ಇನ್ಮುಂದೆ ಯುಪಿಐ ಉಚಿತವಲ್ಲ – ಗ್ರಾಹಕರ ಮೇಲೆ ಏನು ಪರಿಣಾಮ? ಶುಲ್ಕ ವಿಧಿಸಿದ್ದು ಯಾಕೆ? ಯಾರಿಗೆ ಲಾಭ? ಎಲ್ಲಾ ಪ್ರಶ್ನೆಗಳಿಗೆ ಇಲ್ಲಿದೆ ಉತ್ತರ

ತಿಂಗಳಿಗೆ ಬರೋಬ್ಬರಿ 1,500 ಕೋಟಿಗೂ ಹೆಚ್ಚು ವಹಿವಾಟು… ಜಗತ್ತೇ ಭಾರತದತ್ತ ತಿರುಗಿ ನೋಡುವಂತೆ ಮಾಡಿದ ಡಿಜಿಟಲ್ ಕ್ರಾಂತಿ ಯುಪಿಐ. ಟೀ ಅಂಗಡಿಯಿಂದ ಹಿಡಿದು ದೊಡ್ಡ ಶಾಪಿಂಗ್ ಮಾಲ್‌ವರೆಗೆ ಇಂದು ಭಾರತೀಯರ ಜೇಬಿನಲ್ಲಿ ನೋಟುಗಳಿಗಿಂತ ಕ್ಯೂಆರ್ ಕೋಡ್ ಸ್ಕ್ಯಾನರ್‌ಗಳೇ ಹೆಚ್ಚಾಗಿ ಸದ್ದು ಮಾಡುತ್ತಿವೆ. ಇಷ್ಟು ದಿನ ಸಂಪೂರ್ಣ ಉಚಿತವಾಗಿದ್ದ ಯುಪಿಐ (UPI) ಜಗತ್ತಿನಲ್ಲಿ ಈಗ ಎಂಡಿಆರ್ (MDR) ಎಂಬ ಹೊಸ ನಿಯಮ ಸದ್ದು ಮಾಡುತ್ತಿದೆ. ಹೀಗಾಗಿ ಇಲ್ಲಿ ಎಂಡಿಆರ್ ಎಂದರೇನು? 2,000 ರೂ. ಮೇಲ್ಪಟ್ಟ ವಹಿವಾಟಿಗೆ ಯಾರು ಶುಲ್ಕ ಕಟ್ಟಬೇಕು? ಮತ್ತು ಇದರಿಂದ ಗ್ರಾಹಕರ ಮೇಲೆ ಏನು ಪರಿಣಾಮ ಬೀರಲಿದೆ? ಪ್ರತಿಯೊಬ್ಬರೂ ತಿಳಿದುಕೊಳ್ಳಬೇಕಾದ ಪ್ರಮುಖ ವಿಚಾರಗಳನ್ನು ಇಲ್ಲಿ ಸರಳವಾಗಿ ತಿಳಿಸಲಾಗಿದೆ.

ಎಂಡಿಆರ್ ಎಂದರೇನು?
ವ್ಯಾಪಾರಿಗಳು (Merchants) ಗ್ರಾಹಕರಿಂದ ಡಿಜಿಟಲ್ ಪಾವತಿಗಳನ್ನು (ಡೆಬಿಟ್/ಕ್ರೆಡಿಟ್ ಕಾರ್ಡ್ ಅಥವಾ ಯುಪಿಐ) ಸ್ವೀಕರಿಸಲು ಬ್ಯಾಂಕ್ ಹಾಗೂ ಪಾವತಿ ಸೇವಾ ಸಂಸ್ಥೆಗಳಿಗೆ ಪಾವತಿಸುವ ಸೇವಾ ಶುಲ್ಕ.

