ಮಧ್ಯಪ್ರಾಚ್ಯದ ರಣಾಂಗಣದಲ್ಲಿ ದಶಕಗಳಿಂದ ಹೊತ್ತಿ ಉರಿಯುತ್ತಿರುವ ಹೌತಿ ಬಂಡುಕೋರರು(Houthi Rebels) ಮತ್ತು ಸೌದಿ ಅರೇಬಿಯಾ(Saudi Arabia) ನಡುವಿನ ಸಂಘರ್ಷ ಕೇವಲ ಎರಡು ಗಡಿಗಳ ನಡುವಿನ ಕಾಳಗವಲ್ಲ. ಅದು ಇಡೀ ಪ್ರಾಂತ್ಯದ ಅಧಿಪತ್ಯಕ್ಕಾಗಿ ನಡೆಯುತ್ತಿರುವ ಜಟಿಲ ಸಮರ. ಈ ಸುದೀರ್ಘ ಕದನದ ಆಳಕ್ಕೆ ಇಳಿದರೆ ಅಲ್ಲಿ ಪ್ರಾದೇಶಿಕ ರಾಜಕಾರಣದ ಮೇಲಾಟ, ಶಿಯಾ-ಸುನ್ನಿ ಸಿದ್ಧಾಂತಗಳ ನಡುವಿನ ಧಾರ್ಮಿಕ ಬಿರುಕು ಹಾಗೂ ಯುದ್ಧಪೀಡಿತ ಯೆಮೆನ್ ದೇಶದ ನಿಯಂತ್ರಣ ಸಾಧಿಸಲು ನಡೆಯುತ್ತಿರುವ ಹಪಾಹಪಿಯೇ ಪ್ರಮುಖ ಕಾರಣಗಳಾಗಿ ಎದ್ದು ಕಾಣುತ್ತವೆ. ಬಲಾಢ್ಯ ಅರಬ್ ಒಕ್ಕೂಟ ಮತ್ತು ಇರಾನ್(Iran) ಬೆಂಬಲಿತ ಬಂಡುಕೋರರ ಈ ಪ್ರತಿಷ್ಠೆಯ ಹೋರಾಟವು ಕೇವಲ ಯೆಮೆನ್‌ನ(Yemen) ಭವಿಷ್ಯವನ್ನು ಮಾತ್ರವಲ್ಲದೆ, ಇಡೀ ಜಾಗತಿಕ ರಾಜಕೀಯ ಮತ್ತು ಆರ್ಥಿಕ ಸಮತೋಲನವನ್ನೇ ತಲ್ಲಣಗೊಳಿಸಿದೆ.
ಯೆಮೆನ್ ಅಂತರ್ಯುದ್ಧ
ಯೆಮೆನ್ ದೇಶವು ಪ್ರಸ್ತುತ ಸುದೀರ್ಘ ಅಂತರ್ಯುದ್ಧದ ಕಾರಣದಿಂದಾಗಿ ಎರಡು ಪ್ರಮುಖ ಭಾಗಗಳಾಗಿ ವಿಭಜನೆಯಾಗಿದೆ. ಹಾಗಾಗಿ ಇಡೀ ದೇಶದ ಮೇಲೆ ಯಾವುದೇ ಒಬ್ಬರೇ ಆಡಳಿತ ನಡೆಸುತ್ತಿಲ್ಲ. ಬದಲಿಗೆ ಎರಡು ವಿಭಿನ್ನ ಗುಂಪುಗಳು ಬೇರೆ ಬೇರೆ ಪ್ರದೇಶಗಳಲ್ಲಿ ತಲಾ ತಮ್ಮದೇ ಆದ ಸರ್ಕಾರಗಳನ್ನು ನಡೆಸುತ್ತಿವೆ.
