ಮಲೆನಾಡ ಪ್ರವಾಸೋದ್ಯಮಕ್ಕೆ ರೆಕ್ಕೆ ಮೂಡಿಸಿದ ಕುವೆಂಪು ವಿಮಾನ ನಿಲ್ದಾಣ

ಮಲೆನಾಡು ಎಂದಾಕ್ಷಣ ಕಣ್ಣ ಮುಂದೆ ಬರುವುದು ಹಚ್ಚ ಹಸಿರಿನ ಬೆಟ್ಟಗಳು, ಧುಮ್ಮಿಕ್ಕುವ ಜಲಪಾತಗಳು, ದಟ್ಟ ಕಾಡುಗಳು, ನದಿಗಳ ನಿನಾದ ಮತ್ತು ಸುಂದರ ಹಳ್ಳಿಗಳು. ಪ್ರಕೃತಿಯ ಮಡಿಲಲ್ಲಿ ಅಡಗಿರುವ ಶಿವಮೊಗ್ಗ (Shivamogga) ಜಿಲ್ಲೆ ಪ್ರವಾಸಿಗರಿಗೆ ಸದಾ ಆಕರ್ಷಣೆಯ ತಾಣ. ಇಲ್ಲಿ ವಿಮಾನ ನಿಲ್ದಾಣವಾಗಿ (Shivamogga Airport) ಸುಮಾರು ಮೂರು ವರ್ಷಗಳು ಕಳೆದಿವೆ. ವಿಮಾನ ನಿಲ್ದಾಣ ನಿರ್ಮಾಣವಾದ ಬಳಿಕ ಜಿಲ್ಲೆಯ ಪ್ರವಾಸೋದ್ಯಮಕ್ಕೆ ಗರಿ ಮೂಡಿದೆ. ಆದರೆ ಕಾರಣಾಂತರಗಳಿಂದ ವಿಮಾನ (Flight) ಹಾರಾಟ ಸ್ಥಗಿತಗೊಂಡಿದ್ದು ಜನರನ್ನು ನಿರಾಸೆಗೆ ತಳ್ಳಿದೆ.

ಮಲೆನಾಡಿಗೆ ತೆರೆದ ವಾಯು ಮಾರ್ಗ
ಶಿವಮೊಗ್ಗದ ಸೋಗಾನೆಯಲ್ಲಿ 450 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ರಾಷ್ಟ್ರಕವಿ ಕುವೆಂಪು ವಿಮಾನ ನಿಲ್ದಾಣವನ್ನು 2023ರ ಫೆಬ್ರವರಿ 27ರಂದು ಪ್ರಧಾನಿ ಮೋದಿಯವರು (Narendra Modi) ಉದ್ಘಾಟಿಸಿದ್ದರು. ಅದೇ ವರ್ಷ ಆಗಸ್ಟ್‌ನಲ್ಲಿ ವಿಮಾನ ಸೇವೆಗಳು ಆರಂಭವಾದವು. ಇದರಿಂದ ಶಿವಮೊಗ್ಗ ಮಾತ್ರವಲ್ಲದೆ, ಸುತ್ತಮುತ್ತಲಿನ ಪ್ರದೇಶಗಳಿಗೂ ವಾಯು ಸಂಪರ್ಕದ ಹೊಸ ದಾರಿ ತೆರೆದಂತಾಗಿದೆ.

ಹಿಂದೆ ಬೆಂಗಳೂರಿನಿಂದ (Bengaluru) ಶಿವಮೊಗ್ಗಕ್ಕೆ ರಸ್ತೆ ಅಥವಾ ರೈಲು ಮೂಲಕ ಪ್ರಯಾಣಿಸಿ, ಅಲ್ಲಿಂದ ಪ್ರವಾಸಿ ತಾಣಗಳಿಗೆ ತೆರಳಬೇಕಾಗುತ್ತಿತ್ತು. ರಸ್ತೆ ಅಥವಾ ಈಗ ವಿಮಾನದಲ್ಲಿ ಬರುವ ಸಾಕಷ್ಟು ಪ್ರವಾಸಿಗರಿಗೆ ಕಡಿಮೆ ಸಮಯದಲ್ಲಿ ನಾನಾ ಭಾಗಗಳಿಗೆ ತೆರಳುವ ಅವಕಾಶ ಸಿಕ್ಕಿದೆ. ಇದು ಮಹಾನಗರಗಳಿಂದ ಪ್ರವಾಸಿಗರನ್ನು ಆಕರ್ಷಿಸಲು ಸಹಕಾರಿಯಾಗಿದೆ.

