ರಾಧಿಕಾ ಕುಮಾರಸ್ವಾಮಿ ಸಿನಿಮಾ ಮೂಲಕ ಪ್ರೇಕ್ಷಕರ ಮುಂದೆ ಬಾರದೆ ವರ್ಷಗಳೇ ಕಳೆದಿವೆ. ಆದರೆ ಈಗೊಂದು ವರ್ಷದಿಂದೀಚೆಗೆ ಅವರು ನಾಯಕಿಯಾಗಿ ನಟಿಸಿರುವ ದಮಯಂತಿ ಎಂಬ ಚಿತ್ರವೊಂದು ಆಗಾಗ ಸದ್ದು ಮಾಡುತ್ತಿತ್ತು.
ಪೋಸ್ಟರ್‍ಗಳು ಆಗಾಗ ಬಿಡುಗಡೆಯಾಗುತ್ತಾ ರಾಧಿಕಾ ಅಲ್ಲಿ ಕಾಣಿಸಿಕೊಂಡ ಅವತಾರವೇ ಸೆನ್ಸೇಷನ್ ಕ್ರಿಯೇಟ್ ಮಾಡಿದ್ದೂ ಇದೆ. ಈ ಚಿತ್ರವೀಗ ಬಿಡುಗಡೆಯ ಹೊಸ್ತಿಲಲ್ಲಿದೆ. ಸದ್ಯ ದಮಯಂತಿಯ ಟೀಸರ್ ಲಾಂಚ್ ಮಾಡಲು ಚಿತ್ರತಂಡ ತಯಾರಿ ಮಾಡಿಕೊಂಡಿದೆ.
ನವರಸನ್ ನಿರ್ದೇಶನದಲ್ಲಿ ಮೂಡಿ ಬಂದಿರೋ ದಮಯಂತಿ ಚಿತ್ರದಲ್ಲಿ ರಾಧಿಕಾ ಡಿಫರೆಂಟಾದ ಪಾತ್ರದಲ್ಲಿ ನಟಿಸಿದ್ದಾರೆ. ಇದರ ಸ್ಪಷ್ಟ ಸುಳಿವುಗಳೇ ಪೋಸ್ಟರ್‍ಗಳ ಮೂಲಕ ಕಾಣಿಸಿವೆ. ಇದೀಗ ಚಿತ್ರೀಕರಣ ಮುಗಿಸಿಕೊಂಡಿರೋ ದಮಯಂತಿಯ ಟೀಸರ್ ಲಾಂಚ್ ಆಗೋ ಕಾಲ ಸಮೀಪಿಸಿದೆ. ಈ ತಿಂಗಳ ಅಂತ್ಯದೊಳಗೆ ಟೀಸರ್ ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದೆ. ಅಧಿಕೃತ ದಿನಾಂಕವೂ ದಿನದೊಪ್ಪತ್ತಿನಲ್ಲಿಯೇ ಹೊರ ಬರಲಿದೆ.
ಈ ಚಿತ್ರ ದೇಶಾದ್ಯಂತ ಸದ್ದು ಮಾಡಲು ತಯಾರಾಗಿದೆ. ಯಾಕೆಂದರೆ ಈ ಚಿತ್ರ ಕೇವಲ ಕನ್ನಡ ಮಾತ್ರವಲ್ಲದೆ ತಮಿಳು, ತೆಲುಗು, ಮಲೆಯಾಳಂ ಮತ್ತು ಹಿಂದಿಯಲ್ಲಿಯೂ ಬಿಡುಗಡೆಯಾಗಲಿದೆ. ಎಲ್ಲ ಭಾಷೆಗಳ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗುವಂಥಾ ಕಂಟೆಂಟು ಈ ಚಿತ್ರದಲ್ಲಿದೆ ಎಂಬ ಭರವಸೆಯೂ ಚಿತ್ರ ತಂಡದಲ್ಲಿದೆ.
ಈ ಟೀಸರ್ ಕೂಡಾ ಅಷ್ಟೂ ಭಾಷೆಗಳಲ್ಲಿಯೂ ಬಿಡುಗಡೆಯಾಗಲಿದೆಯಂತೆ. ಹಿಂದಿ, ಮಲೆಯಾಳಂ, ತಮಿಳು ಮತ್ತು ತೆಲುಗಿನ ಸ್ಟಾರ್ ನಟರಿಂದ ಈ ಟೀಸರ್ ಬಿಡುಗಡೆಗೊಳಿಸಲು ಚಿತ್ರತಂಡ ಯೋಜನೆ ಹಾಕಿಕೊಂಡಿದೆ. ಅಂತೂ ದಮಯಂತಿ ಮೂಲಕ ತುಂಬಾನೇ ಭಿನ್ನವಾದ ಪಾತ್ರವೊಂದರ ಮೂಲಕ ರಾಧಿಕಾ ಕುಮಾರಸ್ವಾಮಿ ಪ್ರೇಕ್ಷಕರನ್ನು ಮುಖಾಮುಖಿಯಾಗಲು ತಯಾರಾಗಿದ್ದಾರೆ.
