ಮುಂಬೈ: ಹಿಂದಿ ಕಿರುತೆರೆ ನಟಿ ರಿಚಾ ಭದ್ರ ತಮಗೆ ಆಗಿರುವ ಕಾಸ್ಟಿಂಗ್ ಕೌಚ್ ಅನುಭವವನ್ನು ಹಂಚಿಕೊಂಡಿದ್ದಾರೆ.
ಇತ್ತೀಚೆಗೆ ರಿಚಾ ಭದ್ರ ಸಂದರ್ಶನವೊಂದರಲ್ಲಿ ಭಾಗವಹಿಸಿದ್ದರು. ಈ ವೇಳೆ ಅವರು ನಾನು ಕಾಸ್ಟಿಂಗ್ ಕೌಚ್ ಎದುರಿಸಿದ್ದೇನೆ. ಮದುವೆಯಾದ ನಂತರ ಈ ಘಟನೆ ನಡೆದಿದೆ. ಕೆಲಸ ಬೇಕೆಂದರೆ ನನ್ನನ್ನು ಖುಷಿಪಡಿಸು ಎಂದು ನಿರ್ದೇಶಕರೊಬ್ಬರು ಕೇಳಿಕೊಂಡಿದ್ದರು ಎಂದು ರಿಚಾ ಹೇಳಿದ್ದಾರೆ.
ಈ ಬಗ್ಗೆ ಮಾತನಾಡಿದ ರಿಚಾ ನನಗೆ ತುಂಬಾ ಹತ್ತಿರದಿಂದ ಕಾಸ್ಟಿಂಗ್ ಕೌಚ್ ಅನುಭವವಾಗಿದೆ. ಮದುವೆ ನಂತರ ನಾನು ಹಲವು ಕಡೆ ಆಡಿಶನ್ಗೆ ಹೋದಾಗ ಸಾಕಷ್ಟು ಮಂದಿ ಕಾಂಪ್ರಮೈಸ್ ಮಾಡಿಕೋ ಎಂಬುದಾಗಿ ಹೇಳಿದ್ದರು ಎಂದು ತಿಳಿಸಿದರು.
ಒಬ್ಬ ನಿರ್ದೇಶಕ, ನಿನಗೆ ಕೆಲಸ ಬೇಕೆಂದರೆ ನನ್ನನ್ನು ತೃಪ್ತಿಪಡಿಸು. ನಾನು ಬೇಕಾದರೆ ಹೋಟೆಲ್ ಬುಕ್ ಮಾಡುತ್ತೇನೆ. ನೀನು ಹೋಟೆಲ್ಗೆ ಬಾ ಎಂದು ಕರೆದಿದ್ದರು. ಆಗ ನಾನು ಕಾಫಿ ಶಾಪ್ನಲ್ಲಿ ಬೇಕಿದ್ದರೆ ಭೇಟಿ ಮಾಡುತ್ತೇನೆ ಎಂದೆ. ಆದರೆ ಆ ನಿರ್ದೇಶಕ ನನ್ನ ಮಾತನ್ನು ಒಪ್ಪಲಿಲ್ಲ ಎಂದು ತಿಳಿಸಿದರು.
ರಿಚಾ ‘ಕಿಚಡಿ’, ‘ಬಾ ಬಹು ಔರ್ ಬೇಬಿ’ ಹಾಗೂ ‘ಮಿಸೆಸ್. ತೆಂಡೂಲ್ಕರ್’ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಸದ್ಯ ರಿಚಾ ಮತ್ತೆ ಕಿರುತೆರೆಗೆ ಹಿಂತಿರುಗಬೇಕು ಎಂಬ ಇಚ್ಛೆಯನ್ನು ಹೊರ ಹಾಕಿದ್ದಾರೆ. ಆದರೆ ಅವರು ಬೋಲ್ಡ್ ಸೀನ್ ಮಾಡಿ ಕುಟುಂಬದ ಹೆಸರನ್ನು ಹಾಳು ಮಾಡಲು ಇಷ್ಟವಿಲ್ಲ ಎಂದು ಹೇಳಿದರು.
