ಮನಿಲಾ: ತಮ್ಮ ಮೂರು ದಿನಗಳ ಏಷ್ಯಾ ಪ್ರವಾಸದ ಮೊದಲ ಹಂತವಾಗಿ ಫಿಲಿಪೈನ್ಸ್ ರಾಜಧಾನಿ ಮನಿಲಾದಲ್ಲಿ ಮಂಗಳವಾರ ನಡೆದ ಕ್ವಾಡ್ (Quad) ರಾಷ್ಟ್ರಗಳ ನಾಯಕರ ಸಭೆಯಲ್ಲಿ ಭಾಗವಹಿಸಿದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಒಬ್ಬ ಕಠಿಣ ವ್ಯಕ್ತಿ (Tough Man) ಎಂದು ಮತ್ತೊಮ್ಮೆ ಬಣ್ಣಿಸಿದ್ದಾರೆ.
ಮಹತ್ವದ ಸಭೆಯಲ್ಲಿ ಟ್ರಂಪ್ ಅವರು ಭಾರತ, ಜಪಾನ್ ಮತ್ತು ಆಸ್ಟ್ರೇಲಿಯಾ ನಾಯಕರನ್ನು ಭೇಟಿಯಾಗಿ, ‘ಅಪರೂಪದ ಭೂಮಿಯ ಖನಿಜಗಳ’ (Rare earths) ಉತ್ಪಾದನೆಯಲ್ಲಿ ಕ್ವಾಡ್ ರಾಷ್ಟ್ರಗಳ ಸಹಕಾರವನ್ನು ಶ್ಲಾಘಿಸಿದರು.
ಕ್ವಾಡ್ ಒಕ್ಕೂಟವು ವಿಶ್ವದ ಅತ್ಯಂತ ಯಶಸ್ವಿ ಪಾಲುದಾರಿಕೆಗಳನ್ನು ಒಟ್ಟುಗೂಡಿಸಿದೆ ಎಂದು ಹೇಳಿದ ಟ್ರಂಪ್, ನಾಯಕರೊಂದಿಗಿನ ತಮ್ಮ ಆತ್ಮೀಯ ಬಾಂಧವ್ಯವನ್ನು ಮೆಚ್ಚುಗೆ ವ್ಯಕ್ತಪಡಿಸಿದರು.
“ಈ ನಾಯಕರು ಮತ್ತು ಈ ದೇಶಗಳೊಂದಿಗೆ ನಮಗೆ ಆರಂಭದಿಂದಲೂ ಉತ್ತಮ ಸಂಬಂಧವಿದೆ. ನಾನು ಈ ಮೂವರು ನಾಯಕರೊಂದಿಗೆ ಬಹಳ ಸಮಯದಿಂದ ಒಡನಾಟ ಹೊಂದಿದ್ದೇನೆ, ಅವರೆಲ್ಲರೂ ಅದ್ಭುತ ವ್ಯಕ್ತಿಗಳು ಮತ್ತು ನನ್ನ ಸ್ನೇಹಿತರು. ಅಂದಹಾಗೆ, ಅವರು (PM Modi) ಬಹಳ ಕಠಿಣ ವ್ಯಕ್ತಿ ಮತ್ತು ಇವರು (ಜಪಾನ್ ನಾಯಕಿ) ಅವರಿಗಿಂತಲೂ ಕಠಿಣವಾಗಿರಬಹುದು. ನಾವೂ ಕೂಡ ಕಡಿಮೆಯಿಲ್ಲ” ಎಂದು ಟ್ರಂಪ್ ನಗೆ ಚಟಾಕಿ ಹಾರಿಸಿದರು.
#WATCH | Manila, Philippines | US President Donald Trump says, “…He (PM Modi) is a very tough man, just in case and she (Japanese PM Sanae Takaichi) may be even tougher. We’re okay, too…”
“We have a great relationship with these people and these countries. Right from the beginning. I’ve been with all three of them for a long time, and they’re phenomenal people. They’re friends of mine. So that helps…By the way, he’s a very tough man, just in case and she may be even tougher. We’re okay, too…”
(Video Source: The White House)
— ANI (@ANI) November 17, 2026