ಯಾವುದಕ್ಕೆ ಎಷ್ಟು ಪಾವತಿ ದರ?
ಭಾರತದಲ್ಲಿ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಜಾರಿಗೆ ತಂದಿರುವ ಹೊಸ ಯುಪಿಐ (UPI) ಎಂಡಿಆರ್ ನಿಯಮಗಳು ಅಕ್ಟೋಬರ್ 15 ರಿಂದ ಜಾರಿಗೆ ಬರಲಿವೆ. ಇದರ ಪ್ರಕಾರ ವಿವಿಧ ಪಾವತಿ ವಿಧಾನಗಳ ದರಗಳು ಈ ಕೆಳಗಿನಂತಿವೆ
• 2,000 ರೂ. ವರೆಗಿನ ವಹಿವಾಟು: ಯಾವುದೇ ಶುಲ್ಕವಿಲ್ಲ
• 2,000 ರೂ. ಕ್ಕಿಂತ ಹೆಚ್ಚಿನ ವ್ಯಾಪಾರಿ ಪಾವತಿಗಳು (P2M): 0.4% MDR ಅನ್ವಯ
• ಗರಿಷ್ಠ ಮಿತಿ 75,000 ರೂ. ಅಥವಾ ಅದಕ್ಕಿಂತ ಹೆಚ್ಚಿನ ದೊಡ್ಡ ವಹಿವಾಟುಗಳಿಗೆ ಗರಿಷ್ಠ ಶುಲ್ಕವನ್ನು 300 ರೂ.ಗೆ ಮಿತಿಗೊಳಿಸಲಾಗಿದೆ.
• ಅತ್ಯಗತ್ಯ ಸೇವೆಗಳಿಗೆ ಸ್ಥಿರ ದರ: ರೈಲ್ವೆ, ಟೆಲಿಕಾಂ, ವಿಮೆ, ಇಂಧನ, ಮತ್ತು ಕೃಷಿ ಪರಿಕರಗಳ ಖರೀದಿಗೆ 2,000 ಕ್ಕಿಂತ ಹೆಚ್ಚಿನ ವಹಿವಾಟು ನಡೆದರೆ 0.4% ಬದಲಾಗಿ 5 ರೂ.ಸ್ಥಿರ ಶುಲ್ಕ ಇರುತ್ತದೆ.
• ಬಂಡವಾಳ ಮಾರುಕಟ್ಟೆ ಪಾವತಿಗಳು: ಮ್ಯೂಚುವಲ್ ಫಂಡ್, ಸ್ಟಾಕ್ ಬ್ರೋಕರ್ ಮತ್ತು ಸೆಕ್ಯುರಿಟೀಸ್ ಪಾವತಿಗಳಿಗೆ 0.02% MDR ಗರಿಷ್ಠ 300 ರೂ.

ಯಾವ ಕಾರ್ಡ್‌ಗೆ ಈಗ ಎಷ್ಟು ಎಂಡಿಆರ್‌ ಇದೆ?
ಡೆಬಿಟ್ ಕಾರ್ಡ್‌ಗಳು: ಸಾಮಾನ್ಯವಾಗಿ ವಹಿವಾಟಿನ ಮೌಲ್ಯದ 0.90% ಇರುತ್ತದೆ
ಕ್ರೆಡಿಟ್ ಕಾರ್ಡ್‌ಗಳು: ಸಾಮಾನ್ಯವಾಗಿ ವಹಿವಾಟಿನ ಮೌಲ್ಯದ 1.5% ರಿಂದ 2.5% ವರೆಗೆ ಇರುತ್ತದೆ.

ಯಾರಿಗೆ ಉಚಿತ?
ಗ್ರಾಹಕರಿಗೆ ಉಚಿತ: ಈ ಎಂಡಿಆರ್ ಶುಲ್ಕವನ್ನು ಕೇವಲ ವ್ಯಾಪಾರಿಗಳು ಮಾತ್ರ ಭರಿಸಬೇಕು. ಸಾಮಾನ್ಯ ಗ್ರಾಹಕರು ಹಣ ಪಾವತಿಸುವಾಗ ಯಾವುದೇ ಹೆಚ್ಚುವರಿ ಶುಲ್ಕ ಕಡಿತವಾಗುವುದಿಲ್ಲ.
ವ್ಯಕ್ತಿಗತ ವರ್ಗಾವಣೆ ಉಚಿತ: ನಿಮ್ಮ ಸ್ನೇಹಿತರು ಅಥವಾ ಕುಟುಂಬದವರಿಗೆ ಯುಪಿಐ ಮೂಲಕ ಎಷ್ಟು ಹಣ ಕಳುಹಿಸಿದರೂ ಅದು ಸಂಪೂರ್ಣ ಉಚಿತವಾಗಿರುತ್ತದೆ.
ಸಣ್ಣ ವ್ಯಾಪಾರಿಗಳಿಗೆ ವಿನಾಯಿತಿ: ತಿಂಗಳಿಗೆ 1 ಲಕ್ಷ ರೂ.ವರೆಗೆ ಯುಪಿಐ ಕ್ಯೂಆರ್ (QR) ಕೋಡ್ ಮೂಲಕ ಆದಾಯ ಪಡೆಯುವ ಸಣ್ಣ ವ್ಯಾಪಾರಿಗಳಿಗೆ ಈ ಶುಲ್ಕದಿಂದ ವಿನಾಯಿತಿ ನೀಡಲಾಗಿದೆ.

ಈಗ ದರ ವಿಧಿಸಿದ್ದು ಯಾಕೆ?
ಈಗ ಗ್ರಾಹಕ ಹಣವನ್ನು ಹೇಗೆ ಕಳಹಿಸುತ್ತಾನೆ ಅಂತ ನೋಡೋಣ. ಮೊದಲನೇಯದ್ದು ಮೊದಲನೆಯದ್ದು ಮೊಬೈಲಿನಲ್ಲಿ ಯುಪಿಐ ಆಪ್‌ ಮೂಲಕ ಹಣವನ್ನು ಕಳುಹಿಸುತ್ತಾನೆ. ಈ ಹಣ ಆತನ ಬ್ಯಾಂಕ್‌ ಖಾತೆಯ ಮೂಲಕ ಎನ್‌ಪಿಸಿಐ ಸರ್ವರ್‌ಗೆ ಹೋಗಿ ಬಳಿಕ ಅಂಗಡಿಯ ಬ್ಯಾಂಕ್‌ ಖಾತೆ ಬೀಳುತ್ತದೆ. ಹಣ ಬಿದ್ದ ಕೂಡಲೇ ಆತನ ಮೊಬೈಲಿನಲ್ಲಿರುವ ಯುಪಿಐ ಆಪ್‌ಗೆ ಸಂದೇಶ ಬರುತ್ತದೆ. ಆಂದರೆ ಒಟ್ಟು ಐದು ವ್ಯವಸ್ಥೆಗಳ ಮೂಲಕ ಹಣ ವರ್ಗಾವಣೆಯ ಪ್ರಕ್ರಿಯೆ ನಡೆಯುತ್ತದೆ.