ಪ್ರವಾಸಿ ತಾಣಗಳ ಪ್ರವೇಶದ್ವಾರ
ಶಿವಮೊಗ್ಗ ಜಿಲ್ಲೆ ಎಂದರೆ ಜೋಗ ಜಲಪಾತದ (Jog Falls) ಭವ್ಯತೆ, ಆಗುಂಬೆಯ ಹಚ್ಚ ಹಸಿರಿನ ಕಾಡು, ತೀರ್ಥಹಳ್ಳಿಯ ಪ್ರಕೃತಿ, ಸಾಗರದ ಐತಿಹಾಸಿಕ ಸೊಗಡು, ಸಕ್ರೆಬೈಲು ಆನೆ ಶಿಬಿರ, ಭದ್ರಾ ಅರಣ್ಯ ಪ್ರದೇಶದ ಜೀವವೈವಿಧ್ಯ—ಹೀಗೆ ಪ್ರವಾಸಿಗರನ್ನು ಸೆಳೆಯುವ ಹಲವು ತಾಣಗಳ ಸಮೂಹ.

ವಿಮಾನ ನಿಲ್ದಾಣದ ಮೂಲಕ ದೂರದ ನಗರಗಳಿಂದ ಬರುವ ಪ್ರವಾಸಿಗರು ಈ ತಾಣಗಳಿಗೆ ಸುಲಭವಾಗಿ ತೆರಳಲು ಸಾಧ್ಯವಾದರೆ, ಸ್ಥಳೀಯ ಪ್ರವಾಸೋದ್ಯಮಕ್ಕೆ ಮತ್ತಷ್ಟು ಚೈತನ್ಯ ಸಿಗಲಿದೆ. ವಿಶೇಷವಾಗಿ ವಾರಾಂತ್ಯ ಪ್ರವಾಸ, ಕುಟುಂಬ ಪ್ರವಾಸ, ಪ್ರಕೃತಿ ವೀಕ್ಷಣೆ ಮತ್ತು ಛಾಯಾಗ್ರಹಣ ಪ್ರವಾಸಗಳಿಗೆ ಇದು ಅನುಕೂಲಕರವಾಗಲಿದೆ.

ಜೋಗ ಜಲಪಾತ, ಅಗುಂಬೆ, ಸಕ್ರೆಬೈಲು ಆನೆ ಶಿಬಿರ, ಸಿಗಂದೂರು ಚೌಡೇಶ್ವರಿ ದೇವಾಲಯ, ಕೊಡಚಾದ್ರಿ ಬೆಟ್ಟ, ಕವಲೇದುರ್ಗ ಕೋಟೆ ನೋಡಲು ಈಗ ಬೆಂಗಳೂರು, ಹೈದರಾಬಾದ್, ಚೆನ್ನೈನಿಂದ ನೇರವಾಗಿ ಪ್ರವಾಸಿಗರು ಬರುತ್ತಿದ್ದಾರೆ. ಶಿವಮೊಗ್ಗ ಮಾತ್ರವಲ್ಲ, ಚಿಕ್ಕಮಗಳೂರು, ದಾವಣಗೆರೆ, ಚಿತ್ರದುರ್ಗ ಜಿಲ್ಲೆಗಳಿಗೂ ಈ ವಿಮಾನ ನಿಲ್ದಾಣ ವರದಾನವಾಗಿದೆ.

ವಿಮಾನ ನಿಲ್ದಾಣವೊಂದು ನಿರ್ಮಾಣವಾದ ಮಾತ್ರಕ್ಕೆ ಪ್ರವಾಸೋದ್ಯಮ ಸಂಪೂರ್ಣವಾಗಿ ಅಭಿವೃದ್ಧಿಯಾಗುವುದಿಲ್ಲ. ವಿಮಾನ ಸಂಪರ್ಕದ ಜೊತೆಗೆ ಉತ್ತಮ ರಸ್ತೆ, ಪ್ರವಾಸಿ ಮಾರ್ಗದರ್ಶಕರು, ಸುರಕ್ಷಿತ ವಸತಿ, ಸ್ವಚ್ಛತೆ, ಸ್ಥಳೀಯ ಸಾರಿಗೆ ಮತ್ತು ಪ್ರವಾಸಿ ತಾಣಗಳ ಮೂಲಸೌಕರ್ಯವೂ ಅಗತ್ಯ.

