ವಿಶ್ವದ ಮೊದಲ ಬೃಹತ್‌ ಎಲೆಕ್ಟ್ರಿಕ್‌ ಫ್ಲೈಟ್‌ ಹಾರಾಟ ಸಕ್ಸಸ್;‌ ವಿಮಾನದ ಒಂದು ಹಾರಾಟದ ವೆಚ್ಚ ಕೇವಲ 500 ರೂ.

ಒಂದು ಕಪ್ ಕಾಫಿ ಕುಡಿಯುವ ಹಣದಲ್ಲಿ ವಿಮಾನದಲ್ಲೇ ಪ್ರಯಾಣ ಮಾಡಬಹುದೇ? ಈ ಪ್ರಶ್ನೆಗೆ, ‘ಸಾಧ್ಯವೇ ಇಲ್ಲ’ ಎಂಬ ಉತ್ತರ ಬಂದೇ ಬರುತ್ತದೆ. ಆದರೂ, ವಿಮಾನಯಾನವನ್ನು ತುಂಬಾ ಅಗ್ಗವಾಗಿಸುವ ಸಂಶೋಧನೆಯೊಂದು ಆಗಿದೆ. ಅಮೆರಿಕದಲ್ಲಿ ಇತ್ತೀಚೆಗೆ ನಡೆದ ಪರೀಕ್ಷಾರ್ಥ ಹಾರಾಟವೊಂದು ಮುಂಬರುವ ವರ್ಷಗಳಲ್ಲಿ ವಿಮಾನ ಪ್ರಯಾಣ ಹೇಗಿರಬಹುದು ಎಂಬುದರ ಕುತೂಹಲಕಾರಿ ನೋಟವನ್ನು ನೀಡಿದೆ. ಭವಿಷ್ಯದಲ್ಲಿ ತುಂಬಾ ಅಗ್ಗದ ದರದಲ್ಲಿ ವಿಮಾನ ಪ್ರಯಾಣ ಮಾಡಬಹುದು ಎಂಬುದನ್ನು ಈ ಸಂಶೋಧನೆ ಮುನ್ನುಡಿ ಬರೆದಿದೆ. ಅದು ಹೇಗೆ? ಏನದು ಸಂಶೋಧನೆ? ವಿಮಾನದ ವಿಶೇಷತೆ ಏನು ಎಂಬ ಪ್ರಶ್ನೆಗಳಿಗೆ ಇಲ್ಲಿದೆ ಸಂಕ್ಷಿಪ್ತ ವಿವರ.

27 ನಿಮಿಷ ಹಾರಾಟಕ್ಕೆ ಕೇವಲ 500 ರೂ. ವೆಚ್ಚದ ವಿದ್ಯುತ್
ನಾವು ನೆಲದಲ್ಲಿ ವಿದ್ಯುತ್‌ಚಾಲಿತ ಸ್ಕೂಟರ್, ಕಾರು, ರೈಲುಗಳನ್ನು ನೋಡಿದ್ದೇವೆ, ಓಡಾಡಿದ್ದೇವೆ. ಆದರೆ ಆಕಾಶಯಾನಕ್ಕೂ ಈ ತಂತ್ರಜ್ಞಾನ ಬಳಕೆಯ ಸಂಶೋಧನೆಯಾಗಿದೆ. ಸಣ್ಣಪುಟ್ಟ ಎಲೆಕ್ಟ್ರಿಕ್‌ ವಿಮಾನಗಳೂ ಬಳಕೆಯಲ್ಲಿವೆ. ಆದರೀಗ ಅಮೆರಿಕ ಮೂಲದ ವಿಮಾನಯಾನ ಕಂಪನಿಯಾದ ಹಾರ್ಟ್ ಏರೋಸ್ಪೇಸ್‌ (Heart Aerospace) ಒಂದು ಹೆಜ್ಜೆ ಮುಂದೆ ಹೋಗಿದೆ. ಲಾಸ್ ಏಂಜಲೀಸ್‌ನಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಸ್ವೀಡಿಷ್-ಸ್ಥಾಪಿತ ಈ ಕಂಪನಿ ತನ್ನ ಪೂರ್ಣ ಪ್ರಮಾಣದ ವಿದ್ಯುತ್‌ಚಾಲಿತ ವಿಮಾನವಾದ X1 ಅನ್ನು ಮೊದಲ ಬಾರಿಗೆ ಯಶಸ್ವಿ ಹಾರಾಟ ನಡೆಸಿದೆ. 27 ನಿಮಿಷಗಳ ಹಾರಾಟದಲ್ಲಿ ಬ್ಯಾಟರಿ ಶಕ್ತಿಯನ್ನು ಮಾತ್ರ ಬಳಸಿತು. ಸುಮಾರು $5 (ಸುಮಾರು ರೂ. 500) ಮೌಲ್ಯದ ವಿದ್ಯುತ್ ಅನ್ನಷ್ಟೇ ಬಳಸಿತು. ವಿಮಾನವು ನ್ಯೂಯಾರ್ಕ್‌ನ ಅಪ್‌ಸ್ಟೇಟ್‌ನಲ್ಲಿರುವ ಪ್ರಾದೇಶಿಕ ವಿಮಾನ ನಿಲ್ದಾಣದಿಂದ ಹೊರಟು, ಸುಮಾರು 1,100 ಅಡಿ (335 ಮೀಟರ್) ಎತ್ತರಕ್ಕೆ ಏರಿತು. ಕೇವಲ ಒಬ್ಬ ಪೈಲಟ್‌ನೊಂದಿಗೆ ಪರೀಕ್ಷೆಯನ್ನು ಪೂರ್ಣಗೊಳಿಸಿತು. ಇದರಲ್ಲಿ ಯಾವುದೇ ಪ್ರಯಾಣಿಕರಿರಲಿಲ್ಲ. ಇದನ್ನೂ ಓದಿ: ಭಾರತದ ಗ್ರಾಮೀಣ ಭಾಗಗಳಿಗೆ ಸ್ಟಾರ್‌ಲಿಂಕ್ ಇಂಟರ್ನೆಟ್ ವರದಾನ: ಎಲಾನ್ ಮಸ್ಕ್