ಕ್ಯೂಆರ್ ಕೋಡ್ ಮತ್ತು ಯುಪಿಐ (UPI) ವಹಿವಾಟುಗಳು ದೇಶಾದ್ಯಂತ ಭಾರೀ ಪ್ರಮಾಣದಲ್ಲಿ ಬೆಳೆದಿದ್ದರೂ, ಈ ವ್ಯವಸ್ಥೆಯನ್ನು ನಡೆಸಲು ತಗಲುವ ಬೃಹತ್ ತಂತ್ರಜ್ಞಾನ ವೆಚ್ಚವನ್ನು ಸರಿದೂಗಿಸಲು ಮತ್ತು ಈ ಡಿಜಿಟಲ್ ಮೂಲಸೌಕರ್ಯವನ್ನು ದೀರ್ಘಕಾಲದವರೆಗೆ ಸುಸ್ಥಿರವಾಗಿಡಲು ಈಗ ಎಂಡಿಆರ್ ದರವನ್ನು ತರಲಾಗಿದೆ.

ಇಲ್ಲಿಯವರೆಗೆ ಯುಪಿಐ ಸಂಪೂರ್ಣ ಉಚಿತವಾಗಿದ್ದರಿಂದ, ಬ್ಯಾಂಕುಗಳಿಗೆ ಆಗುತ್ತಿದ್ದ ನಷ್ಟವನ್ನು ಸರಿದೂಗಿಸಲು ಕೇಂದ್ರ ಸರ್ಕಾರವೇ ಪ್ರತಿವರ್ಷ ಸುಮಾರು 20 ಸಾವಿರ ಕೋಟಿ ರೂ. ಸಬ್ಸಿಡಿಯನ್ನು ನೀಡುತ್ತಿತ್ತು. ಸರ್ಕಾರದ ದುಡ್ಡು ಅಂದರೆ ಅದು ಜನರ ದುಡ್ಡೇ ಆಗಿರುತ್ತದೆ. ತೆರಿಗೆ ಇತ್ಯಾದಿಗಳಿಂದ ಸಂಗ್ರಹಿಸಿದ ದುಡ್ಡನ್ನು ಯುಪಿಐ ವ್ಯವಸ್ಥೆಗೆ ಬಳಸುತ್ತಿತ್ತು. ಆದರೆ ಯಾವುದೇ ದೇಶದಲ್ಲಿ ‘ಉಚಿತ’ವಾಗಿ ಸಿಗುವ ವ್ಯವಸ್ಥೆ ದೀರ್ಘಕಾಲ ಮುಂದುವರಿಯಲು ಸಾಧ್ಯವಿಲ್ಲ. ಡಿಜಿಟಲ್ ಪಾವತಿಗಳು ಬೃಹತ್ ಮಟ್ಟಕ್ಕೆ ತಲುಪಿರುವುದರಿಂದ, ಈ ಹೊರೆಯನ್ನು ಸರ್ಕಾರವೇ ದೀರ್ಘಕಾಲ ಭರಿಸಲು ಸಾಧ್ಯವಿಲ್ಲ. ಹೀಗಾಗಿ ಈ ವ್ಯವಸ್ಥೆ ಸ್ವಾವಲಂಬಿಯಾಗಬೇಕಿದೆ.

ಕೋಟಿಗಟ್ಟಲೆ ಯುಪಿಐ ವಹಿವಾಟುಗಳನ್ನು ಕ್ಷಣಾರ್ಧದಲ್ಲಿ ಸುರಕ್ಷಿತವಾಗಿ ಪೂರ್ಣಗೊಳಿಸಲು ಬ್ಯಾಂಕುಗಳು ಮತ್ತು ಪಾವತಿ ಕಂಪನಿಗಳು ಅತ್ಯಾಧುನಿಕ ಸರ್ವರ್‌ಗಳು ಮತ್ತು ತಂತ್ರಜ್ಞಾನವನ್ನು ನಿರ್ವಹಿಸಬೇಕಾಗುತ್ತದೆ. ವಹಿವಾಟುಗಳ ಸಂಖ್ಯೆ ಹೆಚ್ಚಿದಂತೆ ಈ ತಾಂತ್ರಿಕ ವೆಚ್ಚವೂ ಭಾರೀ ಪ್ರಮಾಣದಲ್ಲಿ ಹೆಚ್ಚುತ್ತಿದೆ. ಯುಪಿಐ ಬಳಕೆಯ ಜೊತೆಗೆ ಡಿಜಿಟಲ್ ವಂಚನೆಗಳೂ ಹೆಚ್ಚುತ್ತಿವೆ. ಬ್ಯಾಂಕುಗಳು ತಮ್ಮ ಸೈಬರ್ ಭದ್ರತೆಯನ್ನು ಬಲಪಡಿಸಲು ಗ್ರಾಹಕರ ಹಣವನ್ನು ಸುರಕ್ಷಿತವಾಗಿಡಲು ಭಾರೀ ಹೂಡಿಕೆಯ ಅಗತ್ಯವಿದೆ.