ಸೌದಿ ಅರೇಬಿಯಾದ ಬೆಂಬಲ ಹೊಂದಿರುವ ಈ ಮಂಡಳಿಯ ಅಧ್ಯಕ್ಷರಾಗಿ ಡಾ. ರಶಾದ್ ಅಲ್-ಅಲಿಮಿ (Rashad al-Alimi) ಮತ್ತು ಪ್ರಧಾನಮಂತ್ರಿಯಾಗಿ ಡಾ. ಶಾಯಾ ಮೊಹ್ಸಿನ್ ಅಲ್-ಜಿಂದಾನಿ (Shaya Mohsin al-Zindani) ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ಈ ಇವರ ಸರ್ಕಾರ ಯೆಮೆನ್‌ನ ದಕ್ಷಿಣ ಮತ್ತು ಪೂರ್ವ ಭಾಗಗಳನ್ನು ನಿಯಂತ್ರಿಸುತ್ತಿದೆ. ದೇಶದ ಪ್ರಮುಖ ಬಂದರು ನಗರಿ ಅಡೆನ್ (Aden) ಈ ಸರ್ಕಾರದ ತಾತ್ಕಾಲಿಕ ರಾಜಧಾನಿಯಾಗಿದೆ. ಇತ್ತೀಚಿನ ವರದಿಗಳ ಪ್ರಕಾರ, ಸರ್ಕಾರಿ ಪಡೆಗಳು ದಕ್ಷಿಣದ ಹಗ್ರಾಮತ್ ಮತ್ತು ಅಲ್-ಮಹ್ರಾದಂತಹ ಪ್ರಮುಖ ತೈಲ ಸಮೃದ್ಧ ಪ್ರಾಂತ್ಯಗಳ ಮೇಲೆಯೂ ತಮ್ಮ ಸಂಪೂರ್ಣ ಹಿಡಿತವನ್ನು ಸಾಧಿಸಿವೆ.
ಇರಾನ್ ದೇಶದ ಬೆಂಬಲ ಹೊಂದಿರುವ ಹೌತಿ ಬಂಡುಕೋರರು ತಮ್ಮದೇ ಆದ ಸರ್ಕಾರವನ್ನು ನಡೆಸುತ್ತಿದ್ದಾರೆ. ಇದರ ಅಧ್ಯಕ್ಷರಾಗಿ ಮಹ್ದಿ ಅಲ್-ಮಶತ್ (Mahdi al-Mashat) ಹಾಗೂ ಕಾರ್ಯಕಾರಿ ಪ್ರಧಾನಿಯಾಗಿ ಮುಹಮ್ಮದ್ ಅಹ್ಮದ್ ಮಿಫ್ತಾಹ್ ಕಾರ್ಯನಿರ್ವಹಿಸುತ್ತಿದ್ದಾರೆ. ಹೌತಿಗಳು ಯೆಮೆನ್‌ನ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ಉತ್ತರ ಮತ್ತು ಪಶ್ಚಿಮ ಭಾಗಗಳನ್ನು ತಮ್ಮ ನಿಯಂತ್ರಣದಲ್ಲಿಟ್ಟುಕೊಂಡಿದ್ದಾರೆ. ಯೆಮೆನ್‌ನ ಅಧಿಕೃತ ರಾಜಧಾನಿಯಾದ ಸನಾ (Sanaa) ಮತ್ತು ಕೆಂಪು ಸಮುದ್ರದ ತೀರದಲ್ಲಿರುವ ಆಯಕಟ್ಟಿನ ಬಂದರು ನಗರಿ ಹುದೈದಾ (Hodeidah) ಇವರ ನಿಯಂತ್ರಣದಲ್ಲಿದೆ.
ರಾಜಧಾನಿ ಸನಾ ಸೇರಿದಂತೆ ಉತ್ತರ ಭಾಗಗಳನ್ನು ಹೌತಿಗಳು ವಶಪಡಿಸಿಕೊಂಡಿರುವುದರಿಂದ, ಸೌದಿ ಬೆಂಬಲಿತ ಅಧಿಕೃತ ಸರ್ಕಾರವು ಅಡೆನ್‌ನಿಂದಲೇ ಆಡಳಿತ ನಡೆಸುತ್ತಿದೆ. ಇತ್ತೀಚೆಗೆ ಅಧ್ಯಕ್ಷ ರಶಾದ್ ಅಲ್-ಅಲಿಮಿ ಅವರು ಹೌತಿಗಳ ವಶದಲ್ಲಿರುವ ಇಡೀ ಯೆಮೆನ್ ದೇಶವನ್ನು ಮರಳಿ ವಶಪಡಿಸಿಕೊಳ್ಳಲು ‘ಡಾನ್ ಆಫ್ ಯೆಮೆನ್’ (Operation Dawn of Yemen) ಎಂಬ ಬೃಹತ್ ಮಿಲಿಟರಿ ಕಾರ್ಯಾಚರಣೆಯನ್ನು ಘೋಷಿಸಿದ್ದು, ಇರಡೂ ಪಡೆಗಳ ನಡುವೆ ಭೀಕರ ಸಂಘರ್ಷ ಮುಂದುವರಿದಿದೆ.
