ವಾಷಿಂಗ್ಟನ್: ಇರಾನ್ ಯುದ್ಧ (America Iran War) ವಿಚಾರದಲ್ಲಿ ಟ್ರಂಪ್ಗೆ (Donald Trump) ರಾಜಕೀಯ ಹಿನ್ನಡೆಯಾಗಿದೆ. ಸತತ ಮೂರು ತಿಂಗಳಿಂದ ನಡೆಯುತ್ತಿರುವ ಯುದ್ಧಕ್ಕೆ ಕಡಿವಾಣ ಹಾಕುವ ನಿರ್ಣಯವನ್ನು ಅಮೆರಿಕ ಸಂಸತ್ನ ಕೆಳಮನೆ ತೆಗೆದುಕೊಂಡಿದೆ.
ಯುದ್ಧ ನಿಲ್ಲಿಸುವ ನಿರ್ಣಯದ ಪರ 215 ಸದಸ್ಯರು ಮತ ಚಲಾಯಿಸಿದರೆ, ವಿರುದ್ಧ 208 ಮತಗಳು ದಾಖಲಾಗಿವೆ. ಡೆಮಾಕ್ರಾಟ್ ಪಕ್ಷದ ಸದಸ್ಯರ ಜೊತೆಗೆ ನಾಲ್ವರು ರಿಪಬ್ಲಿಕನ್ ಸಂಸದರೂ ನಿರ್ಣಯವನ್ನು ಬೆಂಬಲಿಸಿದ್ದಾರೆ.
ಈ ನಿರ್ಣಯದ ಉದ್ದೇಶ ಇರಾನ್ ವಿರುದ್ಧ ಅಧ್ಯಕ್ಷ ಟ್ರಂಪ್ ಮತ್ತಷ್ಟು ಸೇನಾ ಕ್ರಮ ಕೈಗೊಳ್ಳುವುದನ್ನು ತಡೆಯುವುದಾಗಿದೆ. ಆದರೆ ಇದು ಇನ್ನೂ ಅಮೆರಿಕ ಸೆನೆಟ್ನ ಅನುಮೋದನೆ ಪಡೆಯಬೇಕಿದೆ. ಇದನ್ನೂ ಓದಿ: ಹಾರ್ಮುಜ್ನಲ್ಲಿ ಜಲಬಾಂಬ್ ಇಡುತ್ತಿದ್ದ ಬೋಟ್, ಇರಾನ್ ಕ್ಷಿಪಣಿ ಉಡಾವಣಾ ತಾಣಗಳ ಮೇಲೆ US ವಾಯುದಾಳಿ
ಅಮೆರಿಕದ ವಿರೋಧ ಪಕ್ಷದ ನಾಯಕರು, ಕಾಂಗ್ರೆಸ್ ಅನುಮೋದನೆ ಇಲ್ಲದೇ ಯುದ್ಧ ನಡೆಸುವುದು ಸರಿಯಲ್ಲ ಎಂದು ವಾದಿಸಿದ್ದಾರೆ. ಯುದ್ಧ ಘೋಷಿಸುವ ಅಧಿಕಾರ ಕಾಂಗ್ರೆಸ್ಗೆ ಮಾತ್ರ ಇದೆ ಎಂದು ಅವರು ಹೇಳಿದ್ದಾರೆ.
ಹೌಸ್ ವಿದೇಶಾಂಗ ವ್ಯವಹಾರಗಳ ಸಮಿತಿಯ ಹಿರಿಯ ಡೆಮಾಕ್ರಾಟ್ ನಾಯಕ ಗ್ರೆಗೊರಿ ಮೀಕ್ಸ್, ಈ ಮತದಾನ ಟ್ರಂಪ್ ಅವರ ಇರಾನ್ ನೀತಿಗೆ ನೀಡಲಾದ ದೊಡ್ಡ ರಾಜಕೀಯ ಸಂದೇಶ ಎಂದು ಹೇಳಿದ್ದಾರೆ.
ಇರಾನ್ ವಿರುದ್ಧದ ಯುದ್ಧವು ಇಂಧನ ಬೆಲೆ ಏರಿಕೆಗೆ ಕಾರಣವಾಗಿದ್ದು, ಸಮಸ್ಯೆಗೆ ರಾಜತಾಂತ್ರಿಕ ಪರಿಹಾರ ಕಂಡುಕೊಳ್ಳುವುದನ್ನು ಇನ್ನಷ್ಟು ಕಷ್ಟಕರ ಮಾಡಿದೆ ಎಂದು ಅವರು ಆರೋಪಿಸಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ಅಧ್ಯಕ್ಷ ಟ್ರಂಪ್, ಇರಾನ್ ಜೊತೆಗಿನ ಮಾತುಕತೆಗಳು ಉತ್ತಮವಾಗಿ ಸಾಗುತ್ತಿದ್ದು, ಶೀಘ್ರದಲ್ಲೇ ಒಪ್ಪಂದ ಸಾಧ್ಯವಾಗಬಹುದು ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಫೆಬ್ರವರಿಯಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಇರಾನ್ ಮೇಲೆ ದಾಳಿ ನಡೆಸಿದ್ದವು. ಇದಕ್ಕೆ ಪ್ರತಿಯಾಗಿ ಇರಾನ್ ಕೂಡ ಅಮೆರಿಕ ಮಿತ್ರ ರಾಷ್ಟ್ರಗಳ ಮೇಲೆ ದಾಳಿ ನಡೆಸಿತ್ತು. ಇದರ ಬಳಿಕ ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಾಗಿದೆ. ಈ ನಡುವೆ ಯುದ್ಧ ಅಧಿಕಾರಗಳನ್ನು ನಿಯಂತ್ರಿಸುವ ನಿರ್ಣಯ ಅಂಗೀಕಾರವಾಗಿರುವುದು ಟ್ರಂಪ್ ಆಡಳಿತಕ್ಕೆ ದೊಡ್ಡ ರಾಜಕೀಯ ಹಿನ್ನಡೆಯಾಗಿ ಪರಿಗಣಿಸಲಾಗಿದೆ. ಇದನ್ನೂ ಓದಿ: I Love India, Modi | ಭಾರತ ಬಯಸಿದ್ದೆಲ್ಲವೂ ಸಿಗುತ್ತೆ, ನನ್ನನ್ನ 100% ನಂಬಬಹುದು: ಟ್ರಂಪ್
