ಮುಂಬೈ: ಇಂದು ಬಾಲಿವುಡ್ ಕ್ಯೂಟ್ ಬೆಡಗಿ ಆಲಿಯಾ ಭಟ್ ಹುಟ್ಟುಹಬ್ಬ. ಇವತ್ತು ಟಾಲಿವುಡ್ ಸ್ಟಾರ್ ನಿರ್ದೇಶಕ ರಾಜಮೌಳಿ ಆರ್ಆರ್ಆರ್ ಸಿನಿಮಾದಲ್ಲಿಯ ಆಲಿಯಾ ಭಟ್ ಪಾತ್ರದ ಲುಕ್ ರಿವೀಲ್ ಮಾಡುವ ಮೂಲಕ ಡಿಯರ್ ಜಿಂದಗಿ ಚೆಲುವೆಯ ಅಭಿಮಾನಿ ಬಳಗವನ್ನ ಚಕಿತಗೊಳಿಸಿದ್ದಾರೆ.
ಸ್ಟುಡೆಂಟ್ ಆಫ್ ದಿ ಇಯರ್ ಫಿಲಂ ಮೂಲಕ ಬಿಟೌನ್ ಗೆ ಎಂಟ್ರಿ ಕೊಟ್ಟ ಹದಿಹರೆಯದ ಹುಡುಗಿ ಆಲಿಯಾ ಭಟ್. ಚಿಕ್ಕವಯಸ್ಸಿನಲ್ಲಿಯೇ ತನ್ನ ಗ್ಲಾಮರ್ ಲುಕ್, ಡ್ಯಾನ್ಸಿಂಗ್, ತುಟಿಯ ಮೇಲಿನ ಕಡುಗೆಂಪು ನಗುವಿನ ಜೊತೆಯಲ್ಲಿ ಸರಳ ನಟನೆ ಮೂಲಕ ತನ್ನದೇ ಅಭಿಮಾನಿ ಬಳಗವನ್ನ ಸೃಷ್ಟಿಸಿಕೊಂಡ ಅಪ್ಸರೆ ಆಲಿಯಾ ಭಟ್. ಇನ್ನು ತಾನು ಗ್ಲಾಮರ್ ಪಾತ್ರಕ್ಕೆ ಸೀಮಿತ ಅಲ್ಲ ಅನ್ನೋದನ್ನ ಉಡ್ತಾ ಪಂಜಾಬ್ ಸಿನಿಮಾದಲ್ಲಿ ನಿರೂಪಿಸಿದ್ದರು. ಶಾಹಿದ್ ಕಪೂರ್, ಕರೀನಾ ಕಪೂರ್ ಅಂತಹ ಸ್ಟಾರ್ ಗಳ ಜೊತೆ ಸ್ಕ್ರೀನ್ ಶೇರ್ ಮಾಡಿದ್ದ ಆಲಿಯಾ, ತಾನು ಹೊಸಬಳು ಅನ್ನೋದು ತಿಳಿಯದಂತೆ ಸರಿಸಮಾನವಾಗಿ ಆ್ಯಕ್ಟ್ ಮಾಡೋ ಮೂಲಕ ವಿಮರ್ಶಕರ ಮೆಚ್ಚುಗೆಯನ್ನ ಅಲಿಯಾ ಪಡೆದುಕೊಂಡಿದ್ದರು.
2018ರಲ್ಲಿ ಬಿಡುಗಡೆಗೊಂಡಿದ್ದ ‘ರಾಝಿ’ಯಲ್ಲಿ ಸೆಹಮತ್ ಖಾನ್ ಪಾತ್ರಕ್ಕೆ ಜೀವ ತುಂಬಿದ್ದ ಆಲಿಯಾ ಭಟ್, ತಂದೆಯಿಂದ ಸಿನಿಮಾಕ್ಕೆ ಬಂದ ನಟಿ ಅಂತ ಹೇಳಿದ್ದ ಟೀಕಾಕಾರರಿಗೆ ತಿರುಗೇಟು ನೀಡಿದ್ದರು. ಪಾಕಿಸ್ತಾನದಲ್ಲಿ ಭಾರತದ ಮಗಳಾಗಿ ಗೂಢಾಚಾರಣಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಆಲಿಯಾ ಭಟ್, ತನ್ನ ನಟನೆ ಮೂಲಕ ಟೀಕಾಕಾರರು ಮೂಗಿನ ಮೇಲೆ ಬೆರಳಿಟ್ಟುಕೊಳ್ಳುವಂತೆ ಮಾಡಿದ್ದರು.