ವಿಮಾನದ ಗಾತ್ರ ಎಷ್ಟು?
ವಿದ್ಯುತ್‌ಚಾಲಿತ ವಿಮಾನವು (Electric Aircraft) ಸಣ್ಣ ವಾಣಿಜ್ಯ ವಿಮಾನದ ಗಾತ್ರದ್ದಾಗಿದೆ. X1 ಒಂದು ಸಣ್ಣ ಪ್ರಾಯೋಗಿಕ ವಿಮಾನವಲ್ಲ. ಇದರ ರೆಕ್ಕೆಗಳು 106 ಅಡಿ, ಮುಂಭಾಗದಿಂದ ಬಾಲದವರೆಗೆ 76 ಅಡಿ ಉದ್ದ ಮತ್ತು 25,000 ಪೌಂಡ್‌ಗಳಿಗಿಂತ ಹೆಚ್ಚು ತೂಕವಿದೆ. ಸರಿಸುಮಾರು ಖಾಲಿ ಶಾಲಾ ಬಸ್‌ನಷ್ಟು ತೂಕ ಹೊಂದಿದೆ.

ವಿಮಾನ ಪ್ರಯಾಣ ಅಗ್ಗವಾಗುತ್ತಾ?
ಸದ್ಯಕ್ಕೆ ಹೌದು ಎನ್ನುವುದು ಕಷ್ಟ. ಏಕೆಂದರೆ, ವಿದ್ಯುತ್‌ಚಾಲಿತ ವಿಮಾನ ಹಾರಾಟಕ್ಕೆ ಬಳಕೆಯಾದ 5 ಡಾಲರ್ (500 ರೂ.) ವೆಚ್ಚದ ವಿದ್ಯುತ್, 27 ನಿಮಿಷಗಳ ಪ್ರದರ್ಶನ ಹಾರಾಟದ ಸಮಯದಲ್ಲಿ ಬಳಸಲಾದ ವಿದ್ಯುತ್ ಅನ್ನು ಮಾತ್ರ ಸೂಚಿಸುತ್ತದೆ. ಇದು ಪೈಲಟ್ ಸಂಬಳ, ನಿರ್ವಹಣೆ, ವಿಮಾನ ನಿಲ್ದಾಣ ಶುಲ್ಕಗಳು, ವಿಮೆ, ಹಣಕಾಸು ಮತ್ತು ಬ್ಯಾಟರಿ ಬದಲಿ ಸೇರಿದಂತೆ ವಿಮಾನವನ್ನು ನಿರ್ವಹಿಸಲು ಬೇಕಾದ ಇತರ ಹಲವು ವೆಚ್ಚಗಳನ್ನು ಒಳಗೊಂಡಿಲ್ಲ. ಹಾಗಾಗಿ, ಕೇವಲ 500 ಡಾಲರ್ ಮೊತ್ತದಲ್ಲಿ ಒಂದು ವಿಮಾನ ಹಾರಿಸಬಹುದು ಎಂದು ನಿರೀಕ್ಷಿಸಬಾರದು. ಇದನ್ನೂ ಓದಿ: ಇನ್ಮುಂದೆ ಒಬ್ಬ ವ್ಯಕ್ತಿ ಹೆಸರಿಗೆ ಗರಿಷ್ಠ 9 ಸಿಮ್ – ರಿಯಲ್ ಟೈಮ್ ವೆರಿಫಿಕೇಷನ್ ಕಡ್ಡಾಯ

