– ಸೀತೆ ಪಾತ್ರ ಕೈತಪ್ಪಿದ್ದೇಕೆ? ನಟಿ ಶ್ರೀನಿಧಿ ಹೇಳಿದ್ದೇನು?
ರಾಕಿಂಗ್‌ ಸ್ಟಾರ್‌ ಯಶ್ (Yash), ರಣಬೀರ್ ಕಪೂರ್ ಅಭಿನಯದ ‘ರಾಮಾಯಣ’ (Ramayana) ಸಿನಿಮಾ ಇಂದು ತೆರೆಕಂಡಿದ್ದು, ಭರ್ಜರಿ ಸದ್ದು ಮಾಡುತ್ತಿದೆ. ರಾಮಾಯಣ ಸಿನಿಮಾದಲ್ಲಿ ಸೀತೆ ಪಾತ್ರದಲ್ಲಿ ನಟಿಸಿರುವ ಸಾಯಿ ಪಲ್ಲವಿ ಅಭಿನಯಕ್ಕೆ ನಟಿ ಶ್ರೀನಿಧಿ ಶೆಟ್ಟಿ (Srinidhi Shetty) ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ‘ಸಾಯಿ ಪಲ್ಲವಿ ಆಯ್ಕೆ ಅತ್ಯುತ್ತಮ ನಿರ್ಧಾರ. ನಾನು ಕೂಡ ಸೀತೆ ಪಾತ್ರಕ್ಕಾಗಿ ಆಡಿಷನ್ ನೀಡಿದ್ದೆ’ ಎಂದು ನಟಿ ಬಹಿರಂಗಪಡಿಸಿದ್ದಾರೆ.
ನಿತೇಶ್ ತಿವಾರಿ ನಿರ್ಮಾಣದ ‘ರಾಮಾಯಣ’ದಲ್ಲಿ ಸಾಯಿ ಪಲ್ಲವಿ (Sai Pallavi) ಸೀತೆಯ ಪಾತ್ರವನ್ನು ನಿರ್ವಹಿಸಿದ್ದಾರೆ. ಆದರೆ, ನಟಿ ಶ್ರೀನಿಧಿ ಶೆಟ್ಟಿ ಕೂಡ ಈ ಪಾತ್ರಕ್ಕಾಗಿ ಆಡಿಷನ್ ನೀಡಿದ್ದರು. ಈ ಬಗ್ಗೆ ಅವರು ಹಿಂದೊಮ್ಮೆ ಸಂದರ್ಶನವೊಂದರಲ್ಲಿ ಮಾತನಾಡಿದ್ದರು. ಆ ಸಂದರ್ಶನದ ತುಣುಕೊಂದು ಇದೀಗ ಎಕ್ಸ್‌ ಖಾತೆಯಲ್ಲಿ ವೈರಲ್ ಆಗಿದೆ.
‘ಕೆಜಿಎಫ್’ ಸರಣಿಯಲ್ಲಿ ಯಶ್ ಅವರೊಂದಿಗೆ ತೆರೆ ಹಂಚಿಕೊಂಡಿದ್ದ ಶ್ರೀನಿಧಿ, ಸಿದ್ಧಾರ್ಥ್ ಕಣ್ಣನ್ ಅವರ ಪಾಡ್‌ಕಾಸ್ಟ್‌ನಲ್ಲಿ ಕಾಣಿಸಿಕೊಂಡಿದ್ದರು. ‘ನಿತೇಶ್ ತಿವಾರಿ ಅವರು ‘ರಾಮಾಯಣ’ಕ್ಕಾಗಿ ಪಾತ್ರವರ್ಗವನ್ನು ಆಯ್ಕೆ ಮಾಡುತ್ತಿದ್ದಾಗ, ಸೀತಾ ಪಾತ್ರಕ್ಕಾಗಿ ಸಾಯಿ ಪಲ್ಲವಿ, ಆಲಿಯಾ ಭಟ್ ಮತ್ತು ನಿಮ್ಮ ಹೆಸರನ್ನು ಕೂಡ ಪರಿಗಣಿಸಲಾಗಿದೆ ಎಂದು ಜನರು ಹೇಳುತ್ತಿದ್ದರು. ಇದು ನಿಜವೇ?’ ಎಂದು ನಟಿ ಸಿದ್ಧಾರ್ಥ್ ಪ್ರಶ್ನೆ ಮಾಡಿದ್ದರು. ಇದನ್ನೂ ಓದಿ: ವಿಶ್ವಾದ್ಯಂತ 50 ಸಾವಿರ ಥಿಯೇಟರ್‌ಗಳಲ್ಲಿ ರಾಮಾಯಣ ರಿಲೀಸ್‌ – ರಾವಣನಾಗಿ ಅಬ್ಬರಿಸಿದ ಯಶ್
