ಮುಂಬೈ: ಬಾಲಿವುಡ್ ಕಾಂಟ್ರವರ್ಸಿ ಕ್ವೀನ್ ರಾಖಿ ಸಾವಂತ್ ಬಿಗ್‍ಬಾಸ್ ಮನೆಗೆ ಎಂಟ್ರಿ ಕೊಟ್ಟಿದ್ದು, ತಮ್ಮ ಮದುವೆ ರಹಸ್ಯ ರಿವೀಲ್ ಮಾಡೋದಾಗಿ ಹೇಳಿದ್ದಾರೆ.
ಕೆಲ ತಿಂಗಳ ಹಿಂದೆ ವಧುವಿನ ಡ್ರೆಸ್ ತೊಟ್ಟ ಫೋಟೋಗಳನ್ನ ರಾಖಿ ಸಾವಂತ್ ಇನ್‍ಸ್ಟಾಗ್ರಾಂನಲ್ಲಿ ಶೇರ್ ಮಾಡಿಕೊಂಡಿದ್ದರು. ತದನಂತರ ಮದುವೆಯಾಗಿದ್ದು ಅಂತ ಹೇಳಿಕೊಂಡು ಮಾಂಗಲ್ಯ ಮತ್ತು ಸಿಂಧೂರ ಹಚ್ಚಿಕೊಳ್ಳಲಾರಂಭಿಸಿದ್ದರು. ಆದ್ರೆ ಇದುವರೆಗೂ ಪತಿ ಯಾರು ಎಂಬುದರ ಗುಟ್ಟನ್ನ ರಾಖಿ ಸಾವಂತ್ ಹೇಳಿಲ್ಲ. ಆದ್ರೆ ನೆಟ್ಟಿಗರು ರಾಖಿ ಡ್ರಾಮಾ ಮಾಡಿದ್ದಾಳೆ ಅಂತಾನೇ ಹೇಳಿದ್ದರು. ಕೆಲ ದಿನಗಳ ಹಿಂದೆ ರಾಖಿ ಡಿವೋರ್ಸ್ ಪಡೆದ ಬಗ್ಗೆಯೂ ಸುದ್ದಿ ಹಬ್ಬಿತ್ತು. ಈ ಎಲ್ಲ ಊಹಾಪೋಹಗಳ ನಡುವೆ ರಾಖಿ ಸಾವಂತ್ ಬಿಗ್‍ಬಾಸ್ ಮನೆಗೆ ಎಂಟ್ರಿ ಕೊಟ್ಟಿದ್ದಾರೆ.
ಬಿಗ್‍ಬಾಸ್ ಮನೆ ಪ್ರವೇಶಿಸುವ ಮುನ್ನ ಮಾತಾಡಿರುವ ರಾಖಿ, ನನ್ನ ಮದುವೆಗೆ ಸಂಬಂಧಿಸಿದ ಎಲ್ಲ ರಹಸ್ಯಗಳನ್ನು ಹೇಳುತ್ತೇನೆ. ಬಿಗ್‍ಬಾಸ್ ಮನೆಯಲ್ಲಿ ಫೋನ್, ಟಿವಿ ಇರಲ್ಲ. ಖಾಲಿ ಕುಳಿತಾಗ ನನ್ನ ಮದುವೆ ವಿಚಾರಗಳನ್ನ ಹಂಚಿಕೊಳ್ಳುತ್ತೇನೆ ಎಂದು ಹೇಳಿದ್ದಾರೆ.
