ಬೆಂಗಳೂರು: ಪ್ರಿಯಕರ ಮೋಸ ಮಾಡಿದ್ದಾನೆ, ನ್ಯಾಯ ಕೊಡಿಸಿ ಎಂದ ಯುವತಿಗೆ ಪೊಲೀಸ್ ಪೇದೆಯೊಬ್ಬ ಅಡ್ಜೆಸ್ಟ್ ಆಗಬೇಕು ಎಂದು ಹೇಳಿದ ಪ್ರಕರಣವೊಂದು ಬೆಂಗಳೂರಿನಲ್ಲಿ ನಡೆದಿರುವ ಬಗ್ಗೆ ಬೆಳಕಿಗೆ ಬಂದಿದೆ.
ವಿಜಯ್ ರಾಥೋಡ್ ಅಡ್ಜೆಸ್ಟ್ ಮಾಡಿಕೊಳ್ಳು ಎಂದ ಯುವತಿಗೆ ಹೇಳಿದ ಪೇದೆ. ಈತ ವಿವೇಕನಗರ ಪೊಲೀಸ್ ಠಾಣೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾನೆ. ಯುವತಿ ಹಾಗೂ ವಿಜಯ್ ರಾಥೋಡ್ ನಡುವೆ ನಡೆದ ಆಡಿಯೋ ಸಂಭಾಷಣೆ ರೆಕಾರ್ಡ್ ಆಗಿದ್ದು, ಈ ಆಡಿಯೋ ಇದೀಗ ಪಬ್ಲಿಕ್ ಟಿವಿಗೆ ಲಭಿಸಿದೆ.
ಏನಿದು ಪ್ರಕರಣ?:
ಯುವತಿ ತನ್ನ ಪ್ರಿಯಕರ ಮೋಸ ಮಾಡಿದ್ದಾನೆ. ಹೀಗಾಗಿ ನನಗೆ ನ್ಯಾಯ ಕೊಡಿಸಿ ಎಂದು ಪೊಲೀಸ್ ಠಾಣೆಗೆ ತೆರಳಿದ್ದಳು. ಈ ವೇಳೆ ವಿಜಯ್ ನಿಮಗೆ ಸಹಾಯ ಮಾಡುತ್ತೇನೆ ಎಂದು ಯುವತಿ ಬಾಳಿನಲ್ಲಿ ವಿಲನ್ ಆಗಿದ್ದಾನೆ.
ಯುವತಿ ತನ್ನ ಪ್ರಿಯಕರನ ವಿರುದ್ಧ ಸಾಕ್ಷ್ಯಗಳನ್ನು ಸಂಗ್ರಹಿಸಿ ವಿಜಯ್‍ಗೆ ನೀಡಿದ್ದರು. ಆದರೆ ವಿಜಯ್ ನ್ಯಾಯ ಕೊಡಿಸುವುದಾಗಿ ಹೇಳಿ ಪ್ರಿಯಕರನ ವಿರುದ್ಧ ಇದ್ದ ಸಾಕ್ಷ್ಯಗಳನ್ನು ಡಿಲೀಟ್ ಮಾಡಿದ್ದಾನೆ. ಅಲ್ಲದೆ ಯುವಕನೊಬ್ಬನನ್ನು ನಂಬಿಸಿ ಯುವತಿಯಿಂದ ವಿಜಯ್ ಹಣ ವಸೂಲಿ ಮಾಡಿದ್ದಾನೆ. ಬಳಿಕ ಆ ಯುವಕನೂ ಸಿಗಲಿಲ್ಲ ಹಾಗೂ ಆತನಿಗೆ ನೀಡಿದ್ದ ಹಣವೂ ಬರಲಿಲ್ಲ.
ಅವನಿಗೆ ಕೊಟ್ಟಿದ್ದ 50 ಲಕ್ಷ ಹಣ ವಾಪಸ್ ಕೊಡಿಸಿ ಎಂದು ಯುವತಿ ಪೇದೆ ಬಳಿ ಕೇಳಿಕೊಂಡಿದ್ದಾಳೆ. ಈ ವೇಳೆ ವಿಜಯ್ ನಿನಗೆ ನ್ಯಾಯ ಸಿಗಬೇಕೆಂದರೆ ನನ್ನ ಜೊತೆ ಅಡ್ಜೆಸ್ಟ್ ಆಗಬೇಕು ಎಂದು ಹೇಳಿದ್ದಾನೆ. ಆದರೆ ಯುವತಿ ಇದಕ್ಕೆ ಒಪ್ಪಲಿಲ್ಲ. ಆಗ ವಿಜಯ್ ಯುವತಿಗೆ ಕಿರುಕುಳ ನೀಡಿದ್ದಾನೆ. ಇಬ್ಬರೂ ಒಂದೇ ಜಾತಿ ಅಲ್ವಾ? ನಾವೇಕೆ ಜೊತೆ ಆಗಬಾರದು ಎಂದು ವಿಜಯ್ ಹಿಂಸೆ ಕೊಟ್ಟಿದ್ದಾನೆ ಎಂದು ಯುವತಿ ಆರೋಪಿಸಿದ್ದಾರೆ.
