ಹಿಂದಿ ಹಾಗೂ ಮರಾಠಿ ಚಿತ್ರರಂಗದಲ್ಲಿ ತಮ್ಮ ಅಮೋಘ ನಟನೆಯಿಂದ ಮನೆಮಾತಾಗಿದ್ದ ನಾನಾ ಪಾಟೇಕರ್(Nana Patekar) ಕನ್ನಡ ಚಿತ್ರರಂಗದಲ್ಲೂ ತಮ್ಮ ಅಳಿಸಲಾಗದ ಛಾಪು ಮೂಡಿಸಿದ್ದರು. 2010ರಲ್ಲಿ ತೆರೆಕಂಡ ‘ಲೂಸ್ ಮಾದ’ ಯೋಗೇಶ್ ನಟನೆಯ ಯಕ್ಷ(Yaksha) ಆಕ್ಷನ್ ಕ್ರೈಮ್ ಚಿತ್ರದ ಮೂಲಕ ಅವರು ಚಂದನವನಕ್ಕೆ (Sandalwood) ಪಾದಾರ್ಪಣೆ ಮಾಡಿದ್ದರು.
ರಮೇಶ್ ಭಾಗವತರ್ ನಿರ್ದೇಶನದಲ್ಲಿ ಹಾಗೂ ಟಿ.ಪಿ. ಸಿದ್ದರಾಜು ನಿರ್ಮಾಣದಲ್ಲಿ ಮೂಡಿಬಂದ ಈ ಚಿತ್ರದಲ್ಲಿ ನಾನಾ ಪಾಟೇಕರ್ ಅವರು ನಾಯಕ ಯಕ್ಷನ ತಂದೆ, ಖಡಕ್ ಪೊಲೀಸ್ ಅಧಿಕಾರಿ (ಡಿಸಿಪಿ) ‘ಯೋಗರಾಜ್ ಪುಲಕೇಶಿ’ ಎಂಬ ಪವರ್‌ಫುಲ್ ಪಾತ್ರದಲ್ಲಿ ಅಭಿನಯಿಸಿದ್ದರು. ಭೂಗತ ಲೋಕದ ವಿರುದ್ಧ ಸಿಡಿದೆದ್ದು ನಿಲ್ಲುವ ಒಬ್ಬ ಪ್ರಾಮಾಣಿಕ ಹಾಗೂ ದಕ್ಷ ಅಧಿಕಾರಿಯ ಈ ಪಾತ್ರವನ್ನು ನಿರ್ದೇಶಕರು ‘ಕಲಿಯುಗದ ಪರಶುರಾಮ’ನಂತೆ ಬಿಂಬಿಸಿದ್ದರು.
ಚಿತ್ರದ ದ್ವಿತೀಯಾರ್ಧದಲ್ಲಿ ಪ್ರವೇಶಿಸುವ ಇವರ ಪಾತ್ರವೇ ಇಡೀ ಕಥೆಗೆ ಬಹುದೊಡ್ಡ ತಿರುವು ನೀಡುತ್ತದೆ. ಭೂಗತ ಪಾತಕಿ ಮಚ್ಚೇಂದ್ರನಾಥ್ ಪೂಂಜಾ (ಅತುಲ್ ಕುಲಕರ್ಣಿ) ಸಂಚು ರೂಪಿಸಿ ಪ್ರಾಮಾಣಿಕ ಅಧಿಕಾರಿ ಯೋಗರಾಜ್ ಪುಲಕೇಶಿ ಅವರನ್ನು ಹತ್ಯೆ ಮಾಡುತ್ತಾನೆ. ತಂದೆಯ ಸಾವಿಗೆ ಪ್ರತೀಕಾರ ತೀರಿಸಿಕೊಳ್ಳಲು ಮತ್ತು ಅಧರ್ಮವನ್ನು ಮಟ್ಟಹಾಕಲು ನಾಯಕ ಭೂಗತ ಲೋಕಕ್ಕೆ ಪ್ರವೇಶಿಸುವುದೇ ಚಿತ್ರದ ಪ್ರಮುಖ ತಿರುಳಾಗಿತ್ತು.
