ಚೆನ್ನೈ: ತಮಿಳುನಾಡಿನಲ್ಲಿ ತಾಯಿಯೊಬ್ಬರು ಮಗಳು ದಲಿತ ಯುವಕನ್ನು ಪ್ರೀತಿಸಿದ್ದಕ್ಕೆ ಆಕೆಯನ್ನು ಜೀವಂತ ಸುಟ್ಟು ಮರ್ಯಾದಾ ಹತ್ಯೆ ಎಸಗಿದ್ದಾರೆ.
ತಮಿಳುನಾಡಿನ ನಾಗಪಟ್ಟಣಂ ಜಿಲ್ಲೆಯ ವಜ್ಮಂಗಲಂ ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ವಜ್ಮಂಗಲಂ ನಿವಾಸಿ ಉಮಾ ಮಹೇಶ್ವರಿ ತನ್ನ 17 ವರ್ಷದ ಮಗಳಿಗೆ ಬೆಂಕಿ ಹಾಕಿ ತಾನು ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ಪರಿಣಾಮ ಯುವತಿ ಸಾವನ್ನಪ್ಪಿದ್ದು, ತಾಯಿಯ ದೇಹ ಶೇ. 80ರಷ್ಟು ಭಾಗ ಸುಟ್ಟುಹೋಗಿದೆ. ಸದ್ಯ ಆಸ್ಪತ್ರೆಯಲ್ಲಿ ತಾಯಿ ಸಾವು ನೋವಿನ ಮಧ್ಯೆ ಹೋರಾಡುತ್ತಿದ್ದಾರೆ. ಇದನ್ನೂ ಓದಿ:22 ವರ್ಷದ ಮಗಳಿಗೆ ವಿದ್ಯುತ್ ಶಾಕ್ ನೀಡಿ, ಕತ್ತು ಸೀಳಿದ ಪಾಪಿ ತಂದೆ
ಗ್ರಾಮದ ರಾಜ್ಕುಮಾರ್(22) ಹಾಗೂ ಯುವತಿ ಪ್ರೀತಿಸುತ್ತಿದ್ದಳು. ಆದರೆ ಮಗಳ ಪ್ರೀತಿ ಮನೆಯವರಿಗೆ ಇಷ್ಟವಿರಲಿಲ್ಲ. ರಾಜ್ಕುಮಾರ್ ದಲಿತ ಎಂಬ ಕಾರಣಕ್ಕೆ ಆತನ ಜೊತೆ ಮಗಳನ್ನು ಮದುವೆ ಮಾಡಿದರೆ ತಮ್ಮ ಮರ್ಯಾದೆ ಹೋಗುತ್ತದೆ ಎಂದು ಹೆತ್ತವರು ಅಂಜಿದ್ದರು. ಆತನನ್ನು ಬಿಟ್ಟುಬಿಡು ಎಂದು ಮಗಳಿಗೆ ಸಾಕಷ್ಟು ಬುದ್ಧಿ ಹೇಳಿದ್ದರು. ಆದರೆ, ಹೆತ್ತವರ ಮಾತು ಕೇಳದ ಯುವತಿ ಮುಂದಿನ ಸೋಮವಾರ ರಾಜ್ಕುಮಾರ್ ಜೊತೆ ಮದುವೆಯಾಗಲು ಸಿದ್ಧತೆ ನಡೆಸಿದ್ದಳು. ಇದೇ ಭಾನುವಾರ ಆಕೆಗೆ 18 ವರ್ಷ ತುಂಬುತ್ತಿತ್ತು. ಹೀಗಾಗಿ ತಡಮಾಡದೇ ಸೋಮವಾರವೇ ಮದುವೆ ಮಾಡಿಕೊಳ್ಳಲು ಪ್ರೇಮಿಗಳು ನಿರ್ಧರಿಸಿದ್ದರು. ಆದರೆ ಈ ವಿಚಾರ ಮನೆಯವರಿಗೆ ಗೊತ್ತಿರಲಿಲ್ಲ. ಇದನ್ನೂ ಓದಿ:ನಿಶ್ಚಿತಾರ್ಥವಾದ ಯುವತಿಯನ್ನು ಪ್ರೀತಿಸಿ ಮದುವೆಯಾದವ ಇಂದು ಶವವಾಗಿ ಪತ್ತೆ
