– 18 ವರ್ಷ ಒಂದೇ ಟೀಮ್, ಅದೇ ಗತ್ತು, ತಾಕತ್ತು
ಆತ ತಂಡಕ್ಕೆ ಎಂಟ್ರಿ ಕೊಟ್ಟಾಗ ಜಸ್ಟ್ 19 ವರ್ಷದ ಸಾಮಾನ್ಯ ಹುಡುಗ ಅಷ್ಟೇ. ಆಕಸ್ಮಿಕವಾಗಿ ಐಪಿಎಲ್ನಲ್ಲಿ ಬೆಂಗಳೂರು ತಂಡಕ್ಕೆ ಸೇರಿದ ಅವನು, ನಂತರದ ದಿನಗಳಲ್ಲಿ ಚರಿತ್ರೆಯನ್ನ ಬರೆದ. ಸಾಮಾನ್ಯನಾಗಿ ಬಂದಾತ ಕಿಂಗ್ ಆಗಿ ಮೆರೆದ. ರನ್ ಮೆಷಿನ್ ಕಿಂಗ್ ಕೊಹ್ಲಿ (Virat Kohli) ರಾಜನಾಗಿ ಮೆರೆದರೂ ಅದೊಂದು ಕೊರಗು 18 ವರ್ಷಗಳಿಂದ ಆರ್ಸಿಬಿ ಮತ್ತು ಕೊಹ್ಲಿ ಅಭಿಮಾನಿಗಳಿಗೆ ಕಾಡುತ್ತಲೇ ಇತ್ತು. ಈಗ ಆ ಕೊರಗನ್ನು ನೀಗಿಸುವ ಅವಕಾಶ ಮತ್ತೆ ಕೂಡಿ ಬಂದಿದೆ.
ಅದು 2008, ಐಪಿಎಲ್ನ ಮೊದಲ ಸೀಸನ್. ಭಾರತದ ಅಂಡರ್ 19 ತಂಡದ ಕ್ಯಾಪ್ಟನ್ ಆಗಿದ್ದ ಹುಡುಗ ವಿರಾಟ್ ಕೊಹ್ಲಿ ಬೆಂಗಳೂರು ತಂಡಕ್ಕೆ ಸೇರಿದ್ದೇ ಅಚಾನಕ್. 2008ರಲ್ಲಿ ಅಂಡರ್ 19 ಕೋಟಾದಲ್ಲಿ ಆರ್ಸಿಬಿ ಮ್ಯಾನೇಜ್ಮೆಂಟ್ ವಿರಾಟ್ ಕೊಹ್ಲಿಯನ್ನ ತಂಡಕ್ಕೆ ಸೇರಿಸಿಕೊಳ್ಳಲಾಯಿತು. ಆರಂಭದಲ್ಲಿ ವಿರಾಟ್ ಡೆಲ್ಲಿ ತಂಡದ ಪಾಲಾಗಬೇಕಿತ್ತು. ಆದರೆ ದೆಹಲಿ ತಂಡ ಮತ್ತೊಬ್ಬ ಯುವ ಆಟಗಾರ ಪ್ರದೀಪ್ ಸಾಂಗ್ವಾನ್ ಕಡೆ ವಾಲಿದ ಕಾರಣ, ಕೊಹ್ಲಿ ಬೆಂಗಳೂರಿಗರ ಪಾಲಾದರು.
ರೆಡ್ ಅಂಡ್ ಗೋಲ್ಡ್ ಜರ್ಸಿ ತೊಟ್ಟು ಅಖಾಡಕ್ಕಿಳಿ ವಿರಾಟ್ ಕೊಹ್ಲಿ ಐಪಿಎಲ್ ಆರಂಭದ ಮೂರು ಸೀಸನ್ನಲ್ಲೂ ಅಷ್ಟು ದೊಡ್ಡದಾಗಿ ಮಿಂಚದಿದ್ದರೂ ಆರ್ಸಿಬಿ ಮ್ಯಾನೇಜ್ಮೆಂಟ್ ಕೊಹ್ಲಿ ಮೇಲೆ ನಂಬಿಕೆ ಇಟ್ಟು, ರಿಟೈನ್ ಮಾಡಿಕೊಂಡಿತು. ಈ ಒಂದು ನಿರ್ಧಾರ ಆರ್ಸಿಬಿಯಲ್ಲಿ ಒಬ್ಬ ದೊಡ್ಡ ಸ್ಟಾರ್ ಉಗಮಕ್ಕೆ ಕಾರಣವಾಯಿತು. ಅಲ್ಲಿಂದ ಶುರವಾದ ಕೊಹ್ಲಿ ಅಬ್ಬರ ಇಂದು ಕೂಡ ಮುಂದುವರೆಯುತ್ತಲೇ ಇದೆ. ಆನೆ ನಡೆದಿದ್ದೆ ದಾರಿ ಎಂಬಂತೆ ಮುನ್ನುಗ್ಗಿದ್ರು. ಅದು ಯಾವುದೇ ಪಿಚ್ ಇರಲಿ, ಅದು ಎಂತಹ ಘಟಾನುಘಟಿ ಬೌಲರ್ ಇದ್ದರೂ ಚಿಂದಿ ಉಡಾಯಿಸಿದರು.
