ಮುಂಬೈ: ಬಾಲಿವುಡ್ ನಟಿ ವಾಣಿ ಕಪೂರ್ ತನ್ನ ಅಭಿಮಾನಿಯ ಕಿರುಕುಳಕ್ಕೆ ಬೇಸತ್ತು ಆತನ ವಿರುದ್ಧ ದೂರು ದಾಖಲಿಸಿದ್ದಾರೆ.
ಕೆಲವು ದಿನಗಳಿಂದ ಅಭಿಮಾನಿಯೊಬ್ಬ ನಟಿ ವಾಣಿ ಕಪೂರ್ ಅವರನ್ನು ಹಿಂಬಾಲಿಸುತ್ತಿದ್ದನು. ವಾಣಿ ಕಪೂರ್ ಕಾರಿನಲ್ಲಿ ಹೋಗುತ್ತಿದ್ದರೆ, ಅಭಿಮಾನಿ ಬೈಕಿನಲ್ಲಿ ಅವರನ್ನು ಫಾಲೋ ಮಾಡುತ್ತಿದ್ದನು. ಮೊದಲು ವಾಣಿ ಆ ಅಭಿಮಾನಿ ಕಡೆ ಗಮನ ಕೊಡದೇ ತನ್ನ ಕಾರಿನ ಸ್ಪೀಡ್ ಹೆಚ್ಚಿಸಿ ಮುಂದೆ ಹೋಗುತ್ತಿದ್ದರು.
ಅಭಿಮಾನಿ ಸುಮಾರು ದಿನಗಳಿಂದ ವಾಣಿ ಅವರನ್ನು ಹಿಂಬಾಲಿಸುತ್ತಿದ್ದನು. ಆದರೆ ಒಂದು ದಿನ ವಾಣಿ ಅವರು ಕಾರಿನಲ್ಲಿ ವರ್ಸಾವಾಗೆ ತೆರಳುತ್ತಿದ್ದಾಗ ಅಭಿಮಾನಿ ಅವರ ಸನಿಹಕ್ಕೆ ಬಂದಿದ್ದಾನೆ. ಇದರಿಂದ ವಾಣಿ ಕಪೂರ್ ಸಾಕಷ್ಟು ಹೆದರಿಕೊಂಡಿದ್ದಾರೆ.
ಆತ ಪದೇ ಪದೇ ಹಿಂಬಾಲಿಸುತ್ತಿರುವುದನ್ನು ನೋಡಿ ಕೊನೆಗೆ ವಾಣಿ ಕಪೂರ್ ವರ್ಸಾವಾ ಠಾಣೆಯಲ್ಲಿ ಅಭಿಮಾನಿ ವಿರುದ್ಧ ದೂರು ದಾಖಲಿಸಿದ್ದಾರೆ.
ದೂರಿನ ಆಧಾರದಲ್ಲಿ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದಿದ್ದಾರೆ. ತನಿಖೆ ವೇಳೆ ಅಭಿಮಾನಿ ಹೆಸರು ಸಮೀರ್ ಖಾನ್ ಎಂದು ತಿಳಿದು ಬಂದಿದೆ. ಸದ್ಯ ಪೊಲೀಸರು ಅಭಿಮಾನಿ ವಿರುದ್ಧ ಯಾವ ಕ್ರಮ ಕೈಗೊಂಡಿದ್ದಾರೆ ಎಂಬುದು ತಿಳಿದು ಬಂದಿಲ್ಲ.