ಬೆಂಗಳೂರು: ಒಂದು ಕಾಲದಲ್ಲಿ ನಾಯಕ ನಟನಾಗಬೇಕೆಂಬ ಕನಸು ಹೊತ್ತು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ್ದವರು ರಿಷಬ್ ಶೆಟ್ಟಿ. ಆದರೆ ತನ್ನೊಳಗೆ ಗಂಭೀರವಾಗಿರೋದು ನಿರ್ದೇಶಕನಾಗೋ ಕನಸು ಎಂಬುದನ್ನು ಖಚಿತಪಡಿಸಿಕೊಂಡಿದ್ದ ರಿಷಬ್ ಆ ನಂತರದಲ್ಲಿ ಆ ಕ್ಷೇತ್ರದಲ್ಲಿಯೇ ತೊಡಗಿಸಿಕೊಂಡು ಯಶ ಕಂಡಿದ್ದರು. ಆದರೆ ಹೀಗೆ ನಿರ್ದೇಶನದಲ್ಲಿ ಕಳೆದು ಹೋಗಿದ್ದ ಅವರ ಪಾಲಿಗೆ ಸರ್ ಪ್ರೈಸ್ ಎಂಬಂತೆ ಕೂಡಿ ಬಂದಿದ್ದ ಅವಕಾಶ ಬೆಲ್ ಬಾಟಂನದ್ದು!
ಆ ಚಿತ್ರ ಈ ವರ್ಷದ ಸೂಪರ್ ಹಿಟ್ ಚಿತ್ರವಾಗಿ ದಾಖಲಾಗುತ್ತಲೇ ರಿಷಬ್ ಶೆಟ್ಟರನ್ನು ನಾಯಕನನ್ನಾಗಿ ಮಾಡೋ ಉತ್ಸಾಹವೂ ಗಾಂಧಿನಗರದಲ್ಲಿ ಹೆಚ್ಚಿಕೊಂಡಿದೆ. ಅಷ್ಟಕ್ಕೂ ಬೆಲ್ ಬಾಟಂ ಚಿತ್ರ ಯಶ ಕಂಡ ನಂತರ ಅವರು ಹೀರೋ ಆಗಿಯೇ ಮುಂದುವರೆಯುತ್ತಾರೆಂದೇ ಬಹುತೇಕರು ಅಂದುಕೊಂಡಿದ್ದರು. ಆದರೆ ಒಂದಷ್ಟು ಕಾಲ ಸುಮ್ಮನಿದ್ದ ರಿಷಬ್ ಆ ನಂತರದಲ್ಲಿ ನಿರ್ದೇಶಕನಾಗಿಯೇ ಮುಂದುವರೆಯುವ ನಿರ್ಧಾರ ಪ್ರಕಟಿಸಿದ್ದರು. ಅದರನ್ವಯ ರುದ್ರಪ್ರಯಾಗ ಎಂಬ ಚಿತ್ರವನ್ನೂ ಘೋಷಣೆ ಮಾಡಿದ್ದರು. ಇದೀಗ ಅದರ ಕೆಲಸ ಕಾರ್ಯದಲ್ಲಿ ಬ್ಯುಸಿಯಾಗಿದ್ದು ರಿಷಬ್ ನಿರ್ದೇಶನದಲ್ಲಿಯೇ ಮುಂದುವರೆಯುತ್ತಾರೆ ಅಂತ ನೀವಂದುಕೊಂಡಿದ್ದರೆ ಇಲ್ಲಿ ಬೇರೆಯದ್ದೇ ಸುದ್ದಿಯೊಂದಿದೆ!
ಇದರನ್ವಯ ಹೇಳೋದಾದರೆ ರಿಷಬ್ ಹೀರೋ ಆಗಿ ಏಕ ಕಾಲದಲ್ಲಿಯೇ ನಾಲ್ಕು ಚಿತ್ರಗಳನ್ನು ಒಪ್ಪಿಕೊಂಡಿದ್ದಾರಂತೆ. ಬೆಲ್ ಬಾಟಂ ಚಿತ್ರ ಮುಗಿದ ಕೂಡಲೆ ಅವರಿಗಾಗಿ ಕಥೆ ರೆಡಿ ಮಾಡಿಕೊಂಡವರ ಸಂಖ್ಯೆಯೂ ಹೆಚ್ಚಾಗಿತ್ತಂತೆ. ಆದರೆ ಈ ಬಗ್ಗೆ ಯಾವ ನಿರ್ಧಾರ ತಳೆಯೋದೆಂಬ ಗೊಂದಲಕ್ಕೆ ಬಿದ್ದಿದ್ದ ರಿಷಬ್ ಅದರಲ್ಲಿ ಆರು ಕಥೆಯನ್ನು ಆರಿಸಿಕೊಂಡಿದ್ದರಂತೆ. ಆದರೆ ಕಡೆಗೆ ಅದರಲ್ಲಿ 4 ಚಿತ್ರಗಳನ್ನು ಫೈನಲ್ ಮಾಡಿಕೊಂಡಿದ್ದಾರಂತೆ. ಅವರು ರುದ್ರಪ್ರಯಾಗದ ಜೊತೆಯಲ್ಲಿಯೇ ಈ ಚಿತ್ರಗಳಲ್ಲಿ ಅಭಿನಯಿಸುತ್ತಾರಾ ಅಥವಾ ಆ ನಂತರ ಅಖಾಡಕ್ಕಿಳಿಯುತ್ತಾರಾ ಅನ್ನೋದಷ್ಟೇ ಈಗಿರೋ ಪ್ರಶ್ನೆ.