ಯೆಮೆನ್ ದೇಶದ ಉತ್ತರ ಭಾಗದಲ್ಲಿ ಸಕ್ರಿಯವಾಗಿರುವ ಹೌತಿಗಳು (ಶಿಬಾ ಮುಸ್ಲಿಂ ಪಂಗಡದ ಜೈದಿ ಪಂಗಡಕ್ಕೆ ಸೇರಿದವರು), ಅಲ್ಲಿನ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಪಡೆದಿದ್ದ ಸುನ್ನಿ ಮುಸ್ಲಿಂ ಸರ್ಕಾರವನ್ನು 2014-15ರಲ್ಲಿ ಅಧಿಕಾರದಿಂದ ಕೆಳಗಿಳಿಸಿ ರಾಜಧಾನಿ ಸನಾವನ್ನು ವಶಪಡಿಸಿಕೊಂಡರು.
ಮಧ್ಯಪ್ರಾಚ್ಯದಲ್ಲಿ ಸೌದಿ ಅರೇಬಿಯಾ (ಸುನ್ನಿ ಪ್ರಾಬಲ್ಯ) ಮತ್ತು ಇರಾನ್ (ಶಿಯಾ ಪ್ರಾಬಲ್ಯ) ದೇಶಗಳ ನಡುವೆ ದಶಕಗಳಿಂದ ಪ್ರಭಾವಕ್ಕಾಗಿ ಪೈಪೋಟಿ ನಡೆಯುತ್ತಿದೆ.ಹೌತಿಗಳು ಇರಾನ್‌ನ ಬೆಂಬಲಿಗರು. ಇರಾನ್ ಇವರಿಗೆ ಅತ್ಯಾಧುನಿಕ ಕ್ಷಿಪಣಿಗಳು, ಡ್ರೋನ್‌ಗಳು ಮತ್ತು ಶಸ್ತ್ರಾಸ್ತ್ರಗಳನ್ನು ಪೂರೈಸುತ್ತದೆ. ಹೀಗಾಗಿ ಹೌತಿಗಳನ್ನು ಅಡಗಿಸುವುದು ಎಂದರೆ ಇರಾನ್‌ನ ಪ್ರಭಾವವನ್ನು ತಗ್ಗಿಸುವುದು ಎಂಬುದು ಸೌದಿಯ ಲೆಕ್ಕಾಚಾರವಾಗಿದೆ.
2022 ರಲ್ಲಿ ವಿಶ್ವಸಂಸ್ಥೆಯ ಮಧ್ಯಸ್ಥಿಕೆಯಲ್ಲಿ ಏರ್ಪಟ್ಟಿದ್ದ ಕದನ ವಿರಾಮವು ಮುರಿದುಬಿದ್ದಿದ್ದು, ಯೆಮೆನ್‌ನ ಹೌತಿ ನಿಯಂತ್ರಿತ ಪ್ರದೇಶಗಳ ಮೇಲೆ ಸೌದಿ ಪಡೆಗಳು ಮತ್ತು ಯೆಮೆನ್ ಸರ್ಕಾರಿ ಪಡೆಗಳು ಮತ್ತೆ ವೈಮಾನಿಕ ದಾಳಿಗಳನ್ನು ತೀವ್ರಗೊಳಿಸಿವೆ. ಇದಕ್ಕೆ ಪ್ರತಿಯಾಗಿ ಹೌತಿ ಬಂಡುಕೋರರು ಸೌದಿ ಅರೇಬಿಯಾದ ಆರ್ಥಿಕತೆಯ ಬೆನ್ನೆಲುಬಾದ ಸೌದಿ ಅರಾಮ್ಕೊ ತೈಲ ಸಂಸ್ಥೆಗಳು ಮತ್ತು ರಾಜಧಾನಿ ರಿಯಾದ್‌ನ ಕಿಂಗ್ ಖಾಲಿದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಭೀಕರ ಡ್ರೋನ್ ಹಾಗೂ ಬ್ಯಾಲಿಸ್ಟಿಕ್ ಕ್ಷಿಪಣಿ ದಾಳಿಗಳನ್ನು ನಡೆಸುತ್ತಿದ್ದಾರೆ.
