Connect with us

Latest

31ನೇ ಬಾರಿ ಹಿಡಿಯಿತು ಅದೃಷ್ಟ -ಬುಲೆಟ್ ರೈಲು ಯೋಜನೆಗೆ ಲೋಗೋ ರೂಪಿಸಿದ ವಿದ್ಯಾರ್ಥಿಯ ಸಾಧನೆಯ ಕತೆ

Published

on

ನವದೆಹಲಿ: ಸರ್ಕಾರ ಆಯೋಜಿಸುವ ಲೋಗೋ ಸ್ಪರ್ಧೆಯ ಅಂತಿಮ ಸುತ್ತಿಗೆ ಲೋಗೋ ಆಯ್ಕೆಯಾದರೂ ಪ್ರಶಸ್ತಿ ಗಳಿಸುವಲ್ಲಿ ವಿಫಲ. ಒಂದಲ್ಲ ಎರಡಲ್ಲ ಒಟ್ಟು 30 ಬಾರಿ ಪ್ರಶಸ್ತಿಯ ಸನಿಹ ಬಂದಿದ್ದರೂ ಕೊನೆಗೆ ನಿರಾಸೆ. ಲೋಗೋ ಆಯ್ಕೆಯಾಗದೇ ಇದ್ದರೂ ಸ್ಪರ್ಧೆಯಲ್ಲಿ ಭಾಗವಹಿಸುವ ಉತ್ಸಾಹ ಮಾತ್ರ ಕುಂದಲಿಲ್ಲ. ಆದರೆ 31ನೇ ಬಾರಿ ಅದೃಷ್ಟ ಕೈ ಹಿಡಿದಿದ್ದು ಲೋಗೋ ಆಯ್ಕೆಯಾಗಿದೆ.

ಇದು ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷಿ ಬುಲೆಟ್ ರೈಲು ಯೋಜನೆಯ ಲೋಗೋ ವಿನ್ಯಾಸ ಸ್ಪರ್ಧೆಯಲ್ಲಿ ಭಾಗವಹಿಸಿ ಜಯಗಳಿಸಿದ ಅಹಮದಾಬಾದಿನ ವಿದ್ಯಾರ್ಥಿಯ ಸಾಧನೆಯ ಕತೆ.

27 ವರ್ಷದ ಚಕ್ರಧರ್ ಅವರು ನ್ಯಾಷನಲ್ ಇನ್ ಸ್ಟಿಟ್ಯೂಟ್ ಆಫ್ ಡಿಸೈನ್ ನಲ್ಲಿ ಎರಡನೇ ವರ್ಷದ ಪದವಿ ಓದುತ್ತಿದ್ದು, ತಮ್ಮ 31ನೇ ಪ್ರಯತ್ನದಲ್ಲಿ ಜಯಗಳಿಸಿ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.

ಕೇಂದ್ರ ಸರ್ಕಾರ ಬುಲೆಟ್ ರೈಲು ಯೋಜನೆಗೆ ಸಂಬಂಧಿಸಿದಂತೆ ಜನರಿಂದ ಲೋಗೋ ಗಳನ್ನು ಆಹ್ವಾನಿಸಿ MyGov.in ಪೋರ್ಟಲ್ ಗೆ ಅಪ್ಲೋಡ್ ಮಾಡುವಂತೆ ಸೂಚಿಸಿತ್ತು. ಅದರಂತೆ ಚಕ್ರಧರ್ ಅವರು ಲೋಗೋ ವನ್ನು ವಿನ್ಯಾಸ ಮಾಡಿ ಅಪ್ಲೋಡ್ ಮಾಡಿದ್ದರು. ಬಂದಿರುವ ಲೋಗೋಗಳಲ್ಲಿ ಅಂತಿಮ ಸುತ್ತಿಗೆ 100ಕ್ಕೂ ಅಧಿಕ ಲೋಗೋಗಳನ್ನು ಆಯ್ಕೆ ಮಾಡಲಾಗಿತ್ತು. ಅಂತಿಮವಾಗಿ ಪ್ರಸಿದ್ಧ ಚಿತ್ರಗಾರ ಸತೀಶ್ ಗುಜ್ರಾಲ್ ಅವರ ಸಮಿತಿ ಚಕ್ರಧರ್ ಅವರು ಬಿಡಿಸಿದ ಲೋಗೋವನ್ನು ಆಯ್ಕೆ ಮಾಡಿದೆ.