ಅಪರೂಪದ ಖನಿಜಗಳ ಉತ್ಪಾದನೆಯನ್ನು ಹೆಚ್ಚಿಸಲು ಅಮೆರಿಕ, ಭಾರತ ಮತ್ತು ಜಪಾನ್ ನಡೆಸುತ್ತಿರುವ ಜಂಟಿ ಪ್ರಯತ್ನಗಳನ್ನು ಟ್ರಂಪ್ ಪ್ರಮುಖವಾಗಿ ಪ್ರಸ್ತಾಪಿಸಿದರು. “ನಮಗೆ ಅಗತ್ಯವಿರುವ ಎಲ್ಲಾ ಅಪರೂಪದ ಖನಿಜಗಳು ಮುಂದಿನ 10 ತಿಂಗಳಲ್ಲಿ ಲಭ್ಯವಾಗಲಿವೆ. ಈ ಕ್ಷೇತ್ರದಲ್ಲಿ ನಾವು ಭಾರಿ ಪ್ರಮಾಣದಲ್ಲಿ ಉತ್ಪಾದನೆ ಮಾಡುತ್ತಿದ್ದೇವೆ. ಜಪಾನ್ ಮತ್ತು ಭಾರತ ಕೂಡ ಇದೇ ಕೆಲಸ ಮಾಡುತ್ತಿವೆ. ನಾವೆಲ್ಲರೂ ಒಟ್ಟಾಗಿ ಇದನ್ನು ಸಾಧಿಸುತ್ತಿದ್ದೇವೆ” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ಪ್ರಸ್ತುತ ಆಸಿಯಾನ್ (ASEAN) ಅಧ್ಯಕ್ಷತೆ ವಹಿಸಿರುವ ಫಿಲಿಪೈನ್ಸ್, ಮನಿಲಾದಲ್ಲಿ ವಾರ್ಷಿಕ ಶೃಂಗಸಭೆಯನ್ನು ಆಯೋಜಿಸಿದ್ದು, ಟ್ರಂಪ್ ಇದರಲ್ಲಿಯೂ ಭಾಗವಹಿಸಲಿದ್ದಾರೆ. ಮನಿಲಾದಲ್ಲಿ ಪ್ರಾದೇಶಿಕ ಪಾಲುದಾರರೊಂದಿಗೆ ವ್ಯಾಪಾರ ಮತ್ತು ಆರ್ಥಿಕ ಒಪ್ಪಂದಗಳ ಕುರಿತು ಚರ್ಚಿಸಿದ ಬಳಿಕ, ಟ್ರಂಪ್ ಚೀನಾಕ್ಕೆ ಪ್ರಯಾಣಿಸಲಿದ್ದಾರೆ. ಅಲ್ಲಿ ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಮತ್ತು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ಮಹತ್ವದ ತ್ರಿಪಕ್ಷೀಯ ಪರಮಾಣು ಮಾತುಕತೆ ನಡೆಸಲಿದ್ದಾರೆ. ಅಲ್ಲದೆ, ಈ ಪ್ರವಾಸದ ವೇಳೆ ಉತ್ತರ ಕೊರಿಯಾದ ನಾಯಕ ಕಿಮ್ ಜಾಂಗ್ ಉನ್ ಅವರನ್ನೂ ಭೇಟಿಯಾಗುವ ಸಾಧ್ಯತೆಯ ಬಗ್ಗೆ ಟ್ರಂಪ್ ಸುಳಿವು ನೀಡಿದ್ದಾರೆ.
ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ತಮ್ಮ ಪಕ್ಷಕ್ಕೆ ಹಿನ್ನಡೆಯಾದ ಬಳಿಕ ಮತ್ತು ಅಮೆರಿಕದ ವಿಮಾನಯಾನ ಕ್ಷೇತ್ರದಲ್ಲಿ ತೀವ್ರ ವ್ಯತ್ಯಯ ಉಂಟಾಗಿರುವ ನಡುವೆಯೇ ಟ್ರಂಪ್ ಅವರು ಕೈಗೊಂಡಿರುವ ಮೊದಲ ವಿದೇಶಿ ಪ್ರವಾಸ ಇದಾಗಿದೆ.
ಏನಿದು ಕ್ವಾಡ್?
ಕ್ವಾಡ್ (QUAD – Quadrilateral Security Dialogue) ಎನ್ನುವುದು ಭಾರತ, ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಜಪಾನ್ ದೇಶಗಳ ನಡುವಿನ ಒಂದು ಕಾರ್ಯತಂತ್ರದ ರಾಜತಾಂತ್ರಿಕ ವೇದಿಕೆಯಾಗಿದೆ. ಮುಕ್ತ ಮತ್ತು ಸಮೃದ್ಧ ‘ಇಂಡೋ-ಪೆಸಿಫಿಕ್’ (Indo-Pacific) ಪ್ರದೇಶವನ್ನು ಕಾಪಾಡುವುದು ಮತ್ತು ಈ ಪ್ರದೇಶದಲ್ಲಿ ಶಾಂತಿ, ಸ್ಥಿರತೆ ಹಾಗೂ ಆರ್ಥಿಕ ಸಹಕಾರವನ್ನು ಉತ್ತೇಜಿಸುವುದು ಈ ಸಂಸ್ಥೆಯ ಉದ್ದೇಶವಾಗಿದೆ.
ಇಂಡೋ-ಪೆಸಿಫಿಕ್ ಸಾಗರ ಪ್ರದೇಶದಲ್ಲಿ ಹೆಚ್ಚುತ್ತಿರುವ ಚೀನಾದ ಆರ್ಥಿಕ ಮತ್ತು ರಾಜಕೀಯ ಪ್ರಾಬಲ್ಯವನ್ನು ಸಮತೋಲನಗೊಳಿಸುವುದು ಈ ಕೂಟದ ಪ್ರಮುಖ ಗುರಿಗಳಲ್ಲಿ ಒಂದಾಗಿದೆ. ಇದು ನ್ಯಾಟೋ (NATO) ತರಹದ ಕಟ್ಟುನಿಟ್ಟಿನ ಅಧಿಕೃತ ಮಿಲಿಟರಿ ಒಕ್ಕೂಟವಲ್ಲ. ಬದಲಾಗಿ ಸದಸ್ಯ ರಾಷ್ಟ್ರಗಳು ಕಡಲ ಭದ್ರತೆ, ತಂತ್ರಜ್ಞಾನ, ಪೂರೈಕೆ ಸರಪಳಿ ಮತ್ತು ವಿಪತ್ತು ನಿರ್ವಹಣೆಯಂತಹ ವಿಷಯಗಳಲ್ಲಿ ಪರಸ್ಪರ ಸಹಕರಿಸುತ್ತವೆ.
