ಶಿಲ್ಲಾಂಗ್: ಶಾಸಕರು ಮತ್ತು ಬಿಜೆಪಿ ನಾಯಕತ್ವದ ನಡುವೆ ತಿಂಗಳುಗಳ ಕಾಲ ನಡೆದ ಮಾತುಕತೆಗಳ ನಂತರ, ಮೇಘಾಲಯದಲ್ಲಿ ಪ್ರಮುಖ ರಾಜಕೀಯ ಬದಲಾವಣೆಯ ಭಾಗವಾಗಿ ಯುನೈಟೆಡ್ ಡೆಮಾಕ್ರಟಿಕ್ ಪಾರ್ಟಿಯ (UDP) ಎಂಟು ಮಂದಿ ಶಾಸಕರು ಬುಧವಾರ ನವದೆಹಲಿಯಲ್ಲಿ ಬಿಜೆಪಿ (BJP) ಸೇರ್ಪಡೆಗೊಂಡರು.
ಶಾಸಕರಾದ ಲಹ್ಕ್ಮೆನ್ ರಿಂಬುಯಿ (ಅಮ್ಲಾರೆಮ್), ಮಾಜಿ ಸಚಿವ ಕಿರ್ಮೆನ್ ಶೈಲ್ಲಾ (ಖ್ಲೀಹ್ರಿಯತ್), ಓಲನ್ ಸಿಂಗ್ ಸುಯಿನ್ (ಮಾವ್ಸಿನ್ರಾಮ್), ಮ್ಯಾಥ್ಯೂ ಬಿಯಾಂಡ್ಸ್ಟಾರ್ ಕುರ್ಬಾಹ್ (ಮಾವ್ಫ್ಲಾಂಗ್), ಮೈರಾಲ್ಬೋರ್ನ್ ಸೈಯೆಮ್ (ನಾಂಗ್ಪೋಹ್), ಪಿಯುಸ್ ಮಾರ್ವೀನ್ (ರಾನಿಕೋರ್), ಸಿನ್ಶಾರ್ ಥಾಬಾಹ್ ಬಿಜೆಪಿ ಸೇರಿದ್ದಾರೆ. ಇದನ್ನೂ ಓದಿ: ಕಾಂಗ್ರೆಸ್ ಅವಧಿಯಲ್ಲಿ ಚುನಾವಣಾ ಆಯುಕ್ತರಾಗಿದ್ದವರು `ಕೈʼ ಟಿಕೆಟ್ನಲ್ಲಿ ಸ್ಪರ್ಧಿಸಿ ಮಂತ್ರಿಯಾಗಿದ್ದರು – ಸಂಬಿತ್ ಪಾತ್ರ ತಿರುಗೇಟು
ಪಕ್ಷದ ಹಿರಿಯ ನಾಯಕರ ಸಮ್ಮುಖದಲ್ಲಿ ಶಾಸಕರು ಬಿಜೆಪಿಗೆ ಸೇರ್ಪಡೆಗೊಂಡರು. ಈ ಬೆಳವಣಿಗೆಯ ಕುರಿತು ನವದೆಹಲಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಬಿಜೆಪಿ ರಾಷ್ಟ್ರೀಯ ವಕ್ತಾರ ಹಾಗೂ ಹಿರಿಯ ನಾಯಕ ಸಂಬಿತ್ ಪಾತ್ರಾ ಮಾತನಾಡಿದರು.
ಶಾಸಕರ ಭವಿಷ್ಯ ಹಾಗೂ ಮೇಘಾಲಯಕ್ಕೆ ಸಂಬಂಧಿಸಿದ ವಿವಿಧ ವಿಷಯಗಳ ಕುರಿತು ವಾರಗಳ ಕಾಲ ನಡೆದ ರಾಜಕೀಯ ಊಹಾಪೋಹಗಳು ಮತ್ತು ನಿರಂತರ ಮಾತುಕತೆಗಳ ನಂತರ ಈ ಬೆಳವಣಿಗೆ ನಡೆದಿದೆ.
ಈ ಎಂಟು ಶಾಸಕರ ಸೇರ್ಪಡೆಯು ರಾಜ್ಯದ ರಾಜಕೀಯ ಲೆಕ್ಕಾಚಾರವನ್ನು ಬದಲಾಯಿಸಲಿದ್ದು, ಆಡಳಿತಾರೂಢ ಮೈತ್ರಿಕೂಟ ಹಾಗೂ 2028ರ ವಿಧಾನಸಭಾ ಚುನಾವಣೆಯ ಸಿದ್ಧತೆಗಳ ಮೇಲೆ ವ್ಯಾಪಕ ಪರಿಣಾಮ ಬೀರಬಹುದು. ಮಾಜಿ ಶಾಸಕ ಮತ್ತು ಯುಡಿಪಿ (UDP) ನಾಯಕ ಡಾ. ಜೆಮಿನೊ ಮಾವ್ಥೋ ಅವರು ಸೆಪ್ಟೆಂಬರ್ 12 ರಂದು ಬಿಜೆಪಿಗೆ ಸೇರ್ಪಡೆಗೊಂಡಿದ್ದರು. ಇದನ್ನೂ ಓದಿ: ನೀವು ಮಾಡಿರೋದು ದೇಶದ್ರೋಹ; ಟೈಂ ಬರುತ್ತೆ, ನಿಮ್ಮನ್ನ ಹಿಡಿಯುತ್ತೇವೆ – ರಾಹುಲ್ ಗಾಂಧಿ ಎಚ್ಚರಿಕೆ
ಈ 10 ಶಾಸಕರೊಂದಿಗೆ ಮೇಘಾಲಯ ವಿಧಾನಸಭೆಯಲ್ಲಿ ಎನ್ಪಿಪಿ (NPP) ನಂತರ ಬಿಜೆಪಿ ಎರಡನೇ ಅತಿದೊಡ್ಡ ಪಕ್ಷವಾಗಲಿದೆ. ಈ ಶಾಸಕರು ಬಿಜೆಪಿ ನಾಯಕತ್ವದ ಮುಂದೆ ನಿರ್ದಿಷ್ಟ ಬೇಡಿಕೆಗಳನ್ನು ಮುಂದಿಟ್ಟಿದ್ದರು. ಖಾಸಿ ಭಾಷೆಯನ್ನು ಎಂಟನೇ ಪರಿಚ್ಛೇದಕ್ಕೆ ಸೇರಿಸುವುದು, ಕಲ್ಲಿದ್ದಲು ಗಣಿಗಾರಿಕೆಯನ್ನು ಕಾನೂನುಬದ್ಧವಾಗಿ ಪುನರಾರಂಭಿಸುವುದು ಮತ್ತು MRSSA-ಗೆ ತಿದ್ದುಪಡಿಗಳಿಗಾಗಿ ಅನುಮೋದನೆ ಪಡೆಯುವುದು ಇವರ ಬೇಡಿಕೆಯಾಗಿದೆ.