ಅದಕ್ಕೆ ನಟಿ ಶ್ರೀನಿಧಿ ಶೆಟ್ಟಿ ಉತ್ತರಿಸಿ, ‘ಸರಿ, ಈಗ ವಿಷಯ ಹೊರಬಿದ್ದಿದೆ. ಅಂದರೆ, ಮುಹೂರ್ತದ ಚಿತ್ರೀಕರಣ ಈಗಾಗಲೇ ನಡೆಯುತ್ತಿದೆ. ಹಾಗಾಗಿ, ನಾನಿದನ್ನು ಹೇಳಬಹುದು ಎಂದುಕೊಳ್ಳುತ್ತೇನೆ. ಹೌದು, ನಾನು ಅವರನ್ನು ಭೇಟಿಯಾಗಿದ್ದೆ. ಸ್ಕ್ರೀನ್ ಟೆಸ್ಟ್ ಕೂಡ ನೀಡಿದ್ದೆ’ ಎಂದು ಒಪ್ಪಿಕೊಂಡಿದ್ದಾರೆ.
ನೀವು ಎಂದಾದರೂ ನಿರಾಶೆಗೊಂಡು, ‘ಅಯ್ಯೋ, ಈ ಸಿನಿಮಾ ನನ್ನ ಕೈತಪ್ಪಿ ಹೋಯಿತಲ್ಲಾ. ಇದೊಂದು ಅತ್ಯಂತ ಸ್ಮರಣೀಯ ಪಾತ್ರವಾಗಬಹುದಿತ್ತು, ಅಲ್ಲವೇ?’ ಎಂದು ಯೋಚಿಸಿದ್ದೀರಾ? ಎಂದು ಸಿದ್ಧಾರ್ಥ್ ಮತ್ತೆ ಪ್ರಶ್ನಿಸಿದ್ದರು.
ಅದಕ್ಕೆ ನಟಿ, ‘ಸೀತೆ? ಹೌದು… ನನಗೆ ನೆನಪಿದೆ, ನಾನು ಮೂರು ದೃಶ್ಯಗಳಿಗೆ ಚೆನ್ನಾಗಿ ಸಿದ್ಧತೆ ನಡೆಸಿ, ಅವುಗಳನ್ನು ಅಭಿನಯಿಸಿ ತೋರಿಸಿದ್ದೆ. ಅವರು ಕೂಡ ಸಕಾರಾತ್ಮಕವಾಗಿ ಸ್ಪಂದಿಸಿದರು. ನನ್ನ ಆಡಿಷನ್ ಅವರಿಗೆ ತುಂಬಾ ಇಷ್ಟವಾಯಿತು. ಆದರೆ ಎಲ್ಲೋ ಒಂದು ಕಡೆ, ಏನೋ ಒಂದು ರೀತಿಯ ಭಾವನೆ ನನ್ನಲ್ಲಿತ್ತು. ಅದೇ ಸಮಯದಲ್ಲಿ ಯಶ್ ಕೂಡ ‘ರಾಮಾಯಣ’ದ ಭಾಗವಾಗಲಿದ್ದಾರೆ ಎಂದು ನಾನು ಕೇಳಿದ್ದೆ. ಆ ವರ್ಷದ ಏಪ್ರಿಲ್‌ನಲ್ಲಿ ‘ಕೆಜಿಎಫ್ 2′ ಬಿಡುಗಡೆಯಾಗಿತ್ತು. ಅದರಲ್ಲಿನ ರಾಕಿ ಹಾಗೂ ರೀನಾ ಜೋಡಿ ಭಾರಿ ಯಶಸ್ಸು ಕಂಡಿತ್ತು. ಜನರು ನಮ್ಮನ್ನು ಒಟ್ಟಿಗೆ ನೋಡುವುದನ್ನು ಇಷ್ಟಪಟ್ಟಿದ್ದರು. ಆ ನಂತರ, ಒಂದೆರಡು ತಿಂಗಳು ಕಳೆಯುವುದರಲ್ಲೇ ಈ ಅವಕಾಶ ಬಂತು. ಒಂದು ವೇಳೆ ಅವರು ರಾವಣನ ಪಾತ್ರದಲ್ಲಿ ಮತ್ತು ನಾನು ಸೀತೆಯ ಪಾತ್ರದಲ್ಲಿ ನಟಿಸಿದರೆ, ನಾವು ಪರಸ್ಪರ ಎದುರಾಳಿಗಳಾಗುತ್ತೇವೆ ಎಂದು ನಾನು ಯೋಚಿಸಿದೆ. ಆಗತಾನೆ ಜನರು ನಮ್ಮನ್ನು ಒಟ್ಟಿಗೆ ನೋಡಿ, ನಮ್ಮ ಜೋಡಿಯನ್ನು ಇಷ್ಟಪಟ್ಟಿದ್ದರು. ಅಂತಹ ಪರಿಸ್ಥಿತಿಯಲ್ಲಿ, ನಾವು ಪರಸ್ಪರ ಎದುರಾಳಿಗಳಾಗಿ ಕಾಣಿಸಿಕೊಳ್ಳುವುದನ್ನು ಪ್ರೇಕ್ಷಕರು ಎಷ್ಟು ಸುಲಭವಾಗಿ ಸ್ವೀಕರಿಸುತ್ತಾರೆ ಎಂಬ ಬಗ್ಗೆ ನನಗೆ ಖಚಿತವಿರಲಿಲ್ಲ’ ಎಂದು ಪ್ರತಿಕ್ರಿಯಿಸಿದ್ದಾರೆ.
‘ಹಾಗಾಗಿ, ಇದು ಫಲಪ್ರದವಾಗದಿರಬಹುದು ಎಂದು ನನಗೆ ಎಲ್ಲೋ ಒಂದು ಕಡೆ ಅನ್ನಿಸಿತ್ತು. ಆದರೆ, ಸಾಯಿ ಪಲ್ಲವಿ ಅತ್ಯುತ್ತಮ ಆಯ್ಕೆ ಎಂದು ನಾನು ಭಾವಿಸುತ್ತೇನೆ. ಈ ಚಿತ್ರದಲ್ಲಿ ಅವರು ಸೀತೆಯ ಪಾತ್ರ ನಿರ್ವಹಿಸುವುದನ್ನು ನೋಡಲು ನಾನು ಉತ್ಸುಕಳಾಗಿದ್ದೇನೆ. ನಾನು ಯಾವಾಗಲೂ ಹೇಳುವಂತೆ, ಒಂದು ವಿಷಯ ಯಶಸ್ವಿಯಾದರೆ ಅದು ತುಂಬಾ ಒಳ್ಳೆಯದು. ಒಂದು ವೇಳೆ ಅದು ಯಶಸ್ವಿಯಾಗದಿದ್ದರೂ, ಅದೂ ಕೂಡ ಅದ್ಭುತವೇ. ಏಕೆಂದರೆ ಅದು ಬೇರೆ ಅವಕಾಶಗಳಿಗೆ ದಾರಿ ಮಾಡಿಕೊಡುತ್ತದೆ’ ಎಂದು ನಟಿ ಮಾತನಾಡಿದ್ದಾರೆ.
‘ರಾಮಾಯಣ’ ಚಿತ್ರದಲ್ಲಿ ರಣಬೀರ್ ಕಪೂರ್ ರಾಮನಾಗಿ, ಸಾಯಿ ಪಲ್ಲವಿ ಸೀತೆಯಾಗಿ ಮತ್ತು ಯಶ್ ರಾವಣನಾಗಿ ನಟಿಸಿದ್ದಾರೆ. ನಿತೇಶ್ ತಿವಾರಿ ನಿರ್ದೇಶನದ ‘ರಾಮಾಯಣ’ವು ಎರಡು ಭಾಗಗಳ ಚಲನಚಿತ್ರ ಸರಣಿಯಾಗಿದ್ದು, ಇದರ ಎರಡನೇ ಭಾಗವು 2028ರ ದೀಪಾವಳಿಯ ಸಮಯದಲ್ಲಿ ಬಿಡುಗಡೆಯಾಗಲಿದೆ.
