ಹಲಸಿನ ಹಣ್ಣಿನ ಸೀಸನ್ ಶುರುವಾಗಿದೆ. ಕೆಲವರು ಮನೆಯಲ್ಲೇ ಹಲಸಿನ ಹಣ್ಣು ಬೆಳೆದರೆ ಇನ್ನೂ ಕೆಲವು ಹಲಸಿನ ಹಣ್ಣು ಪ್ರಿಯರು ಮಾರ್ಕೆಟ್‌ನಿಂದ ಹಲಸಿನ ಹಣ್ಣು ಖರೀದಿಸಿ ತಮ್ಮ ಆಸೆ ಪೂರೈಸಿಕೊಳ್ಳುತ್ತಾರೆ. ಹಲಸಿನ ಹಣ್ಣಿನಲ್ಲಿ ನಾನಾರೀತಿಯ ತಿಂಡಿ ತಿನಿಸುಗಳನ್ನು ಮಾಡಬಹುದು. ಈ ಪೈಕಿ ಬೇಸಿಗೆಯಲ್ಲಿ ದಾಹ ನೀಗಿಸುವ, ಹೊಟ್ಟೆ ತಂಪಾಗಿಸುವ ಹಲಸಿನ ಹಣ್ಣಿನ ಐಸ್‌ಕ್ರೀಮ್ ಯಾವ ರೀತಿ ಮಾಡುವುದು ಎಂಬುದನ್ನು ನಾವು ಇಂದು ತಿಳಿಸಿಕೊಡುತ್ತಿದ್ದೇವೆ. ಹಾಗಿದ್ರೆ ತಡಮಾಡದೇ ನೀವೂ ಕೂಡ ಈ ರೆಸಿಪಿಯನ್ನೊಮ್ಮೆ ಮನೆಯಲ್ಲಿ ಟ್ರೈ ಮಾಡಿ ನೋಡಿ.
ಬೇಕಾಗುವ ಸಾಮಗ್ರಿಗಳು:
ಹಣ್ಣಾದ ಹಲಸಿನ ತೊಳೆಗಳು – 1 ಕಪ್
ಸಕ್ಕರೆ – ಅರ್ಧ ಕಪ್
ಕೆನೆ/ಫ್ರೆಶ್ ಕ್ರೀಮ್ – 1 ಕಪ್
ಕಂಡೆನ್ಸ್ಡ್ ಮಿಲ್ಕ್ – ಅರ್ಧ ಕಪ್
ಹಾಲು – ಕಾಲು ಕಪ್
ಮಾಡುವ ವಿಧಾನ:
* ಮೊದಲಿಗೆ ಹಲಸಿನ ತೊಳೆಗಳನ್ನು ಹಾಗೂ ಸಕ್ಕರೆಯನ್ನು ಮಿಕ್ಸರ್ ಜಾರಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ರುಬ್ಬಲು ಹಾಲು ಅಥವಾ ನೀರನ್ನು ಬೆರೆಸಿಕೊಳ್ಳಬಹುದು.
* ಈಗ ಒಂದು ಬಟ್ಟಲಿನಲ್ಲಿ ಕೆನೆ ಹಾಕಿ ಗಟ್ಟಿಯಾಗುವವರೆಗೆ ಕಡೆಯಿರಿ.
* ಬಳಿಕ ಕಡೆದ ಕೆನೆಗೆ ರುಬ್ಬಿದ ಹಲಸಿನ ಹಣ್ಣಿನ ಮಿಶ್ರಣ ಹಾಗೂ ಕಂಡೆನ್ಸ್ಡ್ ಮಿಲ್ಕ್ ಸೇರಿಸಿ ಚನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ.
* ನಂತರ ಈ ಮಿಶ್ರಣವನ್ನು ಗಾಳಿಯಾಡದ ಡಬ್ಬದಲ್ಲಿ ಹಾಕಿ ಫ್ರೀಜರ್‌ನಲ್ಲಿ 6-8 ಗಂಟೆಗಳ ಕಾಲ ಇಡಿ.
* ಐಸ್‌ಕ್ರೀಮ್ ಗಟ್ಟಿಯಾದ ಬಳಿಕ ಸ್ಕೂಪ್ ಸಹಾಯದಿಂದ ಬೌಲ್‌ಗೆ ಹಾಕಿ ಸವಿಯಲು ಕೊಡಿ.