ಸೌದಿಗೆ ಯಾಕೆ ಯೆಮೆನ್ ಮೇಲೆ ಕಣ್ಣು?
ಸೌದಿ ಅರೇಬಿಯಾಕ್ಕೆ ತನ್ನ ನೆರೆಹೊರೆಯ ದೇಶವಾದ ಯೆಮೆನ್ ಮೇಲೆ ಹಿತಾಸಕ್ತಿ ಅಥವಾ ಕಣ್ಣಿಡಲು ಕೇವಲ ಪ್ರಾದೇಶಿಕ ರಾಜಕಾರಣ ಮಾತ್ರವಲ್ಲದೆ, ಭೌಗೋಳಿಕ, ಆರ್ಥಿಕ ಮತ್ತು ರಾಷ್ಟ್ರೀಯ ಭದ್ರತೆಯ ಪ್ರಮುಖ ಕಾರಣಗಳಿವೆ.
ಯೆಮೆನ್ ದೇಶವು ಜಗತ್ತಿನ ಅತ್ಯಂತ ಪ್ರಮುಖ ಸಮುದ್ರ ವ್ಯಾಪಾರ ಮಾರ್ಗಗಳಲ್ಲಿ ಒಂದಾದ ಬಾಬ್ ಅಲ್-ಮಂದಬ್ ಜಲಸಂಧಿಯ ಮೇಲ್ವಿಚಾರಣೆ ಹೊಂದಿದೆ. ಜಗತ್ತಿನಾದ್ಯಂತ ಪೂರೈಕೆಯಾಗುವ ತೈಲ (Oil) ಮತ್ತು ವಾಣಿಜ್ಯ ಸರಕುಗಳು ಕೆಂಪು ಸಮುದ್ರದ ಮೂಲಕ ಸಾಗಲು ಈ ಮಾರ್ಗವೇ ದಾರಿಯಾಗಿದೆ.
ಸೌದಿ ಅರೇಬಿಯಾದ ಬಹುಪಾಲು ತೈಲ ರಫ್ತು ಈ ಜಲಮಾರ್ಗದ ಮೇಲೆಯೇ ಅವಲಂಬಿತವಾಗಿದೆ. ಒಂದು ವೇಳೆ ಹೌತಿಗಳು ಇದರ ಸಂಪೂರ್ಣ ನಿಯಂತ್ರಣ ಸಾಧಿಸಿದರೆ, ಸೌದಿಯ ಆರ್ಥಿಕತೆಯ ಗಂಟಲನ್ನು ಹಿಸುಕಿದಂತಾಗುತ್ತದೆ. ಹಾಗಾಗಿ ಈ ಮಾರ್ಗವನ್ನು ತನ್ನ ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಸೌದಿಗೆ ಅನಿವಾರ್ಯವಾಗಿದೆ.
ಸೌದಿ ಅರೇಬಿಯಾ ಮತ್ತು ಯೆಮೆನ್ ಸುಮಾರು 1,800 ಕಿಲೋಮೀಟರ್ ಉದ್ದದ ಹಂಚಿಕೆಯ ಸುದೀರ್ಘ ಭೂಗಡಿಯನ್ನು ಹೊಂದಿವೆ. ಯೆಮೆನ್‌ನಲ್ಲಿ ಹೌತಿಗಳಂತಹ ಕಡು ಸೌದಿ-ವಿರೋಧಿ ಮತ್ತು ಇರಾನ್ ಬೆಂಬಲಿತ ಸಶಸ್ತ್ರ ಗುಂಪು ಪ್ರಬಲವಾದರೆ, ಅದು ನೇರವಾಗಿ ಸೌದಿಯ ಗಡಿಯೊಳಗೆ ನುಸುಳುವಿಕೆಗೆ ಅಥವಾ ಭದ್ರತೆಗೆ ಧಕ್ಕೆ ತರುತ್ತದೆ.
ಈಗಾಗಲೇ ಹೌತಿಗಳು ಯೆಮೆನ್ ಗಡಿಯಿಂದ ಸೌದಿ ಅರೇಬಿಯಾದ ತೈಲ ಸಂಸ್ಥೆಗಳು (Aramco) ಮತ್ತು ವಿಮಾನ ನಿಲ್ದಾಣಗಳ ಮೇಲೆ ನಿರಂತರವಾಗಿ ಡ್ರೋನ್ ಮತ್ತು ಬ್ಯಾಲಿಸ್ಟಿಕ್ ಕ್ಷಿಪಣಿ ದಾಳಿಗಳನ್ನು ನಡೆಸುತ್ತಿರುವುದು ಸೌದಿಯ ಈ ಭೀತಿಯನ್ನು ನಿಜವಾಗಿಸಿದೆ.