ಲೋಗೋದ ವಿಶೇಷತೆ ಏನು?
ರೈಲು ಸಂಚಾರಿ ಮ್ಯಾಪ್ ನಂತೆ ಲೋಗೋ ಇದ್ದು, ಅದರಲ್ಲಿರುವ ಸಣ್ಣ ಚುಕ್ಕೆಗಳು ಮಾರ್ಗ ಮಧ್ಯದ ರೈಲು ನಿಲ್ದಾಣಗಳನ್ನು ಪ್ರತಿನಿಧಿಸಿದರೆ, ಮುಖ್ಯವಾಗಿ ಮಧ್ಯಭಾಗದಲ್ಲಿರುವ ಚಿರತೆ ವೇಗ, ವಿಶ್ವಾರ್ಹತೆ ಮತ್ತು ನಂಬಿಕೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ಚಕ್ರಧರ್ ಹೇಳಿದ್ದಾರೆ.

ಮೂಲತಃ ಹೈದರಾಬಾದ್ ಮೂಲದ ಚಕ್ರಧರ್ ಅವರ ತಂದೆ ಸರ್ಕಾರಿ ಅಧಿಕಾರಿಯಾಗಿದ್ದರೆ, ತಾಯಿ ಶಾಲೆಯೊಂದರಲ್ಲಿ ಪ್ರಿನ್ಸಿಪಾಲ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಸಣ್ಣ ವಯಸ್ಸಿನಿಂದಲೇ ಚಿತ್ರ ಬಿಡಿಸುತ್ತಿದ್ದ ಇವರು ನಂತರ ಸರ್ಕಾರ ಆಯೋಜಿಸುವ ಲೋಗೋ ಸ್ಪರ್ಧೆಗಳಿಗೆ ನಿರಂತರವಾಗಿ ಲೋಗೋ ಕಳುಹಿಸುತ್ತಿದ್ದರು. ಇದರಿಂದಾಗಿ ಕುಟುಂಬದಲ್ಲಿ ಚಕ್ರಧರ್   ಈಗ ‘ಲೋಗೋ ಮ್ಯಾನ್‘ ಎಂದೇ ಪ್ರಸಿದ್ಧರಾಗಿದ್ದಾರೆ.

ಈ ಹಿಂದೆ ಸ್ವಚ್ಛ ಭಾರತ್, ಬೇಟಿ ಬಚಾವೋ ಸೇರಿದಂತೆ ಆನೇಕ ಸರ್ಕಾರದ ಯೋಜನೆಗಳಿಗೆ ಲೋಗೋ ವನ್ನು MyGov.in ಪೋರ್ಟಲ್ ನಲ್ಲಿ ಅಪ್ಲೋಡ್ ಮಾಡಿದ್ದೇನೆ. ಅಂತಿಮ ಹಂತಕ್ಕೆ ಲೋಗೋ ಆಯ್ಕೆಯಾಗುತ್ತಿದ್ದರೂ ಪ್ರಶಸ್ತಿ ಗಳಿಸದೇ ಇದ್ದಾಗ ನನಗೆ ಬೇಸರವಾಗುತಿತ್ತು. ಆದರೂ ನಾನು ಉತ್ಸಾಹ ಕಳೆದುಕೊಳ್ಳಲಿಲ್ಲ. ಈಗ 31ನೇ ಪ್ರಯತ್ನದಲ್ಲಿ ನಾನು ಜಯಗಳಿಸಿದ್ದು, ಚಿರತೆ ಇರುವ ಲೋಗೋ ಬುಲೆಟ್ ರೈಲು ಯೋಜನೆಗೆ ಆಯ್ಕೆ ಆಗಿದ್ದು ನನಗೆ ಬಹಳ ಸಂತಸವಾಗಿದೆ. ಸರ್ಕಾರದ ದಾಖಲೆ, ಲೆಟರ್ ಹೆಡ್ ಗಳಲ್ಲಿ ನನ್ನ ಲೋಗೋ ವನ್ನು ನೋಡಲು ನಾನು ಕಾತರನಾಗಿದ್ದೇನೆ ಎಂದು ಚಕ್ರಧರ್ ಅವರು ಪ್ರತಿಕ್ರಿಯಿಸಿದ್ದಾರೆ.