ಆದರೆ, ಇಂಧನ ಚಾಲಿತ ವಿಮಾನಗಳಿಗಿಂತ ವೆಚ್ಚದಲ್ಲಿ ಎಲೆಕ್ಟ್ರಿಕ್‌ ವಿಮಾನಗಳಿಂದ ತುಂಬಾ ಪ್ರಯೋಜನಗಳಿವೆ. ಭವಿಷ್ಯದಲ್ಲಿ ಅಗ್ಗದ ವಿಮಾನ ಪ್ರಯಾಣ ಸಾಧ್ಯವಾಗುತ್ತದೆ. ವಿದ್ಯುತ್‌ಚಾಲಿತ ವಾಣಿಜ್ಯ ವಿಮಾನಗಳು ಮೂಲಭೂತವಾಗಿ ವಿಮಾನಯಾನ ಆರ್ಥಿಕತೆಯನ್ನು ಮರುರೂಪಿಸಬಹುದು. ವಿಮಾನ ಪ್ರಯಾಣದ ವೆಚ್ಚವನ್ನು ಕಡಿಮೆ ಮಾಡಬಹುದು ಎಂದು ಹಾರ್ಟ್ ಏರೋಸ್ಪೇಸ್ ಸಂಸ್ಥಾಪಕ ಮತ್ತು ಸಿಇಒ ಆಂಡರ್ಸ್ ಫೋರ್ಸ್ಲಂಡ್ ತಿಳಿಸಿದ್ದಾರೆ.

ಪರಿಸರ ಸ್ನೇಹಿ, ಇಂಧನ ಅವಲಂಬನೆ ಕಡಿಮೆ
ಎಲೆಕ್ಟ್ರಿಕ್‌ ವಿಮಾನವು ಹವಾಮಾನ ದೃಷ್ಟಿಕೋನವನ್ನು ಹೊಂದಿದೆ. ಶುದ್ಧ ಇಂಧನದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ. ಅಷ್ಟೇ ಅಲ್ಲದೇ, ವಿಮಾನ ಇಂಧನ ಬೆಲೆಗಳು ಏರುತ್ತಿರುವ ಸಮಯದಲ್ಲಿ ವೆಚ್ಚದ ದೃಷ್ಟಿಕೋನದಿಂದಲೂ ಈ ಸಾಧನೆಯು ಮಹತ್ವದ್ದಾಗಿದೆ. ನಾಸಾ ತನ್ನ ಸೂಪರ್ಸಾನಿಕ್ X-59 ಜೆಟ್‌ನೊಂದಿಗೆ ಕಾರ್ಯನಿರತವಾಗಿರುವ ಸಮಯದಲ್ಲಿ ಈ ಪರೀಕ್ಷೆ ಯಶಸ್ವಿಯಾಗಿ ನಡೆದಿದೆ.