ಮಧ್ಯಪ್ರಾಚ್ಯದಲ್ಲಿ ತನ್ನ ಕಟ್ಟಾ ವೈರಿಯಾದ ಇರಾನ್ ತನ್ನ ಗಡಿಯ ಪಕ್ಕದಲ್ಲೇ ಬಂದು ಕೂರುವುದನ್ನು ಸೌದಿ ಬಯಸುವುದಿಲ್ಲ. ಹೌತಿಗಳು ಇರಾನ್‌ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಇಂದ ತರಬೇತಿ ಮತ್ತು ಶಸ್ತ್ರಾಸ್ತ್ರಗಳನ್ನು ಪಡೆಯುತ್ತಾರೆ. ಯೆಮೆನ್‌ನಲ್ಲಿ ಹೌತಿಗಳ ಆಡಳಿತ ಭದ್ರವಾದರೆ, ಅದು ಸೌದಿಯ ಹಿತ್ತಲಲ್ಲೇ “ಇರಾನ್‌ನ ಮಿಲಿಟರಿ ನೆಲೆ” ಸ್ಥಾಪನೆಯಾದಂತೆ ಎಂಬುದು ಸೌದಿ ಅರೇಬಿಯಾದ ಆತಂಕವಾಗಿದೆ.
ಸೌದಿ Vs ಇರಾನ್:
ಸೌದಿ ಅರೇಬಿಯಾ ಮತ್ತು ಇರಾನ್ ನಡುವಿನ ತೀವ್ರ ವೈಷಮ್ಯ ಮತ್ತು ಕಿತ್ತಾಟಕ್ಕೆ ಮುಖ್ಯವಾಗಿ ಮಧ್ಯಪ್ರಾಚ್ಯದಲ್ಲಿ ಯಾರು ದೊಡ್ಡಣ್ಣ ಎಂಬ ಪ್ರಾದೇಶಿಕ ಪ್ರಾಬಲ್ಯದ ಹೋರಾಟ, ಧಾರ್ಮಿಕ ಭಿನ್ನಾಭಿಪ್ರಾಯ ಹಾಗೂ ಅಂತರರಾಷ್ಟ್ರೀಯ ರಾಜಕಾರಣ ಪ್ರಮುಖ ಕಾರಣಗಳಾಗಿವೆ. ಇಸ್ಲಾಂ ಧರ್ಮದ ಎರಡು ಪ್ರಮುಖ ಪಂಗಡಗಳ ನಾಯಕತ್ವಕ್ಕಾಗಿ ಈ ಎರಡು ದೇಶಗಳ ನಡುವೆ ಪೈಪೋಟಿ ಇದೆ.
ಸೌದಿ ಅರೇಬಿಯಾ ತನ್ನನ್ನು ಜಾಗತಿಕ ಸುನ್ನಿ ಮುಸ್ಲಿಮರ ಧ್ವನಿ ಮತ್ತು ಇಸ್ಲಾಂನ ಪವಿತ್ರ ಸ್ಥಳಗಳಾದ ಮೆಕ್ಕಾ-ಮದೀನಾಗಳ ರಕ್ಷಕ ಎಂದು ಭಾವಿಸುತ್ತದೆ.ಪ್ರತಿಯಾಗಿ, ಇರಾನ್ ಜಗತ್ತಿನ ಅತಿ ದೊಡ್ಡ ಶಿಯಾ ಮುಸ್ಲಿಂ ರಾಷ್ಟ್ರವಾಗಿದ್ದು, ಇಸ್ಲಾಮಿಕ್ ಜಗತ್ತಿನಲ್ಲಿ ಸೌದಿಯ ಏಕಸ್ವಾಮ್ಯವನ್ನು ಸದಾ ಪ್ರಶ್ನಿಸುತ್ತಾ ಬಂದಿದೆ.
