ಹುಬ್ಬಳ್ಳಿ: ಸಿಗರೇಟ್ ಬಾಕ್ಸ್ ತುಂಬಿದ ವಾಹನದಿಂದ 24,41,450 ರೂ. ಮೌಲ್ಯದ ಸರಕು ಕಳ್ಳತನವಾಗಿರುವ ಪ್ರಕರಣ ಬೆಳಕಿಗೆ ಬಂದಿದೆ.
ಈ ಕುರಿತು ಹುಬ್ಬಳ್ಳಿಯ ಬೆಂಡಿಗೇರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಬಳ್ಳಾರಿಯ ಬೈಲವದ್ದಿಗೇರಿ ಗ್ರಾಮದ ಹೊರವಲಯದಲ್ಲಿ ಚಾಲಕ ಮಿನಿ ಲಾರಿ ನಿಲ್ಲಿಸಿ ನೋಡಿದಾಗ ಕಳುವಾಗಿರುವುದು ತಿಳಿದಿದೆ.
ನಗರದ ಗದಗ ರಸ್ತೆಯಲ್ಲಿರುವ ಐಟಿಸಿ ಸಿಗರೇಟ್ ಕಂಪನಿ ಗೋದಾಮಿನಲ್ಲಿ ಒಟ್ಟು 67,25 ಲಕ್ಷ ರೂ. ಬೆಲೆ ಬಾಳುವ 74 ಸಿಗರೇಟ್ ಬಾಕ್ಸ್ ಮತ್ತು ಇತರೆ ಆಹಾರ ದಿನಸಿಗಳ ಒಟ್ಟು 291 ಬ್ಯಾಗ್ ಗಳನ್ನು ಮಿನಿ ಲಾರಿಗೆ ಲೋಡ್ ಮಾಡಲಾಗಿತ್ತು. ಹುಬ್ಬಳ್ಳಿಯಿಂದ ಹೊಸಪೇಟೆ ಮಾರ್ಗವಾಗಿ ಬಳ್ಳಾರಿಗೆ ಹೊರಟ ಚಾಲಕ ಮಧ್ಯದಲ್ಲಿ ಒಮ್ಮೆ ಚಹಾ ಕುಡಿಯಲು ವಾಹನ ನಿಲ್ಲಿಸಿದ್ದ. ಮತ್ತೆ ಪ್ರಯಾಣ ಬೆಳೆಸಿ ಬಳ್ಳಾರಿಯ ಬೈಲವದ್ದಿಗೇರಿ ಗ್ರಾಮದ ಹೊರವಲಯದಲ್ಲಿ ನಿಲ್ಲಿಸಿ ವಾಹನ ಪರಿಶೀಲನೆ ನಡೆಸಿದಾಗ 74 ಬಾಕ್ಸ್ಗಳ ಪೈಕಿ 24 ಸಿಗರೇಟ್ ಬಾಕ್ಸ್ ಗಳು ಕಳ್ಳತನವಾಗಿರುವುದು ಬೆಳಕಿಗೆ ಬಂದಿದೆ.
ಸಿಗರೇಟ್ ಬಾಕ್ಸ್ ಕಳ್ಳತನವಾದ ದೂರಿನ ಮೇರೆಗೆ ಹುಬ್ಬಳ್ಳಿಯ ಬೆಂಡಿಗೇರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆಸಿದ್ದಾರೆ.