ಬೆಂಗಳೂರು: ಪ್ರಿಯಾಂಕಾ ಉಪೇಂದ್ರ ಮುಖ್ಯಭೂಮಿಕೆಯಲ್ಲಿ ನಟಿಸಿ, ಯುವ ಪ್ರತಿಭೆ ಲೋಹಿತ್ ನಿರ್ದೇಶನ ಮಾಡಿರುವ ಚಿತ್ರ ದೇವಕಿ. ಈ ಹಿಂದೆ ಇದೇ ಲೋಹಿತ್ ಮಮ್ಮಿ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದರು. ಆ ಚಿತ್ರದಲ್ಲಿಯೂ ಪ್ರಿಯಾಂಕಾ ಅವರೇ ನಟಿಸಿದ್ದರು. ಆ ಚಿತ್ರ ದೊಡ್ಡ ಮಟ್ಟದಲ್ಲಿ ಗೆಲುವು ಕಂಡಿದ್ದರಿಂದ ದೇವಕಿಯ ಬಗ್ಗೆ ಎಲ್ಲೆಡೆ ಕ್ಯೂರಿಯಾಸಿಟಿ ಶುರುವಾಗಿದೆ. ಇದೀಗ ಈ ಚಿತ್ರ ಬಿಡುಗಡೆ ಕೊಂಚ ಮುಂದಕ್ಕೆ ಹೋಗಿದ್ದರೂ ಜುಲೈ ತಿಂಗಳಲ್ಲಿ ದೇವಕಿಯ ದರ್ಶನವಾಗೋದು ಗ್ಯಾರೆಂಟಿ.
ಚಿತ್ರತಂಡವೇ ಈ ವಿಚಾರವನ್ನು ಜಾಹೀರು ಮಾಡಿದೆ. ಇದೇ ತಿಂಗಳ 28ರಂದು ದೇವಕಿಯನ್ನು ಥೇಟರಿಗೆ ಕರೆತರಲು ನಿರ್ದೇಶಕ ಲೋಹಿತ್ ಯೋಜನೆ ಹಾಕಿಕೊಂಡಿದ್ದರು. ಆದರೆ ರುಸ್ತುಂ ಚಿತ್ರ ಜೂನ್ ಹದಿನಾಲಕ್ಕನೇ ತಾರೀಕಿನಿಂದ ಪೋಸ್ಟ್ಪೋನ್ ಆಗಿ 28ಕ್ಕೆ ಬಿಡುಗಡೆಯಾಗಲು ತಯಾರಾಗಿದೆ. ರುಸ್ತುಂ ರಿಲೀಸಿಂಗ್ ಡೇಟು ಫಿಕ್ಸಾಗುತ್ತಲೇ ಲೋಹಿತ್ ದೇವಕಿಯನ್ನು ಜುಲೈ ಮೊದಲ ವಾರದಲ್ಲಿ ತೆರೆಗೆ ತರಲು ನಿರ್ಧಾರ ಮಾಡಿದ್ದಾರೆ.
ಈಗಾಗಲೇ ದೇವಕಿ ಚಿತ್ರದ ಬಗ್ಗೆ ಎಲ್ಲ ವರ್ಗಗಳ ಪ್ರೇಕ್ಷಕರೂ ಆಕರ್ಷಿತರಾಗಿದ್ದಾರೆ. ಪೋಸ್ಟರ್, ಟೀಸರ್ ಮತ್ತು ಟ್ರೈಲರ್ ಮೂಲಕ ದೇವಕಿಯ ಹವಾ ಎಲ್ಲೆಡೆ ವ್ಯಾಪಿಸಿಕೊಂಡಿದೆ. ಮೊದಲ ಚಿತ್ರ ಮಮ್ಮಿಯ ಮೂಲಕವೇ ಪುಷ್ಕಳ ಗೆಲುವನ್ನು ತನ್ನದಾಗಿಸಿಕೊಂಡಿದ್ದ ಲೋಹಿತ್ ದೇವಕಿಯ ಮೂಲಕ ಅದನ್ನು ಮುಂದುವರೆಸೋ ಉತ್ಸಾಹದಿಂದಿದ್ದಾರೆ. ಆರಂಭದಲ್ಲಿ ಹೌರಾ ಬ್ರಿಡ್ಜ್ ಅಂತಿದ್ದ ಈ ಚಿತ್ರವೀಗ ದೇವಕಿಯಾಗಿ ರೂಪಾಂತರ ಹೊಂದಿದೆ.
ಇದು ವಿಶೇಷ ಕಥೆ ಹೊಂದಿರೋ ಹಾರರ್ ಚಿತ್ರ. ಹಾರರ್ ಅಂದಾಕ್ಷಣ ಸಿದ್ಧ ಸೂತ್ರಗಳ ಪ್ರೇತ ಬಾಧೆ ಈ ಚಿತ್ರದ್ದು ಅಂದುಕೊಳ್ಳುವಂತಿಲ್ಲ. ಇದು ಹಾರರ್ ಜಾನರಿನಲ್ಲಿಯೇ ಮೈಲಿಗಲ್ಲಾಗುವಂಥಾ ನವೀನ ಶೈಲಿಯ ನಿರೂಪಣೆಯನ್ನು ಹೊಂದಿದೆಯಂತೆ. ಇದರ ಬಹುಭಾಗದ ಚಿತ್ರೀಕರಣ ಕೊಲ್ಕತ್ತಾದ ವಿಶೇಷ ಸ್ಥಳಗಳಲ್ಲಿ ನಡೆದಿದೆ. ತಾಂತ್ರಿಕವಾಗಿಯೂ ಹೊಸತನ ಹೊಂದಿರೋ ದೇವಕಿ ಇದೇ ಜುಲೈ ತಿಂಗಳ ಜಡಿಮಳೆಯ ಒಡ್ಡೋಲಗದಲ್ಲಿ ಪ್ರೇಕ್ಷಕರ ಮುಂದೆ ಅವತರಿಸಲಿದ್ದಾಳೆ.