ದಾವಣಗೆರೆ: ಬಿಹಾರದಿಂದ ಬಂದ ಅವಧಿ ಮುಗಿದ ಪಶು ಔಷಧಿಗೆ ಹೊಸ ಲೇಬಲ್ ಹಾಕಿ ಕರ್ನಾಟಕದಲ್ಲಿ ಮಾರಾಟ ಮಾಡಲಾಗುತ್ತಿರೋ ಆಘಾತಕಾರಿ ಸಂಗತಿ ಬೆಳಕಿಗೆ ಬಂದಿದೆ.
ದಾವಣಗೆರೆ ನಗರದ ಅಥಣಿ ಗಿರಣಿಯಲ್ಲಿ ಈ ಮೆಡಿಸಿನ್ ದಂಧೆ ನಡೆಯುತ್ತಿದೆ. ಅವಧಿ ಮುಗಿದ ಫೀಡ್ ಸಪ್ಲಿಮೆಂಟ್‍ಗೆ ಹೊಸ ಲೇಬಲ್ ಹಾಕಿ ಮಾರಾಟ ಮಾಡಲಾಗ್ತಿದೆ. ಹಸುವಿನ ಹಾಲು ಹೆಚ್ಚಾಗಲು ಈ ಔಷಧ ನೀಡಲಾಗುತ್ತದೆ.
ದಾವಣಗೆರೆ ನಗರದ ಅಥಣಿ ಗಿರಣಿ ಕಾಂಪೌಂಡ್ ಮೇಲೆ ಅಧಿಕಾರಿಗಳು ಇಂದು ದಾಳಿ ನಡೆಸಿದ್ರು. ಡಿಸಿಐಬಿ ಸಿಪಿಐ ಬಾಲಚಂದ್ರ ನಾಯಕ್ ನೇತೃತ್ವದಲ್ಲಿ ನಡೆದ ಈ ಕಾರ್ಯಾಚರಣೆಯಲ್ಲಿ ಕೋಟಿ ಕೋಟಿ ದಂಧೆಯ ವ್ಯವಸ್ಥಿತ ಜಾಲವನ್ನ ಡಿಸಿಐಬಿ ಅಧಿಕಾರಿಗಳು ಬೇಧಿಸಿದ್ದಾರೆ. ಈ ವೇಳೆ ಪವರ್ ಮಿಲ್ಕ್ ಹೆಸರಿನ ಸಾವಿರಾರು ಬಾಟಲ್‍ಗಳನ್ನ ವಶಪಡಿಸಿಕೊಂಡಿದ್ದಾರೆ.
ಡಿಸಿಐಬಿ ರೇಡ್ ಮಾಡ್ತಿದ್ದಂತೆ ದಾವಣಗೆರೆಯ ವಿವಿಧ ಇಲಾಖೆ ಅಧಿಕಾರಿಗಳು ಬೆಚ್ಚಿಬಿದ್ದಿದ್ದಾರೆ. ಈ ಬಗ್ಗೆ ಪಶು ಇಲಾಖೆ ಹಾಗೂ ಡ್ರಗ್ ಕಂಟ್ರೋಲ್ ಅಧಿಕಾರಿಗಳು ದ್ವಂದ್ವ ಹೇಳಿಕೆ ನೀಡುತ್ತಿದ್ದು, ನಮ್ಮ ವ್ಯಾಪ್ತಿಗೆ ಬರಲ್ಲ ಎಂದು ನುಣುಚಿಕೊಳ್ತಿದ್ದಾರೆ. ಈ ದಂಧೆಯ ಹಿಂದೆ ವ್ಯವಸ್ಥಿತ ಜಾಲ ಕಾರ್ಯನಿರ್ವಹಿಸುತ್ತಿರುವ ಬಗ್ಗೆ ಅಧಿಕಾರಿಗಳು ಶಂಕೆ ವ್ಯಕ್ತಪಡಿಸಿದ್ದಾರೆ.
