ಗುವಾಹಟಿ: ಹಲವು ವರ್ಷಗಳ ಪೂರ್ವಜರ ಮತದಾರರ ಪಟ್ಟಿ, ಪ್ಯಾನ್ ಕಾರ್ಡ್, ವೋಟರ್ ಐಡಿ ಮತ್ತು ಶಾಲಾ ಪ್ರಮಾಣಪತ್ರ ಸೇರಿದಂತೆ 15 ದಾಖಲೆ ಸಲ್ಲಿಸಿದ್ದರೂ ವ್ಯಕ್ತಿಯೊಬ್ಬ ತನ್ನ ಭಾರತೀಯ ನಾಗರಿಕತ್ವ (Indian Citizenship) ಸಾಬೀತುಪಡಿಸುವಲ್ಲಿ ವಿಫಲನಾಗಿದ್ದಾನೆ.
ಅಸ್ಸಾಂನಲ್ಲಿ ದಿನಗೂಲಿ ಕಾರ್ಮಿಕನಾಗಿರುವ (Assam Resident) ಅರ್ಜಿದಾರ, ವಿದೇಶಿ ನ್ಯಾಯಾಧೀಕರಣದಲ್ಲಿ ತನ್ನ ನಾಗರಿಕತ್ವ ಸಾಬೀತುಪಡಿಸಲು ಅವನು 15 ದಾಖಲೆಗಳನ್ನು ಸಲ್ಲಿಸಿದ್ದನು. ಇವುಗಳಲ್ಲಿ 1951 ರ ಎನ್ಆರ್ಸಿಯಲ್ಲಿ ಅವನ ತಂದೆ ಮತ್ತು ಅಜ್ಜ-ಅಜ್ಜಿಯ ಹೆಸರುಗಳು, 1966 ರಿಂದ 2017ರ ವರೆಗಿನ ವಿವಿಧ ವೋಟರ್ ಪಟ್ಟಿಗಳು, 1973ರ ಭೂಮಿ ಖರೀದಿ ದಸ್ತಾವೇಜು, 2017ರ ಶಾಲಾ ಪ್ರಮಾಣಪತ್ರ, ಪ್ಯಾನ್ಕಾರ್ಡ್ ಮತ್ತು ವೋಟರ್ ಫೋಟೋ ಐಡಿ ಇದ್ದವು.
ಅವನ ಕುಟುಂಬವು ನದಿ ಕೊರೆಯುವಿಕೆಯಿಂದಾಗಿ ಹಲವು ಬಾರಿ ಗ್ರಾಮಗಳನ್ನು ಬದಲಾಯಿಸಿದೆ ಎಂದು ಅವನು ಹೇಳಿದ್ದಾನೆ. ಮೊದಲು ಚರಾಯಿ ಖಾಸ್ರಾ, ನಂತರ ಧೋಬುಕುರಾ, ಘುಗುಡೋಬಾ ಮತ್ತು ಅಂತಿಮವಾಗಿ ಹಶ್ದೋಬಾ ಗ್ರಾಮದಲ್ಲಿ ನೆಲೆಸಿದ್ದಾರೆ ಎಂದು ತಿಳಿಸಿದ್ದಾನೆ. ತನ್ನ ಹಕ್ಕನ್ನು ಬೆಂಬಲಿಸಲು ತಂದೆಯ ಸಾಕ್ಷ್ಯವನ್ನೂ ಸಲ್ಲಿಸಿದ್ದನು.
ಕೋರ್ಟ್ ದಾಖಲೆಗಳನ್ನ ತಿರಸ್ಕರಿಸಿದ್ದೇಕೆ?