ಬಹುಮಾನ ಎಷ್ಟು? ಮೊದಲ ಸ್ಥಾನ ಪಡೆದ ಚಕ್ರಧರ್ ಅವರಿಗೆ ಬುಲೆಟ್ ರೈಲು ಯೋಜನೆ ಮತ್ತು ನ್ಯಾಷನಲ್ ಹೈ ಸ್ಪೀಡ್ ರೈಲು ಕಾರ್ಪೋರೇಷನ್(ಎನ್‍ಎಚ್‍ಎಸ್‍ಆರ್‍ಸಿಎಲ್) 1 ಲಕ್ಷ ರೂ. ಬಹುಮಾನ ನೀಡಿ ಪುರಸ್ಕರಿಸಿದೆ. ನ್ಯಾಷನಲ್ ಇನ್ ಸ್ಟಿಟ್ಯೂಟ್ ಆಫ್ ಡಿಸೈನ್ ಬೆಂಗಳೂರಿನ ಇಬ್ಬರು ವಿದ್ಯಾರ್ಥಿಗಳು ದ್ವಿತೀಯ ಮತ್ತು ತೃತೀಯ ಸ್ಥಾನ ಪಡೆದಿದ್ದು, ಕ್ರಮವಾಗಿ 75 ಸಾವಿರ ರೂ. ಮತ್ತು 50 ಸಾವಿರ ರೂ. ಬಹುಮಾನ ಪಡೆದಿದ್ದಾರೆ.

ಅಹಮದಾಬಾದ್ ಮತ್ತು ಮುಂಬೈ ನಡುವೆ ಸಂಚರಿಸಲಿರುವ ದೇಶದ ಮೊದಲ ಬುಲೆಟ್ ರೈಲು ಯೋಜನೆಗೆ ಸಪ್ಟೆಂಬರ್ 14 ರಂದು ಪ್ರಧಾನಿ ನರೇಂದ್ರ ಮೋದಿ ಮತ್ತು ಜಪಾನ್ ಪ್ರಧಾನಿ ಶಿಂಜೋ ಅಬೆ ಅಹಮದಾಬಾದ್ ನಲ್ಲಿ ಶಂಕುಸ್ಥಾಪನೆ ನೆರವೇರಿಸಿ ಚಾಲನೆ ನೀಡಿದ್ದರು. 75 ವರ್ಷದ ಸ್ವಾತಂತ್ರ್ಯ ಸಂಭ್ರಮಕ್ಕೆ ದೇಶದ ಜನರಿಗೆ ಗಿಫ್ಟ್ ನೀಡಲು ಸರ್ಕಾರ ಮುಂದಾಗಿದ್ದು, 2022 ಆಗಸ್ಟ್ 15ಕ್ಕೆ ಮೊದಲ ಬುಲೆಟ್ ರೈಲು ಓಡಾಟ ಆರಂಭಿಸಲಿದೆ.

ಇದನ್ನೂ ಓದಿ: ಬುಲೆಟ್ ರೈಲು ಯೋಜನೆ: ನೀವು ತಿಳಿದುಕೊಳ್ಳಲೇಬೇಕಾದ 10 ವಿಚಾರಗಳು ಇಲ್ಲಿದೆ

 

Click to comment

Leave a Reply

Your email address will not be published. Required fields are marked *