ವಿಶೇಷವೆಂದರೆ, ಬಾಲಿವುಡ್‌ನ ತಮ್ಮ ಖ್ಯಾತ ‘ಯಶ್ವಂತ್’ ಚಿತ್ರದ “ಏಕ್ ಮಚ್ಚರ್ ಸಾಲಾ…” ಡೈಲಾಗ್ ಅನ್ನು ಈ ಚಿತ್ರದಲ್ಲಿ ಕನ್ನಡ ರೂಪಾಂತರದಲ್ಲಿ ಹೇಳಿ, ಹಾಡೊಂದಕ್ಕೆ ಹೆಜ್ಜೆ ಹಾಕುವ ಮೂಲಕ ಕನ್ನಡಿಗರನ್ನು ರಂಜಿಸಿದ್ದರು. ಅಷ್ಟೇ ಅಲ್ಲದೆ, ತಮ್ಮ ಪಾತ್ರಕ್ಕೆ ಬೇರೆಯವರಿಂದ ಧ್ವನಿ ಕೊಡಿಸದೆ ಸ್ವತಃ ತಾವೇ ಕನ್ನಡ ಭಾಷೆ ಕಲಿತು ಡಬ್ಬಿಂಗ್ ಮಾಡಿದ್ದು ಅವರ ವೃತ್ತಿಪರತೆಗೆ ಸಾಕ್ಷಿಯಾಗಿತ್ತು. ಚಂದನವನದಲ್ಲಿ ನಾನಾ ಪಾಟೇಕರ್ ನಟಿಸಿದ ಏಕೈಕ ಚಿತ್ರ ಇದಾಗಿದ್ದು, ಅವರ ಖಡಕ್ ಅಭಿನಯ ಕನ್ನಡಿಗರ ಮನದಲ್ಲಿ ಸದಾ ಹಸಿರಾಗಿ ಉಳಿದಿದೆ.
ಯಕ್ಷ ಚಿತ್ರದಲ್ಲಿ ಯೋಗೇಶ್ ತಂದೆಯಾಗಿ, ಖಡಕ್ ಪೊಲೀಸ್ ಅಧಿಕಾರಿ ‘ಯೋಗರಾಜ್ ಪುಲಕೇಶಿ’ ಪಾತ್ರವನ್ನು ಸೃಷ್ಟಿಸಿದ್ದ ನಿರ್ದೇಶಕ ರಮೇಶ್ ಭಾಗವತರ್, ಆ ಪಾತ್ರಕ್ಕೆ ನಾನಾ ಪಾಟೇಕರ್ ಅವರೇ ಬೇಕೆಂದು ಬರೋಬ್ಬರಿ ಮೂರು ವರ್ಷ ಪಟ್ಟುಹಿಡಿದಿದ್ದರು. “ನಿರ್ಮಾಪಕ ಟಿ.ಪಿ. ಸಿದ್ದರಾಜು ಅವರು ಸಂಭಾವನೆ ಬಗ್ಗೆ ಚಿಂತಿಸದೆ ನಾನಾ ಅವರನ್ನು ಸಂಪರ್ಕಿಸಲು ಗ್ರೀನ್ ಸಿಗ್ನಲ್ ನೀಡಿದ್ದರು. ಭೋಪಾಲ್‌ನಲ್ಲಿ ‘ರಾಜ್‌ನೀತಿ’ ಶೂಟಿಂಗ್‌ನಲ್ಲಿದ್ದ ನಾನಾ ಅವರೊಂದಿಗೆ 4-5 ಸುತ್ತಿನ ಮಾತುಕತೆ ನಡೆಸಿದ ಬಳಿಕ ಅವರು ಒಪ್ಪಿಕೊಂಡರು. ‘ರಾಜ್‌ನೀತಿ’ಯಲ್ಲಿ ಅವರದ್ದು ಶ್ರೀಕೃಷ್ಣನಂಥ ಪಾತ್ರವಾದರೆ, ಯಕ್ಷ ಚಿತ್ರದಲ್ಲಿ ಅವರದ್ದು ‘ಕಲಿಯುಗದ ಪರಶುರಾಮ’ನಂತಹ ಪಾತ್ರವಾಗಿತ್ತು” ಎಂದು ರಮೇಶ್ ಈ ಹಿಂದೆ ಮಾಧ್ಯಮಕ್ಕೆ ತಿಳಿಸಿದ್ದರು.
