ಲಂಡನ್: ಪಾಕಿಸ್ತಾನ ಮೂಲದ ಬ್ರಿಟಿಷ್ ಪಾರ್ಲಿಮೆಂಟ್ ಸದಸ್ಯೆ ನಾಜ್ ಶಾ ಮುಂದೆ ಕಳೆದ ವಾರ ಬಸ್ಸಿನಲ್ಲಿ ವ್ಯಕ್ತಿಯೊಬ್ಬ ಹಸ್ತಮೈಥುನ ಮಾಡಿದ್ದಾನೆ.
ಬ್ರಾಡ್ಫೋರ್ಡ್ ವೆಸ್ಟ್ ನ ಲೇಬರ್ ಪಾರ್ಟಿ ನಾಯಕಿ ನಾಜ್ ಶಾ ಏಪ್ರಿಲ್ 1ರ ಬೆಳಗ್ಗೆ 10:50ಕ್ಕೆ ಲಂಡನ್ ಸೆಂಟ್ರಲ್ನ ವೈಟ್ಹಾಲ್ ತಲುಪಿದಾಗ ಈ ಘಟನೆ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಈ ಬಗ್ಗೆ ಲಂಡನ್ ಮೆಟ್ರೋಪೋಲಿಟನ್ ಪೊಲೀಸ್ ಇಲಾಖೆ ತನಿಖೆ ನಡೆಸುತ್ತಿದ್ದಾರೆ.
ಈ ಘಟನೆಯಿಂದ ನಾನು ಆಘಾತಕ್ಕೆ ಒಳಗಾಗಿದ್ದೇನೆ. ಆ ವ್ಯಕ್ತಿ ನಾರ್ಮಲ್ ಆಗಿ ನನ್ನ ಮುಂದೆ ಕುಳಿತಿದ್ದನು. ಬಳಿಕ ಹಸ್ತಮೈಥುನ ಮಾಡಿದ್ದಾನೆ. ನನಗೆ ಆ ಕ್ಷಣ ಏನೂ ಮಾಡಬೇಕೆಂದು ಗೊತ್ತಿರಲಿಲ್ಲ. ಆ ವ್ಯಕ್ತಿ ಅಸಭ್ಯವಾಗಿ ವರ್ತಿಸಿರುವುದರ ಬಗ್ಗೆ ನಾನು ದೂರು ದಾಖಲಿಸಿದ್ದೇನೆ. ನನಗೆ ಇಲ್ಲಿಯವರೆಗೂ ಈ ರೀತಿಯ ಅನುಭವ ಆಗಿಲ್ಲ. ಮಹಿಳೆಯರಿಗೆ ಈ ರೀತಿ ಅನುಭವ ಆಗದೇ ತಮ್ಮ ಕೆಲಸಕ್ಕೆ ಹೋಗುವ ಅವಕಾಶ ಸಿಗಬೇಕು ಎಂದು ನಾಜ್ ಶಾ ಹೇಳಿದ್ದಾರೆ.
ಆ ವ್ಯಕ್ತಿ ಹಸ್ತಮೈಥುನ ಮಾಡಿದ ತಕ್ಷಣ ನಾನು ಈ ಬಗ್ಗೆ ಬಸ್ ಚಾಲಕನಿಗೆ ಹೇಳಿದೆ. ಆದರೆ ಅಷ್ಟರಲ್ಲಿ ಆತ ಬಸ್ ಇಳಿದು ಹೊರಟು ಹೋಗಿದ್ದನು ಎಂದು ನಾಜ್ ಶಾ ತಿಳಿಸಿದ್ದಾರೆ.
ನಾಜ್ ಶಾ ತಮಗಾದ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ವೇಳೆ ಲೈಂಗಿಕ ದೌರ್ಜನ್ಯ ಸಂತ್ರಸ್ತರ ಯೂಟ್ಯೂಬ್ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಈ ವಿಡಿಯೋದಲ್ಲಿ ಶೇ.90ರಷ್ಟು ಮಂದಿ ತಮಗೆ ಆಗಿರುವ ಲೈಂಗಿಕ ಕಿರಕುಳಕ್ಕೆ ಸಂಬಂಧಿಸಿದ ಯಾವುದೇ ಘಟನೆಯನ್ನು ಹಂಚಿಕೊಂಡಿಲ್ಲ ಎಂದು ತಿಳಿಸಿದ್ದಾರೆ.
