದಾರ್ ಜಾಧವ್ ವಿಕೆಟ್ ಪಡೆದರು. ಇತರೇ ರೂಪದಲ್ಲಿ ಭಾರತ 25 ರನ್ ನೀಡಿತ್ತು
ಪಾಕ್ ರನ್ ಏರಿದ್ದು ಹೇಗೆ?
50 ರನ್ – 9.2 ಓವರ್
100 ರನ್ – 17.6 ಓವರ್
150 ರನ್ – 25.6 ಓವರ್
200 ರನ್ – 32.5 ಓವರ್
250 ರನ್ – 40.1 ಓವರ್
300 ರನ್ – 45.2 ಓವರ್
338 ರನ್ – 50 ಓವರ್
ಈ ಹಿಂದಿನ ಚಾಂಪಿಯನ್‍ಗಳು: ದಕ್ಷಿಣ ಆಫ್ರಿಕಾ(1998), ನ್ಯೂಜಿಲೆಂಡ್(2000), ಭಾರತ -ಶ್ರೀಲಂಕಾ(2002), ವೆಸ್ಟ್ ಇಂಡೀಸ್(2004), ಆಸ್ಟ್ರಲಿಯಾ(2006), ಆಸ್ಟ್ರೇಲಿಯಾ(2009), ಭಾರತ(2013)ರಲ್ಲಿ ಕಪ್ ಜಯಿಸಿತ್ತು.