ಕನ್ನಡದಲ್ಲೇ ಸ್ವತಃ ಡಬ್ಬಿಂಗ್
ನಾನಾ ಪಾಟೇಕರ್ ಈ ಹಿಂದೆ ಭಾರತಿರಾಜಾ ಅವರ ‘ಬೊಮ್ಮಲಾಟ್ಟಂ’ ಎಂಬ ತಮಿಳು ಚಿತ್ರದಲ್ಲಿ ನಟಿಸಿದ್ದರೂ ಅದಕ್ಕೆ ಡಬ್ ಮಾಡಿರಲಿಲ್ಲ. ಆದರೆ ಕನ್ನಡದ ‘ಯಕ್ಷ’ ಚಿತ್ರಕ್ಕೆ ಅವರೇ ಸ್ವತಃ ಡಬ್ ಮಾಡಿದ್ದು ವಿಶೇಷ. ಶೂಟಿಂಗ್ ವೇಳೆ ತಮ್ಮ ಸಂಭಾಷಣೆಗಳನ್ನು ಮರಾಠಿ ಅಥವಾ ಹಿಂದಿಯಲ್ಲಿ ಬರೆದುಕೊಂಡು, ಸ್ಪಷ್ಟವಾಗಿ ಕನ್ನಡದಲ್ಲಿ ಉಚ್ಚರಿಸುತ್ತಿದ್ದರು. “ನಿಮ್ಮ ಪಾತ್ರ ಉತ್ತರ ಭಾರತದಲ್ಲಿ ಹೆಚ್ಚು ಕಾಲ ನೆಲೆಸಿರುವ ಹಿನ್ನೆಲೆ ಹೊಂದಿರುವುದರಿಂದ ಉಚ್ಚಾರಣೆಯಲ್ಲಿ ಸ್ವಲ್ಪ ವ್ಯತ್ಯಾಸವಾದರೂ ಸೂಕ್ತವಾಗಿರುತ್ತದೆ” ಎಂದು ನಿರ್ದೇಶಕರು ಮನವೊಲಿಸಿದಾಗ, ನಾನಾ ಪಾಟೇಕರ್ ಕೇವಲ ಎರಡೇ ದಿನಗಳಲ್ಲಿ ಪೂರ್ಣ ಡಬ್ಬಿಂಗ್ ಮುಗಿಸಿಕೊಟ್ಟಿದ್ದರು. ಇದರೊಂದಿಗೆ ಯೋಗರಾಜ್ ಭಟ್ ಬರೆದ ಯುವಜನತೆಗೆ ಸಂದೇಶ ಸಾರುವ ವಿಶೇಷ ಹಾಡಿಗೆ ಯೋಗಿ ಜೊತೆ ಹೆಜ್ಜೆಯನ್ನೂ ಹಾಕಿದ್ದರು.
ಸಾಮಾನ್ಯವಾಗಿ ನಾನಾ ಪಾಟೇಕರ್ ಬಹಳ ಮೂಡಿ, ಮುಂಗೋಪಿ ಎಂಬ ಮಾತಿದೆ. ಆದರೆ ಅವರ ಜೊತೆ ಕೆಲಸ ಮಾಡಿದಾಗ ಆ ಕಲ್ಪನೆಯೇ ಬದಲಾಯಿತು ಎನ್ನುತ್ತಾರೆ ನಿರ್ದೇಶಕರು. ಅವರು ಹೊಗಳುಭಟ್ಟರನ್ನು ಸಹಿಸುತ್ತಿರಲಿಲ್ಲವಷ್ಟೇ, ಆದರೆ ವಾಸ್ತವವಾಗಿ ಅತ್ಯಂತ ವಿನಮ್ರ ಮತ್ತು ಸ್ನೇಹಪರ ವ್ಯಕ್ತಿ. ಚಿತ್ರೀಕರಣ ಮುಗಿದ ಸಂಭ್ರಮದಲ್ಲಿ ಸ್ವತಃ ಅವರೇ ಕೈಯಾರೆ ರುಚಿಕರವಾದ ಮಟನ್ ಚಾಪ್ಸ್ ತಯಾರಿಸಿ ಇಡೀ ಚಿತ್ರತಂಡಕ್ಕೆ ಬಡಿಸಿದ್ದರು.