ಈ ಮಧ್ಯೆ ಮಗಳಿಗೆ ತಮ್ಮ ಜಾತಿಯ ಯುವಕನಿಗೆ ಕೊಟ್ಟು ಮದುವೆ ಮಾಡಲು ಪೋಷಕರು ಸಿದ್ಧತೆ ನಾಡೆಸುತ್ತಿದ್ದರು. ಹೀಗಾಗಿ ಯುವತಿಗೆ ಮನೆಯವರು ಏನಾದರೂ ತೊಂದರೆ ಮಾಡಬಹುದು ಎಂದು ಯುವಕ ಆಕೆಯನ್ನು ಹಾಸ್ಟೆಲ್ನಲ್ಲಿ ಇರಿಸಿದ್ದ. ಆದರೆ ಮಗಳು ಮದುವೆಯಾಗುತ್ತಿದ್ದಾಳೆ ಎಂಬ ವಿಚಾರ ತಾಯಿಗೆ ತಿಳಿದಾಗ ಆಕೆಯ ಮನವೊಲಿಸಲು ಸಾಕಷ್ಟು ಪ್ರಯತ್ನಿಸಿ, ಮಗಳನ್ನು ಹಾಸ್ಟೆಲ್ನಿಂದ ಬಲವಂತವಾಗಿ ಮನೆಗೆ ಕರೆದುಕೊಂಡು ಬಂದಿದ್ದರು. ಇದನ್ನೂ ಓದಿ:ಮದ್ವೆಗೆ ಒಪ್ಪಿಲ್ಲವೆಂದು ಯುವತಿಯ ಕತ್ತು ಸೀಳಿ ಪೊಲೀಸರ ಅತಿಥಿಯಾದ
ಇದೇ ವಿಚಾರಕ್ಕೆ ಮಗಳು ಹಾಗೂ ಹೆತ್ತವರ ಮಧ್ಯೆ ಜಗಳ ನಡೆದಿತ್ತು. ತಂದೆ-ತಾಯಿ ಎಷ್ಟೇ ಹೇಳಿದರೂ ಮಗಳು ಮಾತ್ರ ಅವರ ಮಾತನ್ನು ಕೇಳಲು ಸಿದ್ಧವಿರಲಿಲ್ಲ. ಮದುವೆಯಾಗಿ ಮರ್ಯಾದೆ ಕಳೆಯುವುದಕ್ಕಿಂದ ಮಗಳು ಸತ್ತರೆ ಒಳ್ಳೆದು ಎಂದು ತಾಯಿ ಯೋಚಿಸಿದ್ದಾರೆ. ರಾತ್ರಿ ಮಗಳು ಮಲಗಿದ್ದಾಗ ತಾಯಿಯೇ ಆಕೆಯ ಮೈಮೇಲೆ ಸೀಮೆಎಣ್ಣೆ ಸುರಿದು, ಬೆಂಕಿ ಹಚ್ಚಿದ್ದಾರೆ. ಹಾಗೆಯೇ ತಾನೂ ಕೂಡ ಬೆಂಕಿ ಹಚ್ಚಿಕೊಂಡಿದ್ದರು. ಈ ವೇಳೆ ತಾಯಿ ಮಗಳ ಕಿರುಚಾಟ ಕೇಳಿ ಅಕ್ಕಪಕ್ಕದ ಮನೆಯವರು ತಕ್ಷಣ ಸ್ಥಳಕ್ಕೆ ಬಂದು ಇಬ್ಬರನ್ನೂ ಆಸ್ಪತ್ರೆಗೆ ರವಾನಿಸಿದರು. ಆದರೆ ಯುವತಿ ಮಾರ್ಗ ಮಧ್ಯೆಯೇ ಮೃತಪಟ್ಟಿದ್ದು, ತಾಯಿ ಇನ್ನೂ ಚಿಕಿತ್ಸೆ ಪಡೆಯುತ್ತಿದ್ದಾರೆ.
