ರುಚಿಯಾದ ಸೋಯಾ ಬೀನ್ ಕುರ್ಮಾ ಮಾಡೋ ವಿಧಾನ

ನಾವು ತಿನ್ನುವ ಅನೇಕ ಪದಾರ್ಥಗಳಲ್ಲಿ ವಿಟಮಿನ್ ಇರುತ್ತವೆ. ಅದರಲ್ಲಿ ಸೋಯಾ ಬೀನ್ ಕೂಡ ಒಂದಾಗಿದ್ದು, ಮಕ್ಕಳಿಗೆ-ವೃದ್ಧರಿಗೆ ಎಲ್ಲರಿಗೂ ಮಾಡಿಕೊಡಬಹುದು. ಇದೊಂದು ಆರೋಗ್ಯಕರವಾದ ಅಡುಗೆಯಾಗಿದೆ. ಪ್ರತಿ ಸಂಡೇ ಬಂದರೆ ನಾನ್‍ವೆಜ್ ಅಡುಗೆ ಮಾಡಲು ಸಾಧ್ಯವಿಲ್ಲ. ಆದರೆ ಮಕ್ಕಳು ರುಚಿಯಾಗಿ ತಿನ್ನಲು ಕೇಳುತ್ತಿರುತ್ತಾರೆ. ಹೀಗಾಗಿ ನಿಮಗಾಗಿ ಸೋಯಾ ಬೀನ್ ಕುರ್ಮಾ ಮಾಡುವ ವಿಧಾನ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು
1. ಸೋಯಾ ಬೀನ್ – ಅರ್ಧ ಕಪ್
2. ಹಸಿ ಬಟಾಣಿ – ಅರ್ಧ ಕಪ್
3. ಈರುಳ್ಳಿ – 2
4. ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ
5. ಮೆಣಸಿನ ಪುಡಿ – 1/2 ಚಮಚ
6. ಗರಂ ಮಸಾಲ – 1/2 ಚಮಚ
7. ಅರಿಶಿಣ – 1/4 ಟೀ ಸ್ಪೂನ್
8. ದನಿಯಾ ಪುಡಿ – 1/2 ಚಮಚ
9. ಕೊತ್ತಂಬರಿ ಸೊಪ್ಪು – ಸ್ವಲ್ಪ
10. ತೆಂಗಿನ ಕಾಯಿ ಪೀಸ್ – 3 ಚಮಚ
11. ಏಲಕ್ಕಿ – 2
12. ಜೀರಿಗೆ – 1 ಚಮಚ
13. ಟೊಮೆಟೊ – 3
14. ಉಪ್ಪು – ರುಚಿಗೆ ತಕ್ಕಷ್ಟು
15. ಎಣ್ಣೆ – 3 ಚಮಚ
16. ಗೋಡಂಬಿ – 8-10
17. ಗಸಗಸೆ – 1 ಟೀ ಚಮಚ

ಮಾಡುವ ವಿಧಾನ
* ಮೊದಲಿಗೆ ಬಿಸಿ ನೀರಿಗೆ ಸ್ವಲ್ಪ ಉಪ್ಪು ಹಾಕಿ ಸೋಯಾ ಬೀನ್ ಹಾಕಿ 5 ನಿಮಿಷ ನೆನೆಸಿರಬೇಕು.
* ಈಗ ಮಿಕ್ಸ್ ಜಾರಿಗೆ ಗೋಡಂಬಿ, ಗಸಗಸೆ, ತೆಂಗಿನ ಕಾಯಿ ಪೀಸ್ ಹಾಕಿಕೊಂಡು ರುಬ್ಬಿಕೊಳ್ಳಿ.
* ಬಾಣಲೆಗೆ 3 ಚಮಚ ಎಣ್ಣೆ ಹಾಕಿ, ಕಾದ ನಂತರ ಜೀರಿಗೆ, ಏಲಕ್ಕಿ, ಪಲಾವ್ ಎಲೆ, ಈರುಳ್ಳಿ, ಶುಂಠಿ-ಬೆಳ್ಳುಳ್ಳಿ ಹಾಕಿ ಚೆನ್ನಾಗಿ ಫ್ರೈ ಮಾಡಿ.
* ನಂತರ ಬಟಾಣಿ, ಖಾರದ ಪುಡಿ, ಅರಿಶಿಣ, ದನಿಯಾ ಪುಡಿ ಹಾಕಿ ಫ್ರೈ ಮಾಡಿಕೊಳ್ಳಿ.
* ಈಗ ರುಬ್ಬಿದ ಟಮೋಟೋ ಪೇಸ್ಟ್, ಸ್ವಲ್ಪ ಉಪ್ಪು, ಮೊದಲೇ ರುಬ್ಬಿಕೊಂಡಿದ್ದ ಗೋಡಂಬಿ ಪೇಸ್ಟ್ ಹಾಕಿ ಫ್ರೈ ಮಾಡಿಕೊಳ್ಳಿ, ಸ್ವಲ್ಪ ನೀರು ಹಾಕಿ 5 ನಿಮಿಷ ಬೇಯಿಸಿ.
* ನೆನೆಸಿಟ್ಟ ಸೋಯಾ ಬೀನ್, ಗರಂ ಮಸಲಾ ಹಾಕಿ ಮಿಕ್ಸ್ ಮಾಡಿ. ರುಚಿ ನೋಡಿಕೊಂಡು ಉಪ್ಪು ಹಾಕಿ 5 ನಿಮಿಷ ಬೇಯಿಸಬೇಕು.
* ನಂತರ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿದರೆ ರುಚಿಯಾದ ಸೋಯಾ ಬೀನ್ ಕುರ್ಮಾ ಸವಿಯಲು ಸಿದ್ಧ

ಇದನ್ನು ಅನ್ನ, ದೋಸೆ, ಚಪಾತಿ ಯಾವುದಕ್ಕಾದರೂ ಹಾಕಿಕೊಂಡು ಸವಿಯಬಹುದು.