1979 ರವರೆಗೆ ಸೌದಿ ಮತ್ತು ಇರಾನ್ ನಡುವೆ ಇಷ್ಟೊಂದು ದ್ವೇಷವಿರಲಿಲ್ಲ. ಆದರೆ 1979ರಲ್ಲಿ ಇರಾನ್‌ನಲ್ಲಿ ನಡೆದ ಇಸ್ಲಾಮಿಕ್ ಕ್ರಾಂತಿಯ ನಂತರ ಅಲ್ಲಿ ಅಯತೊಲ್ಲಾ ಖೊಮೇನಿ ನೇತೃತ್ವದ ಧಾರ್ಮಿಕ ಸರ್ಕಾರ ಅಧಿಕಾರಕ್ಕೆ ಬಂದಿತು. ಹೊಸ ಇರಾನಿ ಸರ್ಕಾರವು ಸೌದಿ ಅರೇಬಿಯಾದಲ್ಲಿರುವ ರಾಜಪ್ರಭುತ್ವವನ್ನು (ರಾಯಲ್ ಫ್ಯಾಮಿಲಿ) ವಿರೋಧಿಸಿತು ಮತ್ತು ತನ್ನ ಕ್ರಾಂತಿಕಾರಿ ಆಡಳಿತ ಮಾದರಿಯನ್ನು ಇತರ ಅರಬ್ ದೇಶಗಳಿಗೂ ವಿಸ್ತರಿಸಲು ಯತ್ನಿಸಿತು. ಇದು ಸೌದಿ ರಾಜಮನೆತನಕ್ಕೆ ತನ್ನ ಅಸ್ತಿತ್ವದ ಮೇಲೆಯೇ ಬಂದ ದೊಡ್ಡ ಭೀತಿಯಾಗಿ ಕಾಣಿಸಿತು.
ಸೌದಿ ಮತ್ತು ಇರಾನ್ ಪಡೆಗಳು ಇದುವರೆಗೆ ನೇರವಾಗಿ ಪರಸ್ಪರ ಮುಖಾಮುಖಿ ಯುದ್ಧ ಮಾಡಿಲ್ಲ. ಆದರೆ ಮಧ್ಯಪ್ರಾಚ್ಯದ ಇತರ ಆಂತರಿಕವಾಗಿ ದುರ್ಬಲವಾಗಿರುವ ದೇಶಗಳಲ್ಲಿ ತಮಗನುಕೂಲಕರವಾದ ಗುಂಪುಗಳಿಗೆ ಹಣ ಮತ್ತು ಶಸ್ತ್ರಾಸ್ತ್ರ ನೀಡಿ ಪರಸ್ಪರರ ವಿರುದ್ಧ ಯುದ್ಧ ನಡೆಸುತ್ತಿವೆ.
ಹೌತಿಗಳಿಗೆ ಸೌದಿ ಮೇಲೆ ಸಿಟ್ಯಾಕೆ?
ಸೌದಿ ಅರೇಬಿಯಾ ಅಮೆರಿಕದ ಪರಮಾಪ್ತ ಮಿತ್ರ ರಾಷ್ಟ್ರವಾಗಿದೆ. ಆದರೆ ಇರಾನ್ ದೇಶವು ಅಮೆರಿಕದ ಕಡು ವೈರಿಯಾಗಿದೆ. ಸೌದಿ ಅರೇಬಿಯಾ ಅಮೆರಿಕದ ಶಸ್ತ್ರಾಸ್ತ್ರಗಳನ್ನು ಬಳಸಿ ತನ್ನ ಭದ್ರತೆಯನ್ನು ಬಲಪಡಿಸಿಕೊಳ್ಳುತ್ತಿರುವುದು ಮತ್ತು ಇರಾನ್ ವಿರುದ್ಧ ಅಮೆರಿಕ ವಿಧಿಸುವ ಆರ್ಥಿಕ ದಿಗ್ಬಂಧನಗಳನ್ನು ಬೆಂಬಲಿಸುವುದು ಇರಾನ್ ಮತ್ತು ಹೌತಿಗೆ ತೀವ್ರ ಅಸಮಾಧಾನ ತಂದಿದೆ.