ಬರುತ್ತಾ 30 ಆಸನಗಳ ಹೈಬ್ರೀಡ್‌ ವಿಮಾನ?
ಹಾರ್ಟ್ ಏರೋಸ್ಪೇಸ್‌ನ ಯೋಜಿತ ES-30 ಗಾಗಿ ತಂತ್ರಜ್ಞಾನಗಳನ್ನು ಪರೀಕ್ಷಿಸಲು X1 ಅನ್ನು ಬಳಸಲಾಗುತ್ತಿದೆ. ಕಂಪನಿಯು 2031 ರ ವೇಳೆಗೆ ಸೇವೆಗೆ ತರಲು ಆಶಿಸುವ 30 ಆಸನಗಳ ಹೈಬ್ರಿಡ್-ಎಲೆಕ್ಟ್ರಿಕ್ ವಿಮಾನ ಯೋಜನೆ ಇದಾಗಿದೆ. ಸಾಂಪ್ರದಾಯಿಕ ಪ್ರಾದೇಶಿಕ ವಿಮಾನಗಳಿಗೆ (ಇಂಧನಚಾಲಿತ ವಿಮಾನ) ಹೋಲಿಸಿದರೆ ES-30 ವಿಮಾನ ನಿರ್ವಹಣಾ ವೆಚ್ಚವನ್ನು 40% ಕ್ಕಿಂತ ಹೆಚ್ಚು ಕಡಿತಗೊಳಿಸುತ್ತದೆ ಎಂದು ಹಾರ್ಟ್ ಏರೋಸ್ಪೇಸ್ ತಿಳಿಸಿದೆ. ಕಡಿಮೆ ಇಂಧನ ವೆಚ್ಚ, ಕಡಿಮೆ ನಿರ್ವಹಣಾ ಅವಶ್ಯಕತೆ ಮತ್ತು ಹೆಚ್ಚಿನ ವಿಮಾನ ವಿಶ್ವಾಸಾರ್ಹತೆಯೇ ಯೋಜಿತ ಉಳಿತಾಯಕ್ಕೆ ಕಾರಣ ಎಂದು ಕಂಪನಿ ಹೇಳುತ್ತದೆ. ಯುನೈಟೆಡ್, ಏರ್ ಕೆನಡಾ ಮತ್ತು JSX ಸೇರಿದಂತೆ ವಿಮಾನಯಾನ ಸಂಸ್ಥೆಗಳು ಈಗಾಗಲೇ ವಿಮಾನದ ಬಗ್ಗೆ ಆಸಕ್ತಿ ತೋರಿಸಿವೆ. ಇದನ್ನೂ ಓದಿ: 110 ದೇಶಗಳ ಐಫೋನ್‌ ಬಳಕೆದಾರರಿಗೆ ಥ್ರೆಟ್ ಅಲರ್ಟ್: ಏನಿದು ನೋಟಿಫಿಕೇಶನ್‌? ಬಂದರೆ ಏನು ಮಾಡಬೇಕು

ವಿದ್ಯುತ್ ಚಾಲಿತ ವಿಮಾನಗಳು ದಿಢೀರ್‌ ಅಂತ ವಿಮಾನ ಟಿಕೆಟ್‌ಗಳನ್ನು ನಾಟಕೀಯವಾಗಿ ಅಗ್ಗವಾಗಿಸುವ ಸಾಧ್ಯತೆಯಿಲ್ಲ. ತೆರಿಗೆಗಳು, ವಿಮಾನ ನಿಲ್ದಾಣ ಶುಲ್ಕಗಳು, ಸಿಬ್ಬಂದಿ, ವಿಮಾನ ಹಣಕಾಸು ಮತ್ತು ಬೇಡಿಕೆ ಎಲ್ಲವೂ ಟಿಕೆಟ್ ಬೆಲೆಗಳ ಮೇಲೆ ಪ್ರಭಾವ ಬೀರುತ್ತವೆ. ಆದರೆ, ಈ ಹೊಸ ತಂತ್ರಜ್ಞಾನವು ಯೋಜಿಸಿದಂತೆ ಕೆಲಸ ಮಾಡಿದರೆ, ವಿಮಾನ ಪ್ರಯಾಣ ದರದಲ್ಲಿ ಬದಲಾವಣೆ ಖಂಡಿತ ಆಗುತ್ತದೆ. ಕಡಿಮೆ ಇಂಧನ ಅಥವಾ ವಿದ್ಯುತ್ ಬಳಸುವ, ಕಡಿಮೆ ನಿರ್ವಹಣೆ ಅಗತ್ಯವಿರುವ ಸಣ್ಣ ವಿಮಾನಗಳು ಅಲ್ಪ-ದೂರ ವಿಮಾನ ಸೇವೆಗಳನ್ನು ನಿರ್ವಹಿಸಲು ಅಗ್ಗವಾಗಬಹುದು.

X1 ಬ್ಯಾಟರಿ-ವಿದ್ಯುತ್ ವಿಮಾನದ ಸಾಮರ್ಥ್ಯ ಏನು?
* ಹಾರಾಟದ ಅವಧಿ: 27 ನಿಮಿಷ
* ಗರಿಷ್ಠ ಎತ್ತರ: 335 ಮೀಟರ್
* ಹಾರಾಟಕ್ಕೆ ತಗುಲಿದ ವಿದ್ಯುತ್ ವೆಚ್ಚ: 5 ಡಾಲರ್‌
* ರೆಕ್ಕೆಗಳ ಅಂತರ: 32.3 ಮೀಟರ್
* ಉದ್ದ: ಮುಂದಿನ ತುದಿಯಿಂದ ಬಾಲದವರೆಗೆ 23.1 ಮೀಟರ್
* ಟೇಕ್-ಆಫ್ ತೂಕ: 11,340 ಕೆಜಿ
* ವಿದ್ಯುತ್ ಪ್ರೊಪಲ್ಷನ್ ಶಕ್ತಿ: 1 MW ಗಿಂತ ಹೆಚ್ಚು