ಮುಂಬೈ: 23 ವರ್ಷದ ಯುವಕನೊಬ್ಬ ತನ್ನ ಮಾಜಿ ಗೆಳತಿಗೆ ಬಲವಂತವಾಗಿ ಚುಂಬಿಸಿದ್ದಕ್ಕೆ ಈಗ ಆತ ಪೊಲೀಸರ ಅತಿಥಿಯಾಗಿದ್ದಾನೆ.
ಈ ಘಟನೆ ಬಾಂದ್ರಾದ ಕಾರ್ಟರ್ ರಸ್ತೆಯಲ್ಲಿ ಯುವತಿ ತನ್ನ ಸ್ನೇಹಿತರ ಜೊತೆ ಮಂಗಳವಾರ ರಾತ್ರಿ ಇದ್ದ ಸಂದರ್ಭದಲ್ಲಿ ನಡೆದಿದೆ. ಯುವತಿ ತನ್ನ ಸ್ನೇಹಿತರ ಜೊತೆ ಇದ್ದ ಸಂದರ್ಭದಲ್ಲಿ ಆರೋಪಿ ಏಕಾಏಕಿ ಯುವತಿಯ ಬಳಿಗೆ ಹೋಗಿ ಬಲವಂತಾಗಿ ಆಕೆಯನ್ನು ಚುಂಬಿಸಲು ಮುಂದಾಗಿದ್ದಾನೆ. ಅಲ್ಲೇ ಇದ್ದ ಯುತಿಯ ಸ್ನೇಹಿತರು ತಾತ್ಕಾಲಿಕವಾಗಿ ಆತನನ್ನು ತಡೆಯಲು ಪ್ರಯತ್ನ ಮಾಡಿದ್ದಾರೆ.
ಆರೋಪಿ ಬಿಡದೇ ಬಲವಂತವಾಗಿ ಯುವತಿಯ ಜೊತೆ ಅಸಭ್ಯವಾಗಿ ವರ್ತಿಸಿದ್ದಾನೆ. ಬಳಿಕ ಕಾರ್ಟರ್ ರಸ್ತೆ ಚೌಕದಲ್ಲಿದ್ದ ಪೊಲೀಸರು ಸ್ಥಳಕ್ಕೆ ತೆರಳಿ ಆರೋಪಿಯನ್ನು ಬಂಧಿಸಿದ್ದಾರೆ. ಆರೋಪಿ ಬಗ್ಗೆ ತನಿಖೆ ನಡೆಸಿದಾಗ ಈತನ ಮೇಲೆ ಯಾವುದೇ ಯಾವ ಕ್ರಿಮಿನಲ್ ಆರೋಪ ಇಲ್ಲ ಎಂದು ಖಾರ್ ಪೊಲೀಸರು ತಿಳಿಸಿದ್ದಾರೆ.
ನ್ಯಾಯಾಲಯವು ಆರೋಪಿಯನ್ನು ಎರಡು ದಿನಗಳವರೆಗೆ ಪೊಲೀಸ್ ಕಸ್ಟಡಿಗೆ ನೀಡಿದೆ. ಈತ ತನ್ನ ವಿದ್ಯಾಭ್ಯಾಸವನ್ನು ಪೂರ್ಣಗೊಳಿಸಿದ್ದಾನೆ. ಆದರೆ ಪ್ರಸ್ತುತ ಈತ ನಿರುದ್ಯೋಗಿಯಾಗಿದ್ದಾನೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಆರೋಪಿ ಮತ್ತು ಯುವತಿ ಕಳೆದ ವರ್ಷದಿಂದ ದೂರ ಆಗಿದ್ದು, ಇಬ್ಬರು ಪ್ರತ್ಯೇಕವಾಗಿದ್ದಾರೆ. ಆರೋಪಿ ಮತ್ತೆ ಆಕೆಯ ಜೊತೆ ಮಾತನಾಡಲು ಆಕೆಯ ಫೋನ್ ಮತ್ತು ಸಾಮಾಜಿಕ ಮಾಧ್ಯಮದಲ್ಲಿ ಪದೇ ಪದೇ ಸಂಪರ್ಕಿಸಲು ಪ್ರಯತ್ನಿಸುತ್ತಿದ್ದನು.
ಆರೋಪಿ ವಿರುದ್ಧ ಐಪಿಸಿ ಸೆಕ್ಷನ್ 354, 354 ಡಿ, 506 ಮತ್ತು 509 ರ ಅಡಿಯಲ್ಲಿ ಏಫ್ಐಆರ್ ದಾಖಲಿಸಲಾಗಿದೆ.