ಕ್ರೆಡಿಟ್ ಮತ್ತು ಡೆಬಿಟ್ ಕಾರ್ಡ್‌ಗಳ ವಹಿವಾಟಿಗೆ ವ್ಯಾಪಾರಿಗಳು ಈಗಾಗಲೇ 1% ರಿಂದ 2.5% ವರೆಗೆ ಶುಲ್ಕ ನೀಡುತ್ತಿದ್ದಾರೆ. ಕಾರ್ಡ್ ಪಾವತಿಗಳಿಗೆ ಹೋಲಿಸಿದರೆ ಯುಪಿಐ ಮೇಲಿನ ಹೊಸ ಎಂಡಿಆರ್ ದರ (0.4%) ಅತ್ಯಂತ ಕಡಿಮೆಯಾಗಿದೆ.

2020 ರ ಜನವರಿಯಿಂದ ಭಾರತ ಸರ್ಕಾರವು ಯುಪಿಐ ಮೇಲೆ ‘ಜೀರೋ ಎಂಡಿಆರ್’ ನೀತಿಯನ್ನು ಜಾರಿಗೆ ತಂದಿತ್ತು. ಅಂದರೆ ಬ್ಯಾಂಕುಗಳು ಅಥವಾ ಪೇಟಿಎಂ, ಫೋನ್ ಪೇ ನಂತಹ ಆ್ಯಪ್‌ಗಳು ವ್ಯಾಪಾರಿಗಳಿಂದ ಯಾವುದೇ ಶುಲ್ಕ ಪಡೆಯುವಂತಿರಲಿಲ್ಲ. ಇದರಿಂದಾಗಿ ಬ್ಯಾಂಕುಗಳು ಮತ್ತು ಪಾವತಿ ಸೇವಾ ಸಂಸ್ಥೆಗಳಿಗೆ ಯುಪಿಐನಿಂದ ಯಾವುದೇ ಆದಾಯ ಬರುತ್ತಿರಲಿಲ್ಲ. ಸರ್ವರ್‌ಗಳ ನಿರ್ವಹಣೆ, ವಿಫಲವಾದ ವಹಿವಾಟುಗಳ ಇತ್ಯರ್ಥ (Failed Transactions), ಮತ್ತು ಗ್ರಾಹಕ ಸೇವೆಗಾಗಿ ಬ್ಯಾಂಕುಗಳು ತಮ್ಮ ಸ್ವಂತ ಹಣವನ್ನು ಖರ್ಚು ಮಾಡಬೇಕಾಗಿತ್ತು. ಈ ನಷ್ಟವನ್ನು ಸರಿದೂಗಿಸಲು ಈಗ ದರ ವಿಧಿಸಲಾಗುತ್ತಿದೆ.

ಇಂದು ಭಾರತದಲ್ಲಿ ತಿಂಗಳಿಗೆ ಸರಾಸರಿ 1,500 ಕೋಟಿಗೂ ಹೆಚ್ಚು ಯುಪಿಐ ವಹಿವಾಟುಗಳು ನಡೆಯುತ್ತಿವೆ. ಜಗತ್ತಿನ ಯಾವುದೇ ದೇಶದಲ್ಲೂ ಇಷ್ಟೊಂದು ಬೃಹತ್ ಮಟ್ಟದ ಡಿಜಿಟಲ್ ಪಾವತಿ ವ್ಯವಸ್ಥೆ ಇಲ್ಲ. ಇಷ್ಟು ದೊಡ್ಡ ವ್ಯವಸ್ಥೆಯು ಯಾವುದೇ ತಾಂತ್ರಿಕ ಅಡಚಣೆ ಇಲ್ಲದೆ (Server Crash ಆಗದೆ) 24/7 ಕೆಲಸ ಮಾಡಬೇಕಾದರೆ, ಅದಕ್ಕೆ ನಿರಂತರ ಆದಾಯದ ಮೂಲ ಇರಬೇಕಾದುದು ಅತ್ಯಗತ್ಯ.