2013ರಲ್ಲಿ ಡೆನಿಯಲ್ ವೆಟ್ಟೋರಿ ಬಳಿಕ ತಂಡದ ಜವಬ್ದಾರಿ ಹೊತ್ತ ಕೊಹ್ಲಿ, ಬರೊಬ್ಬರಿ 143 ಪಂದ್ಯಗಳಲ್ಲಿ ತಂಡವನ್ನ ಮುನ್ನಡೆಸಿದರು. 2016ರಲ್ಲಿ ತಂಡವನ್ನು ಯಶಸ್ಬಿಯಾಗಿ ಫೈನಲ್ಗೆ ತೆಗೆದುಕೊಂಡ ಹೋದ ಹೆಮ್ಮೆ ಕೂಡ ಕೊಹ್ಲಿಯದ್ದೇ. ಒಂದೇ ಸೀಸನ್ನಲ್ಲಿ ಬರೊಬ್ಬರಿ 970 ರನ್ ಗಳಿಸಿದ್ದ ಕೊಹ್ಲಿಯ ದಾಖಲೆಯನ್ನು ಇಂದಿಗೂ ಯಾರೂ ಮುರಿದಿಲ್ಲ.
ಇಲ್ಲಿ ತನಕ ಕೊಹ್ಲಿ ಕಳೆದ 18 ವರ್ಷದಲ್ಲಿ ಆರ್ಸಿಬಿ ಒಂದೇ ತಂಡದ ಪರ ಆಡಿ ಬರೊಬ್ಬರಿ 8 ಸಾವಿರ ರನ್ ಪೂರೈಸಿದ್ದಾರೆ. ಇದು ಐಪಿಎಲ್ ಇತಿಹಾಸದಲ್ಲೇ ಆಟಗಾರ ಗಳಿಸಿದ ಅತಿ ಹೆಚ್ಚು ರನ್ ಮತ್ತು ಒಬ್ಬ ಆಟಗಾರ ಒಂದೇ ತಂಡದ ಪರ ಅತಿ ಹೆಚ್ಚು ರನ್ ಗಳಿಸಿದ ಸಾರ್ವಕಾಲಿಕ ದಾಖಲೆ ಕೂಡ ಹೌದು. ಅಲ್ಲದೇ 68 ಅರ್ಧ ಶತಕ, 8 ಶತಕ ಗಳಿಸುವ ಮೂಲಕ ಅತಿ ಹೆಚ್ಚು ಶತಕಗಳನ್ನು ಸಿಡಿಸಿದ ಹೆಮ್ಮೆ ಕೂಡ ಕೊಹ್ಲಿಯ ಗರಿಮೆ. ತಂಡದ ಜೊತೆಗೆ ಕೊಹ್ಲಿ ಯಶಸ್ಸಿಗೆ ಮತ್ತೊಂದು ಕಾರಣ ಆರ್ಸಿಬಿ ಅಭಿಮಾನಿಗಳು. ಕಪ್ ಬರ ನೀಗದಿದ್ದರೂ ತಂಡವನ್ನು ಬಿಟ್ಟು ಕೊಡದ ಅಭಿಮಾನಿಗಳಿಗೆ ಕೊಹ್ಲಿ ಎಂದಿಗೂ ಹಾಟ್ ಫೇವರೇಟ್. ಇದೇ ಕಾರಣಕ್ಕೆ ಸದ್ಯ ಆರ್ಸಿಬಿ ಗತ್ತು ಇಂಟರ್ನ್ಯಾಷನಲ್ ಲೆವಲ್ನಲ್ಲಿ ಸದ್ದು ಮಾಡಿದೆ.
ಕೊಹ್ಲಿ ಸಾಧನೆ:
ಪಂದ್ಯ – 266
ರನ್ – 8,618
ಅರ್ಧಶತಕ/ಶತಕ -63/8
ಸ್ಟ್ರೈಕ್ ರೇಟ್ – 132.92
ಈ ಸೀಸನ್ 18ಕ್ಕೂ ಕೊಹ್ಲಿಯ ಜರ್ಸಿ ನಂಬರ್ಗೂ ಕಾಕತಾಳೀಯ ಎಂಬಂತೆ ಸಾಮ್ಯತೆ ಇದೆ. ಅಷ್ಟೇ ಅಲ್ಲದೇ ಪಂಜಾಬ್ ವಿರುದ್ಧ ಆರ್ಸಿಬಿ ಇಲ್ಲಿ ತನಕ 18 ಪಂದ್ಯಗಳನ್ನು ಗೆದ್ದಿದ್ದರೆ, 18 ಪಂದ್ಯಗಳಲ್ಲಿ ಸೋತಿದೆ. ಇನ್ನೊಂದು ಸ್ಪೆಷಲ್ ಅಂದರೆ ಇವತ್ತಿನ ಎಲ್ಲಾ ದಿನಾಂಕವನ್ನು ಕೂಡಿದ್ರೆ ಒಟ್ಟು ನಂಬರ್ ಕೂಡ 18. ಒಟ್ಟಾರೆ 18ರ ನಂಟು ಕಪ್ ಗಂಟನ್ನು ಬಿಡಿಸಲು ಸಹಾಯವಾಗುತ್ತಾ ಅನ್ನೋದನ್ನ ಕಾದು ನೋಡಬೇಕಿದೆ.