ಅಮೆರಿಕ-ಇರಾನ್ ಯುದ್ಧದ ಕಾರಣದಿಂದಾಗಿ ಹಾರ್ಮುಜ್ ಜಲಸಂಧಿಯ (Strait of Hormuz) ಮೂಲಕ ಸಾಗುತ್ತಿದ್ದ ಸೌದಿಯ ತೈಲ ರಫ್ತು ಸ್ಥಗಿತಗೊಂಡಿತ್ತು. ಇದರಿಂದಾಗಿ ಸೌದಿ ಅರೇಬಿಯಾ ತನ್ನ ತೈಲವನ್ನು ಕೆಂಪು ಸಮುದ್ರದ ಮಾರ್ಗವಾಗಿ (ಬಾಬ್ ಅಲ್-ಮಂದಬ್ ಜಲಸಂಧಿ) ರಫ್ತು ಮಾಡಲು ಆರಂಭಿಸಿತ್ತು. ಆದರೆ, ಹೌತಿಗಳು ಇತ್ತೀಚೆಗೆ ತಂತ್ರಗಾರಿಕೆಯಿಂದ ಬಾಬ್ ಅಲ್-ಮಂದಬ್ ಜಲಸಂಧಿ ಮತ್ತು ಪೆರಿಮ್ ದ್ವೀಪವನ್ನು ವಶಪಡಿಸಿಕೊಂಡು ಬ್ಲಾಕೇಡ್ (ದಿಗ್ಬಂಧನ) ವಿಧಿಸಿದ್ದಾರೆ. ಈ ಮೂಲಕ ಸೌದಿಯ ಆರ್ಥಿಕತೆಯ ಬೆನ್ನೆಲುಬಾದ ತೈಲ ರಫ್ತನ್ನು ಸಂಪೂರ್ಣವಾಗಿ ಜರ್ಜರಿತಗೊಳಿಸಿದ್ದಾರೆ.
ಇತ್ತೀಚಿನ ವಾರಗಳಲ್ಲಿ ಹೌತಿಗಳು ವಶಪಡಿಸಿಕೊಂಡಿದ್ದ ಪ್ರದೇಶಗಳನ್ನು ಮರಳಿ ಪಡೆಯಲು ಸೌದಿ ಅರೇಬಿಯಾ ಬೆಂಬಲಿತ ಯೆಮೆನ್ ಸರ್ಕಾರಿ ಪಡೆಗಳು ‘ಡಾನ್ ಆಫ್ ಯೆಮೆನ್’ ಎಂಬ ಬೃಹತ್ ಪ್ರತಿ-ಕಾರ್ಯಾಚರಣೆಯನ್ನು ಆರಂಭಿಸಿವೆ. ಸೌದಿ ವಾಯುಪಡೆಯು ಹೌತಿ ನೆಲೆಗಳ ಮೇಲೆ ತೀವ್ರ ವೈಮಾನಿಕ ದಾಳಿ ನಡೆಸುತ್ತಿರುವುದಕ್ಕೆ ಪ್ರತಿಯಾಗಿ, ಹೌತಿಗಳು ನೇರವಾಗಿ ಸೌದಿಯ ಆಂತರಿಕ ನಗರಗಳ ಮೇಲೆ ಸಮರ ಸಾರಿದ್ದಾರೆ.
ಹೌತಿಗಳು ಕಡು ಅಮೆರಿಕ ಮತ್ತು ಇಸ್ರೇಲ್ ವಿರೋಧಿಗಳಾಗಿದ್ದಾರೆ. ಸೌದಿ ಅರೇಬಿಯಾ ಅಮೆರಿಕದ ಪರಮಾಪ್ತ ಮಿತ್ರರಾಷ್ಟ್ರವಾಗಿರುವುದು ಹೌತಿಗಳ ಕೆಂಗಣ್ಣಿಗೆ ಕಾರಣವಾಗಿದೆ. ಪಶ್ಚಿಮ ಏಷ್ಯಾದಲ್ಲಿ ಇರಾನ್ ವಿರುದ್ಧ ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ನೀತಿಗಳಿಗೆ ಸೌದಿ ಅರೇಬಿಯಾ ಸಾಥ್ ನೀಡುತ್ತಿದೆ ಎಂದು ಆರೋಪಿಸಿ ಹೌತಿಗಳು ಸೌದಿಯನ್ನು ಗುರಿ ಮಾಡುತ್ತಿದ್ದಾರೆ.