ಇದೀಗ ಟಾಲಿವುಡ್ ಪ್ರವೇಶಿಸಿರುವ ಆಲಿಯಾ ಭಟ್ ಆರ್ಆರ್ಆರ್ ಸಿನಿಮಾದಲ್ಲಿ ನಟಿಸುತ್ತಿರುವ ವಿಷಯ ಹಳೆಯದು. ಆದ್ರೆ ಚಿತ್ರದ ಸೂತ್ರದಾರ ರಾಜಮೌಳಿ ಮಾತ್ರ ಚೆಲುವೆ ಆಲಿಯಾ ಪಾತ್ರದ ಗುಟ್ಟು ಬಿಟ್ಟಕೊಟ್ಟಿರಲಿಲ್ಲ. ಇಂದು ಹುಟ್ಟುಹಬ್ಬದ ಸಂಭ್ರಮದಲ್ಲಿರುವ ಆಲಿಯಾರ ಫಸ್ಟ್ ಲುಕ್ ರಿವೀಲ್ ಮಾಡುವ ಮೂಲಕ ಬರ್ತ್ ಡೇ ಗಿಫ್ಟ್ ನೀಡಿದ್ದಾರೆ. ಭಾನುವಾರವೇ ಫಸ್ಟ್ ಲುಕ್ ರಿಲೀಸ್ ಮಾಡುವ ಕುರಿತು ಸುಳಿವು ನೀಡಿದ್ದ ರಾಜಮೌಳಿ, ಇಂದು ಬೆಳಗ್ಗೆ 11 ಗಂಟೆಗೆ ಸೀತಾ ಪಾತ್ರವನ್ನ ಅಭಿಮಾನಿಗಳಿಗೆ ಪರಿಚಯಿಸಿದ್ದಾರೆ.
Strong-willed and resolvent SITA's wait for Ramaraju will be legendary!
Presenting @aliaa08 as #Sita to you all 🙂@tarak9999 @AlwaysRamCharan #RRR #RRRMovie pic.twitter.com/NFe4WwjS6u
— rajamouli ss (@ssrajamouli) March 15, 2021
ಸದೃಢ ಇಚ್ಛಾಶಕ್ತಿಯ ಎಲ್ಲ ಸಮಸ್ಯೆಗಳನ್ನ ಪರಿಹರಿಸುವ ಸೀತೆಯನ್ನ ನಾನು ಪರಿಚಯಿಸುತ್ತಿದ್ದೇವೆ ಎಂದು ರಾಜಮೌಳಿ ಬರೆದುಕೊಂಡಿದ್ದಾರೆ. ಹಸಿರು ಬಣ್ಣದ ಸೀರೆ, ಮುಡಿ ತುಂಬ ಕನಕಾಂಬರ ಧರಿಸಿ ತದೇಕಚಿತ್ತದಿಂದ ಕುಳಿತು ಯೋಚನೆಯಲ್ಲಿ ಮಗ್ನಳಾಗಿರುವ ಸೀತೆಯಾಗಿ ಆಲಿಯಾ ಮಿಂಚಿದ್ದಾರೆ. ಕೇವಲ ಒಂದೇ ಒಂದು ಲುಕ್, ಸಿನಿಮಾದಲ್ಲಿ ಆಲಿಯಾ ಪಾತ್ರದ ಪ್ರಾಮುಖ್ಯತೆಯನ್ನ ಹೇಳುವಂತಿದೆ. ನಟಿಯ ಹೊಸ ಲುಕ್ ನೋಡಿದ ಅಭಿಮಾನಿಗಳು ಥ್ರಿಲ್ ಆಗಿದ್ದು, ಚಿತ್ರಕ್ಕಾಗಿ ಕಾದು ಕುಳಿತಿದ್ದಾರೆ.
View this post on Instagram