ಸ್ಥಳೀಯರಿಗೆ ಉದ್ಯೋಗ ಅವಕಾಶ
ಪ್ರವಾಸಿಗರ ಸಂಖ್ಯೆ ಹೆಚ್ಚಾದಂತೆ ಹೋಟೆಲ್‌ಗಳು, ಹೋಂಸ್ಟೇಗಳು, ರೆಸಾರ್ಟ್‌ಗಳು, ಪ್ರವಾಸಿ ವಾಹನಗಳು, ಸ್ಥಳೀಯ ಆಹಾರ ಮಳಿಗೆಗಳು ಮತ್ತು ಪ್ರವಾಸಿ ಮಾರ್ಗದರ್ಶಕರಿಗೆ ಬೇಡಿಕೆ ಹೆಚ್ಚಾಗಿದೆ. ಇದರಿಂದ ಸ್ಥಳೀಯ ಯುವಜನರಿಗೆ ಉದ್ಯೋಗಾವಕಾಶಗಳು ಸೃಷ್ಟಿಯಾಗಿದೆ.

ಇನ್ನಷ್ಟು ಸಂಪರ್ಕದ ಅಗತ್ಯ
ಶಿವಮೊಗ್ಗ ವಿಮಾನ ನಿಲ್ದಾಣದಿಂದ ಪ್ರವಾಸೋದ್ಯಮಕ್ಕೆ ಮತ್ತಷ್ಟು ಚೈತನ್ಯ ಬರಬೇಕಾದರೆ ನಿರಂತರ ವಿಮಾನ ಸೇವೆಗಳು ಬಹಳ ಮುಖ್ಯ. 2026ರಲ್ಲಿ ಬೆಂಗಳೂರಿನ ವಿಮಾನ ಸಂಪರ್ಕವನ್ನು ಮರುಸ್ಥಾಪಿಸುವ ಕುರಿತು ಚರ್ಚೆಗಳು ನಡೆದಿವೆ.

ಇದರ ಜೊತೆಗೆ, ವಿಮಾನ ನಿಲ್ದಾಣದಿಂದ ಜೋಗ, ಆಗುಂಬೆ, ಸಾಗರ, ತೀರ್ಥಹಳ್ಳಿ ಹಾಗೂ ಇತರ ಪ್ರವಾಸಿ ತಾಣಗಳಿಗೆ ಉತ್ತಮ ಸಾರಿಗೆ ವ್ಯವಸ್ಥೆ ಕಲ್ಪಿಸಬೇಕು. ಪ್ರವಾಸಿಗರಿಗೆ ಒಂದೇ ಸ್ಥಳದಲ್ಲಿ ಮಾಹಿತಿ ದೊರೆಯುವ ವ್ಯವಸ್ಥೆ, ಆನ್‌ಲೈನ್‌ ಬುಕಿಂಗ್‌ ಸೌಲಭ್ಯವಿದ್ದರೆ ಮತ್ತಷ್ಟು ಉತ್ತಮವಾಗಲಿದೆ.

ಮಲೆನಾಡಿನ ಭವಿಷ್ಯಕ್ಕೆ ಹೊಸ ಭರವಸೆ
ಶಿವಮೊಗ್ಗ ವಿಮಾನ ನಿಲ್ದಾಣವು ಕೇವಲ ವಿಮಾನಗಳು ಇಳಿಯುವ ಸ್ಥಳವಲ್ಲ. ಇದು ಮಲೆನಾಡಿನ ಪ್ರಕೃತಿ, ಸಂಸ್ಕೃತಿ ಮತ್ತು ಪ್ರವಾಸಿ ಸಾಮರ್ಥ್ಯವನ್ನು ದೇಶದ ವಿವಿಧ ಭಾಗಗಳಿಗೆ ಪರಿಚಯಿಸುವ ಒಂದು ಸಂಪರ್ಕ ಸೇತುವೆಯಾಗುವ ಎಲ್ಲಾ ಲಕ್ಷಣಗಳು ಗೋಚರಿಸುತ್ತಿವೆ. ವಿಮಾನ ಸಂಪರ್ಕದ ಜೊತೆಗೆ ಉತ್ತಮ ಮೂಲಸೌಕರ್ಯ, ನಿರಂತರ ಸೇವೆಗಳು, ಸ್ಥಳೀಯರ ಸಹಭಾಗಿತ್ವ ಮತ್ತು ಪರಿಸರ ಸ್ನೇಹಿ ಪ್ರವಾಸೋದ್ಯಮಕ್ಕೆ ಒತ್ತು ನೀಡಿದರೆ ಶಿವಮೊಗ್ಗ ಜಿಲ್ಲೆಯ ಪ್ರವಾಸೋದ್ಯಮ ಮತ್ತಷ್ಟು ಶ್ರೀಮಂತವಾಗಬಹುದು.

