ಬಳ್ಳಾರಿ: ವೇಗವಾಗಿ ಬಂದ ಡೆಮು ರೈಲೊಂದು ಹಳಿಗೆ ಅಡ್ಡ ಬಂದ ಎಮ್ಮೆಗಳ(Buffaloes) ಹಿಂಡಿಗೆ ಡಿಕ್ಕಿ ಹೊಡೆದ ಪರಿಣಾಮ ಸ್ಥಳದಲ್ಲೇ ಎಂಟು ಎಮ್ಮೆಗಳು ಛಿದ್ರ ಛಿದ್ರವಾಗಿ ಸಾವನ್ನಪ್ಪಿರುವ ಧಾರುಣ ಘಟನೆ ಜಿಲ್ಲೆಯ ಹೊಸಪೇಟೆ(Hosapet) ತಾಲೂಕಿನ ಮರಿಯಮ್ಮನಹಳ್ಳಿ ಸಮೀಪ ನಡೆದಿದೆ.
ಮರಿಯಮ್ಮನಹಳ್ಳಿ ಪಟ್ಟಣದ ನಿವಾಸಿ ಕಾಳಪ್ಪ ಎಂಬುವವರು ಎಂದಿನಂತೆ ತಮ್ಮ ಎಮ್ಮೆಗಳನ್ನು ಮೇಯಿಸಲು ಕರೆದೊಯ್ದಿದ್ದರು. ಈ ವೇಳೆ ರೈಲ್ವೆ ಹಳಿ(Rail Track) ದಾಟುತ್ತಿದ್ದ ಸಂದರ್ಭದಲ್ಲಿ ವೇಗವಾಗಿ ಬಂದ ಡೆಮು (DEMU) ಎಂಜಿನ್ ರೈಲು ಅಪ್ಪಳಿಸಿದೆ. ಡಿಕ್ಕಿಯ ರಭಸಕ್ಕೆ ಹಳಿಯ ಮೇಲೆಯೇ ಎಮ್ಮೆಗಳ ದೇಹ ಛಿದ್ರಗೊಂಡು ಭೀಕರವಾಗಿ ಮೃತಪಟ್ಟಿವೆ.
ಕಾಳಪ್ಪ ಅವರ ಕುಟುಂಬವು ಸಂಪೂರ್ಣವಾಗಿ ಈ ಎಮ್ಮೆಗಳನ್ನು ನಂಬಿಕೊಂಡೇ ಹೈನುಗಾರಿಕೆ ನಡೆಸಿ ಜೀವನ ಸಾಗಿಸುತ್ತಿತ್ತು. ಮನೆಯ ಜೀವನೋಪಾಯಕ್ಕೆ ಮತ್ತು ದಿನನಿತ್ಯದ ಆದಾಯಕ್ಕೆ ಆಧಾರವಾಗಿದ್ದ ಎಂಟು ಎಮ್ಮೆಗಳೂ ಕಣ್ಣಮುಂದೆಯೇ ಪ್ರಾಣಬಿಟ್ಟಿದ್ದನ್ನು ಕಂಡು ಕುಟುಂಬಸ್ಥರ ಆಕ್ರಂದನ ಮುಗಿಲುಮುಟ್ಟಿದೆ. ಇದನ್ನೂ ಓದಿ: ರೈತರ ಪರವಾಗಿ ಜೈಲಿಗೆ ಹೋಗಲು ನಾನು ಸಿದ್ಧ: ಬಿಡದಿ ಟೌನ್ಶಿಪ್ ರೈತರಿಗೆ ಧೈರ್ಯ ತುಂಬಿದ ಹೆಚ್ಡಿಡಿ
ಏಕಾಏಕಿ ಸಂಭವಿಸಿದ ಈ ದುರಂತದಿಂದ ಕುಟುಂಬವು ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದು, ಸರ್ಕಾರ ಹಾಗೂ ರೈಲ್ವೆ ಇಲಾಖೆ ತಮಗೆ ಸೂಕ್ತ ಪರಿಹಾರ ನೀಡಿ ನೆರವಾಗಬೇಕೆಂದು ಕಣ್ಣೀರು ಹಾಕಿದ್ದಾರೆ.
ವಿಷಯ ತಿಳಿಯುತ್ತಿದ್ದಂತೆಯೇ ಸ್ಥಳಕ್ಕೆ ರೈಲ್ವೆ ಅಧಿಕಾರಿಗಳು ಹಾಗೂ ಸ್ಥಳೀಯ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಸಂಬಂಧ ಮರಿಯಮ್ಮನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂದಿನ ತನಿಖೆ ಮುಂದುವರಿದಿದೆ.