ಯೆಮೆನ್ ಮೇಲಿನ ಸೌದಿ ದಾಳಿಗಳಿಗೆ ತಕ್ಕ ಪಾಠ ಕಲಿಸಲು ಹೌತಿಗಳು ಈ ಬಾರಿ ಕೇವಲ ಗಡಿಭಾಗಕ್ಕೆ ಸೀಮಿತವಾಗದೆ ಸೌದಿಯ ಹೃದಯಭಾಗಕ್ಕೆ ಪೆಟ್ಟು ನೀಡುತ್ತಿದ್ದಾರೆ. ಇತ್ತೀಚೆಗೆ ಸೌದಿಯ ರಾಜಧಾನಿ ರಿಯಾದ್‌ನ ಕಿಂಗ್ ಖಾಲಿದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಹೌತಿಗಳು ನಡೆಸಿದ ಭೀಕರ ಡ್ರೋನ್ ಮತ್ತು ಕ್ಷಿಪಣಿ ದಾಳಿಯಲ್ಲಿ 13 ಜನರು ಸಾವನ್ನಪ್ಪಿದ್ದಾರೆ. ಇಂತಹ ದಾಳಿಗಳ ಮೂಲಕ ಸೌದಿ ಅರೇಬಿಯಾ ಸುರಕ್ಷಿತ ರಾಷ್ಟ್ರವಲ್ಲ ಎಂಬ ಭಯವನ್ನು ಸೃಷ್ಟಿಸಿ, ಜಾಗತಿಕವಾಗಿ ಅದರ ಆರ್ಥಿಕ ಭವಿಷ್ಯಕ್ಕೆ ಧಕ್ಕೆ ತರುವುದು ಹೌತಿಗಳ ಉದ್ದೇಶವಾಗಿದೆ.
ಹೌತಿ ಬಂಡುಕೋರರು ಮತ್ತು ಸೌದಿ ಅರೇಬಿಯಾ ನಡುವಿನ ಈ ದೀರ್ಘಕಾಲದ ಸಂಘರ್ಷವು ಕೇವಲ ರಾಜತಾಂತ್ರಿಕ ಅಥವಾ ಸೇನಾ ಬಲಪ್ರದರ್ಶನಕ್ಕೆ ಸೀಮಿತವಾಗಿರದೆ, ಯೆಮೆನ್‌ನ ಲಕ್ಷಾಂತರ ಅಮಾಯಕ ಜನರ ಬದುಕನ್ನು ಅತಂತ್ರಗೊಳಿಸಿರುವ ಭೀಕರ ಮಾನವೀಯ ದುರಂತವಾಗಿದೆ. ಬಾಹ್ಯ ರಾಷ್ಟ್ರಗಳ ಹಸ್ತಕ್ಷೇಪ, ಸಿದ್ಧಾಂತಗಳ ಸಂಘರ್ಷ ಹಾಗೂ ಪ್ರಾದೇಶಿಕ ಅಧಿಪತ್ಯದ ಹಪಾಹಪಿಯು ಶಾಂತಿ ಸ್ಥಾಪನೆಯ ಪ್ರಯತ್ನಗಳನ್ನು ಮತ್ತಷ್ಟು ಜಟಿಲಗೊಳಿಸಿದೆ. ಕೇವಲ ಕ್ಷಿಪಣಿ ದಾಳಿಗಳು ಅಥವಾ ಕದನವಿರಾಮದ ಒಪ್ಪಂದಗಳಿಂದ ಈ ಬಿಕ್ಕಟ್ಟಿಗೆ ಶಾಶ್ವತ ಪರಿಹಾರ ಕಂಡುಕೊಳ್ಳುವುದು ಅಸಾಧ್ಯ; ಬದಲಿಗೆ ಯೆಮೆನ್‌ನ ಸಾರ್ವಭೌಮತೆಯನ್ನು ಗೌರವಿಸಿ, ಎರಡೂ ಬಣಗಳು ರಾಜಕೀಯ ಇಚ್ಛಾಶಕ್ತಿಯೊಂದಿಗೆ ಮುಕ್ತ ಮಾತುಕತೆಗೆ ಮುಂದಾದಾಗ ಮಾತ್ರ ಈ ರಕ್ತಸಿಕ್ತ ಕದನಕ್ಕೆ ಮುಕ್ತಿ ಸಿಗಲು ಹಾಗೂ ಇಡೀ ಮಧ್ಯಪ್ರಾಚ್ಯದಲ್ಲಿ ಸ್ಥಿರತೆ ನೆಲೆಸಲು ಸಾಧ್ಯ.