ವಿಮಾನ ನಿಲ್ದಾಣದ ಬಗ್ಗೆ
ಕುವೆಂಪು ವಿಮಾನ ನಿಲ್ದಾಣ ಕಮಲದ ಆಕಾರದ ಟರ್ಮಿನಲ್ ಹೊಂದಿದ್ದು, ಗಂಟೆಗೆ 300 ಪ್ರಯಾಣಿಕರನ್ನು ನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ. 3,200 ಮೀಟರ್ ಉದ್ದದ ರನ್‌ವೇ ಹೊಂದಿದ್ದು, ಬೆಂಗಳೂರು ನಂತರ ರಾಜ್ಯದ ಎರಡನೇ ಅತಿ ದೊಡ್ಡ ರನ್‌ವೇ ಇದಾಗಿದೆ.

ಪ್ರಯಾಣಿಕರ ಅಂಕಿ ಅಂಶ
2023-24ರಲ್ಲಿ 38,647 ಪ್ರಯಾಣಿಕರು, 2024-25ರಲ್ಲಿ 1.17 ಲಕ್ಷ ಮತ್ತು 2025-26ರಲ್ಲಿ 1.86 ಲಕ್ಷ ಪ್ರಯಾಣಿಕರು ಈ ವಿಮಾನ ನಿಲ್ದಾಣವನ್ನು ಬಳಸಿದ್ದಾರೆ. ಇದು ಮಲೆನಾಡಿನ ಪ್ರವಾಸೋದ್ಯಮಕ್ಕೆ ವಿಮಾನ ನಿಲ್ದಾಣ ಎಷ್ಟು ಮುಖ್ಯ ಎಂದು ತೋರಿಸುತ್ತದೆ.

ವಿಮಾನಗಳ ಸ್ಥಗಿತ
ಕಳೆದ ಮೇ ತಿಂಗಳಲ್ಲಿ IndiGo ಮತ್ತು SpiceJet ಸಂಸ್ಥೆಗಳು ತಾಂತ್ರಿಕ ಮತ್ತು DGCA ಅನುಮತಿ ಕಾರಣದಿಂದ ಸೇವೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿವೆ. ಇದರಿಂದ ಪ್ರವಾಸಿಗರಿಗೆ ತೊಂದರೆಯಾಗಿದೆ.

ರಾಜ್ಯ ಸರ್ಕಾರ ನಿರ್ವಹಿಸುತ್ತಿರುವ ಮೊದಲ ವಿಮಾನ ನಿಲ್ದಾಣ ಇದಾಗಿದ್ದು, ಈಗ ಖಾಸಗಿ ನಿರ್ವಹಣೆಗೆ EOI ಕರೆಯಲಾಗಿದೆ. ಮಲೆನಾಡಿನ ಅಭಿವೃದ್ಧಿಗೆ ವಿಮಾನ ನಿಲ್ದಾಣ ಕೇವಲ ಕಟ್ಟಡವಲ್ಲ, ಅದು ನಿರಂತರವಾಗಿ ಹಾರಾಡಬೇಕು. ಬೆಂಗಳೂರು ಮಾತ್ರವಲ್ಲ, ಗೋವಾ, ಹೈದರಾಬಾದ್, ಮುಂಬೈಗೂ ನೇರ ಸಂಪರ್ಕ ಬಂದರೆ ಮಾತ್ರ ಇಲ್ಲಿನ ಪ್ರವಾಸೋದ್ಯಮದ ಕ್ರಾಂತಿ ಸಾಧ್ಯ.