ಯಾರ ಮೇಲೆ ಏನು ಪರಿಣಾಮ?
ಸಾಮಾನ್ಯ ಗ್ರಾಹಕರಿಗೆ ಯುಪಿಐ ಪಾವತಿಗಳು ಎಂದಿನಂತೆಯೇ ಸಂಪೂರ್ಣ ಉಚಿತವಾಗಿರುತ್ತದೆ. ನೀವು ತರಕಾರಿ ಖರೀದಿ, ಹೋಟೆಲ್ ಬಿಲ್ ಕಟ್ಟಲು ಅಥವಾ ಸ್ನೇಹಿತರಿಗೆ ಹಣ ಕಳುಹಿಸಲು ಯುಪಿಐ ಬಳಸಿದಾಗ ನಿಮ್ಮ ಬ್ಯಾಂಕ್ ಖಾತೆಯಿಂದ ಯಾವುದೇ ಹೆಚ್ಚುವರಿ ಶುಲ್ಕ ಕಡಿತವಾಗುವುದಿಲ್ಲ. ಆದರೆ ಕೆಲವು ದೊಡ್ಡ ವ್ಯಾಪಾರಿಗಳು ತಮಗಾಗುವ ನಷ್ಟವನ್ನು ಸರಿದೂಗಿಸಲು ವಸ್ತುಗಳ ಬೆಲೆಯನ್ನು ಅತ್ಯಲ್ಪ ಪ್ರಮಾಣದಲ್ಲಿ ಹೆಚ್ಚಿಸುವ ಸಾಧ್ಯತೆ ಇರುತ್ತದೆ.

ಬೀದಿ ಬದಿಯ ವ್ಯಾಪಾರಿಗಳು, ಸಣ್ಣ ಕಿರಾಣಿ ಅಂಗಡಿಗಳು ಮತ್ತು ತಿಂಗಳಿಗೆ 1 ಲಕ್ಷದವರೆಗೆ ಆದಾಯ ಹೊಂದಿರುವ ಸಣ್ಣ ವ್ಯಾಪಾರಿಗಳಿಗೆ ಈ ಶುಲ್ಕದಿಂದ ವಿನಾಯಿತಿ ನೀಡಲಾಗಿದೆ. ಜೊತೆಗೆ 2,000 ರೂ. ವರೆಗಿನ ಎಲ್ಲಾ ವಹಿವಾಟುಗಳು ಉಚಿತವಾಗಿರುವುದರಿಂದ ಇವರ ವ್ಯವಹಾರಕ್ಕೆ ಯಾವುದೇ ತೊಂದರೆಯಾಗುವುದಿಲ್ಲ.

ಸೂಪರ್ ಮಾರ್ಕೆಟ್‌ಗಳು, ಮಾಲ್‌ಗಳು, ದೊಡ್ಡ ಎಲೆಕ್ಟ್ರಾನಿಕ್ಸ್ ಶೋರೂಮ್‌ಗಳು ಮತ್ತು ಅಮೆಜಾನ್, ಫ್ಲಿಪ್‌ಕಾರ್ಟ್‌ನಂತಹ ಇಕಾಮರ್ಸ್ ಸಂಸ್ಥೆಗಳಿಗೆ ವೆಚ್ಚ ಹೆಚ್ಚಾಗಲಿದೆ. 2,000 ಕ್ಕಿಂತ ಹೆಚ್ಚಿನ ಪ್ರತಿ ವಹಿವಾಟಿನ ಮೇಲೆ ಇವರು 0.4% ಶುಲ್ಕವನ್ನು ಬ್ಯಾಂಕುಗಳಿಗೆ ನೀಡಬೇಕಾಗುತ್ತದೆ. ಅಂದರೆ 10 ಸಾವಿರ ರೂ. ವಹಿವಾಟು ನಡೆದರೆ 40 ರೂ. ಬ್ಯಾಂಕಿಗೆ ಶುಲ್ಕವಾಗಿ ನೀಡಬೇಕಾಗುತ್ತದೆ.

ಅತ್ಯಗತ್ಯ ಸೇವೆಗಳು (ಪೆಟ್ರೋಲ್ ಬಂಕ್, ವಿಮಾ ಪ್ರೀಮಿಯಂ, ರೈಲ್ವೆ ಟಿಕೆಟ್, ಟೆಲಿಕಾಂ ಬಿಲ್) ಇಲ್ಲಿ ಬಿಲ್ ಎಷ್ಟೇ ದೊಡ್ಡದಿದ್ದರೂ (2,000 ರೂ. ಮಿತಿ ದಾಟಿದರೂ) ಕೇವಲ 5 ರೂ. ಸ್ಥಿರ ಶುಲ್ಕ ಮಾತ್ರ ಇರುತ್ತದೆ. ಇದರಿಂದ ಗ್ರಾಹಕರ ಮೇಲೆ ಬೆಲೆ ಏರಿಕೆಯ ಬಿಸಿ ತಟ್ಟುವುದಿಲ್ಲ.

95% ಕ್ಕಿಂತ ಹೆಚ್ಚು ಯುಪಿಐ ವಹಿವಾಟುಗಳು 2,000 ರೂ. ಕ್ಕಿಂತ ಕಡಿಮೆ ಮೌಲ್ಯದ್ದಾಗಿರುತ್ತವೆ. ಈ ಎಲ್ಲಾ ಸಣ್ಣ ಪಾವತಿಗಳಿಗೆ 0% ಶುಲ್ಕ ಇರುವುದರಿಂದ ಸಾಮಾನ್ಯ ಜನರ ದಿನನಿತ್ಯದ ಬದುಕಿನ ಮೇಲೆ ಯಾವುದೇ ಪ್ರಭಾವ ಬೀರುವುದಿಲ್ಲ.

