ಮಂಡ್ಯ: ಜಿಲ್ಲೆಯ ಮೇಲುಕೋಟೆಯ(Melukote) ಪ್ರಸಿದ್ಧ ಚೆಲುವನಾರಾಯಣಸ್ವಾಮಿ ದೇವಾಲಯದಲ್ಲಿ(Cheluvanarayana Swamy Temple) ಕಾರ್ತಿಕ ಮಾಸದ ಬ್ರಹ್ಮೋತ್ಸವವು ಗರುಡ ಧ್ವಜಾರೋಹಣದೊಂದಿಗೆ ವಿಧ್ಯುಕ್ತವಾಗಿ ಆರಂಭಗೊಂಡಿದೆ. ಒಂಬತ್ತು ದಿನಗಳ ಕಾಲ ವೈಭವದಿಂದ ಜರುಗಲಿರುವ ಈ ಉತ್ಸವದ ಪ್ರಮುಖ ಆಕರ್ಷಣೆಯಾದ ರಾಜಮುಡಿ ಕಿರೀಟಧಾರಣಾ ಮಹೋತ್ಸವವು(Rajamudi Kireetadharana Mahotsava) ನವೆಂಬರ್ 17ರಂದು ರಾತ್ರಿ 7 ಗಂಟೆಗೆ ನಡೆಯಲಿದೆ.
ಮೈಸೂರು ಸಂಸ್ಥಾನದ ರಾಜ ಒಡೆಯರ್ ಸಮರ್ಪಿಸಿರುವ ಅಪೂರ್ವ ವಜ್ರಖಚಿತ ರಾಜಮುಡಿ ಕಿರೀಟ, ಗಂಡುಭೇರುಂಡ ಪದಕ ಸೇರಿದಂತೆ ಸುಮಾರು 16 ಬಗೆಯ ಭವ್ಯ ಚಿನ್ನಾಭರಣಗಳಿಂದ ಅಂದು ಚೆಲುವನಾರಾಯಣಸ್ವಾಮಿಯನ್ನು ವಿಶೇಷವಾಗಿ ಅಲಂಕರಿಸಿ ವೈಭವದ ಉತ್ಸವ ನೆರವೇರಿಸಲಾಗುತ್ತದೆ
ಮಕ್ಕಳಿಲ್ಲದ ದಂಪತಿಗಳು ಶ್ರದ್ಧಾಭಕ್ತಿಗಳಿಂದ ಆಗಮಿಸುವ ಪುಣ್ಯಕ್ಷೇತ್ರದ ಕೊಪ್ಪಲುಮಯ ಜಾತ್ರಾ ಮಹೋತ್ಸವವು ನವೆಂಬರ್ 19ರಂದು ಜರುಗಲಿದೆ. ನವದಂಪತಿಗಳು ಹರಕೆ ಹೊತ್ತು ಪೂಜೆ ಸಲ್ಲಿಸಲು ಅಪಾರ ಸಂಖ್ಯೆಯಲ್ಲಿ ಆಗಮಿಸುವ ನಿರೀಕ್ಷೆಯಿದೆ.
ನವೆಂಬರ್ 22ರಂದು ಕಲ್ಯಾಣಿ ತೀರದಲ್ಲಿ ನಡೆಯುವ ತೀರ್ಥಸ್ನಾನ ಹಾಗೂ ಮಹಾರಥೋತ್ಸವದೊಂದಿಗೆ 9 ದಿನಗಳ ಕಾರ್ತಿಕ ಮಾಸದ ಧಾರ್ಮಿಕ ಕೈಂಕರ್ಯಗಳು ಸಂಪನ್ನಗೊಳ್ಳಲಿವೆ. ಭಕ್ತರ ಅನುಕೂಲಕ್ಕಾಗಿ ವಿಶೇಷ ದೀಪಾಲಂಕಾರ ಹಾಗೂ ಸುಗಮ ದರ್ಶನಕ್ಕೆ ಸೂಕ್ತ ವ್ಯವಸ್ಥೆಗಳನ್ನು ಮಾಡಲಾಗಿದೆ ಎಂದು ದೇವಾಲಯ ಆಡಳಿತ ತಿಳಿಸಿದೆ.