ಮೇಲ್ಮನವಿ ಅರ್ಜಿ ವಿಚಾರಣೆ ನಡೆಸಿದ ಗುವಾಹಟಿ ಹೈಕೋರ್ಟ್ ಮುಖ್ಯವಾಗಿ 1951ರ ಎನ್ಆರ್ಸಿ ಪ್ರತಿಯನ್ನು ತಿರಸ್ಕರಿಸಿದೆ. ಇದು ಕೇವಲ ಕಂಪ್ಯೂಟರ್ನಿಂದ ತೆಗೆದ ರೆಕಾರ್ಡ್ ಆಗಿದ್ದು, ಭಾರತೀಯ ಸಾಕ್ಷ್ಯ ಕಾನೂನಿನ ಪ್ರಕಾರ ಪ್ರಮಾಣೀಕರಣಗೊಂಡಿಲ್ಲ ಎಂದು ಹೇಳಿದೆ. ಜನಗಣನಾ ಕಾಯಿದೆ 1948ರ ಸೆಕ್ಷನ್ 15 ಪ್ರಕಾರ ಜನಗಣನಾ ರೆಕಾರ್ಡ್ಗಳು ನೇರವಾಗಿ ನಾಗರಿಕತ್ವ ಸಾಬೀತುಪಡಿಸುವ ಸಾಕ್ಷ್ಯವಾಗಲಾರವು ಎಂದೂ ಸ್ಪಷ್ಟಪಡಿಸಿದೆ.
ಶಾಲಾ ಪ್ರಮಾಣಪತ್ರವನ್ನು ತಿರಸ್ಕರಿಸಲಾಗಿದೆ ಏಕೆಂದರೆ ಶಾಲಾ ಪ್ರಿನ್ಸಿಪಾಲ್ ಅನ್ನು ಸಾಕ್ಷಿಯಾಗಿ ಪರಿಗಣಿಸಿಲ್ಲ ಮತ್ತು ಪ್ರವೇಶ ರಜಿಸ್ಟರ್ ಸಲ್ಲಿಸಲಿಲ್ಲ. 1973ರ ಭೂಮಿ ಖರೀದಿ ದಸ್ತಾವೇಜು ಕುಟುಂಬದ ಉತ್ತರಾಧಿಕಾರಿಗಳಿಗೆ ಹೇಗೆ ತಲುಪಿತು ಎಂಬುದನ್ನು ಸಾಬೀತುಪಡಿಸಲಿಲ್ಲ.
ಪ್ಯಾನ್ ಕಾರ್ಡ್ ಮತ್ತು ವೋಟರ್ ಐಡಿ ಕೇವಲ ಗುರುತಿನ ಅಥವಾ ತೆರಿಗೆ ಸಂಬಂಧಿತ ದಸ್ತಾವೇಜುಗಳು ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ. ಇವುಗಳು ಭಾರತೀಯ ನಾಗರಿಕತ್ವದ ಪ್ರಮಾಣವಲ್ಲ. ವೋಟರ್ ಪಟ್ಟಿಗಳಲ್ಲೂ ಗಂಭೀರ ವ್ಯತ್ಯಾಸಗಳಿದ್ದವು. ಕುಟುಂಬ ಸದಸ್ಯರ ವಯಸ್ಸು ವಿವಿಧ ವರ್ಷಗಳಲ್ಲಿ ಅಸಾಧಾರಣವಾಗಿ ಬದಲಾಗಿತ್ತು. ಮೂರು ವಿವಿಧ ಗ್ರಾಮಗಳ ವೋಟರ್ ಪಟ್ಟಿಗಳಲ್ಲಿ ಹೆಸರುಗಳಿದ್ದರೂ, ಅವುಗಳ ನಡುವೆ ವಿಶ್ವಾಸಾರ್ಹ ಸಂಬಂಧ ಸಾಬೀತುಪಡಿಸಲು ಸಾಧ್ಯವಾಗಲಿಲ್ಲ.
ನಾಗರಿಕತ್ವ ಸಾಬೀತುಪಡಿಸುವ ಜವಾಬ್ದಾರಿ ವ್ಯಕ್ತಿಯದ್ದೇ ಆಗಿದೆ. ಕೇವಲ ದಸ್ತಾವೇಜುಗಳನ್ನು ಸಲ್ಲಿಸುವುದು ಸಾಕಾಗಲ್ಲ. ಅವು ಕಾನೂನುಬದ್ಧವಾಗಿ ಸ್ವೀಕಾರಾರ್ಹವಾಗಿರಬೇಕು ಮತ್ತು ವ್ಯಕ್ತಿಯು ತನ್ನ ಪೂರ್ವಜರೊಂದಿಗೆ ಸ್ಪಷ್ಟ ಸಂಬಂಧ ಹೊಂದಿದ್ದಾನೆ ಎಂದು ಸಾಬೀತುಪಡಿಸಬೇಕು ಎಂದು ಹೈಕೋರ್ಟ್ ಒತ್ತಿ ಹೇಳಿದೆ.