ಯಾರಿಗೆ ಲಾಭ?
ಫೋನ್ ಪೇ (PhonePe), ಗೂಗಲ್ ಪೇ (Google Pay) ಸೇರಿದಂತೆ ವಿವಿಧ ಯುಪಿಐ ಆಪ್‌ಗಳು ಮತ್ತು ವಿವಿಧ ಬ್ಯಾಂಕುಗಳಿಗೆ ಈ ನಿರ್ಧಾರದಿಂದ ಬಿಗ್ ರಿಲೀಫ್ ಸಿಗಲಿದೆ. ಇದುವರೆಗೆ ಯುಪಿಐನಿಂದ ನಷ್ಟ ಅನುಭವಿಸುತ್ತಿದ್ದ ಈ ಸಂಸ್ಥೆಗಳಿಗೆ ಇನ್ನು ಮುಂದೆ ಭಾರೀ ಆದಾಯ ಸಿಗಲಿದೆ. ಇದುವರೆಗೆ ಕೇವಲ ಜಾಹೀರಾತು ಮತ್ತು ಇತರೆ ಸೇವೆಗಳ ಮೂಲಕ ಆದಾಯ ಗಳಿಸುತ್ತಿದ್ದ ಪಾವತಿ ಆ್ಯಪ್‌ಗಳಿಗೆ ಈಗ ನೇರ ಆದಾಯ ಸಿಗಲಿದೆ.

ಇದುವರೆಗೆ ಯುಪಿಐ ಉಚಿತವಾಗಿದ್ದರಿಂದ ಬ್ಯಾಂಕುಗಳ ನಷ್ಟವನ್ನು ಸರಿದೂಗಿಸಲು ಕೇಂದ್ರ ಸರ್ಕಾರವೇ ಪ್ರತಿವರ್ಷ ಸಾವಿರಾರು ಕೋಟಿ ರೂಪಾಯಿ ಸಬ್ಸಿಡಿ ನೀಡುತ್ತಿತ್ತು. ಈಗ ಆ ಹೊರೆ ಇಳಿಕೆಯಾಗುವುದರಿಂದ ಸರ್ಕಾರವು ಆ ಸಾರ್ವಜನಿಕ ಹಣವನ್ನು ರಸ್ತೆ, ಶಿಕ್ಷಣ ಮತ್ತು ಆರೋಗ್ಯದಂತಹ ಇತರ ಜನೋಪಕಾರಿ ಅಭಿವೃದ್ಧಿ ಕೆಲಸಗಳಿಗೆ ಬಳಸಬಹುದು.

ಯಾವುದಕ್ಕೆ ಎಷ್ಟು?
ನೀವು ಬಟ್ಟೆ ಅಂಗಡಿ, ಎಲೆಕ್ಟ್ರಾನಿಕ್ಸ್ ಶೋರೂಮ್, ಮಾಲ್ ಇತ್ಯಾದಿ ಹೋದಾಗ ಅಲ್ಲಿ 0.4% MDR ಅನ್ವಯಿಸುತ್ತದೆ. ಈ ಪ್ರಕಾರ 5,000 ರೂ. ವಸ್ತು ಖರೀದಿಸಿದರೆ ಅದರಲ್ಲಿ 4,980 ರೂ. ವ್ಯಾಪಾರಿಗೆ ಹೋದರೆ ಬ್ಯಾಂಕುಗಳಿಗೆ 20 ರೂ. ಶುಲ್ಕ ಹೋಗುತ್ತದೆ. 50,000 ರೂ. ವಸ್ತು ಖರೀದಿಸಿದರೆ ವ್ಯಾಪಾರಿಗೆ 49,800 ರೂ. ತಲುಪಿದರೆ ಬ್ಯಾಂಕುಗಳಿಗೆ 200 ರೂ. ಶುಲ್ಕ ಹೋಗುತ್ತದೆ.

75 ಸಾವಿರ ರೂ.ಗಿಂತ ಹೆಚ್ಚಿನ ಮೊತ್ತದ ವಸ್ತು ಖರೀದಿಸಿದರೆ ಗರಿಷ್ಠ ಶುಲ್ಕದ ಮಿತಿಯನ್ನು 300 ರೂ.ಮಿತಿಗೊಳಿಸಲಾಗಿದೆ. ಅಂದರೆ ಶೇಕಡಾವಾರು ಲೆಕ್ಕಾಚಾರದಲ್ಲಿ ಶುಲ್ಕ ಎಷ್ಟೇ ಹೆಚ್ಚಾದರೂ ವ್ಯಾಪಾರಿಗಳು ಗರಿಷ್ಠ 300 ರೂ.ಗಿಂತ ಹೆಚ್ಚು ಪಾವತಿಸಬೇಕಾಗಿಲ್ಲ.

ಸಣ್ಣ ವ್ಯಾಪಾರಿಗಳ ಅಭಿವೃದ್ಧಿಗೆ ವಿಶೇಷ ನಿಧಿ
ಈ ಹೊಸ ನಿಯಮದ ಮೂಲಕ ದೊಡ್ಡ ವ್ಯಾಪಾರಿಗಳಿಂದ ಸಂಗ್ರಹವಾಗುವ ಶುಲ್ಕದ ಒಂದು ಭಾಗವನ್ನು ವಿಶೇಷ ನಿಧಿಯಾಗಿ (Special Fund) ಮೀಸಲಿಡಲಾಗುತ್ತದೆ. ಈ ನಿಧಿಯನ್ನು ಗ್ರಾಮೀಣ ಭಾಗಗಳು, ಈಶಾನ್ಯ ರಾಜ್ಯಗಳು, ಜಮ್ಮು-ಕಾಶ್ಮೀರ ಮತ್ತು ಲಡಾಖ್‌ನಂತಹ ಪ್ರದೇಶಗಳಲ್ಲಿ ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ವಿಸ್ತರಿಸಲು ಬಳಸಲಾಗುತ್ತದೆ. ಅಷ್ಟೇ ಅಲ್ಲದೆ, ಸಣ್ಣ ಸಣ್ಣ ಅಂಗಡಿಗಳಿಗೆ ಕ್ಯೂಆರ್ (QR) ಕೋಡ್ ಮತ್ತು ಅಗತ್ಯ ಡಿಜಿಟಲ್ ಸೌಲಭ್ಯಗಳನ್ನು ಉಚಿತವಾಗಿ ನೀಡಲು ಈ ಹಣವನ್ನು ವಿನಿಯೋಗಿಸಲಾಗುತ್ತದೆ.

ಸವಾಲು ಮತ್ತು ಆತಂಕ ಏನು?
ಸಾಮಾನ್ಯ ಗ್ರಾಹಕರಿಗೆ ಯುಪಿಐ ಪಾವತಿ ನೇರವಾಗಿ ಉಚಿತವಾಗಿದ್ದರೂ, ದೊಡ್ಡ ವ್ಯಾಪಾರಿಗಳು (ಸೂಪರ್ ಮಾರ್ಕೆಟ್‌ಗಳು, ಬಟ್ಟೆ ಅಂಗಡಿಗಳು) ತಮಗಾಗುವ 0.4% ನಷ್ಟವನ್ನು ಸರಿದೂಗಿಸಲು ವಸ್ತುಗಳ ಬೆಲೆಯನ್ನು ಅತ್ಯಲ್ಪ ಪ್ರಮಾಣದಲ್ಲಿ ಹೆಚ್ಚಿಸುವ ಸಾಧ್ಯತೆ ಇರುತ್ತದೆ. ಇದರಿಂದಾಗಿ ಗ್ರಾಹಕರು ಪರೋಕ್ಷವಾಗಿ ಹೆಚ್ಚಿನ ಹಣ ಪಾವತಿಸಬೇಕಾಗಿ ಬರಬಹುದು.

2,000 ರೂ. ಕ್ಕಿಂತ ಹೆಚ್ಚಿನ ವಹಿವಾಟುಗಳಿಗೆ ಶುಲ್ಕವಿರುವುದರಿಂದ, ಕೆಲವು ವ್ಯಾಪಾರಿಗಳು ಶುಲ್ಕದಿಂದ ತಪ್ಪಿಸಿಕೊಳ್ಳಲು ಗ್ರಾಹಕರಿಂದ ಮತ್ತೆ ನಗದು ರೂಪದಲ್ಲೇ ಹಣ ನೀಡುವಂತೆ ಒತ್ತಾಯಿಸಬಹುದು. ಇದು ಭಾರತವನ್ನು “ಕಡಿಮೆ ನಗದು ಆರ್ಥಿಕ ಮಾಡುವ ಸರ್ಕಾರದ ಉದ್ದೇಶಕ್ಕೆ ಹಿನ್ನಡೆ ಉಂಟುಮಾಡಬಹುದು.

2,000 ರೂ. ವರೆಗಿನ ವಹಿವಾಟು ಸಂಪೂರ್ಣ ಉಚಿತವಾಗಿರುವುದರಿಂದ, ವ್ಯಾಪಾರಿಗಳು ದೊಡ್ಡ ಬಿಲ್‌ಗಳನ್ನು ಸಣ್ಣ ಸಣ್ಣ ಭಾಗಗಳಾಗಿ ವಿಂಗಡಿಸಲು ಪ್ರಯತ್ನಿಸಬಹುದು .ಉದಾಹರಣೆಗೆ 6,000 ರೂ. ಬಿಲ್ ಆಗಿದ್ದರೆ, ವ್ಯಾಪಾರಿಗಳು ಶುಲ್ಕ ತಪ್ಪಿಸಲು 2,000 ನಂತೆ ಮೂರು ಬಾರಿ ಯುಪಿಐ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಲು ಕೇಳಬಹುದು. ಇದು ಪಾವತಿ ಪ್ರಕ್ರಿಯೆಯನ್ನು ಸಂಕೀರ್ಣಗೊಳಿಸುತ್ತದೆ.

ಅಮೆಜಾನ್, ಫ್ಲಿಪ್‌ಕಾರ್ಟ್‌ನಂತಹ ದೊಡ್ಡ ಇ-ಕಾಮರ್ಸ್ ಕಂಪನಿಗಳು ಮತ್ತು ಜೊಮ್ಯಾಟೋ, ಸ್ವಿಗ್ಗಿಯಂತಹ ಆ್ಯಪ್‌ಗಳಿಗೆ ಯುಪಿಐ ಮೂಲಕ ಬರುವ ದೊಡ್ಡ ಮೊತ್ತದ ಆರ್ಡರ್‌ಗಳಿಗೆ ವೆಚ್ಚ ಹೆಚ್ಚಾಗಲಿದೆ. ಈ ಹೆಚ್ಚುವರಿ ವೆಚ್ಚವನ್ನು ಸರಿದೂಗಿಸಲು ಅವರು ಯುಪಿಐ ಪಾವತಿಗಳಿಗೆ ನೀಡುತ್ತಿದ್ದ ಕ್ಯಾಶ್‌ಬ್ಯಾಕ್, ಡಿಸ್ಕೌಂಟ್ ಮತ್ತು ಇತರ ಕೊಡುಗೆಗಳನ್ನು ಸಂಪೂರ್ಣವಾಗಿ ನಿಲ್ಲಿಸಬಹುದು ಅಥವಾ ಕಡಿಮೆ ಮಾಡಬಹುದು.

ಮಧ್ಯಮ ಗಾತ್ರದ ಸೂಪರ್ ಮಾರ್ಕೆಟ್‌ಗಳು ಅಥವಾ ಹೋಲ್‌ಸೇಲ್ ವ್ಯಾಪಾರಿಗಳ ಲಾಭಾಂಶ ಈಗಾಗಲೇ ಅತ್ಯಂತ ಕಡಿಮೆಯಿರುತ್ತದೆ. ಈ ಸಂದರ್ಭದಲ್ಲಿ 0.4% ಎಂಡಿಆರ್ ಶುಲ್ಕವನ್ನು ಅವರೇ ಭರಿಸಬೇಕಾಗಿ ಬಂದರೆ ಅದು ಅವರ ನಿವ್ವಳ ಲಾಭದ ಮೇಲೆ ನೇರ ಪರಿಣಾಮ ಬೀರುತ್ತದೆ.

ಈ ನಿಯಮದ ಮುಖ್ಯ ಸವಾಲಿರುವುದು ವ್ಯಾಪಾರಿಗಳು ಈ ಶುಲ್ಕದಿಂದ ತಪ್ಪಿಸಿಕೊಳ್ಳಲು ಹುಡುಕುವ ದಾರಿಗಳನ್ನು ನಿಯಂತ್ರಿಸುವುದರಲ್ಲಿ. ಬೆಲೆ ಏರಿಕೆಯಾಗದಂತೆ ತಡೆಯುವುದು ಮತ್ತು ಡಿಜಿಟಲ್ ಪಾವತಿಯ ವೇಗವನ್ನು ಕಾಯ್ದುಕೊಳ್ಳುವುದು ರಿಸರ್ವ್ ಬ್ಯಾಂಕ್ (RBI) ಮುಂದಿರುವ ದೊಡ್ಡ ಸವಾಲುಗಳಾಗಿವೆ.

ʼಉಚಿತ’ ಎಂಬ ಸೌಲಭ್ಯದಿಂದಲೇ ಮನೆಮಾತಾಗಿದ್ದ ಯುಪಿಐ, ಈಗ ಪ್ರಬುದ್ಧ ಹಾಗೂ ಸ್ವಾವಲಂಬಿ ಆರ್ಥಿಕ ಹಂತಕ್ಕೆ ಕಾಲಿಡುತ್ತಿದೆ. ಬ್ಯಾಂಕುಗಳಿಗೆ ತಂತ್ರಜ್ಞಾನ ನಿರ್ವಹಣೆಯ ಬಲ ನೀಡುವುದು ಎಷ್ಟು ಮುಖ್ಯವೋ, ಕ್ಯಾಶ್‌ಲೆಸ್ ಆರ್ಥಿಕತೆಯ ವೇಗ ಕುಂಠಿತವಾಗದಂತೆ ಎಚ್ಚರವಹಿಸುವುದೂ ಅಷ್ಟೇ ಮುಖ್ಯ. ಈ ಹೊಸ ನೀತಿ ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತದೋ ಅಥವಾ ಮತ್ತೆ ನಗದು ಬಳಕೆಗೆ ದಾರಿ ಮಾಡಿಕೊಡುತ್ತದೋ ಎಂಬ ಪ್ರಶ್ನೆಗೆ ಮುಂದಿನ ದಿನಗಳಲ್ಲಿ ಉತ್ತರ ಸಿಗಲಿದೆ.